Oknayene Ibo 42
42
Josep agiglema kugl mogo topo sinamnedi ede dumo Isip wigwa
1Ana okuo yoba ere mogl, Dumo Isip we, kugl mogo yomiwe digo, Jekop prukwa. Jekop prisre, ye wama yegl di prukwa, Ene siragl pre yoko mogl, kan ikne ikne ede meglme? di, yegl di prukwa. 2Jekop yegl di prisre, ye ama yegl dugwa, Ene prio! Dumo Isip we, yoba tau kugl mogo yomedi di nariko, prika. Ene ede Isip pi, kugl mogo topo si yuibi, nono ta goglkramga. Kor moramniwe di, yegl dugwa. 3Jekop yegl dugo, Josep agiglema 10-pela ede nigl beye pi, kugl mogo topo sinamnedi ede Isip eigwa. 4Ye ede eigwa ba Josep agigle ta mano swara moglkwa, ye kagie Benjamin we digwa i we, ye enabuka Jekop mane dugwa. Ye taragl kide ta plau dinan, Benjamin gogl dinabe di prisre, kudugl gogl, mane dugwa. 5Yegl pre Jekop, kagie ta Israel, wama 10-pela i keme ede Isip eigwa. Dumo Isip kidan podo yomere yegl mere dumo Kenan ama kidan podo yogwa. Kidan podo yogwa pre yoba tau mere ede Isip pi kugl mogo topo sinamnedi ede eigo, Jekop wama akie eigwa.
6 Ana Josep we, ye dumo Isip mudu sugl moglkwa pre Isip yoba kugl mogo topo si neigwa i, ye Josep moglmara udre, topo sigwa. Te, ye agiglema 10-pela ikra ama Josep moglmara udre, goglkono bodugl, gumano drano i pi makan mina edigwa. 7Edigo, Josep ye gumano drano kanugwa ba ye na ye agro moglmedi kan dinaiglmedi yoba pere ta moglme dinaiglmedi ersre, ka kodo di, Ene dumo aglo mogl wime? di, yegl di prukwa. Di pruko, ye di ikne ede, No dumo Kenan munga, kugl mogo topo sina umniwe digwa.
8Ana Josep ye agiglema gumano drano kanugwa ba ye guma dra kankre, yoba pere moglmedi kanigwa. 9Josep ye kandre, ye okna ibo ugl kubu kanugwa ikra pre moglsre, agiglema yegl di togwa, Ene no kuda ikne meglkwa pamiwa. Ene yoba kugl mogo topo sigwa mere yegl ede Isip suna udre, okuo kuda bogl noramnedi dumo tau soldia mere moglkrimara doko daka ere kanamnedi wimiwe di, yegl dugwa. 10-11Josep yegl dugo, ye agiglema di ikne ede, yegl digwa, Yagl kade yo, no ene nigl kogonen yoba mere yegl muniwa. No dumo Isip doko daka ere kandre, okuo kuda bogl tenamnedi, yegl pre ukrumniwa. No neno swara moglko, no mudu agigle agigle moglsre, ka kaima dumga yoba munga. No ka kaima kugl mogo topo sinamnedi umniwe di, yegl digwa. 12Yegl digwa ba Josep aglke kor dugwa, I ta manugwa. Ene dumo tau soldia mere moglkrimara doko daka ere kanamnedi wimiwe dugwa. 13Josep yegl dugo, ye agiglema ama aglke kor digwa, No ene nigl kogonen yoba mere yegl muniwa. No yagl swara gagiglma munga. No neno dumo Kenan moglkwa. Te, no agigle agigle munga i, okna 12-pela munga. No agro swara ta goglko, ta okuo kaima moglkwa i erme neno bogl akie dumo Kenan miuriwe di, yegl digwa.
14Ana Josep agiglema ka yegl di kodigo, Josep aglke kor yegl dugwa, Na ene di te kodiga! Ene no kuda ikne moglsre, okuo kuda bogl noraiglkwa pre dumo Isip doko daka ere kanamnedi wigwa. 15Yegl pre na ene yegl ere kanaglka. Ene agro okuo pre digwa i magigl i ta unan, na kankribo, ene ede ikne dumono pikraiglkwa. Na king kagie mina ene ka kaima di teiga. 16Yegl pre ene swara ta ede ikne pi agro okuo auro yunatnga. Te, ene tau we, kane yugu panaiglkwa. Yagl swara ta agro okuo i auro yunan, na ene ka kaima dimedi prisre, ene kane yugu i meda edenaglka. Ba ye ta auro yukran, na king kagie mina ene ka kaima di teiga. Ene ka kaima kuda ikne moglsre, dumo Isip doko daka ere kanamnedi wigwa pamedi praluwe di, yegl dugwa. 17Yegl didre, ye agiglema mudu i pi kane yugu edugo, ye ege suota paigwa.
18Ana Josep agiglema ege suota kane yugu pai meglko, Josep ye mudu i meda edidre, yegl di togwa, Na we, na God kuduglmo goglka. Yegl pre ene na ka ta dinaglmere eribi, yoko moraiglkwa. 19-20Ene swara ta magigl i kane yugu pai morabuka. Ba ene tau we, kugl mogo i pi neno agroma kidan paigwa i tenaiglmiwa. Ene tedre, agro okuo auro yu, na moglmara edibi, na ene ka kaima digwa yoba meglmedi pribo, ene ta goglkraiglmiwe di, yegl dugwa. Yegl dugo, ye agiglema pra we digwa.
21Ana Josep agiglema ye Josep moglmara mogl pai moglsre, yene kano mina di ikne ikne ede, yegl digwa, Nono we, nono kaima agro okuo mabuno kide ere tomga pre erme yubun podo yumga. Nono ye kudugl goglsre, nomane podo sugwa i kandre, ye Ake ple di nario di, kamage yogwa i prisre, yegl erumga ba nono ye ake ple di tekrumga. Yegl pre nono erme yubun podo yumniwe digwa. 22Yegl digo, Ruben ere mogl, yegl dugwa, Na ene okna di teiga ikra we, Josep mabuno kide ere tekrio! diga. Na yegl diga ba ene na kana prikrikwa. Yegl pre ye okuo pi goglkwa i, nono mabuno munga pre yubun podo inamniwe dugwa. 23Josep agiglema yene kano wagle yegl didre, Josep ye kano prikrumedi prikwa. Josep ye ka di togwa i, Isip ka dugo, ka yake togwa yagle ta kamo yake te, ye agiglema di togwa pre ye kano prikrumedi prikwa. Yegl prikwa ba Josep ye ka digwa i prisre, 24kai eragledi ere, ye meglmara kide kodidre, ede pi kai erukwa. Ye kai ere kodidre, ye meglmara ede ikne udre, ka tau ama ye di togwa. Ka tau ye di tedre, ye ere mogl, ye agigle Simeon swara yugo, yoba ye si kane sigwa. Ye si kane sigo, ye agiglema tau kan meglkwa.
Josep agiglema ede ikne dumo Kenan eigwa
25Ana okuo Josep ere mogl, ye nigl kogonmo yoba di te, yegl dugwa, Yagl i bek yuigwa i idre, kugl mogo kau sinabedi atne edidre, mige silva norikwa i ama te ikne ede bekno mina atne edidre, te, kaya mokna tau konbauna bage nenaiglmedi ama teo! di, yegl dugo, ye nigl kogonmo yoba ye dumere erikwa. 26Yegl eriko, Josep agiglema bek i donkino mokono mina padiglsre, ede eigwa. 27Ye konbauna pidre, bage ta eduer panamnedi ere meglkwa. Ere meglko, yagl swara ta kugl mogo tau donkimo tenagledi bekmo yaursre, migemo silva ikra bek mina atne paugo, kanugwa. 28Kandre, ye agiglema di te, yegl dugwa, Aya! Na mige silva kugl mogo pre topo siga i, ikne ediga. Bek mina atne pamiwe dugwa. Yegl dugo, ye kudugl goglsre, ogono gagno nuglo didre, yene di ikne ikne ede, God siragl mere ere norume? di, yegl di prikwa.
29Ana Josep agiglema konbauna pi moglsre, ye neno Jekop dumo Kenan moglmara plau didre, siragl taragl ye meglmara plau dugwa i ye di teigwa. 30Ye yegl digwa, Yagl ta dumo Isip sugl moglkwa i, no ka kodo di norsre, no kuda ikne tau dumo Isip doko daka ere kanamnedi wimedi kanugwa. 31Ba no ere mogl, ye yegl di tomga, No kuda ikne mogl, dumo Isip doko daka ere kanamnedi ukrumga. No ka kaima dumga yoba muniwa. 32No neno swara moglko, agigle agigle munga. No okna 12-pela munga ba agro swara ta goglkwa. Te, no agro okuo kaima moglkwa i, erme neno bogl dumo Kenan miuriwe di, yegl dumga. 33-34No yegl dumgo, ye di ikne ede, yegl dugwa, Ene swara ta magigl i moran, ene tau kugl mogo i pi neno agroma kidan paigwa i tenaiglmiwa. Tedre, agro okuo auro yu, na moglmara obuno dibi, na ye kandre, ene kuda ikne mogl, dumo Isip doko daka ere kanamnedi ukrimedi praglka. Ene ka kaima dimedi prisre, ene agro swara ta magigl i morabuka i te ikne edibo, ene praiglmere wan mogl, kugl mogo topo sinaiglmiwe di, yagl i yegl dumiwe digwa.
35Ana okuo Josep agiglema i ere mogl, kugl mogo i meda edinamnedi bek mudu yaurikwa. Yaursre, migeno silva mudu bek kebra wagle bek mina atne paugo, ye neno bogl kanigwa. Kandre, ye kudugl geglkwa. 36Ye kudugl geglko, ye neno Jekop ye yegl di togwa, Ene na gagrama mudu wau boraiglmedi erikwa. Josep goglko, Simeon magigl i moglkruko, Benjamin ama idre ede enamnedi prikwa. Na moglmara taragl kide keme plau dumiwe di, yegl dugwa. 37Yegl dugo, Ruben ere mogl, ye nem yegl di togwa, Na Benjamin idre, ede Isip pi, ta agre i ede ikne ukribo, ene na wana suo si goratniwa. Na ye suglmo morabedi dedin, na ye sugl moglsre, agre i ede ikne unaluwe di, yegl dugwa. 38Yegl dugwa ba Jekop mane dugwa. Na wana Benjamin ene bogl pikraiglkwa. Ye agigle komono goglko, ye swara moglkwa. Ye ene bogl ede Isip ebi, konbauna bage ta goran, na kidagl yedre, bitna ikan ugwa pre ene ye idre, eimara i mirie goglsre, goraluwe di, Jekop yegl dugwa.
Valgt i Øjeblikket:
Oknayene Ibo 42: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission