Luk 11
11
Jisas duglo beglkwa yagl kamage eraiglmere beke togwa
(Matyu 6.9-15, 7.7-11)
1Ana Jisas dumo swara ta moglsre, kamage ere moglkwa. Ye kamage ere kodugo, ye duglo boglkwa yagl ta ye di te, yegl dugwa, Yagl Kade yo, Jon ye duglo beglkwa yoba kamage eraiglmedi beke tomere yegl, ene ama no kamage eraiglmedi beke noratnedi priwe dugwa. 2Yegl dugo, Jisas ye duglo beglkwa yagl yegl di togwa, Ene kamage eraiglkwa igne, ene yegl eraiglkwa,
Neno Kade yo, ene kagn pere kaima padre, mina kaima panabedi prumga.
Te, ene king moratnga igne i tabre plau dinabedi prumniwa.
3No kaya mokna ege swara swarade ta nenamnere mere noro.
4Te, no tadaglmeno kide kodo noro.
Siragl pre yoba aglau ere norikwa igne, no ama aglauno kide kodo tomniwa.
Te, yagl kide no kinano si dinabedi eratnedi prumniwe di,
ene kamage yegl eraiglmiwe di, Jisas yegl dugwa.
5-6Ana Jisas ye duglo beglkwa yoba ka ebrie ta ama yegl dugwa, Ene ta moraiglmara yoba ye neigwa bage ta wan mogl, eduer suna ta ene meglmara wibi, kaya mokna tenaiglkwa ta manan, ene siragl eratne? Ene pi yoba kabagleno magigl kipainaiglmara pidre, dua sidre, Agra yo, na ibuna ta paugwa pre bret suota naratnedi wiwe di, kira pogln, 7ye yugugl mogl, di ikne ede, Na uglna yokinga kodo, dua si gi di kodo, gagrama bogl ugl pamga pre dinere ta ere tekragle di, yegl dinabuka. 8Yegl dinabuka ba ene prio. Yagl i ene dinere ere tenabuka i, ene kabaglenen moglkwa pre ake ple di tekrabuka ba ene agai goglkre, yugu dua aimadi si motnga pre ene dinere ere tenabiwe di, Jisas yegl dugwa.
9Yegl pre na ene di teiga, Ene taragl tau pre God agle di pribi, ene tenabuka. Ene taragl ta dokibi, ene kanaiglkwa. Te, ene dua mina sibi, God dua yauro tenabuka. 10I siragl pre yoba mudu God agle di prikwa i, ye dimere igwa. Te, yoba taragl ta doko meglkwa i, ye taragl i kanigwa. Te, yoba dua mina sigwa i, God ye dua yauro tomiwe dugwa.
11Ene gak nenoma meglkwa i, ene wano ta ere mogl, buglo bagle ta nenagledi prie dinan, ene ye toki ta tenatno? 12Mo, ye kodowagle muglo pre dinan, ene ere mogl, buglage kide ta no sugwa i, tenaiglmo? Ta tekraiglkwa. 13Ene prio, ene yoba kide meglkwa ba ene gagroma taragl wakai te kanimiwa. Yegl pre Neno Kade heven ibo moglkwa i, yoba ta ye di prabuka i, ye ka kaima Mudu Murubuglo yoba i tenabiwe di, yegl dugwa.
Farisi yoba Jisas Satan yobuglo togo, kogon erume digwa
(Matyu 12.22-30, Mak 3.20-27)
14Ana aglke ta murubuglo kide yagl ta moglmara suna moglsre, ka dikrabedi eruko, Jisas murubuglo kide i, di meda edugwa. Ye di meda edugo, yagl i ka dugwa pre yoba mere kide kandre, nagino keglkwa. 15Ba yoba tau yegl digwa, Ye murubuglo kide di meda edugwa i, Belsebul murubuglo kide bitno moglkwa ikra, yobuglo togo, murubuglo kide di meda edumiwe digwa. 16Yegl digo, te tau Jisas eran, kanamnedi yegl digwa, Ene God yobuglomo idre, kimagl ta etn, pre medramniwe digwa. 17Ana Jisas ye nomano siragl mere paugwa i kan kodidre, ye yegl di togwa, Yoba ta dumo swara ta moraiglkwa i, yene si buno di ede suo pidre, kuda beglbi, dumono u kide pi kodinabuka. Mo, yoba bormai swara meglkwa i, yene ikne ikne kuda beglbi, ye ama u kide enaiglkwa. 18Kuno yegl mere Satan yugobunomo mina yene kuda beglbi, ye yugobunomo i dudunabuka pre ene Belsebul yobuglo naruko, murubuglo kide di meda edume digwa i, kuno erekrumiwa. 19Te, ene kogono yoba ama murubuglo kide di meda edime digwa i, ye Belsebul yobuglo togo, di meda edime ta dikrikwa. Yegl dibi, ene ka tage tenaiglkwa. Ene na pre Belsebul yobuglo naruko, murubuglo kide di meda edume digwa i, ta kuno erekrukwa. 20Ba ene prio! Na murubuglo kide di meda ediga i, God yobuglomo mina erika pre God ene kingno mogl, suglno morabuka igne i ene meglmara u kodumedi prio! di, Jisas yegl dugwa.
21Didre, Yagl Kide yobuglo podo paugwa i, ye kuda gaglsre, yugumo sugl moran, ye taraglmo mudu kuno ere yenabuka. 22Ba yagl ta yobuglomo podo pai, ye egre atne edugwa i ta unan, ye yagl i yobuglo ere tedre, kuda taraglmo i eglke edidre, ye taragl tau kan nogwa i, mudu i pi yoba pere tenabiwe di, yegl dugwa.
23Yoba ta na bogl akie moglkrumga i, ye na kudana ikne ta moglkwa mere yegl paugwa. Te, yoba ta na ake ple di narekrukwa i, ye yoba si pere pere edugwa mere yegl pamiwe dugwa.
24Jisas ka ta ama yegl dugwa, Murubuglo kide ta yoba ta moglmara kide kodidre, ede meda enan, ye dumo ta wau yei, kugla di yomara suna wan mogl, dumo wakai ta ye wakan morabuka i dokinabuka ba ye ta kankrabuka. Yegl pre ye ere mogl, yegl dinabuka, Na yugu ta okna kipaimara ikra, ede ikne enaluwe dinabuka. 25Yegl didre, ede ikne enan, ye kanabuka i, yugu nem yugu i brum didre, ere wakai ere kodugwa mere yegl pamedi kanabuka. 26Ye yegl kandre, pi murubuglo kide 7-pela mabuno kide mina ede okna eigwa i, ama doko inan, ye akie ede ikne unaiglkwa. Ye ede ikne u yoba ta murubuglo kide ye moglmara kide kodo ede ogwa i, moglmara suna moraiglkwa. Yegl eribi, yoba i u kide kaima enabuka. Ye okna kide moglkwa ba okuo kide kaima morabuka mere yegl pamiwe di, Jisas yegl dugwa.
27Ana Jisas ka yegl di moglko, yoba mere kide ye kamo pre meglmara suna i, abu swara ta ka podo yegl dugwa, Abu ta ene kuglsre, am togwa i, God ye ere wakai ere tenabiwe dugwa. 28Ye yegl dugwa ba Jisas tabre di ikne ede yegl dugwa, Ta manga ba yoba ta God kamo prisre, duglo beglkwa i, God ye ere wakai ere tenabiwe dugwa.
Yoba tau Jisas kimagl eran, kanamnedi prikwa
(Matyu 12.38-42, Mak 8.12)
29Ana yoba mere kide ede Jisas moglmara enamnedi ere meglko, Jisas ere mogl, yegl dugwa, Yoba yugobuno erme meglkwa i, u kide pi kodimiwa. Na kimagl ya diu ta etn, kanamnedi prikwa ba na ta erekraglka. Na taragl swara ta eribo, kanaiglkwa i, Jona okna erumere yegl eribo, kanaiglkwa. 30Taragl ta Jona moglmara plau dugo, Ninive yoba kandre, nomane imere yegl, na Yoba Wam moglka i, ama yegl eribo, yugobuno erme meglkwa i kanaiglmiwe dugwa.
31Te, God yoba ka tage tenabuka igne, abu dumo Shiba kwin moglkwa ikra, ama adiglsre ene yoba yugobuno erme meglkwa i mabunono kide pamedi i nogugl edenabuka. I siragl pre king Solomon nomanemo wakai pame digwa pre abu kwin i, ye dumo eglke kaima moglsre, u Solomon ka dinan, pragledi ugwa. Ba na kade mogl, king Solomon nomanemo egre teiga moglka i, magigl akie munga ba na kana prakirikwa.
32Te, ege i plau dinan, Ninive yoba ama adiglsre, ene yoba erme meglkwa i mabunono kide yomedi i nogugl edenaiglkwa. I siragl pre Jona ye Ninive yoba meglmara pi God kamo di togwa igne, ye mudu nomano yake teigwa ba na erme yagl kade mogl, Jona egre teiga i, ene nomano yake tenakrimiwe di, Jisas yegl dugwa.
Yoba gumuglno i, ken lam mere yegl paugwa
(Matyu 5.15, 6.22-23)
33Ana Jisas ka yegl di kodidre, ama yegl dugwa, Yoba ken gagl yu bogl atne yeimo? Mo, degigl gagl ta yu ken bolamugl yei, si bi dimo? Ta manugwa ba bogl mina padigl, nogugl yeigo, yoba ede yugugl wigwa i, abuglagemo kanigwa. 34Ana ene gumuglno paugwa i, ken lam mere yegl padre, ene ogono nagino mudu abuglage si tenabuka paugwa. Ene gumuglno wakai panan, ene ogono nagino mudu panabuka i, abuglage sinabuka. Ba ene gumuglno kide eran, ene ogono nagino mudu mim erabuka. 35Yegl pre ene kan kun erio. Kowai ene kaima mim mina moglsre, no munara abuglage sumedi praiglkwa i, i kide panabuka. 36Ba ene ogono nagino pamara i, ikne ta mim erekre, mudu abuglage sinan, i wakai panabuka. Ken lam ta abuglage si, ene meglmara edumere mere yegl, ene ogono nagino mudu abuglage si panabiwe di, Jisas yegl dugwa.
Jisas ye Farisi yoba ya God lomo beke teigwa yoba yubun inaiglme dugwa
(Matyu 23.1-36, Mak 12.38-40, Luk 20.45-47)
37Ana Jisas ka di moglko, Farisi yagl ta ere mogl, Na kipaimara un, kaya mokna akie nenabugledi priwe dugwa. Yegl dugo, Jisas ye kipamara pidre, kaya mokna nenagledi ame di moglkwa. 38Jisas ame di moglko, Farisi yagl i ye ogo nigl koglkre, kaya mokna nenagledi erumedi kandre, nagie koglkwa. 39Ye nagie koglko, Yagl Kade Jisas ere mogl, ye yegl di togwa, Ene Farisi yoba meglkwa i, kap ya dis meda nigl keglkwa ba deglbi suna yogwa i, nigl kogl koko edekrikwa. Na diga i, ene ogono nagino meda yogwa i, yoba wakai yomedi kanigwa ba ene deno muduno atne i, mabuno kide kau sugo, ene taragl kane kane bubuno geglkwa. 40Ene du erikwa paugwa. Yoba ta ene ogono nagino beke yogwa i, ye ene deno muduno ama beke yogwa. 41Ba ene deno muduno atne i, deglbi yeikrabedi pribi, ene goduglme yoba ake ple di tenamendi taraglno i pi teo. Ene yegl eribi, ene meglmere mudu pe sinabiwe di, Jisas yegl dugwa.
