Oknayene Ibo 48
48
Jekop ye Efraim ya Manase di wakai yei togwa
1Ana okuo, yoba ta Josep moglmara u, ye di te, Nen kidagl kide sumiwe dugwa. Dugo, Josep wam suo Manase ya Efraim agre idre, ede pi nem kidagl wam suo kanabedi agre i ogwa. 2Agre i ogo, yoba ta Jekop di te, Ene wan Josep ene motnara umiwe dugo, ye yobuglo i padiglsre, ugl pai moglkwa i kodo, adigl bogl mina ame dugwa.
3Ana Josep ede u nem kidagl moglmara ugo, Jekop ere mogl, ye yegl di togwa, Na okna dumo Kenan suna dumo kebra Lus we dimara moglka igne, God Yobuglo Podo Paugwa na moglmara plau didre, di wakai yei nare, 4yegl dugwa, Na ene gawanma mere kide moglsre, yugobuno pere pere moraiglmedi ere edenaglka. Ere edibo, na ene ya ene gawanma dumo makan magigl i ene makano aimadi kamin yenabedi tenaluwe di, God yegl dugwa. 5Ana na ede Isip magigl i ukrika igne, ene wan suo kuglnga, kagno Efraim ya Manase we dinga. Ana wan suo i we, ye na wana kaima mere yegl morabrika. Ruben ya Simeon na wana kaima miurere yegl mere na wana kaima morabrika. 6Te, ene gak tau okuo kuratnga i, ene gagiglnma kaima moraiglkwa. Ye makan ya ki inaiglkwa i, ye agro komono Efraim ya Manase wama mere yegl moglsre, ye kagno mina inaiglkwa. 7Te, na dumo Mesopotemia kide kodidre, ede dumo Kenan suna wiga igne, ene man Resel goglko, na mirie podo goglka. No ede dumo Efrata we dimara enamnedi kuri ta magigl magigl omgo, ye goglkwa. Ye goglko, na konbauna bina maugl siwe di, yegl dugwa. Ana ye dumo Efrata pre dugwa i, yoba erme Betlehem we digwa.
8-10Ana Josep nem kidagl Israel i, kidagl kaima yogwa pre ye gumuglo kin yenagledi erukwa. Eruko, ye Josep wam suo magigl miurka kan pogl sikrukwa pre ye ere mogl, Yagl gak suo i, ira miure? dugwa. Dugo, Josep di ikne ede, yegl dugwa, I na wana suo, na dumo Isip magigl i moglka igne God narukwa ikra miuriwe dugwa. Josep yegl dugo, ye nem aglke kor dugwa, Ene ye agre i ede u na moglmara magigl edinatnedi prika. Magigl edin, na ye di wakai yei tenaluwe di, yegl dugwa. Yegl dugo, Josep ye agre i ede pi nem moglmara edugo, nem ye yagl gak suo i nuguno kugro, paunano si nogwa. 11Yegl ersre, ye Josep di te, yegl dugwa, Na okna ene guman dran aglke kor ta kankragledi prika, ba erme we, God na ere wakai ere naruko, na ene kandre, ene wan suo ama kaniwe dugwa. 12Israel ka yegl dugo, Josep ye wam suo Israel bikie wagle ame di miurka i, i eglke edidre, ye goglko bodugl, bre magide guma dra makan mina edugwa.
13Ana Josep kuri ta mogl, wam suo aglke kor agre i pi nem kidagl moglmara edugwa. Ye wam Efraim, Israel ogo koda kra morabedi ogo wo mina akidre, wam Manase Israel ogo wo kra morabedi ogo koda mina akidre, agre i ede pi nem kidagl moglmara edugwa. 14Yegl erukwa ba Israel ere mogl, ogo topo suade erse, ogo wo Efraim bre mina akidre, ogo koda Manase bre mina akugwa. Manase ye Josep wam komono moglkwa pre Israel ogo wo ye bre mina akenabuka paugwa ba yegl ta erekrukwa. 15-16Israel ogo gak suo bitno mina akidre, ye Josep di wakai yei te, yegl dugwa, God ye yagl gak suo i ere wakai ere tenabiwa. Na God we diga i, na nina Aisak ya na yagl awana Abraham God kamo duglo biurka God i pre diga. Te, God, ye sipsip sugl meglkwa yoba mere yegl mogl, na gak kebra moglka igne ede u erme pra na sugl moglkwa, God i pre diga. Te, taragl kane kane na ere kide eramnedi erikwa igne, God ye angelo mere yegl u, na ege ege ere yugwa God i pre diga. Ye yagl gak suo i ere wakai ere tenan, ye gawano u mere kide enaiglmiwa. U mere kide pi meglbi, na ya na nina Aisak ya na yagl awana Abraham, no kagno ta dudukrabiwe di, yegl dugwa.
17Ana Josep nem ka yegl di kodugo, Josep ye ogo wo Efraim bre mina akugwa ikra ake i pi Manase bre mina akenabedi erukwa. Josep ye nem ogo wo Efraim bre mina akididre, ogo koda Manase bre mina akugwa i kandre, kide prukwa pre yegl erukwa. 18Ye nem ogo wo ake i pi Manase bre mina akenabedi ersre, nem yegl di togwa, Ene ogon wo gak i bre mina akekratniwa. Gak ta moglkwa i, na wana komono moglkwa pre ene ogon wo gak i bre mina akenatniwe dugwa. 19Yegl dugwa ba ye nem ere mogl, Mane dugwa. Wana yo, ira komono moglkwa i, na pre kan erika. Ene wan komono yagl kade ta morabuka. Yagl kade moran, ye gawama yugobuno ta moraiglkwa. Ba ene wan okuo we, ye yagl kade mogl, wan komono tenabuka. Yegl moran, ye gawama mere kide moglsre, yugobuno mere moraiglmiwe di, yegl dugwa.
20Israel ka yegl di kodidre, ye ere mogl, Josep wam suo di wakai yei te, yegl dugwa, Israel yoba okuo moraiglkwa we, ye yoba di wakai yei tenamnedi pribi, yegl dinaiglkwa, Ene we, ene Efraim ya Manase wakai miurere yegl moratniwe di, yegl dinaiglmiwe dugwa. Efraim ye okuo moglkwa ba Israel ere mogl, Efraim ya Manase we dugwa i, ye Efraim i komono mere edugwa. 21Ye ka yegl didre, ye ama wam Josep di te, yegl dugwa, Ene pro! Na goraglka igne magigl ugwa. Na goraglka ba okuo we, God ene moraiglmara mogl tedre, ene auro i pi, dumo Kenan, ene kowano awano meglmara edenabuka. 22Dumo Kenan suna i, na bainet ya kibr yer idre, Amor yoba kuda bogl tedre, muglo meglbi ta iga. Na dumo tau ene agiglnma makano yenabedi obuno di teiga ba muglo meglbi i, na ene agiglnma tekre, ene swara teie di, Israel yegl dugwa.
Valgt i Øjeblikket:
Oknayene Ibo 48: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission