Juan 21
21
Jesús ngwani lo re gaz zha kuu mteed lo Jesús
1Ngwalo mriid re koree, tsa lee Jesús mre ngwani lo re nee zha kuu mteed lo Jesús roo nitdoo kuu le Tiberias, ne tenzhee ngoke: 2Ndo Simún Pey, Mach (kuu ni zha lo “kwach”), Natanael (zha yez Caná yez kuu nzi yezlyu Galilea), ne rop nee wetsʼn (xgann Zebedeo), ne techop zha kuu mteed lo Jesús. 3Tsa lee Simún Pey nzhab:
―Lee na nda niit mbel.
Tsa nzhab re nee lo Pey:
―No nee ya kon lu.
Tsa mke re nee leen thib kano ne nda nee, per mniitta nee mbel yaala. 4Ne or ndeyeniʼa yezlyu, lee Jesús ngwani lo re nee roo nitdoo, per myeent re nee Jesúse. 5Tsa ne Jesús lo nee:
―Mndyeen, ¿chu neeka thib mbel mniitta goo?
Tsa nzhab nee:
―Neeka thibe.
6Tsa ne Jesús lo nee:
―Blebi goo yex goo lad ban lo kano, tsa niit goo mbel.
Ne tata mtsow neey, ne kwathoz mbel mniit nee ne neeka gagt koo nee yex leen nit. 7Tsa nzhapʼn lo Pey:
―¡Zha Nabeey!
Per or mbin Simún Pey, Zha Nabeey, tsa mdok Pey xab Pey, tak mloo Pey xab ne oraaka mndaab Pey leen nit. 8Lee tedib net nee mtsino kano asta roo nitdoo, ne mdobyu nee yex kuu tseta nzo mbel, tak teeka thib gayoo metr nzo nee lo nitdoo. 9Ne or mzin re nee roo nitdoo, mwii nee nde bel, ne mwii nee lee thib mbel ngeyex lo ki, noga mwii nee pan. 10Tsa ne Jesús lo re nee:
―Deno goo chop tson mbel kuu mniit goo.
11Ne lee Simún Pey mke leen kano, ne mdobyu yex kuu nzo re mbel kuu nabii, asta roo nitdoo, ne leen yexa nzo thib gayoo chop galbtsii btson mbel, ne tegal kwathoz mbel, per mratta yex. 12Tsa ne Jesús lo re nee:
―De wu ren goo.
Per neeka thib nee myet leettsoo ganaabdiz lo Jesús, naa cho nak Jesús. Tak ne nee Jesús Zha Nabeey. 13Tsa mbig Jesús gax ne mzhen Jesús pan ne mndaa Jesús pan lo nee; ne tataga mtsow Jesús kon mbel.
14Welt ree ngok myon welt kuu ngwani Jesús lo re nee, kuu mteed lo Jesús, lo mrobana Jesús.
Jesús mndediz kon Simún Pey
15Or ngwalo ndow ren re nee, tsa mnaabdiz Jesús lo Simún Pey ne nzhab Jesús:
―Simún xgann Jonás, ¿chu masraa nke leettsooʼa na nake re zha ree?
Pey mkab ne nzhab:
―Ah Zha Nabee, neʼa lu nke leettsoon lu.
Tsa nzhab Jesús lo Pey:
―Bkenap re mbak zhiil da.
16Tsa mbre Jesús mnaabdiz lo Pey tedib welt, ne nzhab Jesús:
―Simún xgann Jonás, ¿chu nke leettsooʼa na?
Lee Pey mkab nzhab:
―Ah, Zha Nabee, neʼa lu nke leettsoon lu.
Tsa nzhab Jesús lo Pey:
―Bkenap re mbak zhiil da.
17Ne ngok myon welt mnaabdiz Jesús lo Pey, ne nzhab Jesús:
―Simún xgann Jonás, ¿chu nke leettsooʼa na?
Tsa nabil ngoo leettsoo Pey, tak myona welt ngenaabdiz Jesús lo Pey, naa chu nke leettsoo Pey Jesús.
Ora mkab Pey ne nzhab Pey:
―Zha Nabee, reta kuu neʼa, neʼa lu nke leettsoon lu.
Tsa nzhab Jesús lo Pey:
―Bkenap re mbak zhiil da. 18Wlipaa na nin loʼa. Leettsa mndyeena mdoka xaba, ne nyaʼa loka pa ta nlaaza, per leettsa gaka zha gox, taaba yaaʼa ne tedib zha tegok xaba, ne teno zha lu ta nlaazta yaʼa.
19Or nzhab Jesús kona, mndaa Jesús kwent naa xomod gath Pey, ne tsow Pey naroob men yelaaz Jesús. Tsaraa nzhab Jesús lo Pey:
―¡Bteke ditsʼn!
Zha kuu mteed lo Jesús kuu kwathoz mke leettsoo Jesús
20Or lee Pey mtsere lo, tsa mwii Pey na Juan ndeken dits re zha. Ne leeka na kuu mnaabdiz lo Jesús btsi kuu ndow rtsee re nee, rtsee chaan Zha Nabee, or kuu nzhapʼn, ¿cho taaʼa lo re zha kuu kutha? 21Or mwii Pey na, tsa nzhab Pey lo Jesús:
―Zha Nabee, ne lee zha ree, ¿kwan gak kon zha ree?
22Jesús mkab ne nzhab:
―Os leen nlazʼn banka zha, asta leettsa bretabʼn, tata gake. ¡Ndoblota gona kona! Komsi bteke ditsʼn.
23Ne lee diza mraats lo re wets ne lo re btan lee na gatht, per net Jesús gathtʼn, sinke kuu nzhab Jesús lo Pey nak: “Os leen nlazʼn banka zha asta leettsa bren, ¿cho mporta kona?”
24Na ndaa kwent re koree, mwiin re koree ne mkee nay lo yeets. Ne, neʼaa wli kuu mkeen.
25Noga mtsow Jesús tedib net re kuu thoz; ne os gake retay lo yeets, ndakʼn neeka dita lo yezlyu gaat yo re yeets kuu gake retay. Tbaa nake.
Valgt i Øjeblikket:
Juan 21: zao
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2007, Wycliffe Bible Translators, Inc. All rights reserved.