42Jisas yegl didre, ama yegl dugwa, Ene Farisi yoba meglkwa i, yubun podo inaiglkwa. Ene siragl kebra kide kaima ede yaudo demene erukwa gaden mina paugwa i, br boglsre, swara ta i pi God teigwa wakai ersre, lo duglo bunedi prikwa ba ene yoba mabuno du ere tenaiglkwa ya God wakai kanaiglkwa i, i taragl podo paugwa ba erekrikwa. Ene taragl podo eraiglkwa paugwa i ersre, taragl kebra eraiglkwa ama eribi, i wakai panabiwe dugwa.
43Ene Farisi yoba meglkwa i, yubun podo inaiglkwa. I siragl pre ene ka mabuno yugu makai simara i, sia wakai yoba gumuglnomugl yeigwa i mina ame dinamnedi prisre, maket wan meglkwa igne, yoba ene di wakai yei teigo, ene gun yeimiwe dugwa.
44Ene Farisi yoba meglkwa i, yubun podo inaiglkwa. Yoba ta goglko, ye ogo nagie i pi maugl sidre, padiglmara i bro pamedi kankrimere mere yegl meglkwa. Yoba gigl pene yomedi kankre, tebe egrimere mere yegl, ene deno muduno deglbi kau sugwa i, yoba ama kankrikwa pre diwe di, Jisas yegl dugwa.
45Ana Jisas ka yegl dugo, God lomo beke togwa yagl ta di ikne ede yegl dugwa, Tisa, ene Farisi yoba ka tenara i, no ama kenaglno siniwe dugwa. 46Yegl dugo, Jisas di ikne ede, yegl dugwa, Ene God lomo beke teigwa yoba meglkwa i, ene ama yubun podo inaiglkwa. I siragl pre ene God lomo mudu duglo bolo dimara i mina yoba yubun podo kaima kakenaiglmedi teigwa ba ene kuri kaima ta ikne ake ple di tekrimiwe dugwa.
47Ene yubun podo inaiglmiwa. I siragl pre ene God kamo kep yoba maugl simara yugu kor kei teigwa i, enene kowano awano yoba i si geglkwa pre kuno erekrukwa. 48Ye gigl peneno kor kei teimara i mina ene kowano awano bogl deno muduno swara yei, akie ye si geglkwa mere yegl i nogugl edimiwe dugwa.
49Ene mabunono kide i pre God yene nomanemo du pamara i mina yegl dugwa, Na ka kep yoba ya dediga yoba akie Israel yoba meglmara enaiglmedi dedibo, Israel yoba tau ere kide ere tedre, tau si goraiglmiwe di, God yegl dugwa. 50Oknayene ibo God dumo makan ere yogwa igne ede u ege erme pra, God kamo kep yoba siramna ta si gogl wimara i, ene yugobuno erme meglkwa i, u kide kaima pidre, mabuno kaima moraiglkwa. 51God kamo kep yoba ta komono kana si geglkwa i, Abel si geglkwa. Yoba Abel si goglsre, God kamo kep yoba tau mere si gogl wimara i, okuo kaima yagl Sekaraia, ye tawa bogl yomara ya God yugumo yomara suna i moglko, yoba ye si geglkwa. Na ene ka kaima di teiga, God kamo kep yoba mudu i si geglmara i, ene yugobuno erme meglkwa i, God topo kide tenan, inaiglkwa pamiwe di, Jisas yegl dugwa.
52Jisas yegl didre, ama yegl dugwa, Ene God lomo beke teigwa yoba meglkwa i, yubun podo inaiglmiwe dugwa. I siragl pre ene nomane wakai inamnedi erekre, yoba tau ama i dinaiglmedi dua yogugl tedre, dua kimo ama i eglke edimiwe di, yegl dugwa.
53Ana Jisas ka yegl di kodidre, dumo i kide kodo, ede ogwa. Ede ogo, mokomugl i God lomo beke teigwa yoba ya Farisi yoba ye deno podo kubro tedre, ka kane kane mina Jisas kira pogl prikwa. 54Jisas ka dinabara i, ka ta aglau ere dinan, kot ere tenamnedi ka di koglsre, kira mere kide peglkwa.
Valgt i Øjeblikket:
Luk 11: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission