Mak 16
16
Jisas adigl u kor ogwa
(Matyu 28.1-8, Luk 24.1-12, Jon 20.1-10)
1 Ana Sabat ege dudugo, Maria, dumo Makdala mam ikra yogo, Maria, Jems mam yogo, te abu Salome ikra yogo, ye ere mogl, kugo nuglo tau demene wakai erukwa i pi Jisas nagie mina kugo ere tenamnedi topo sigwa. 2Topo si yei, paigwa, Sande igne kamun tagekruko, ye ede pi kobuglo mur Jisas atne yeimara i enamnedi pi kamun tagugwa igne plau digwa. 3Ana ye bage pi meglkwa igne, yene di pre yegl digwa, Kobuglo podo paglkane ta kobuglo dra si kegl dugwa ikra, ira ake nu si eglke ede norabe? di, yegl digwa. 4Ye ka yegl didre, ye ede pi Jisas kobuglo mur yeimara magigl pi kan mitna ede, kanigwa, kobuglo paglkane podo kide ikra ake nu si eglke edigwa yogo, kanigwa. 5Ye kandre, ye ede kobuglo mur atne eigwa. Atne pi kanigwa i, yagl kulu ta ye ogono wo kra ame di moglko, kanigwa. Yagl i, gagl suna kruo, olto ta edugwa. Ye yagl i kandre, kudugl geglkwa.
6Kudugl geglko, yagl i yegl di togwa, Ene kudugl goglkrio! dugwa. Ene Jisas, dumo Nasaret nem, ye ede prak mina si geglkwa i dokigwa ba ye magigl i ta moglkrukwa. Ye adigl u kor ogwa. Ene u ye ogo nagie yeimara i, kanio! dugwa. 7Te, ene ede pi ye duglo beglkwa yagl ya Pita yegl di teo, Jisas okna di tomere mere ye ede okna pi distrik Galili omiwa. Ene pi distrik Galili ye kanaiglmiwe di, yegl di teo! dugwa.
8Ana ye ka yegl di kodugo, abu wagle ikra wai kugl, nagino nuglo didre, ede meda pi kobuglo mur yomara i kide kodo, teke ede eigwa. Ye kudugl geglkwa pre teke pi yoba ta di tekrikwa.
Maria, dumo Makdala mam ikra, Jisas kanugwa
(Matyu 28.9-10, Jon 20.11-18)
9Ana Jisas adigl u kor ogwa igne i Sande eduer kana yogwa. Ye adigl u kor pidre, yoba ta moglmara komono kana plau dugwa i, Maria, dumo Makdala mam ikra moglmara plau dugwa. Abu i, okna murubuglo kide 7-pela ye moglmara suna meglko, Jisas ye di meda edugwa. 10Ana Jisas ye abu i moglmara plau dugo, abu i ye ede pi yagl tau okna Jisas bogl akie wanigwa ikra meglmara di tenagledi ogo, yagl i ye Jisas mirie gogl, kai ere meglko, kanugwa. Kandre, Jisas ye moglmara plau dugo, kanugwa i, ye di togwa. 11Ye di te, Jisas adigl u kor ogo, na kaniwe dugwa ba yagl wagle i, ye ka dugwa i pre mediglkrikwa.
Jisas duglo beglkwa yagl suo konbauna pi miurko, Jisas ye ebrara ogwa
(Luk 24.13-35)
12Ana okuo, Jisas ye duglo biurka yagl suo miurara ama plau dugwa. Yagl suo i, ye dumo kade Jerusalem kide kodo, ede meda enabugledi konbauna pi miurko, Jisas ye ogo nagie u pere ta ogo, ye ede u yoba ta mere yegl pidre, ye ebrara plau dugwa. 13Plau dugo, yagl suo i okuo ere mogl, yagl i ye Jisas moglmiwedi kanibrika. Kandre, ye ede ikne pi Jisas duglo beglkwa yagl tau meglkwa i di tebrika ba ye yagl suo kano i ama pre mediglkrikwa.
Jisas ye duglo beglkwa yagl meglmara udre, kogonmo eraiglmedi dedugwa
(Matyu 28.16-20, Luk 24.36-49, Jon 20.19-23)
14Ana okuo, Jisas duglo beglkwa yagl 11-pela kaya mokna ne meglko, Jisas ye meglmara plau dugwa. Plau didre, yagl 11-pela i ka togwa. Ye ka togwa i, okna Jisas adigl u kor ogo, yoba tau ye kandre, ye di teigwa ba yagl wagle i ye yoba kano pre mediglkre, nomano gigle dugwa i pre ye ka togwa. 15Te, Jisas ama ere mogl, ye di te, yegl dugwa, Ene ede uglo koglo koglo pi na kana wakai yogwa i, yoba mudu di teo dugwa. 16Yoba ta pre mediglsre, nigl burabuka i, God ye ere inabuka. Yoba ta pre medrabuka i, God ye ere inabuka ba yoba ta pre mediglkrabuka i, God ye ka tage tenabiwe dugwa. 17Ana yoba pre medraiglkwa i, ye ama kimagl tau yegl eraiglkwa, ye na drana idre, murubuglo kide yoba meglmara suna meglkwa i di meda edidre, ye ka dinaiglkwa i, yoba pere pere kano i mina tau dinaiglkwa. 18Te, ye toki kide ta akenaiglmo mo nigl kide ne geglkwa ta nebi, i ye si goglkrabuka. Yegl ersre, ye ama yoba kide sinaiglkwa i ye akibi, ye kideno aragan erabiwe di, yegl dugwa.
God Jisas agre i ede heven ibo ogwa
(Luk 24.50-53, Aposel 1.9-11)
19 Ana Yagl Kade Jisas ere mogl, ye duglo beglkwa yagl i ka di te kodugo, God ye agre i ede heven ibo ogwa. Agre i ede heven ibo ogo, Jisas ye God ogo wo kra ame di moglkwa. 20Yegl eruko, ye duglo beglkwa yagl wagle i, ye ede dumo koglo koglo pi, ka mabuno di teigo, Yagl Kade ye ake ple di tedre, yoba ye ka kaima dimedi praiglmedi ye ama kimagl tau eraiglmedi yobuglo togwa.
Valgt i Øjeblikket:
Mak 16: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission