Jon 11
11
Yagl Lasarus goglkwa
1Ana aglke ta yagl ta kagie Lasarus we digwa kide sugwa. Ye dumo Betani we dimara kipai moglkwa. Dumo Betani i, Lasarus abauglo suo Maria ya Marta ama kipai meglbrika. 2Maria i aglke ta kugo nuglo demene wakai erukwa Yagl Kade kagle wagle toide edidre, bre yugo mina kokugwa. Maria i agigle Lasarus kide sugwa. 3Ana Lasarus kide sugwa pre ye abauglo suo ere mogl, yoba ta dedebriko, ye pi Jisas yegl di togwa, Yagl Kade yo, yagl ta ene boma daguma meglbrika ikra kide sumiwe dugwa. 4Yegl dugo, Jisas prisre, yegl dugwa, Lasarus kide sugwa i, ye ta gogl dudukrabuka. Ye kide sugwa i, God kagie wanabuka pre erukwa. Te, na God Wam moglka i, ye kide sumara i, na ama kagna wanabiwe di, yegl dugwa.
5Ana Jisas ye Marta ya Maria ya Lasarus pra, wakai kanugwa. 6Ye wakai kanugwa ba ye Lasarus kide sugwa i prisre, tabre pi kankrukwa. Ye moglmara ege suo mogl pai moglkwa. 7Moglsre, ye duglo beglkwa yagl mudu di te, Nono ede ikne distrik Judia, yagl Lasarus moglmara omno dugwa. 8Yegl dugo, ye duglo beglkwa yagl di ikne ede, yegl digwa, Tisa, edue iga Juda yoba kobuglo si, ene si goramnedi erikwa. Yegl erikwa pre ene erme ede ikne enatno? digwa. 9Yegl digwa ba Jisas di ikne ede te, yegl dugwa, Kamun tagugwa igne ede pi mim erukwa igne, ade kwia 12-pela yogwa. Yoba ta ade kwia 12-pela suna i konbauna enan, ye ta guglo sikrabuka. I siragl pre abuglage si makandigle edugo, ye kan pogl sugwa. 10Ba mim eran, yoba ta konbauna enan, abuglage si ye moglmara edekrukwa pre ye guglo sinabiwe di, Jisas yegl dugwa.
11Jisas ka yegl didre, ye ka ta ama yegl di togwa, Nono kabagleno Lasarus i, ugl paugwa. Ye ugl paugwa ba na ye uglo yokinagledi pre ede ikne omno die dugwa. 12Yegl dugo, ye duglo beglkwa yagl di ikne ede, yegl digwa, Yagl Kade yo, ye ugl panan, aragan erabiwe digwa. 13Jisas ye Lasarus ugl pame dugwa i, Lasarus goglkwa pre dugwa ba ye duglo beglkwa yagl prikwa i, ka kaima ugl paugwa pre dumedi prikwa. 14Yegl prikwa pre Jisas di nogugl ede, yegl dugwa, Lasarus goglmiwa. 15Te ye goglkwa igne moglkrika i, gun yeiga. Siragl pre na ene we di prisre, na siragl ta eribo, ene na pre medraiglmedi prika. Ana nono ede pi Lasarus i pi yeimara omno! di, yegl dugwa. 16Jisas yegl dugwa pre Tomas, kagie ta Didimus we digwa i, ye Jisas duglo beglkwa yagl yegl di togwa, Ana, nono ede omno! Yoba ta ere mogl, Jisas si geglbi, nono ama akie goramniwe dugwa.
Jisas ere mogl, Yoba na swara mina adigl u kor pidre, kor moraiglme dugwa
17Ana Jisas ede dumo Betani magigl ugo, yoba ye di te, Lasarus kobuglo mur yeigwa, ege 4-pela de ede omiwe digo, prukwa. 18Dumo Betani i, Jerusalem we dimara magigl yogwa. Jerusalem we dimara ede pi Betani i, 3 kilomita mere yegl yogwa. 19Magigl yogo, Juda yoba mere Marta ya Maria agro goglkwa pre deno muduno aragan erabedi pi kanigwa.
20Ana Jisas ede magigl ugo, yoba ere mogl, Jisas umiwe digo, Marta prukwa. Prisre, ye tegigl yenabugledi ede pi Jisas umara ogwa. Ye ede ogwa ba Maria yugugl mogl pai moglkwa. 21Marta ede pi Jisas umara pidre, ye yegl di togwa, Yagl Kade yo, ene magigl i motna, na agra ta goglkruko. 22Ba na pre kan erika i, erme ama ene God siragl mere di pitn, ye ene dinatnere ere tenabiwe dugwa.
23Marta ka yegl di kodugo, Jisas ye di te, Ene agitn adigl u kor enabiwe dugwa. 24Dugo, Marta ye yegl di togwa, Kaima. Ege okuo, yoba mudu adigl u kor enaiglkwa igne, ye ama adigl u kor enabuka i na priwe dugwa. 25Yegl dugo, Jisas ye aglke kor yegl di togwa, Yoba na swara mina adigl u kor pidre, kor moraiglkwa. Yoba na ta pre mediglsre, goran, ta goglkrabuka. Kor mogl pai morabuka. 26Te, yoba ta kor moglsre, na pre medran, ye kaima ta goglkrabuka. Na ene di teiga i, ene pre mediglno? Jisas yegl di prukwa. 27Di pruko, Marta ye di ikne ede te, yegl dugwa, Yagl Kade yo, na pre mediglka. Ene God Wam moglsre, God Yagl ta dedenan, ede makandigle unabe digwa i, ene motnedi pre mediluwe dugwa.
Lasarus goglkwa i pre Jisas kai erukwa
28Ana Marta ka yegl didre, ye ede ikne abauglo Maria moglmara pidre, ye swara prabedi yegl dugwa, Tisano udre, ene wo dumiwe dugwa. 29Marta yegl dugo, Maria ka i prisre, tabre adigl ede pi Jisas moglmara ogwa. 30Jisas ede dumo suna ukrukwa. Ye Marta bogl tegigl yeibrara ikra mogl pai moglkwa. 31Ana Maria tabre adigl ede ogo, Juda yoba ye dem muduo aragan erabedi gaugl wigwa ikra yugugl moglsre, kanigwa. Kandre, Maria ede kobuglo mur yeimara kai erabuka pre omedi prisre, ye mokomugl sika si eigwa.
32Ana Maria ede Jisas moglmara pi Jisas kandre, ye Jisas adigl moglmara yage kagle mina kobragai padre, yegl dugwa, Yagl Kade yo, ene magigl i motna, na agra ta goglkruko we dugwa. 33Maria yegl didre, kai eruko, Juda yoba ye mokomugl wigwa ikra ama kai eriko, Jisas kanugwa. Ye kandre, ye dem muduo yubun dogo, kide kaima prukwa. 34Ye yegl ersre, yoba di pre, Ene Lasarus ogo nagie aglo yeime? dugwa. Jisas yegl di pruko, ye di ikne ede te, yegl digwa, Yagl Kade yo, ye yomnara kanatna wo digwa. 35Yegl digo, Jisas kai erukwa. 36Ye kai eruko, Juda yoba kandre, yegl digwa, Kanio! Ye Lasarus dem muduo kaima tomiwe digwa. 37Yoba tau yegl digwa ba tau ama ere mogl, yegl digwa, Yagl i yagl ta gumuglo kin yogwa ere wakai ere togwa. Ye ama Lasarus goglkrabedi erabuka pamiba, erekrumiwe di, yegl digwa.
Jisas ye Lasarus ere i kor edugwa
38 Yoba tau ka yegl digo, Jisas dem muduo aglke kor yubun dogo, ye Lasarus kobuglo mur yeimara ede magigl ogwa. Kobuglo dra i, kobuglo paglkane wagle si kegl digwa. 39Jisas ede kobuglo dra magigl pi, ye yoba di te, Kobuglo dra si kegl digwa i, ake nu si eglke edio! dugwa. Yegl dugo, yagl goglkwa abauglo Marta ye Jisas yegl di togwa, Yagl Kade yo, ye goglkwa, ege 4-pela de ede ogwa pre erme kubuno kide erabiwe dugwa. 40Yegl dugo, Jisas di ikne ede te, yegl dugwa, Na ene okna di teiga ikra, Ene pre medigln, God yobuglomo podo paugwa i kanatne digra we dugwa. 41Jisas yegl dugo, yoba kobuglo paglkane ikra ake nu si eglke edigwa. Edigo, Jisas kan mitna ibo ede, yegl dugwa, Nina yo, na ka ta ene erme di praglka i, ene pre kodinga pre na ene di wakai yei teiwa. 42Na ege ege ene ka siragl mere di prika, ene prisre, dimere ere natnga i, na pre kan ere kodiga ba yoba magigl adigl meglkwa i praiglkwa pre diga. Ye prisre, ene ka kaima na dedinga i, pre medraiglkwa pre diwe dugwa.
