Luk 14
14
Yagl ta ogo kagle yakugwa i, Jisas ere wakai ere togwa
1-2Ana ege swara ta, wakan kade ege yogo, Jisas Farisi yoba akie kaya mokna nenamnedi ede Farisi bitno yagl ta kipamara ogwa. Ana Jisas yugugl ame di moglko, yagl ta ogo nagie yakugwa i, Jisas gumamugl adigl moglko, Farisi yoba Jisas aglau ta erabo mo di, kan meglkwa. 3Kan meglko, Jisas ye God lomo beke teigwa yoba ya Fairisi yoba yugugl meglkwa i, yegl di prukwa, God lomo mina wakan kade ege kimagl ere, yoba ere wakai ere tomun, kuno erabo? dugwa. 4Jisas yegl dugo, yoba ka ta di ikne edekrikwa. Di ikne edekriko, Jisas ye yagl ta kide sugwa i akidre, kidemo ere wakai ere te, dedugo, ede ogwa. 5Ede ogo, Jisas kira pogl, yegl di togwa, Ene wan mo ene kau kuglnga i ta yage sidre, maugl nigl atne moran, wakan kade ege yogwa pre ene kanige eratno? Ta manugwa. Ene tabre ye ake i meda edinatniwe dugwa. 6Jisas yegl dugo, ye di ikne edenaiglkwa i, ibun dogwa pre ka swara ta dikrikwa.
Jisas yoba mogl atne edinaiglkwa pre dugwa
7Ana Farisi yagl kaya mokna nenamnedi yoba di gaglko, wigwa i, ye gu bogl, sia gumamugl keme ame dinamnedi eriko, Jisas kandre, ye ka ebrie ta yegl di togwa, 8Yagl abu ta bogl inabredi kaya mokna podo ere, ene ta di gaiglbi, en, ene gu bogl, sia gumamugl wakai ta yogwa i, ame dinagledi erekro dugwa. Kowai sia gumamugl yogwa i, yoba ta kagie podo paugwa ta morabedi sia yeigwa panan, 9yagl kade i unan, yoba di gaglkwa i, Ene we, sia yagl i tedre, bage ta ame do dinan, ene agai goglsre, pi yoba mokonomugl ame dinatnga paugwa. 10Ba ene ede yugugl pidre, mokonomugl ame di motn, yoba ta ene di gaglkwa i udre, ene yegl di tenabuka, Agra yo, ene u sia gumamugl ame do dinan, pra yoba mere gumuglnomugl i, ene kandre, yagl kade ta motnedi kanaiglkwa. 11I siragl pre yoba ta yene mogl mitna edenabuka i, God ye ake atne edenabuka. Ba yoba ta yene mogl atne edenabuka i, God ye ake mitna edenabiwe dugwa.
Yoba ta ere wakai ere norokraiglkwa meglkwa i, ere wakai ere tenamga paugwa
12Jisas ka yegl di kodidre, Farisi yagl ta ye di gaglkwa ikra yegl di togwa, Ene kaya mokna kebra mo kade ta gaglsre, yoba akie nenamnedi di garagledi etn, Yoba kabaglenen ya agiglnma ya yoba bormai swara meglkwa ya yoba mige moni podo ere neigwa magigl kipanaiglkwa i, di gaglkro. Aglau eran, ege swara ta ene etnere i, ere te ikne edibi, topo makandigle pra inga mere yegl panabuka. 13Ba ene kaya mokna podo kenatnga igne, yoba goduglme meglkwa ya yoba kide sigwa ya ogono kaglno kide erukwa ya gumuglno kin yogwa ya ki di gaglo. 14Ye ta te ikne edekraiglkwa meglkwa pre God gumuglo mina yoba du meglkwa adraiglkwa igne, God yene topo tenan, ene gun podo yenatnga pre diwe di, Jisas yegl dugwa.
Kaya mokna podo ta keigwa ka ebrie
(Matyu 22.1-10)
15Ana Jisas ka ebrie yegl dugo, yoba kaya mokna ne meglmara suna i, yagl swara ta Jisas yegl di togwa, God yoba kingno mogl, suglno morabuka ege i, yoba ta akie mogl, kaya mokna nenaiglkwa i, gun podo yenaiglmiwe dugwa. 16Yegl dugo, Jisas ye yegl di togwa, Yagl swara ta kaya mokna podo garagledi ersre, yoba tau mere akie nenamnedi di gaglkwa. 17Di gaglsre, kaya mokna gaglkwa, dogo, nigl kogon yagl i dedidre, pi yoba i di yunabedi dedugo, ogwa. 18Ye niglmo kogonmo yagl pi yoba di togwa ba ye mudu kaima ukramnedi konbauna dokigwa. Komono ta di prukwa i, yegl di togwa, Na we, erme makan kor ta topo siga pre makan i pi kanaglka pre ta ukraglka pamiwe dugwa. 19Te, yagl ta ama yegl dugwa, Na erme kau kumugl 10-pela topo erika pre kogon eraiglmara i, nana sugl moglbo, kogon eraiglkwa pre ta ukraglka pame dugwa. 20Te, yagl ta ama yegl dugwa, Na erme keme abu ta iga pre na unaglka i, kuno ta erekrabiwe dugwa.
21Ana nigl kogon yagl ede ikne u ye dimere mere ye yaglmo kade boglo kugl togo, yagl kade i dem boglko, ye yegl di togwa, Ene we, kogon yoba tau idre, tabre ede pi taun suna wan mogl, konbo kade ya kebra mina goduglme yoba ta moraiglkwa i ya te, yoba kide sigwa mo ogono kaglno kide erukwa mo gumuglno kin yogwa i, mudu auro yuio! dugwa. 22Yegl dugo, ye niglmo kogonmo yoba ikra ye dumere ersre, ede ikne u yegl dugwa, Yagl Kade yo, no ene dinere erumga ba agai mudu yoko yome dugwa. 23Yegl dugo, yagl kade ye niglmo kogonmo yagl i yegl di togwa, Ana ene ede ikne pidre, taun meda konbo kade ya togl bina bina di gagl yuo! Na yuguna kau sinabedi yoba mudu pra pra kanaiglkwa i, auro yunamnedi ka gigledi di teo dugwa. 24Na ka kaima dinaglka i, yoba okna di gaglka i, swara kaima ta u na kaya mokna erme ere yeiga i, kebra kaima ta ne prikrabiwe di, yagl kade i yegl dume dugwa.
Yoba wakai ere kinano gudu prisre, Jisas duglo boraiglkwa paugwa
(Matyu 10.37-38)
25Ana Jisas konbauna ede ogo, yoba mere kidine ye mokomugl sika sigo, Jisas kan ake tedre, ye yegl di togwa, 26Yoba ta na moglmara udre, na duglo boglkwa yoba ta moragledi pran, ye nem mam morabrika mo, ebie gagiglma moraiglkwa mo, agiglema abaugloma moraiglkwa i, ye mudu wakai kankre, na swara wakai kanaiglkwa paugwa. Te, yene ama kor wakai moragledi pran, ye na duglo boglkwa yoba ta moglkrabuka. 27Te, yoba ta na pre gorakiure, ye ede prak ta tebi, kakekragledi mane di pran, ye ama na duglo boglkwa yoba ta moglkrabiwe dugwa.
28Jisas yegl didre, ama yegl dugwa, Yagl ta yugu podo kide kaima ta kenagledi pran, ye komono kana wakai ere kina gudu prisre, yugu siragl mere kei kodinabere mere mige moni kuno yomo mo di, pre yubu sinabuka. 29-30Kowai na ta kei kodokre, ikne keme ta keibo, Yoba i kogon ere kodinabuka kere dikrumiwe di, na gauglna ere dinaiglmedi pre epigl sinabuka paugwa.
31Jisas ka ebrie ta ama yegl dugwa, King ta soldia 20,000 kugl nogwa idre, king ta kuda bogl tenagledi konbo bage u moran, king solida 10,000 kugl nogwa i, ka sigie dibi, prisre, ye siragl mere kuda bogl tedre, yobuglo erabere mere komono kana kina gudu prisre, pre yubu sinabuka. 32Ye kuda yobuglo erekrabuka mere panan, ye ka sigie edidre, kuda i ta paikrabedi yoba ta di edenan, pi king eglke u pai moglmere pi di tenaiglmiwe di, Jisas yegl didre, ama yegl dugwa, 33Kuno yegl mere yoba ta ye taraglmo mudu moko tenabuka i keme na duglo borabuka kuno erabuka pre ene ama wakai ere kinano gudu prisre, na duglo bolo di, Jisas yegl dugwa.
Mudi u kide ogwa ka ebrie
(Matyu 5.13, Mak 9.50)
34Ana Jisas ta ama yegl dugwa, Mudi yogwa i, taragl wakai yogwa. Ba mudi kuglomo ta dudinan, ene siragl mere kuglomo ere ikne edinaiglme? 35Mudi yegl mere kogonmo okuo ta paikrabuka pre yoba idre, kau de bogl i swara edidre, makan nuglo tenamnedi eraiglkwa i, kuno ta erekrabuka. Ye pia si meda edenaiglkwa keme paugwa. Yoba ta nomane inagledi pran, na ka diga i, ye wakai ere kina gudu prabuka pamiwe di, Jisas yegl dugwa.
Valgt i Øjeblikket:
Luk 14: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission