Beliebte Verse in San Juan 15

Teilen

’Janhan mé ti nta to uva, a̱ndá jahara la ti chaon ti inta to uva tsíkꞌañántá. Ti nkexro nkoko̱a tjeki̱a̱n mé tsꞌóna nchónhña ito. A̱ndá ti tsi̱to̱héra ti janhan, la ninkehó ixra̱ tsjáchahyara si̱chꞌera.

Ti tsi̱to̱éhyara ti janhan, ndá kja̱xin janhan tsi̱to̱a̱hya ti jahara. Kixin éxi ijnko chaon inta ti tsíkꞌaxrjentehe, la xrokjuahya tsꞌóna ito, mé xi̱kaha ti jahóra la xitjahya si̱chꞌera ti ixra̱ kuénta̱na.

’Méxra̱ ti chaxín tsi̱to̱éhyara tsitekaonra ti janhan la ko tsꞌitjáñahñara ti nkehe kjuákohára, ndá ti tsjanchiara ichrén nkehe tjinkáonra la tsꞌayéhéra.

Jahara la kjuéyáhyara ti janhan. Náhí. Janhan kjuéyá ti jahara kixin tso̱tja̱hára ixra̱, la éxi ti inta náxrjón tꞌóna itsjé to uva mé chrókꞌuaxrje jína ti ixra̱ si̱chꞌera la tsꞌitjáñahña. Ndá Tꞌaná mé tso̱tjáhara kaín ti nkehe tsjanchexínra ni̱ná.

Ti nkexro tja̱ko̱xi̱n nkexrín imá tjue̱hé ti nkexro chóxin, la tꞌenyákohe̱n ti jehe sin.

Jehe chꞌan tsꞌochrínjin chꞌan chaon ti inta tꞌónahña ito, a̱ndá nchetjuákꞌá chꞌan ti chaon inta tꞌóna ito kixin a̱ntsí itsjé to tsꞌóna.

*Ti nkehe tétua̱hanra la mé tíhi: chrótjue̱héra kichuara éxi janhan tjua̱hára xi̱kaha.

A̱ndá Tꞌaná la tso̱chéhe̱ chꞌan ti si̱chꞌera itsjé ixra̱. Mé xi̱kaha tsjáko̱xi̱nra kixin tinkachónkira ti janhan.

’Janhan mé ti nta to uva la Tꞌaná mé ti nkexro tꞌayakohen.

A̱ndá ti nkexro nkoko̱ahya tjéki̱a̱n la mé éxi ti inta tꞌónahña to uva la tsochrijin tsjikꞌitjí kixin tsoxámá, ndá chrꞌéxi̱n tsoxrejó la tsoche.

’Mé xi̱kaha tjo̱nka̱ra kaín tíhi kixin tso̱cháhara, éxi chàna xi̱kaha mé tso̱chèxin a̱sánra.

Ti tsítekáonra ti nkehe kuétua̱hanra ndá tso̱nohara kixin tjua̱hára éxi janhan nta̱xiteyá ti nkehe kꞌue̱to̱an Tꞌaná, ndá nona kixin jehe chꞌan mé tjue̱he chꞌan ti janhan.

Mé xi̱kaha tétua̱hanra kixin chrótjue̱héra kichuara.

Ti jahara na̱xa̱ chrókjuíchꞌera éxi ti ti nkehe ichꞌe ti chojni chjasintajni, ndá ti chojni chjasintajni la chrótjue̱hé ti jahara. Kjánchó janhan kjuéyá ti jahara kixin chrókꞌuaxrjekjanxínra ti chojni chjasintajni. Méxra̱ ti chojni chjasintajni la nínkakohanra kixin í tjénka̱yáxinhñara éxi jehe sin xi̱kaha.