43Jisas ka yegl di kodidre, ye ka podo yegl dugwa, Lasarus, ene ede meda wo! dugwa. 44Dugo, yagl goglkwa i adigl u kor pidre, ede meda ugwa. Yoba okna ye kobuglo mur yeigwa igne, ogo kagle ya guma dra lap wagle tu sigwa i, pai moglko, ye ede meda ugwa. Ye ede meda ugo, Jisas yoba di te, yegl dugwa, Ene lap pirka si teo. Ye yoko wan morabiwe dugwa.
Israel yoba kade Jisas kanige eun, u kide enamne digwa
(Matyu 26.1-5, Mak 14.1-2, Luk 22.1-2)
45Ana Jisas ere mogl, Lasarus ere i kor edugo, Juda yoba ede Maria moglmara wigwa ikra tau mere kandre, Jisas pre mediglkwa. 46Ye mere pre mediglkwa ba yoba tau we, ye ede pi Farisi yoba meglmara pidre, Jisas siragl mere erukwa i ye di teigwa. 47Di teigo, tawa teigwa yoba bitno meglkwa i ya Farisi yoba ere mogl, Kaunsil di makai sigo, wigwa. Wigo, ye yegl digwa, Nono siragl eramne? digwa. Yagl i kimagl mere erukwa. 48Nono kanige eremun, yoba mudu ye pre medraiglkwa. Yegl eribi, Rom yoba ye no king kor i nogugl edimedi kandre, u nono tawa tomga yugu i ere kide ersre, nono Israel yoba ama ere kide ere noro, eraiglmiwe di, yegl digwa.
49Ana Kaunsil wagle yegl digo, ye swarano kagie Kaiafas we digwa i, di ikne edugwa. Kaiafas ye bugla yugu i, tawa teigwa yoba bitno moglko, ye di ikne edidre, Ene nomane pre pogl sikre, dimiwe, di, ka togwa. 50Ene wakai ta paugwa pre pogl sikrikwa i, nono yoba swara ta Israel yoba mudu againo idre, goran, wakai ta panabuka. Kowai Israel yoba mudu geglbi, wakai ta paikrabiwe di, Kaiafas yegl dugwa. 51Ye ka yegl dugwa i, ye yene prumere dikrukwa ba ye bugla yugu igne i tawa teigwa yoba bitno moglsre, Jisas ye Israel yoba pre gorabuka i, ka kep ere dugwa. 52Te, Jisas ye Israel yoba swara i pre goglkrabuka ba God gagiglma mudu uglo koglo koglo bage bage moraiglkwa i, ye ere i yugobunomo swara edenagledi gorabuka paugwa.
53Ana igne i Juda yoba kade wagle mabuno bogl ka di kogl, siragl mere Jisas si goraiglkwa i, konbauna doko di meglkwa. 54Yegl pre igne i Jisas Juda yoba meglmara nogugl wan moglkre, dumo i kide kodidre, ede pi taun ta dumo wau yomara magigl yomara ogwa. Taun kagie Efraim we dimara i pidre, ye duglo beglkwa yagl bogl dumo i meglkwa.
55Ana ege i, ege kade God Israel yoba oglo sugwa igne ede magigl ugo, Israel yoba bina dage meglkwa i, ege i ede magigl umedi prisre, mudu God gumuglo mina deglbi yei dinamnedi ede okna pi Jerusalem ibo ere meglkwa. 56Ye tawa teigwa yugu yomara togl suna yegl ere moglsre, ka kade di yegl digwa, Nono ege kade yogo, ere munga i, Jisas u kanabo mo kankrabe? digwa. 57Okna kana tawa teigwa yoba bitno meglkwa i ya Farisi yoba ka gigle di padigl, yegl digwa, Ene yoba ta we, Jisas atne ta moran, kanatnga i, di noro! No ye si kane sinamniwe digwa.
Valgt i Øjeblikket:
Jon 11: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission
