Oknayene Ibo 40
40
Yagl suo ugl kubu kanibriko, Josep mabuno di nogugl ede togwa
1-2Ana okuo Isip king yobamo kade suo ere mogl, king gumuglo wagle aglau ta eribrika. Aglau eribriko, king dem boglkwa. Yagl kade ta yoba nigl wain bekidre, i pi king suru teigwa i, ye sugl moglkwa. Te, yagl ta yoba bret gaglsre, i pi king teigwa i, ye sugl moglkwa. 3King dem boglko, ye yagl suo i si kane sidre, i pi Josep kane yugu pai moglmara ikra edugwa. Ana soldia tau king yugumo sugl kan meglkwa ikra, yagl ta ye bitno mogl, sugl moglkwa ikra we, kane yugu i, ye yugomugl yogwa. 4King yagl suo si kane yugu ikra edugo, yagl soldia bitno moglkwa ikra ere mogl, Josep ye yagl suo i sugl morabedi edugo, Josep ye sugl moglkwa. Josep ye sugl moglko, ege olto dagl kane yugu pai miurka. 5Pai moglsre, yagl nigl wain king suru togwa ikra ya yagl king bretmo gagl togwa ikra ere mogl, eduer ege swara igne ugl kubu pere pere kanibrika. Yagl swara ta ugl kubu kanugwa i, mabuno ta paugwa. Te, yagl ta ugl kubu pere ta kanugwa i, mabuno pere ta paugwa.
6-7Ana Josep ya yagl suo i, ye akie Josep sugl moglkwa yagl ikra yugomugl mina kane pai meglko, yagl suo i ugl kubu kanibriko, Josep tagna mogl ye Isip king yobamo kade suo i miurara udre, nomane podo sibriko, kanugwa. Kandre, ye di te, Ene nomane sibredi kanie dugwa. Didre, ye ama yegl di prukwa, Ene siragl eruko, nomane si miure? di, yegl di prukwa. 8Yegl di pruko, yagl suo i di ikne ede, Josep yegl di tebrika, No eduer ugl pai, kubu pere pere kanubuglka ba yoba igle ta mabuno di nogugl ede norabuka ta moglkrukwa pre nomane si mugle dibrika. Dibriko, Josep aglke kor dugwa, Yoba ugl kubu kanigwa i, God yene ere mogl, yoba ugl kubu mabuno i di tenaiglmedi i nogugl ede tenan, yoba ugl kubu kanigwa i mabunomo di tebi, praiglkwa. Ene ugl kubu kanibrika i, di nariro! di, yegl dugwa.
9 Ana Josep ka yegl dugwa pre yagl ta yoba nigl wain bekidre, i pi king suru teigwa ye sugl moglkwa i ere mogl, ugl kubu kanugwa ikra Josep di togwa. Ye yegl dugwa, Na ugl kubu kaniga i, ede wain ta kaniga. 10Ede wain i mina yogagle suota sugwa. Sugo, yogagle i yaudo sugwa. Yaudo sugwa igne i kie ama tabre sidre, wain mogo kogl, bogl yogwa. 11Bogl yogo, na king kapmo akidre, wain mogo i nuglo duko ede king kapmo mina atne edidre, kap i pi king ogo mina ede teye di, yegl dugwa.
12Yagl i ka yegl di kodugo, Josep ye di te, Ene ugl kubu kanga i, mabuno yegl pame dugwa. Ede wain yogagle suota i, ege suota mere yegl paugwa. 13King ege suota mogl, ene i meda edidre, kogon okna etnga i, aglke kor eratnedi edenabuka. Edinan, ene okna nigl wain king kapmo wagle kogl i pi king tenere yegl mere aglke kor eratnga. 14Ba ene motnara taragl wakai yegl plau dinan we, ene na mitna goglsre, na kana i pi king di ten, ye na ama i meda edenabedi prika. 15Na okna Hibru yoba kipaimara moglka ba yoba tau na kunogl kane si yu, na nigl kogon yoba morabedi mige bogl neigwa. Te, na dumo Isip magigl i moglka igne, na ama aglau ta erekrika. Ye mabuno paikrumara na si kane sidre, kane yugu edimiwe di, yegl dugwa.
16Ana Josep ka yegl dugo, yagl ta yoba bret gaglsre, i pi king teigwa ye sugl moglkwa i, ye mabuno wakai ta di nogugl edugwa i prisre, ye ere mogl, Josep yegl di togwa, Na ugl kubu kaniga i, degigl gagl suota kaniga. Degigl gagl suota i mina bret grikwa, atne moglkwa. Ana na degigl gagl suota i, i tebe tebe ede, bitna wagle padiglka. 17Bitna wagle padiglko, degigl gagl ta tebe kaima padiglka i mina bret ya bisket kane kane king pre gaiglkwa i grikwa, atne moglkwa. Atne moglko, kua tau u bret ya bisket i ere nemiwe di, yegl dugwa.
18Yagl i ka yegl di kodugo, Josep ye di te, Ene ugl kubu kanga i, mabuno yegl pame dugwa. Degigl gagl suota i, ege suota mere yegl paugwa. 19King ege suota mogl, ene i meda edidre, nugun gare edenabuka. Yegl eran, ene ogn nagn i pi ede mina wedigl yenan, kua u, ogn nagn mie nenaiglmiwe di, yegl dugwa.
20Ana ege suota ede ogo, king mam ye kuglkwa igne egemo yogwa. Yegl pre ye ere mogl, yobamo kade Kaya mokna podo nenaiglmiwa wio! dugo, wigwa. Udre, ne meglko, king ama yagl suo ikra ye wain nuglo ya bret sugl miurka i, i meda ede, ye yobamo kade kanaiglmedi edugwa. 21Edidre, ye yagl ta yoba nigl wain bekidre, i pi king suru teigwa ye sugl moglkwa i, kogon okna erukwa i aglke kor erabedi edugo, ye aglke kor wain i pi king togwa. 22Te, yagl ta yoba bret gaglsre, i pi king teigwa ye sugl moglkwa i, Josep ye yagl suo i di nogugl ede tomere yegl mere king ye si goglsre, ede mina wedigl yogwa. 23Ana taragl yegl mere plau dugwa ba yagl ta nigl wain i pi king suru togwa i, ye Josep kamo king di tenabuka i, di tekre, kina torua sugwa.
Valgt i Øjeblikket:
Oknayene Ibo 40: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission