Jon 7
7
Ege kade ta yogo, Jisas ede Jerusalem ogwa
1Mokomugl i, Jisas distrik Judia enakiure, distrik Galili suna i keme wan moglkwa. I siragl pre Juda yoba kade dumo Judia suna meglkwa i, ye si goramnedi prikwa. 2Wan moglko, Juda yoba egeno kade ta ede magigl ugwa. Ege kade i, Yugu Teka Sigwa ege yome digwa. 3Ede magigl ugwa pre Jisas agiglema Jisas di te, Igle kide kodo ede distrik Judia po! Kimagl magigl etnere ibo etn, ene duglo beglkwa yoba tau mere kanaiglma. 4Yoba kagno kade inamnedi prikwa i, kogon teke atne erekrikwa. Nogugl erikwa. Yegl pre ene taragl kade eratnga kuno panan, yoba mudu kanaiglmedi dumo Judia i ero di, yegl digwa. 5Jisas agiglema ama ye pre mediglkrikwa pre ka yegl digwa.
6Digo, Jisas ye yegl di togwa, Na ede Jerusalem enaglka ege i, erme ta yeikrukwa. Ba ene erme enaiglkwa mo okuo enaiglkwa i, kuno keme yogwa. 7Makandigle yoba na deno kubro narikwa ba ene ta tekraiglkwa. I siragl pre ye mabuno kide erikwa di pogl teiga. 8Enene ede ege kade pi kanio! Na enaglka i, egena ta yeikrukwa pre na erme ta pikraluwe di, 9Jisas ye agiglema yegl di tedre, distrik Galili suna pai moglkwa.
10Pai moglkwa ba Jisas agiglema ede ege kade eigo, Jisas ama mokonomugl ede ogwa. Ye ogwa i, nogugl yoba gumuglno mina pikrukwa ba yoba ye kan dinaiglmedi atne konbo mere yegl ede ogwa. 11Ana Juda yoba kade Jerusalem meglkwa i, ye yoba makai simara suna i Jisas dokidre, Ye umo mo di, yoba kira pogl pre wan meglkwa. 12Yegl eriko, te yoba ege kade yomedi ede Jerusalem pi, makai sigwa i, ye Jisas pre ka kane kane di ikne ikne edigwa. Tau digwa i, Ye yagl wakai moglmiwe digo, yoba tau digwa i, Ta manugwa, ye yoba ki bakagl tedre, ka kibi di tedre, yegl erukwa yagle moglmiwe di, yegl digwa. 13Yoba meglmara suna i, ka yegl di ikne ikne edigwa ba ye Juda yoba kade kuduglno gogl teigwa pre ye Jisas kagie nogugl daglkre, ka atne keme digwa.
14Ana Juda yoba egeno kade i, ikne dudugo, ikne pai moglko, Jisas ede tawa teigwa yugu yomara togl suna pidre, God kamo yoba beke togwa. 15Beke te moglko, Juda yoba kade pre moglsre, nagino kogl, yegl digwa, Yagl i, ye skul kade ta dikrukwa pre ye nomane podo i, siragl mere idre, ka yegl dume? digwa. 16Digo, Jisas prisre, di ikne ede te, yegl dugwa, Na yoba ka beke teiga i, na nana primere ta beke tekrika ba God na dedugwa i, yene prumere keme yoba ka beke te moluwa.
17Na ka diga i, God kamo idre dio mo na nana primere keme dio mo i, God prumere eragledi prabuka yobamo i, ye pre pogl sinabuka. 18Te, ene prio. Yoba ta yene prumere ka beke tenabuka i, ye yene kagie kade inagledi prukwa. Ba na yoba ka beke teiga i, God na dedugwa i, swara kagie kade inabedi pre erika. Yegl pre na ka kibi dikre, ka kaima keme diwe dugwa.
19Moses ene God lomo togwa ba ene mudu kaima ta lo duglo boglkrikwa. God lomo Yoba si goglkrio di, mane dumara i, ene siragl pre na si goramnedi erime? dugwa. 20Yegl dugo, yoba Jisas kamo pre meglkwa i, ye di ikne ede te, yegl digwa, Yoba ira ene si goramnedi erikwa pre dine? Murubuglo kide ta ene motnara suna moglko, ene du etnga pamiwe di, yegl digwa.
21Digo, Jisas aglke kor ye yegl di togwa, Na wakan kade igne, kimagl swara ta erika pre ene mudu nomane podo sigwa. 22Ba ene prio! Moses ene di togwa i, ene yagl gak ta kuraiglkwa, ege 8-pela de ta morabuka igne i, ene ye gagie puduo gagie boraiglkwa pamiwe dugwa. Ka i, Moses komono kana ta dikrukwa ba ene kowano awano okna yegl digwa paugo, okuo Moses ama yegl dugwa. Moses yegl dugwa i pre ene wakan kade igne kogon ersre, yagl gak nagino puduo nagie beglkwa. 23Ene God lomo swara, Moses bogl atne edugwa i si biglke di dinamniwedi wakan kade igne kogon ta erse, yagl gak gagno puduo gagie bogl teigwa ba na wakan kade igne yagl ta ogo nagie mudu ere wakai ere teimara i, ene siragl pre na deno kubro narime? 24Na kogon erika i, ene enene primere kan yubu sigwa i, kodo, mabuno kaima pamara ime kandre, yubu sio! di, Jisas yegl dugwa.
Juda yoba ye Jisas ira moglkwa i pre ka drano digwa
25Ana yoba dumo Jerusalem kipaigwa i tau Jisas ka dugwa i prisre, yegl digwa, Yagl Jisas i, yoba kade tau ye si goramnedi konbo dokigwa 26ba ene kanio! Jisas ye nogugl ka di moglmiba yoba kade wagle i, ye ka dugwa i ta si kegl dikre, kanige erikwa. Yoba kade i nomane kor ta idre, Jisas ye God Kere Yugwa Yagl moglmedi primo mo? di, yegl digwa. 27Yegl didre, ama yegl digwa, Ba nono prumga i, yagl Jisas, ye God Kere Yugwa Yagl morabuka i, kuno ta erekrukwa. I siragl pre yoba digwa i, Krais unabuka igne, ye aglo mere unabuka i, yoba ta kankraiglme digwa ba yagl Jisas i, ye aglo mere mogl, ugwa i, nono prumga pre ye Krais ta moglkrumiwe di, yegl digwa.
28Ana yoba ka yegl digo, Jisas ye tawa teigwa yugu yomara togl suna moglsre, yoba ka beke tomara suna i ka podo didre, yegl dugwa, Na siragl mere moglka i ya aglo mere wiga i, ene pre kan erumniwedi prikwa. Ba na wiga i, nana primere ta ukrika. Na Nina mabuno kaima keme erukwa i, na dedugo, wiga ba ene ye ta pre kan erekrikwa. 29Pre kan erekrikwa ba na moglka i, na Nina pre kan erika. I siragl pre na ye bogl akie muglko, ye na dedugo, wiwe di, Jisas yegl dugwa.
30Ana Jisas ka yegl dugwa pre yoba kide prisre, ye si akenamnedi erikwa ba i ta manugwa. Jisas gorabuka egemo i ta yeikrukwa pre yoba ye si akenamnedi erikwa i, kuno erekrukwa. 31Yoba tau yegl erikwa ba tau mere ama ye pre mediglsre, yegl digwa, Krais unabe digwa i, Jisas kimagl podo podo erumere mere egre tenabo? digwa.
Tawa teigwa yoba ya Farisi yoba kibr nem Jisas si kane si wio digwa
32Ana yoba ka yegl mere atne kra di iborya di meglko, yoba tau ka waie ere, Farisi yoba di teigwa. Di teigo, Farisi yoba yeigo, tawa teigwa yoba bitno meglkwa i bogl ye prisre, kibr nem tau dede, Ene pi Jisas si kane si yunaiglmiwe di, dedigwa. Dedigo, ye ede eigwa.
33Ana Jisas ye dedigwa prisre, ka yegl dugwa, Na ege sugunagle keme ene bogl akie moramga. Mun, okuo na ede ikne pi, Nina na dedugwa i moglmara ede enaglka. 34Ede ebo, ene na dokinaiglkwa ba na ta kankraiglkwa. Te, na enaglmara i, ene ta enaiglkwa i ama kuno ta erekrabiwe dugwa. 35-36Jisas yegl dugwa pre Juda yoba ye kamo pre meglkwa i kinano yogo, ye ere mogl, yene di ikne ikne ede pre, yegl digwa, Yagl i ka didre, Ene na dokinaiglkwa ba na ta kankraiglme dugwa i ya Na enaglmara i, ene ta enaiglkwa kuno ta erekrabe dugwa i, siragl pre dume? digwa. Ye ede aglo ena pre dume? Grik yoba meglmara Juda yoba tau swarade pi suna suna meglmara i, ye pidre, ye ka beke te, Grik yoba meglkwa i ama ka beke tenabuka pre dumo mo? di, yoba i yegl digwa.
Jisas ye yoba nigl kor tenagle dugwa
37Ana Juda yoba egeno kade dudunabuka magigl eruko, ye ege swara kaima makai si moglsre, tagana ede pere pere enaiglkwa ege i, ege kade kaima yogwa. Ege i Jisas yoba makai si meglmara suna adigl moglsre, ye ka podo di, yegl dugwa, Yoba ta nigl goran, ye ede u na moglmara udre, nigl kor nenabuka paugwa. 38God kamo dumere mere, yoba ta na pre medrabuka i, dem muduo mina nigl ogo mere yegl bogl pai mogl, kau sinan, nigl mere kide pepigl di ede meda enabiwe dugwa. 39Ana Jisas nigl kor pre dugwa i, pre mediglkwa yoba okuo Mudu Murubuglo inaiglkwa pre dugwa. Igne i, Jisas ede ikne heven ibo pidre, abuglagemo podo sumara moglkrukwa pre ye Mudu Murubuglo ikrikwa.
Yoba tau Jisas pre mediglko, tau pre mediglkrikwa
40Jisas yegl dugwa pre yoba tau mere ka yegl digwa, Yagl i, ye Ka Kep Yagl ta unabe digwa ikra kaima moglkwa pamiwe digwa. 41Te tau ama, Ye God Kere Yugwa Yagl moglmiwe digwa. Yegl digwa ba yoba tau yegl digwa, Krais unabuka i, distrik Galili nem ta moglkrabuka. 42God kamo dugwa i, Krais ye Devit gawamo ta moglsre, dumo Betlehem, Devit okna moglmara i mina unabe dugwa pre ye ta manumiwe digwa. 43Yoba ka kane kane yegl didre, Jisas ira moglkwa i pre nomano swara yeikrikwa. 44Te, yoba tau Jisas si akenamnedi prikwa ba yoba swara ta si akekrukwa.
Juda yoba kade ye Jisas pre mediglkrikwa
45Ana kibr nem ede ikne pi tawa teigwa yoba bitno meglkwa i ya Farisi yoba meglmara eigo, ye ka tedre, Ene siragl pre yagl i si kane sikre, yoko ede ikne wime? digwa. 46Digo, kibr nem di ikne ede, yegl digwa, Okna ede u erme i, yoba swara ta yagl i ka dumere ta dikrime digwa. 47Yegl digo, Farisi yoba aglke kor digwa, Ene ama kinano sugo, ye pre mediglkwa pame digwa. 48No yoba kade ya Farisi yoba munga i, swara ta ye pre mediglkwa ta kanimo? 49Ba yoba mere kide ye kamo pre meglkwa i, God lomo pre pogl sikre, du erikwa. Yoba i God ere kide ere tenabiwe digwa.
50Yegl digo, Farisi yagl swarano ta Nikodemus, ye okna Jisas moglmara eduer ogwa yagl ikra, ye yegl dugwa, 51Nono lono dugwa i, yoba yene ta udre, dra mina ka ta dinan, nono prisre, pre yubu sumun, kuno erabe dugwa. Yene ta u dikran, nono ta pre yubu sikramga pamiwe di, Nikodemus yegl dugwa. 52Yegl dugo, Farisi yoba tau di ikne edidre, yegl digwa, Ene ama Galili nem ta motnkana digwa. Enene God kamo kere pitn, pre pogl sinatnga. Distrik Galili suna i, God kamo kep yoba ege swara ta plau dikrabiwe di, yegl digwa. 53Yegl digo, ye mudu ede pere pere pidre, ede kipaimara eigwa.
Valgt i Øjeblikket:
Jon 7: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission
