Jon 9
9
Yagl ta gumuglo kin yogwa i, Jisas ere wakai erukwa
1Ana ege swara ta Jisas konbauna wan mogl, yagl ta gumuglo kin yogwa i, kanugwa. Yagl i, mam ye kuglmara i, gumuglo kin yogwa. 2Ana Jisas duglo beglkwa yagl ama yagl i kandre, Jisas di pre, yegl digwa, Tisa yo, ira tadaglme erumara pre yagl i gumuglo kin yome? Yene tadaglme erukwa pai erumo mo ye nem mam tadaglme eribrika pai erume? digwa. 3Yegl digo, Jisas di ikne ede, yegl dugwa, Yagl i gumuglo kin yogwa i, yene tadaglme erumara plau dikruko, te ye nem mam tadaglme eribrara ama plau dikrukwa ba God ye moglmara kogon podo ta eran, yoba kanaiglkwa pre plau dugwa.
4God na dedugwa i, kogonmo ere moramga paugwa. I siragl pre erme erimine mere yegl yogwa. Eduer mere yegl yenan, kogon erumun, manabuka. 5Na makandigle wan moraglka igne, na makandigle yoba abuglageno mere yegl moluwe dugwa.
6Ana Jisas ka yegl di kodidre, eur si makan mina edugwa. Edidre, ye eur sumara makan gaba tau buglkwa i idre, yagl ta gumuglo kin yogwa i gumuglo mina gaba buglsre, 7ye di te, yegl dugwa, Ene pi, nigl nubun ta Siloam we dimara i nigl paio! dugwa. Nigl nubun kagie Siloam i, mem paugwa i, Dedugwa. Jisas ka yegl dugo, yagl i ede pi nigl padre, ede ikne ugwa igne, ye gumuglo mina kan pogl sugwa.
8Ana yagl i, gumuglo u wakai ogo, yoba tau ye kipamara magigl kipaigwa ya ye guma dra okna kanigwa i, di ikne ikne ede, yegl digwa, Yagl i, ye okna konbo bina ame di mogl, mige pre yana di moglkwa ikra moglmkana we digwa. 9Yegl digo, yoba tau di ikne ede, Kaima, yagl i moglmiwe digwa. Ba yoba tau digwa i, yegl digwa, Ta manugwa. Ye yagl i moglkrukwa ba ye moglmere mere yegl moglkwa pamiwe digwa. Yegl digo, yagl i yegl dugwa, Ta manugwa. Na yagl ikra moluwe dugwa.
10Yegl di moglkwa pre yoba ye di pre, Siragl eruko, ene gumuglno u wakai ome? digwa. 11Yegl digo, ye di ikne ede, Yagl ta ye kagie Jisas we digwa i, ye makan gaba tau buglkwa erabedi ersre, gumuglna mina buglkwa. Ye yegl ersre, na di nare, Ene pi nigl nubun Siloam we dimara nigl paio! dugwa. Yegl dugo, na pi nigl paigo, na gumuglna u wakai omiwe di, yagl i yegl dugwa. 12Yegl dugo, yoba ye di pre, Yagl Jisas i, aglo moglme? digwa. Digo, ye di ikne ede, Na ta kankriwe dugwa.
13Ana yagl ta okna gumuglo kin yogwa i, yoba ere mogl, auro i pi Farisi yoba meglmara edigwa. 14Ana Jisas ye makan gaba tau buglkwa erabedi ersre, yagl i gumuglo ere wakai ere togwa ege i, wakan kade ege yogwa. 15Ana Farisi yoba ama siragl mere gumuglo u wakai ogwa i, yagl i kira pogl prikwa. Kira pogl priko, yagl i ye yegl di togwa, Yagl i ye na gumuglna mina gaba buglko, na pi nigl paigo, gumuglna u wakai omiwe dugwa. 16Yegl dugwa pre Farisi yoba tau ere mogl, yegl digwa, Yagl ta ye gumuglo ere wakai ere togwa i, ye God bogl moglkribrika paugwa. I siragl pre ye lo si buko didre, wakan kade ege kogon erumiwe digwa. Yegl digwa ba Farisi yoba tau yegl digwa, Ye tadaglme yoba moran, ye siragl mere kimagl yegl ta erabe? digwa. Yegl pre Farisi yoba meglmara suna i, ye di pere pere edigwa.
17Ana Farisi yoba ere mogl, yagl ta gumuglo kin yogwa i, aglke kor yegl di prikwa, Yagl i, ye ene gumugln ere wakai ere togwa. Yegl pre ene ye siragl mere moglmedi pitne? digwa. Yegl digo, yagl i di ikne ede, yegl dugwa, Ye God kamo kep yoba ta moglmiwe dugwa.
18Ana yagl i gumuglo kin yedre, u wakai ome dugwa i, Juda yoba kade wagle i, ye kaima dumedi pre mediglkrikwa pre ye nem mam agle digo, ubrika. 19Ubriko, ye di pre, yegl digwa, Yagl i, ene wano moglmo? Te, ene ye kiurka igne, ye gumuglo kin yomiwe di, ene yegl ta dibro? Te, siragl eruko, ye gumuglo u wakai ome? di, yegl digwa. 20Yegl digo, yagl i nem mam di ikne ede, yegl digwa, Ye no wano moglkwa ya no ye kuglka igne ye gumuglo kin yogwa i, no kan pogl subuglka 21ba siragl eruko, ye gumuglo erme wakai yogwa ya te, ira ye gumuglo ere wakai ere togwa i, no ta pre kan erekrubuglka. Yene di prio. Ye yagl denbigl moglkwa pre ye yene dinabiwe di, yegl dibrika. 22-23Yagl i nem mam yegl dibrika i, siragl pre ye Juda yoba kade wagle kuduglno geglbrika pre dibrika. Siragl pre Juda yoba kade wagle i, ye di padigl kodigwa i, yoba ta ere mogl, Jisas ye God Kere Yugwa Yagl moglmiwe dinan, ye si meda edinamniwe digwa. Si meda edumun, ye yoba ka mabuno yugu makai simara i, okuo ta ukrabiwe digwa pre yagl i nem mam kudugl goglsre, Ye yagl denbigl moglkwa. Yene di prio di, yegl dibrika.
24Ana Farisi yoba yagl ta gumuglo okna kin yogwa ikra aglke kor agle didre, ye di te, yegl digwa, God swara kagie kade to! Yagl kimagl erukwa ikra tadaglme yoba moglmedi pre pogl sumniwe digwa. 25Yegl digo, yagl i di ikne ede, Ye tadaglme yoba moglmo mo moglkrumo mo i, na ta pre pogl sikrika. Ba na taragl swara ta pre pogl siga i, yegl paugwa, na gumuglna okna kin yogwa ba erme na kan pogl siwe dugwa.
26Dugo, Farisi yoba ye aglke kor yegl di prikwa, Ye ene siragl ere tome? Ye siragl mere ersre, ene gumugln ere wakai ere tome? digwa. 27Yegl digo, ye di ikne ede, Na ene di te kodiga ba ene prikrikwa. Ene siragl pre aglke kor pramnedi prime? Ene ama yagl i duglo beglkwa yoba moramnedi primo? dugwa.
28Ye yegl dugo, Farisi yoba ye kenaglmo podo sidre, yegl digwa, Ene yagl i duglo boglnga paugwa ba no Moses duglo bunga yoba munga. 29No pre pogl sumga i, God Moses ka di tomedi prumga ba yagl i aglo mere mogl ugwa i, no ta pre kan erekrumniwe digwa. 30Yegl digo, yagl i di ikne ede, yegl dugwa, Digwa i na nagna podo koglka. Yagl i na gumuglna ere wakai ere narukwa be ye aglo mere mogl ugwa i, ta prikrimo? 31Tadaglme yoba agle di primere God ere tekrukwa i, nono prumga. Ba yoba ta God kuduglmo goglsre, God yoba eraiglmedi prumere mere yegl erabuka i, God ye agle di prabere ere tenabuka. 32Te, ene prio! Mana na kuglmara gumuglna kin yogo, ye gumuglna ere wakai ere narukwa i, taragl yegl mere okna ege swara ta plau dugo, kankrumga. 33God ye yagl i dedekruma, ye kogon yegl mere ege swara kaima ta erekruko, we dugwa.
34Yegl dugo, Farisi yoba di ikne ede, yegl digwa, Man ene kuglkwa igne, ede u erme pra, tadaglme mabuno ene motnara kau sugwa. Ene yegl mere moglsre, ka beke notno? digwa. Yegl didre, ye si meda ede, okuo ka mabuno yugu yugugl ta ukrabiwe digwa.
Yoba ta Jisas pre mediglkrikwa i, ye gumuglno kin yogwa mere yegl meglkwa
35Ana Farisi yoba ye yagl i si meda edigwa i, yoba Jisas di teigo, prukwa. Ye prisre, yagl i doko kan, ye di pre, yegl dugwa, Ene Yoba Wam pre mediglno? dugwa. 36Yegl dugo, yagl i di ikne ede, Yagl Kade yo, ye ira moglme? Ene di natn, na ye pre medraluwe dugwa. 37Dugo, Jisas ye yegl di togwa, Ye kan kodinga. Na erme ene ka di te moglka i, na Yoba Wam moluwe dugwa. 38Dugo, yagl i yegl dugwa, Yagl Kade yo, na pre mediluwe dugwa. Didre, Jisas goglko bodugl tedre, ye kagie kade togwa.
39Yagl i yegl eruko, Jisas ere mogl, ka ta yegl dugwa, Na ede makandigle wiga i, na yoba kan yubu sinagledi wiga. Yoba gumuglno kin yogwa i, kanibi, yoba ta kan pogl sumnedi prikwa i, gumuglno kin yenabedi wiwe di, Jisas yegl dugwa. 40Jisas yegl dugo, Farisi yoba tau magigl meglkwa i prisre, Jisas di pre, yegl digwa, No gumuglno kin yomedi pitnga pre dino? digwa. 41Yegl digo, Jisas ye di tedre, Ene gumuglno kin yenan, ene tadaglmeno ta paikrabuka ba ene digwa i, no taragl mudu kan pogl sumniwe digwa pre ene tadaglmeno pai moglmiwe di, Jisas yegl dugwa.
Valgt i Øjeblikket:
Jon 9: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission
