Luk 17
17
Yoba yage si dinamedi eraiglkwa paugwa
(Matyu 18.6-7, 18.21-22, Mak 9.42)
1Ana Jisas ye duglo beglkwa yagl yegl di togwa, Taragl tau yoba yage sinaiglkwa pre plau dinan, plau dinabuka keme paugwa. Ba yoba ta ere mogl, yoba pere ta yage sinabedi eran, ye yubun podo inabuka. 2Gak kebra magigl meglkwa i, yoba ta yage sinabedi eran, ye yubun podo kide inabuka. Yoba ta ye nugu mina kobuglo podo ta kan kogl padigl, pia si mudi nigl atne edibi, yuwaglke panabuka ba God ye ka tage tenabuka i, podo kide panabuka.
3Ene agitn tadaglme ta eran, ene aglau etniwe di to. Ene di ten, ye nomane yake tenan, ye tadaglmemo koko ede to. 4Te, ye ege swara mina ene ege 7-pela taim mere aglau ere tedre, ege 7-pela taim mere ene motnara u, Nomana yake teiwe dinan, ene ye tadaglmemo kide kodo te pai moglo di, Jisas yegl dugwa.
Yoba pre medigl moglsre, taragl podo eraiglkwa pre Jisas dugwa
5Ana Jisas dedugwa yoba Jisas di tedre, No pre medunga i, u podo enabedi eratnedi prumniwe digwa. 6Yegl digwa ba Jisas tabre di ikne ede te, yegl dugwa, Ene pre mediglkwa i, kebra panan, ene ama taragl podo eraiglkwa. Ene pre mediglkwa i, mastet mogo ta kebra kaima yomere yegl panabuka ba ene pre medigl moglsre, ede ta magigl paugwa i di te, Ene duglanen bogl makan magigl i kide kodo, ede mudi nigl suna ibo po ta dibi, ene dinaiglmere mere erabuka pamiwa.
Jisas boi paigwa ya bitno yoba mabunono pre dugwa
7Nigl kogon yoba yaglmo kade kogon tenabere ere wan mogl, ikne unabuka igne, ye tabre ame didre, kaya mokna nekrabuka. 8Ye yaglmo kade kaya moknamo komono kana gagl suru tedre, okuo yene kaya moknamo nenabuka. 9Te, yaglmo kade tabre niglmo kogonmo yoba debie sikrabuka. Siragl pre ye kogonmo pamere erumedi prukwa. 10Kuno yegl mere, ene na kana prisre, duglo beglkwa igne, No kogon wakai erumga pre debino suo ta dikraiglkwa ba kogono pamere keme eunedi prio di, Jisas yegl dugwa.
Yagl 10-pela leprosi paigwa i, Jisas ere wakai ere togwa
11Ana Jisas ede Jerusalem enagledi distrik Galili ya distrik Samaria yebrara ede suna ogwa. 12Ye ede suna pidre, yugu togl yeimara ede suna ogo, yagl 10-pela kide leprosi paugwa i, eglke iro mogl, Jisas kandre, 13ye ka podo di te, yegl digwa, Yagl Kade Jisas yo, ene no mitno goglo digwa. 14Yegl digo, Jisas yagl 10-pela i kandre, ye di te, yegl dugwa, Ene pi tawa teigwa yoba meglmara pidre, ogono nagino obuno di teo dugwa. Yegl dugo, ye ede eigo, ye konbauna eimara i, ogono nagino tabre u wakai ogwa. 15U wakai ogo, yagl swara ta ogona nagna u wakai omedi kandre, God kagie kade tenagledi ka podo didre, ede Jisas moglmara ogwa. 16Ye u Jisas kagle mina yage kobragai padre, ye di wakai yei togwa. Te, yagl i, Samaria yagl ta moglkwa. 17Ana Jisas yagl i kandre, yegl dugwa, Na prika i, yagl 10-pela ogono nagino u wakai omedi prika. Yagl 9-pela meglkwa i, tau ede aglo eime? 18Juda yoba moglkrukwa i keme ede ikne udre, God di wakai yei togwa i, kuno erekrumedi prie dugwa. 19Jisas yagl i yegl di togwa, Ene adigl, ede po. Ene na pre mediglnga pre ene ogon nagn erme u wakai omiwe dugwa.
Jisas ede ikne unabuka pre dugwa
(Matyu 24.23-28, 24.37-41)
20Ana Farisi yoba tau Jisas di pre, God yoba kingno mogl, suglno morabuka i, aunake plau dinabe? digwa. Yegl digo, Jisas di ikne ede yegl dugwa, God yoba kingno mogl, suglno morabuka i, ene taragl tau kandre, ege i umiwedi praiglkwa i ta paikrukwa. 21Te, yoba ta ere mogl, God yoba kingno moglmara i, magigl i plau dumiwe didre, eglke iro plau dumiwe ta dikraiglkwa. I siragl pre God yoba kingno morabuka igne i ene meglmara kwande u kodugwa mere yegl pame di, Jisas yegl dugwa.
22Ana Jisas yegl didre, ye duglo beglkwa yagl yegl di togwa, Na Yoba Wam moglka i, na egena plau dinan, ene na kaima kanamnedi praiglkwa ba ene na kaima ta kankraiglkwa. 23Ege i, yoba tau ene yegl di tenaiglkwa, Ene kanio! Ye magigl i moglmiwe didre, Ye eglke iro moglmiwe dinaiglkwa. Ba ye yegl dinaiglkwa i, ene ye duglo boglkre, pi kankraiglkwa. 24I siragl pre na egena unan, na Yoba Wam moglka i, ede ikne unaglka igne, na nogugl wibo, yoba kanaiglmiwa. Kamun tai dumo swara keme sugo, kamun kua mudu abuglage sumere mere na wibo, yoba mudu kanaiglkwa. 25Ba komono kana na giugl tau mere inaglka paugwa. Yoba yugobuno erme meglkwa i, mokono naraiglkwa pai moglmiwe dugwa.
26Jisas yegl didre, ama yegl dugwa, Na Yoba Wam unaglka i, Noa egemo yomere yegl panabuka. 27Noa egemo yoba kaya mokna podo nedre, gun yei, abu idre, abroma yagl tedre, ere meglkwa. Ye pra munedi ere meglko, Noa ede sip yugugl ogo, nigl kamun podo sidre, ye mudu si goglkwa. 28Te, Lot egemo kuno yegl yogwa. Yoba kaya mokna nedre, gun yei, taragl tau topo sidre, taragl tau topo boglsre, kaya mokna ere yagl, yugu akie keigwa. 29Ye pra munedi ere meglko, Lot dumo Sodom kide kodo ede ogo, doga ya kobuglo tau de bauglo ere paugwa i, kamun mitna yage sidre, yoba mudu i si goglmiwe dugwa. 30Na Yoba Wam ede nogugl unaglka igne i ama kuno yegl mere panabiwe dugwa.
31Jisas ama yegl dugwa, Ege i plau dinan, yoba ta yugu indaule moran, ye taraglmo ta yugugl yenabuka i, inagledi ede yugugl pikre, teke ede enabuka paugwa. Te, yoba ta kaya mokna ere yaglmara kogon ere morabuka i, ye taraglmo pre kan ikne edekrabuka paugwa. 32Lot ebie kan ikne edugo, siragl taragl ye moglmara plau dugwa i, ene pre meglkwa. 33Yoba ta makandigle mogl kor moragledi eran, ye gorabuka. Ba yoba ta Na goraglka i, taragl kebra yomedi pran, ye kaima kor morabiwe di, Jisas yegl dugwa.
34Jisas yegl didre, ama yegl dugwa, Ege i, eduer plau dinan, bogl swara mina yoba suo pai miur, na swara ta auro i ede ebo, ta pai morabuka. 35-36Te, abu suo wit mogo akie si deduagle ere miur, na swara ta auro i ede ebo, ta yoko morabiwe dugwa. 37Jisas yegl dugo, ye duglo beglkwa yoba prisre, ye di pre, yegl digwa, Taragl yegl mere plau dinabe dinga i, aglo mere plau dinabe? digwa. Yegl digo, Jisas di ikne ede yegl dugwa, Yoba ta goran, ye ogo nagie aglo mere ta yenabara i, kua kigla u dumo i makai sidre, i nogugl edenaiglmiwe dugwa.
Valgt i Øjeblikket:
Luk 17: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission