Jon 19
19
Pailat yoba kano prisre, Jisas i pi si golo dugwa
(Matyu 27.27-31, Mak 15.16-20)
1Ana Pailat ye soldia wagle di te, Jisas i pi duglnai sio dugo, ye i pi duglnai sigwa. 2Soldia wagle Jisas duglnai sidre, ama kewan kagigle ake kegmane ere, king bitno gagl erimere yegl ye bre mina padigl tedre, gagl suna gogl ta ede teigwa. 3Yegl ersre, ye moglmara u yegl digwa, Juda yoba kingno, no ene di wakai yei tomniwe didre, ye agl dage sigwa.
4Ana Pailat aglke kor dagl ede meda pi yoba yegl di togwa, Na yagl i, yu obuno dibo, kanaiglkwa. Ba ye aglaumo ta paikrumedi kaniwe dugwa. 5Ana Pailat yegl dugo, Jisas kan kagigle bre mina yobiglkwa ya gagl suna gogl ede teigwa pai miurko, ede meda ugwa. Ede meda ugo, Pailat yegl dugwa, Yagl ikra uma, kanio! dugwa.
6Ana Jisas ede meda ugo, tawa teigwa bitno meglkwa yeigo, kibr nem ye sugl meglkwa i ama yeigo, kanigwa igne, ye ka podo di, yegl digwa, Ye ede prak mina si goglo! Ede prak mina si goglo! digwa. Yegl digo, Pailat aglke kor yegl dugwa, Ye ede prak mina si goramendi pribi, enene ye i pi si goraiglkwa paugwa. Ye aglau ta erekrumedi kaniwe dugwa. 7Pailat yegl dugo, Juda yoba kade wagle di ikne ede, No lono ta paugwa i, lo i mina yagl i gorabuka keme paugwa. I siragl pre ye God Wam moluwe dumiwe di, Juda yoba yegl digwa.
8Ana Juda yoba ye God Wam mole dume digo, Pailat prukwa igne, ye Jisas kuduglmo goglkwa i, u podo ogwa. 9Kudugl goglsre, aglke kor yugumo toglmo pidre, Jisas di pre, yegl dugwa, Ene aglo mogl une? dugwa. Yegl dugwa ba Jisas ka swara ta di ikne edekrukwa. 10Di ikne edekruko, Pailat aglke kor yegl dugwa, Ene ka ta di ikne edekratno? Na ene i meda edenaglka mo ede prak mina si goraglka i, na mina paugwa. Mo, i ta pre kan erekitno? dugwa.
11Yegl dugo, Jisas di ikne ede, yegl dugwa, God mogl mitna edugwa i, ene namba ta tekruma, ene taragl swara ta ere narekitngo. Yegl paugwa pre ene tadaglmenen kebra paugwa ba yoba ta na ene ogon mina edugwa i, tadaglmemo podo kaima pamiwe dugwa. 12Jisas yegl dugo, Pailat prisre, ye i meda edenagledi konbo dokugwa ba Juda yoba kade wagle ka podo yegl digwa, Ene yagl i, i meda edin, ene Rom King kabaglemo ta moglkitnga paugwa. I siragl pre yoba ta king mole dugwa i, ye ka dumara i, Rom King kudamo ikne mere yegl moglmiwe digwa.
13Ana Pailat ka i prisre, Jisas auro yudre, ye jas siamo yu agai ta yomara yedre, ame dugwa. Agai i, ye Kobuglo Makandigle Padiglmara we digwa. Te, ka Hibru mina, agai i Gabata we digwa. 14Ana ade kwie belo yogo, ege i God Israel yoba oglo sugwa ege yenabuka pre taragl tau ake kun ere meglkwa. Ana Pailat Juda yoba yegl di togwa, Ene kanio, ene kingno moglmiwe dugwa. 15Yegl dugo, Juda yoba i, ka podo yegl digwa, I ede po! Ye ede prak mina si goglo! digwa. Yegl digo, Pailat di ikne ede, Na ene kingno ede prak mina si goraglo? dugwa. Yegl dugo, tawa teigwa yoba bitno meglkwa i di ikne ede, yegl digwa, Rom King moglkwa i, ye swara no kingno moglmiwe digwa. 16Yegl digo, Pailat ye Jisas ede prak mina si goraiglmedi ye te ogono mina edugwa.
Jisas ede prak mina sigwa
(Matyu 27.32-44, Mak 15.21-32, Luk 23.26-43)
17 Ana yoba tau Jisas auro i ede meda eigo, Jisas yene ede prakmo kake idre, ede pi dumo ta Bre Yobuglo dumo we dimara ogwa. Dumo i, ka Hibru mina Golgota we digwa. 18Dumo i, ye Jisas ede prak mina si padiglsre, yagl suo ama ta akie ede prak mina si padiglkwa. Yagl ta Jisas ogo wo kra paugo, ta ogo koda kra paugo, Jisas suna paugwa.
19Ana Pailat ere mogl, ka ta bogl paduglko, ye i pi ede prak mina padiglkwa. Ye ka boglkwa i, yegl boglkwa, I Jisas, Nasaret nem moglkwa. Ye Juda yoba kingno moglmiwe di, yegl boglkwa. 20Ana ye Jisas ede prak mina sigwa i, taun yomara magigl yogwa pre Juda yoba tau mere ka i kerikwa. Te, ye ka boglkwa i, ka Hibru mina boglsre, ka Rom mina boglsre, ka Grik mina ama boglkwa pre mere kerikwa. 21Ana Tawa teigwa bitno meglkwa i, ede Pailat moglmara udre, yegl digwa, Ene yagl i Juda yoba kingno moglmiwe di, yegl boglkro. Ba ene boratnga i, Yagl i ye Juda yoba kingno moluwe dume di, yegl boratniwe digwa. 22Yegl digo, Pailat di ikne ede, yegl dugwa, Na boglmere keme pai morabiwe dugwa.
23Ana soldia wagle ye Jisas ede prak mina si padiglsre, ye kuguglmo gaglmo tau idre, br 4-pela boglsre, swara swarade igwa. Swara swarade igo, ye gaglmo suna pai moglkwa kanigwa i, lap si beglmere mere yegl ta yeikrukwa ba yene gagl mudu ta yogwa. 24Yegl kanigwa pre yegl digwa, Nono gagl suna i, ake argla dikramga paugwa ba kas mere yegl sumun, yoba ta win sinabuka i, inabiwe#19.24 Giglage 22.18 digwa. Yegl dimara i, God kamo okna ta beglkwa i, pai yugwa. Ka i yegl beglkwa, Ye na kuguglna gaglna yubu sidre, ira ta inabedi kas mere yegl simiwe di, yegl beglkwa. Beglkwa pamere soldia wagle kuno yegl erikwa.
25Ana Jisas ede prak mina pai moglmara i, abu tau magigl adigl meglkwa. Ye mam yogo, mam abauglo ama yogo, Maria ye Klopa ebie moglkwa i yogo, Maria ta dumo Makdala mam moglkwa i bogl akie adigl meglkwa. 26Ana Jisas ye mam magigl moglkwa i kandre, ye duglo boglkwa yagl ta wakai kanugwa i ama magigl adigl moglkwa i kandre, ye mam yegl di togwa, Abu yo, kano, yagl i ene wan moglmiwe dugwa. 27Yegl didre, ye duglo boglkwa yagl i yegl di togwa, Kano, abu i, ene man moglmiwe dugwa. Yegl dugo, mokomugl i, ye duglo boglkwa yagl i, Jisas mam yu ye yugumo mina edidre, suglmo moglkwa.
Jisas goglkwa
(Matyu 27.45-56, Mak 15.33-41, Luk 23.44-49)
28Ana okuo Jisas prukwa i, Erme kogona mudu dudumedi prisre, God kamo bage ta beglkwa i pai inabedi yegl dugwa, Na nigl goluwe#19.28 Giglage 22.15 dugwa. 29Ana nigl migi ta magigl yogwa i, wain ku erukwa nigl migi mina atne moglkwa pre yoba ta ere mogl, giagin idre, ede hisop yogagle mina were, wain ku erukwa nuglo moglmara i, si badre, Jisas nenabedi togo, nogwa. 30Ana Jisas wain nuglo ku erukwa i nedre, yegl dugwa, I pra dudumiwe dugwa. Yegl didre, bre magi didre, goglkwa.
Soldia ta kuglage idre, Jisas dagigle mina sugwa
31Ana ege i, wakan kade tagna yenabuka pre yoba taragl tau ere wakai erikwa igne yogwa. Te, wakan kade i, ege kade ta yenabuka. Yegl pre Juda yoba kade wagle u, Pailat moglmara udre, ye soldiamo tau di tenan, ye pi, yoba tau ede prak mina pai meglkwa i, kaglno yobuglo si buko dibi, yoba i tabre geglbi, ye i atne edinaiglmedi di prikwa. I siragl pre yoba ogono nagino tau ede prak mina pai moran, wakan kade yenabuka i, ye kide prikwa pre ka yegl digwa. 32Yegl di priko, Pailat pra we dugo, soldia tau u yagl koglo koglo pabrika suo ikra, kaglno yobuglo si buko digwa. 33Yegl erikwa ba ye Jisas pamara u kanigwa i, ye gogl kodumedi kandre, yobuglo swara ta si buko dikrikwa. 34Si buko dikrikwa ba soldia swara ta kuglage idre, Jisas dagigle mina sugwa. Sugo, nigl ya bormai akie tabre ede meda ugwa. 35Ana yoba ta taragl yegl mere gumuglo mina kanugwa i, kandre, ka magigl i boglsre, di nogugl edugwa. Te, ye ka di nogugl ede togwa i, ka kaima dugwa. Ye yene ka kaima die di prisre, te kamo i ene pre medraiglmedi pre dugwa. 36Ana taragl yegl mere plau dugwa i, God kamo bage ta beglkwa i, pai inabedi pre plau dugwa. Ka beglkwa i, yegl beglkwa, Ye yobuglomo swara ta si buko dikraiglmiwe#19.36 Isip Kide Kodigwa 12.46 di, yegl beglkwa. 37Te, God kamo bage ta mina yegl beglkwa, Yoba ta ye kuglage mina sigwa yobamo i, ye kanaiglmiwe dugwa.#19.37 Sekaraia 12.10
Jisas ogo nagie i pi kobuglo mur yeigwa
(Matyu 27.57-61, Mak 15.42-47, Luk 23.50-56)
38Ana mokomugl i, yagl ta kagie Josep we digwa, dumo Arimatea nem ta moglkwa ede Pailat moglmara udre, Jisas ogo nagie inagledi di prukwa. Yagl Josep i, ye Jisas kamo duglo boglkwa yoba ta moglkwa ba ye Juda yoba kade wagle kuduglno goglsre, di nogugl edinakirukwa. Ana yagl i Jisas ogo nagie inagledi Pailat di pruko, Pailat pra we dugwa pre ye pi Jisas ogo nagie i atne edugwa. 39Te, Josep ede ogwa igne, Nikodemus ye bogl akie ede ebrika. Nikodemus i, ye yagl ta okna Jisas moglmara eduer ugwa ikra moglkwa. Nikodemus ede nuglo demene erukwa i, suo suru i swara edidre, yugwa. Ede nuglo i, 30 kilogram mere yegl yugwa. 40Ana Josep ya Nikodemus Jisas ogo nagie idre, lap kruo mina were, ede nuglo demene erukwa i egre tedre, padiglkwa. Juda yoba ye yoba maugl sigwa igne, mabuno yegl erikwa.
41Ana ye Jisas ede prak mina simara magigl i, yoba ta kaya mokna ere yaglmara yogwa. Te, dumo i yomara, kobuglo mur kor ta pere yeigwa yogwa. Kobuglo mur i mina yoba goglkwa ege swara ta atne yeikrikwa. 42Ana igne i wakan kade tagna yenabuka pre taragl ere wakai erikwa igne yogwa. Yegl yogo, kobuglo mur i, magigl yogwa pre ye Jisas ogo nagie i mina atne yeigwa.
Valgt i Øjeblikket:
Jon 19: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission
