Mak 14
14
Yoba kade Jisas si goramnedi konbo dokigwa
(Matyu 26.1-5, Luk 22.1-2, Jon 11.45-53)
1Ana ye ege suo meglbi, God ye okna ibo Israel yoba oglo sugwa pre meglkwa igne ikra ya te, bret yis edekre, gagl neigwa ege kade i, plau dinabuka. Yegl eruko, igne i tawa teigwa yoba bitno meglkwa i ya te, God lomo beke teigwa i, ye Jisas siragl mere ugl mage ere, si akidre, si goraiglmere pre konbauna doko wan meglkwa. 2Ba ye digwa i, Ege kade yoba makai sinaiglkwa igne Jisas ta si kane sikramga paugwa. Ta si kane sumun, kowai yoba kide prisre, kuda eramnedi eribi, kide panabiwa.
Abu ta kugo nuglo ta demene wakai erukwa toide Jisas bre mina edugwa
(Matyu 26.6-13, Jon 12.1-8)
3Ana Jisas dumo Betani moglsre, ede pi yagl ta kagie Saimon we digwa i, kipamara yugugl ogwa. Yagl Saimon i, okna sik leprosi paugwa. Ana Jisas kaya mokna nenagledi ame di moglko, abu ta nigl migi kobuglo mina bekigwa ta idre, ugwa. Nigl migi atne i, kugo nuglo ta demene wakai erukwa ta kagie nard we digwa moglkwa. Te, kugo nuglo i, mige podo boglkwa. Ana abu i, ede Jisas moglmara u kugo migi i dra mina si buko di, kugo nuglo toide bre mina edugwa. 4Toide bre mina edugo, yoba tau Jisas bogl akie yugugl meglkwa i kandre, kide pre, yegl digwa, Abu i kugo nuglo yoko toide yar edugwa. 5Ye kugo nuglo i pi mige boglma, mige silva 300 imna, mige i pi goduglme yoba tomgo we didre, abu i ka teigwa. 6Ka teigwa ba Jisas ye yoba i yegl di togwa, Ene siragl pre abu i yubun teime? Ye mabuno wakai ta ere narukwa. 7Goduglme yoba ene meglmara ege ege moraiglkwa pre ene aunake ta ye ere wakai ere tenamnedi praiglkwa i, eraiglkwa keme paugwa. Ba na we, na ene bogl aimadi akie moglkramga. 8Yegl pre abu i kuno erabara erukwa. Ye kugo nuglo yu toide ogona nagna mina edugwa i, na maugl sinaiglkwa pre erukwa. 9Te, na ene kaima di teiga, yoba ta na kana wakai i pi uglo koglo koglo dinaiglmara i, ye abu i erumere i ama yoba boglo kugl tebi, poglo di praiglmiwe dugwa.
Judas Jisas i pi kuda ikne ogono mina yenagle dugwa
(Matyu 26.14-16, Luk 22.3-6)
10Ana igne i Judas Iskariot, ye Jisas duglo beglkwa yagl 12-pela meglmara i swarano ta moglkwa ye Jisas i pi tawa teigwa yoba bitno meglkwa i ogono wagle yenagledi prisre, ye meglmara ogwa. 11Ye pi meglmara dugo, yoba kade wagle i gun yedre, mige silva tau Judas tenamnedi ka di keglkwa. Ka di keglko, Judas ye ege wakai ta yenan, Jisas auro yu kudamo ikne ogono wagle yenagledi sugl moglkwa.
Jisas duglo beglkwa yagl bogl kaya mokna neigwa
(Matyu 26.17-25, Luk 22.7-14, 22.21-23, Jon 13.21-30)
12Ana yoba bret yis edekre gagl neigwa igne ikra plau dugo, ye sipsip si gogl, tawa tedre, God nono kowano awano oglo sumedi praiglkwa paugwa. Ege i yogo, Jisas duglo beglkwa yagl ye moglmara udre, yegl digwa, God Israel yoba oglo sumedi pre moramnedi kaya mokna nenamga i, no dumo aglo mere ere wakai ere tenamne? digwa. 13Yegl digo, Jisas ye duglo beglkwa yagl suo dedidre, yegl di togwa, Ene ede taun suna ebr, yagl ta nigl migi kake yunan, ene ye tegigl yedre, ene sika si pi 14yugu ta ede yugugl enabara i, ene ama ede yugugl piro. Ene ama pidre, yugu nem kandre, yegl di tero, No tisano ene yegl di prukwa, God nono oglo sugwa i, na duglo beglkwa yoba bogl pre moramnedi kaya mokna nenamga i, agai aglo mere mogl nenamne? di, tisano yegl dumiwe diro. 15Ene yegl dibr, yugu nem ene agre ede kuglo ibo pidre, agai kade ta tenabuka. Ana kiule i tebol ya ki yei, ere wakai ere kodigwa. Ye dumo i ene obuno di tenan, ene dumo i ere wakai eribr, nono kaya mokna akie nenamniwe di, Jisas yegl dugwa. 16Jisas yegl dugo, yagl suo i ede taun suna pidre, taragl kane kane Jisas plau dinabedi dumere mudu plau dugo, kanibrika. Kandre, God ye Israel yoba oglo sugwa i, pre moramnedi kaya mokna ere wakai eribrika.
17 Ana min paugo, Jisas ye duglo beglkwa yagl 12-pela ikra bogl yugu ere wakai erimara ikra ede yugugl eigwa. 18Ede yugugl pi, tebol yomara ame di, winabo di, kaya mokna ne meglko, Jisas yegl dugwa, Na ene ka kaima di teiga, ene meglmara suna i, yagl swarano ta na bogl akie kaya mokna nobuglka i, na i pi kudana ikne ogono wagle yenabiwe di, yegl dugwa. 19Yegl dugo, ye duglo beglkwa yagl deno muduno yubun podo dogo, ye swara swarade Jisas di pre, Na pre ta din we di, yegl digwa. 20Digo, Jisas di ikne ede, yegl dugwa, Yagl diga i, ene na duglo beglkwa yagl 12-pela meglmara suna i moglmiwe dugwa. Ye na bogl akie bret idre, sup swara mina si bai, nobuluwe dugwa. 21Na Yoba Wam moglka i, God kamo dumere yegl na kaima goraglka paugwa ba yagl ta na i pi kudana ikne ogono mina yenabuka i, ye yubun podo inabuka. Ye mam ye ta kuglkruma, wakai paugo we dugwa.
Jisas ye duglo beglkwa yoba bret ya nigl wain togwa
(Matyu 26.26-30, Luk 22.15-20, 1 Korin 11.23-25)
22Ana Jisas duglo beglkwa yagl bogl kaya mokna ne meglko, Jisas bret ta idre, God di wakai yei te, bret i ake buko dugwa. Ake buko di, ye swara swarade nenaiglmedi tedre, yegl dugwa, Bret i idre, neo. I na nagna mere yegl yomiwe dugwa. 23Ana Jisas kap ta wain nuglo atne moglkwa ama idre, ye duglo beglkwa yoba nenaiglmedi tedre, ye mudu neigwa. 24Neigo, Jisas yegl dugwa, Wain nuglo i, na bormaina mere yegl yomiwe dugwa. Na bormaina God kontrakmo ikra pre teiga. Bormai i yoba mere kide pre yage meda sumiwa. 25Te, na ene kaima di teiga, na erme nigl wain nekre, mogl ebo, God yoba kingno mogl, ye suglno morabuka egemo yenan, na aglke kor nenaluwe dugwa. 26Jisas ka yegl di kodugo, ye duglo beglkwa yagl bogl giglage kaima ta didre, yugugl ta meglmara i kide kodo, ede muglo Oliv we dimara eigwa.
Pita ye Jisas pre kan erekriwe dinabuka i pre Jisas di poglkwa
(Matyu 26.31-35, Luk 22.31-34, Jon 13.36-38)
27Eigo, Jisas ye duglo beglkwa yagl yegl di togwa, Erme eduer ene mudu mokono nare, ede pere pere enaiglkwa. Ebi, God kamo okna beglkwa i, kaima plau dinabuka. God kamo bage i yegl dugwa,
Na sipsip sugl moglkwa yagl i sibo, sipsip mudu ede pere pere enaiglmiwe#14.27 Sekeraia 13.7
di, God kamo yegl dume dugwa. Yegl dugwa pre ene mudu na kide kodo, teke ede pere pere enaiglmiwe dugwa. 28Yegl dugwa ba na adigl u kor enaglka igne i, na ede okna u distrik Galili moglbo, tegigl yenamniwe dugwa. 29Jisas yegl dugo, Pita ye di ikne ede te, yegl dugwa, Yoba mudu ene mokono tebi, tenaiglkwa ba na ta tekraluwe dugwa. 30Yegl dugo, Jisas ye di te, yegl dugwa, Na ene kaima di teiga, erme eduer koduagle kumugl wi ege suo ta sikran, ege suota na ye ta kankriwe dinatniwe dugwa. 31Dugwa ba Pita kor dagl ka giglede di, yegl dugwa, Na ene bogl akie gorabuglka mere panan, gorabuglka ba na kaima ene mokona ta tekraluwe dugwa. Pita dumere yegl Jisas duglo beglkwa yagl mudu ama yegl digwa.
Jisas dumo Getsemani pidre, kamage erukwa
(Matyu 26.36-46, Luk 22.39-46)
32Ana Jisas ye duglo beglkwa yagl bogl ede dumo ta Getsemani we dimara eigwa. Eigo, Jisas ye duglo beglkwa yagl yegl di togwa, Ene magigl i ame di molo dugwa. Na ede ido pi, kamage eragle dugwa. 33Ye yegl didre, Pita, ya Jems, ya Jon yagl suota i keme idre, ede ido ogwa. Ede ido pidre, Jisas kide kaima prisre, dem muduo yubun podo kaima dogwa. 34Yegl eruko, ye yagl suota i yegl di togwa, Na dena mudna yubun podo dogo, na goraglka mere yegl paugwa. Ene magigl i ugl paikre, sugl kan molo! dugwa. 35Yegl didre, kuri ta ede iro pi, yage mage di, makan mina emine ere, ye yubun podo kide kaima inabuka i, kide pre, konbauna pere ta yomo mo di, kamage ere, 36yegl dugwa, Nina yo, ene siragl ta eragledi pitnga i, eratnga keme paugwa. Konbauna ta yenan, na nigl kide kogl nenaglka i, i eglke ede naratnedi prika. Ba na nana primere ta erekraglka. Ene pitnere eraluwe dugwa. 37Ana Jisas kamage yegl ere kodidre, ede u ye duglo beglkwa yagl suota meglmara udre, kanugwa i, ye ugl pai meglko, kanugwa. Kandre, Pita yegl di prukwa, Saimon yo, ene ugl pai motno? Ene aua swara keme kor moratnga i, kuno erekrumo? 38Yagl kide ene kinano si dinabedi kor mogl, kamage ere, ugl paikrio. Ene nomano mina wakai eramnedi prikwa ba ene ogono nagino mina yobuglno paikrumiwe dugwa. 39Jisas yegl didre, ye aglke kor ede ikne pi, God kamage ere te, ka okna dumere i, kuno yegl mere dugwa. 40Yegl didre, aglke kor u kanugwa i, ugl pai meglko, kanugwa. Ye ugl podo geglkwa pre ugl paigwa. Ana Jisas u kandre, uglno yokugo, ye Jisas kandre, ye ka siragl mere ye di tenaiglkwa i, prikrikwa.
41Ana Jisas kamage ere kodidre, ege namba 3 ede ikne u ye meglmara yegl dugwa, Ene siragl pre ugl kanana pai meglme? Prio. Ege ikra u kodugwa. Yoba ta na Yoba Wam moglka i, i pi tadaglme yoba ogono mina yei kodumiwa. 42Ene adigl ede wio. Yagl ta na i pi kudana ikne ogono mina yenabuka i, uma, kanio dugwa.
Judas ye Jisas kudamo ikne auro yugwa
(Matyu 26.47-56, Luk 22.47-53, Jon 18.3-12)
43-44Ana Jisas ka yegl di moglko, yoba mere bainet ya kuba ki akidre, wigwa. Wimara suna i, yagl Judas ye duglo beglkwa yagl 12-pela meglmara swarano ta moglsre, Jisas i pi kudamo ikne ogono mina yenabuka yagl ikra akie wigwa. Te, yoba wigwa i, yagl kade wagle tawa teigwa bitno yoba, ya God lomo beke teigwa yoba, ya te Juda yoba kade dedigo, wigwa. Ana Judas komono kana ye di tedre, Na yoba ta pauna si nenaglka i, yoba i moglmedi kandre, ye si ake gi didre, i ede enaiglmiwe dugwa. 45Ana yagl Judas i yoba tau mere bogl akie wigo, yagl i tabre ede Jisas moglmara pidre, Neno Yagle yo didre, pauna si nogwa. 46Yegl eruko, yoba wigwa i kandre, Jisas ake gi di mogl, si kane sigwa. 47Si kane sigwa ba yagl swara ta magigl moglkwa i, bainetmo idre, tawa teigwa yoba bitno moglkwa i niglmo kogonmo yagl ta kina si bugl di edugwa. 48Si bugl di edugo, Jisas yoba mudu i yegl di togwa, Na kunogl gogl yoba ta moglko, ene bainet ya kuba mina na si akenamnedi wimo? 49Na tawa teigwa yugu yomara ege ege mogl, yoba ka beke te moglka ba na si akekrikwa. Ba siragl erme plau dugwa i, God kamo okna beglkwa i mogo korabedi pre plau dumiwe dugwa. 50Yegl dugo, ye duglo beglkwa yagl mudu Jisas moglmara kide kodo, teke ede eigwa.
Yagl kulu ta teke ede ogwa
51 Ana Jisas ye si kane si i ede eigo, yagl kulu ta lap kruo ta were, ogo gagie si bi di, ye eimara mokonomugl ogwa. Eimara mokonomugl ogo, yoba Jisas si kane sigwa i ye kandre, ye si akenamnedi eriko, 52ye lap kruo ikra gugl kide kodo, yokoko teke ede ogwa.
Jisas i pi Kaunsil meglmara edidre, kot ere teigwa
(Matyu 26.57-68, Luk 22.54-55, 22.63-71, Jon 18.13-14, 18.19-24)
53Ana ye Jisas ake i pi tawa teigwa yoba bitno moglmara i edigwa. Edigo, tawa teigwa yoba kade meglkwa i mudu yeigo, Juda yoba yobano kade yeigo, God lomo beke teigwa yoba yeigo, kwade makai si kodigwa. 54Te, Jisas auro i ede eimara i, Pita okuo mokonomugl sika si ede pi tawa teigwa bitno yagl kipamara ede togl suna eimara ede ogwa. Suna pidre, kibr nem tau ede ere gagl, pre meglmara i, ama suna mogl, ede pre moglkwa.
55Ana tawa teigwa yoba bitno meglkwa i, ye Kaunsil bogl mudu makai sidre, yoba tau kot mina Jisas aglau podo yegl erume dibi, si goramnedi dokigwa ba yoba swara yegl mere ta doko kankrikwa. 56Yoba tau mere udre, ka kibi digwa ba ye kano u swara pikrukwa. 57Yegl eruko, yoba tau adigl mogl, ka kibi di, Jisas yegl dumiwe digwa, 58Yagl i, Yoba keme ere mogl, tawa teigwa yugu keigwa i, na si gur di atne ede, ege suota mina aglke kor kei kodinaglka ba yoba ye ogono mina ta kekraiglmiwe di, yegl dugo, no prumne digwa. 59Yegl digwa ba ye ka digwa i ama di pere pere ede, di swara edekrikwa. 60Ana yoba i, yegl digo, tawa teigwa yoba bitno moglkwa i, adiglsre, Jisas yegl di prukwa, Yoba ene aglau yegl yegl etne digwa i, ene di ikne edekratno? dugwa. 61Dugwa ba Jisas ka swara ta di ikne edekrukwa. Di ikne edekruko, tawa teigwa yoba bitno moglkwa i Jisas yegl di togwa, Ene God Kere Yugwa Yagle moglsre, no God debie sumga i, Wam motno? dugwa. 62Yegl dugo, Jisas ye di te, yegl dugwa, Dinga i, na Moliwe dugwa. Na Yoba Wam moglka i, okuo God Yobuglomo Podo Paugwa i, ogo wo kra ame didre, kamun kua mina ibo wibo, ene kanaiglmiwe dugwa. 63Yegl dugo, tawa teigwa yoba bitno moglkwa i, yene kuguglmo gaglmo ake argla didre, yegl dugwa, Yoba ta udre, ye aglaumo di porabuka i ta paikrukwa. 64Ye God kagie ere kide ere togwa i, enene prikwa pre ene siragl we di prime? dugwa. Yegl dugo, yoba mudu makai si meglkwa i, di ikne ede, Ye si goramga i, kuno erumiwe digwa. 65Yoba i yegl di kodigo, yoba tau ere mogl, Jisas guma dra eur sidre, gumuglo were si kegl di tedre, ye ere si, yegl digwa, Yoba ira ta ene sugwa i, ka kep ere, di pogl noro! digwa. Yegl digo, kibr nem tau dumo i sugl kan meglkwa i ama Jisas ere sigwa.
Pita Jisas pre kan erekrie dugwa
(Matyu 26.69-75, Luk 22.56-62, Jon 18.15-18, 18.25-27)
66Ana yugu mina ibo Jisas kot ere teigo, Pita yugu meda kra togl suna moglko, tawa teigwa yoba bitno yagl i niglmo kogonmo abai ta ye moglmara udre, 67Pita ede ere gaiglmara pre moglko, kanugwa. Kandre, ye toro kan mogl, yegl dugwa, Ene ama Nasaret nem Jisas bogl akie meglkwa pamiwe dugwa. 68Yegl dugo, Pita mane di, Ene ka dinga i, na ta pre pogl sikrika. Na ta maniwe dugwa. Pita yegl didre, ye ede pi togl dra yomara pi moglko, koduagle ta wi sugwa. 69Wi sugo, nigl kogon abai ikra aglke kor Pita kandre, ye yoba magigl adigl meglkwa i yegl di togwa, Yagl magigl moglkwa iro Jisas yobamo ta moglmiwe dugwa. 70Yegl dugwa ba Pita kor dagl, Na ta maniwe dugwa.
Pita yegl didre, kuri ta moglko, yoba tau magigl meglkwa i, ede u Pita yegl di teigwa, Ene motnga i, yagl i duglo beglkwa yagl meglmara suna i motnga paugwa. Siragl pre ene Galili yoba ka dimere kuno diniwe digwa. 71Yegl digo, Pita ka gigledi didre, Na yagl i ta pre kan erekriwe dugwa. Na ka kibi ta dibo, God na ere kide ere narabiwe dugwa. 72Yegl dugo, koduagle kumugl ta tabre aglke kor dagl wi sugwa. Wi sugo, Pita ye Jisas ka dugwa ikra, pre moglkwa. Jisas ye okna yegl di togwa, Koduagle kumugl ege suo wi sikran, ene ege suota na ta pre kan erekriwe dinatniwe dugwa. Ye ka yegl dugwa i, Pita poglo di prisre, ede meda pi, kai podo erukwa.
Valgt i Øjeblikket:
Mak 14: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission