LUK 17
17
Ünu, Ütinglak, Toishao
(Mt 18.6-7,21-22; Mk 9.42)
1 #
Mt 18.6-7; Mk 9.42; 1 Kor 8.12. Jesuwe yoi pinlante hüke i, “Kahtalan tangte ülam ja kaiye ünu me yütlak ne hüko hüko tokpu hei peinang; hüyangpoi, aoyinne tüopa peine tam-e tokne tamyapeih, iman jingne hangshin yatuh shao mengpu! 2Hatüo, üjoiha yo mepu jawe nehoi ngaine tam-e ünu ompu pheiya, I üngme longshüm üyongpu ja yük yange yengching me hüngpu shemei. 3#Mt 18.15,21-22.Tüokhei numan yoi manmanke shaoyin yah! Nang jeiheinaowe ünu jonküma-a, ümeng wintam tüoh. 4Nyih ja me Iye nyit me nang phei tüi-e ünu om ma-a, hüyange ümeng ompu lep iye, I nang tangte peiye ‘Tao monglüp teki’ she ima-a, nange Ite ümeng wintam tüoh.”
5 #
Mt 17.20; 21.21; Mk 11.22-23. #Lk 7.13.Hüyange lampulanne Youngwanpa te hüke i, “Toman ütinglakpu yonge tampha.” 6Youngwanpawe janne i, “Numan me ütinglakpu yanhoi li shinne nehoi yonge ngohma-a, numan-e tüopa shaokhahpe te ipu oklak, ‘Yalah me pheckke nang nying nyingke bheitüoh hüyange nang nying nyingke yengching me dei tüoh!’ she ilak, hüyange tüowe numan ngao jailak.”
7“Ipu ja me numan yo me ütam-e shaoshanpa ja kah hokne yejema-a nyee yomne tamnangki. Aope I kah mepu peilakeih, numan-e hüke iya, ‘Mam mamshe peiyah, hüyange hahne shot tüoh!’ 8#Lk 12.37; Jn 13.3-5.Aope-o hüke ye-ilak! Hüleima, nange Ite hüke itüoh, ‘Üjingne hahying tümtüoh, hüyange nang büangnye yahyange tao hahpu mansho mansho tankei; tüophei me nange hahyingyah,’ she Iye ye-ilak a? 9Shaoshanpawe Iye ngaojai yangpu jingne minyong phakülak yeteih, Iye teihyalak? 10Numan phei-o tüo jaja muh; aope numan-e numante linglak ne ipu lili linge shoyalakei, ilak, ‘Toman-a jajang japu shaoshanpalan, toman-e toman toishao hanghe tüo hei lingyangki.’ ”
Jesuwe Ngonpa Pen Meiyetam
11 #
Lk 9.51; 13.22; 19.11. Jesu Jerusalem yete yewante I lamlinne Samaria hei Galilee pa me yeyangki. 12#Lev 13.45-46.I ching ja te pei hüwante ngondak dakpu kahta pen I tangte pei. Iman üjai me yong, 13#Lk 5.5; 8.24,45; 9.33,49.hüyange hüke üngwün, “Konnyüopa! Jesu! Tomante yayeng pha!” 14#Lk 5.14; Mt 8.4; Mk 1.44; Lev 14.2-32.Aope Jesuwe iman nge Iye imante i, “Taitüoh hüyange ngengpalanne numante tokke leilak.” Hüke lamme iman kemme taiwante iman ngondak jao. 15Iman yo me jawe, Imepu ngondak meipu nge; hüwante Kahwang minyonge Iye yeonge üngwün hüyange leihye. 16Minyong phawe, I nying nyingke Jesu yashong me lamme ta. Tüopa kahta-a Samaria kahta ne ngohyangki. 17Jesuwe hüke ngaowe i, “Taowe kahtalan pen jaowe tampu yeje a? Ülaolan tuwa üpu? 18Hatüo eiha jat ja ompu hangke leihyepu ok? Tüo kih-e iman-o leihye-e Kahwang te minyong phapu ye-ok pu a?” 19#Mt 9.22; Mk 5.34; Lk 8.48; 18.42.Hüyange Jesuwe Ite i, “Lüotüoh hüyange yetüoh: nang ütinglakpuwe nang meiteki.”
Kahwang Ahngching Peipu
(Mt 24.23-28,37-41)
20 #
Lk 19.11; 21.7; Lam 1.6. Phariseelan ütamme Jesute tonge i, Kahwang Ahngching aope peikülak. Iye hüke janpu pha: “Kahwang ahngchinga hüke mükke ngelakpa ne peipu ne yeje. 21Aowe-o leitüoh, hatüowa tüome! yejema-a tüopa-a otüome! she ye ilak; hangjingne Kahwang ahngchinga numan yo me ngohnang.”
22 #
Mt 9.15; Mk 2.20; Lk 5.35. Tüophei me Iye pinlante i: “Numan-e Kahwang üha nyih ngehuwe teihpu hipak ja peikülak hüyangpoi numan-e tüopa ye-nge oklak. 23#Mt 24.23; Mk 13.21.‘Leihu otüo yeme!’ yejema-a ‘Leihu, hatüome!’ she ipu ütam ngaikülak. Hüyangpoi tüoyinte leine nokshao te aope-o tah yu. 24#Mt 24.27; Ütah 1.7.Wangphih langpuwe jaye mepu jaye wangjan ngoiye hangke teetam, tüokih-e I hipak me Kahta Üha peilak. 25#Lk 9.22.Hüyangpoi üwangne I shange ponglak hüyange tüopa jin kahtalanne I yeyahlak. 26#Mt 24.37-39; Kaht 6.5-8; 7.6-24.Noah hipak me hangke ngoh, tüokih-e Kahta Üha hipak me ngohlak. 27Noah yenglin te ongpu nyih manngoi manngoi üsheiye yujok hah-ngapu, hüyange sheko hei netan teiyahpu ngoh, tüohipak me yengyong muleam pei hüyange iman üshei mahne tam. 28#Kaht 18.20-33; 19.24-25.Lot hipak-o hüke muh ngohyangki. Üsheiye yujok hah-ngapu, teishakpu, ükong wangpu hei nokwepu maawe ngoh. 29Lotte Sodom tüohpu me peiye, wang mepu vün hei yilong wai ne mange kei hüyange iman üshei mah. 30Tüopa nyih hangke ngoh, tüo kih-e Kahta Üha ütahte ngaipu nyih-o ngohlak.
31 #
Mt 24.17-18; Mk 13.15-16; Lk 21.21. “Tüopa nyih me ao kahta yoi noktok me ngohlakei, noksa me ngohpu toiheinan yahlak jingne yeyelak; tüokih-e muh kah me ngohpu kahta nokte yeyelak. 32#Kaht 19.26.Lot shekonyu teih tüoyah! 33#Mt 10.39; 16.25; Mk 8.35; Lk 9.24; Jn 12.25.Ao kahtawe yoi üyin yinlak jingne nganglakei I mahlak; hüyangpoi aowe yoi üyin man iman yinlak, 34#Mt 24.40-41.Taowe numante inang, tüoya, kahta ni lengja me shiye ngohlak: ja yahteiteiye ja tüohlak. 35Sheko ni jamme sham shuwe ngohlak; ja yahtei teiye ja tüohlak. 36(Kahta ni kah me ngohlak, ja yah teiteiye ja tüohlak.)”
37 #
Mt 24.28. Pinlanne Ite tong, “Youngwanpa ümeken me?” Jesuwe janne i, “Ümeken me lipu mang ngohlakei tüoken me pongkonlan jemlak.”
Valgt i Øjeblikket:
LUK 17: KONYBSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.