Israel Kerikwa 13
13
Yagl 12-pela dumo Kenan suna pi doko kanigwa
1 Ana Yawe ere mogl, Moses yegl di togwa, 2Na dumo Kenan ene Israel yoba tenaluwa. Na ene tenaglka pre ene yagl tau dedin, ye ede pi dumo Kenan suna doko daka ere kanaiglmiwa. Israel yugobuno 12-pela i mina yagl kade swara swarade kere idre, dedenatniwe di, yegl dugwa. 3Yegl dugo, Moses ere mogl, Yawe ye di tomere ere, yagl kade wagle i kere idre, dedugo, ye Israel yoba dumo wau yomara Paran we digwa meglmara i kide kodidre, ede eigwa.
*************************
17Ana yagl wagle i ede pi dumo Kenan doko daka ere kanaiglmedi Moses dedugwa igne, ye yegl di togwa, Ene komono kana dumo Negev we dimara pidre, dumo i kide kodidre, ede pi dumo muglo paimara ede enaiglmiwa. 18Ene pidre, dumo Kenan siragl mere yogwa i, ene kanaiglmiwa. Makan nem yoba mere meglmo mo suom ta meglmo mo i kandre, yobuglno podo pamo mo paikrumo mo i ama kanaiglmiwa. 19Te, dumo wakai yomo mo kide yomo mo i kandre, makan nem yoba kipai meglmara, taun yoko kipaimo mo kobuglo togl podo ere winabo dimo mo i ama kanaiglmiwa. 20Te, makan gaba nuglo podo pamo mo paikrumo mo i kandre, ede mere paimo mo paikrimo mo i ama kanaiglmiwa. Ana taragl i mudu kandre, ene ede ikne unamnedi eribi, ene ede mogo tau uraiglkwa kuno eran, tau uro idre, ede unaiglmiwe di, Moses yegl dugwa. Moses yegl didre, yagl wagle dedugwa igne i ede wain mogo koglkwa bogl yenagledi erukwa ege yogwa.
21Ana Moses ere mogl, yagl wagle ikra dedugo, ye komono kana ede pi nigl beye kra dumo wau ta yomara Sen we dimara pi kandre, wan ede pi nigl bre kra pidre, dumo ta Rehop we dimara ama kanigwa. Dumo Rehop i, dumo ta Lebo Hamat we dimara magigl yogwa.
*************************
25Ana yagl wagle i, ege 40-pela de dumo Kenan suna doko daka ere wan mogl kandre, ede ikne wigwa. 26Ye ede ikne u Moses ya Aron ya Israel yoba mudu dumo wau yomara Paran suna, dumo kebra Kades we digwa i meglmara udre, dumo Kenan siragl mere yogwa i ye di tedre, ede mogo uro yuigwa i, ye obuno di teigwa. 27Yegl ersre, ye Moses di te, yegl digwa, Ene no dumo Kenan pi kanaiglmedi dedingo, no pi kanumga. Dumo i, ka kaima makan nuglo podo moglko, kaya mokna wakai kaima boglkwa. No ede mogo tau uro yumga i, yoma, kano! 28Dumo yegl yogwa ba makan nem yoba we, ye yobuglno podo paugo, ye taun podo kei yedre, taun yeimara kobuglo togl podo ere winabo digwa. Te, yagl ta Anak we digwa i gawama tau dumo Kenan suna meglko, no kamga. Ye yagl olto kuri kaima meglkwa. 29Nigl beye kra dumo Negev we digwa i we, Amalek yoba meglkwa. Te, dumo muglo paimara i we, Hit yoba ya Jebus yoba ya Amor yoba meglkwa. Te, mudi nigl bina ya nigl Jordan bina i we, Kenan yoba meglmiwe di, yegl digwa.
30Ana yagl kade wagle i ka yegl digo, yagl ta kagie Kalep we digwa, ye yagl kade 12-pela ikra mina suna moglkwa i, ye ere mogl, yoba mudu Moses moglmara mogl winabo digwa i di te, Ene ka dikrio! didre, yoba yegl di togwa, Nono dumo Kenan inamga, kuno kaima erabiwe dugwa. Yegl pre nono ede pi Kenan yoba kuda bogl tedre, dumo makan ka kaima inamniwe! di, yegl dugwa. 31Kalep yegl dugwa ba yagl tau ye bogl akie eigwa i we, ere mogl, yegl digwa, Nono ede pi yoba i kuda bogl tenamga i, kuno erekrabiwe digwa. Ye yobuglno podo paugo, nono yobuglno podo paikrumiwe di, yegl digwa. 32Yegl didre, ye dumo Kenan doko daka ere kanigwa i kide yomiwe di yoba di te, yegl digwa, No dumo Kenan suna wan mogl, doko daka ere kanumga i, yoba ta dumo i kipanamnedi ebi, mudu goraiglkwa paugwa. Te, makan nem yoba kanumga i, ye mudu yoba podo kide meglme digwa. 33Mudu yoba podo kide meglko, yagl ta kagie Anak we digwa i gawama ama meglko, kanumga. Ye yagl olto kuri kaima meglkwa. No ye kandre, no taragl kebra, mogodo mere yegl munedi prumga. No yegl munedi prumgo, yoba i ama no kandre, no ama yegl meglmedi kanimiwe di, yegl digwa.
Valgt i Øjeblikket:
Israel Kerikwa 13: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission