METHIU 18
18
Iruwng Lipahna Ruungsehvachii
(Mk 9.33-37; Luk 9.46-48)
1 #
Luk 22.24
Apha ichiinache sebok aeng Jesu ningna theng aeka asiisah ae, “Thangbaen iruwng lipah nache ruungseh vachiichu achuw vachiiva?” 2Amana Jesu ing naepang yngkheh ve eenka engkaarna mangiirka 3#Mk 10.15; Luk 18.17vokhehkho ariir, “Ki ing neningna atatak ing kariirnah, nenuw ing ynguur tanuwka havana naepang ae vaange tamah tanuwve thangbaen iruwng lipahchu phachehmah tanuw. 4Changvakonchu achuw yngkheh ing naepang vaange ataksahchu ynjuursa nave, iruwng lipah nache ruungseh vaata. 5Achuw yngkheh ing ki karumingna naepang yngkhehchu aning amansiih ing kemsa nave kichu yngkemsahva. 6Changvakonchu achuw yngkheh ing havana naepang ae inge ynthacha ae i isiiting babuk nave, ama meechu ariingna rungsum iruungpak yngkheh yngkhaenaka ithuwhpak chifhuw ting iren inche akhaena sakseh vaata.”
Batheem ting Buknii
(Mk 9.42-48; Luk 17.1-2)
7Laaruw paamne isiiting buknii aomtah nache aajaehmeh ijaniiva, akhaechuve havi isuwhmah rumah, changvakonchu isiiting babuk vachii mee taklinache ijaniisapa. 8#Met 5.30“Nakik vokhehkho nakhi ing isiiting ibabuknii vachii vanave tennana renla; nakik nakhi ikip ing isiiting bukva nachii changve, nakik nakhi ikipmah ing iring napha inche nakhaena saksehna. 9#Met 5.29Amanche namik ing isiiting ibabuknii vachii vanave iphernana renla, namik ikip ing isii mi sungting bukva nachii changve, namik yngkhehpang om ing iring naphasah inche nakhaena saksehna.”
Ymmoh Jao taklina Ynghuwnii
(Luk 15.3-7)
10 #
Luk 19.10
Nenuw ing naepang ae havi yng-kheh pangkho nenrathiihniimah ing ynriimruw; akhaechuve neningna ki ing kariirnah, “Thangbaenna ong vaarmee aeng engkhaena kapa maechu apha vakhaena engenjaehnah. 11Akhaechuve Mee Sapa ing ymmoh aechu ikarnii khaena juwngsa.”
12“Nenuw ynchii nemandennah? Mee yngkheh ing jao chaama deennaka amanche yngkhehchu ymmoh nave, jao somikuw arii eekuwchu bung nache manaka, ymmoh jao yngkhehchu jong-mah niikhang? 13Neningna atatak ing kariirnah, ajao yngkheh ymmohchu tuwhnave, jao somikuw arii eekuw aechu ithi ing jao yngkheh ymmoh atuwh khaenache arotha rohseh vaata. 14Amathohche aanghak ing havana naepang ae i yngkheh pangkho ymmohchu thangbaenna ong kapa ing amanden chumahva.”
Unae yngkheh ing nataklina Isii arang
(Luk 17.3)
15 #
Luk 17.3
“Nauw nanae ing nataklina isii rangnave, nang ing vaknana nenum-pang ing nengonglae araarchu riirla. Amana nachongchu rungaenave nang ing atakchu athar natuwhva. 16Changvakonchu nang ing nariirchu irungaepeehmah nave, mee ynnii ynthum nertanii saarkhii aomnii ing, mee yngkheh meenii ikheer ing ruw-reehra. 17Amana chenkho rumah nave ruwrthiing ting manthangla, ruwrthiing chong chukho rungaemah nave, ama meechu lae arum vokhehkho ree ikhuum meeva ichii ing riruw.
Aru mee vokhehkho Arumah mee
18 #
Met 16.19; Jhn 20.23 Ki ing neningna atatak kariirnah, laaruw paamna nenuw ing nenphuwp-chu thangbaen nakho ynphuwp vaata, amanche laaruw paamna nenbathen-chu thangbaen nakho ynthen vaata. 19Athar ki ing neningna kariirnah amachuve, laaruw paamna mee yng-kheh meenii ing rutanuwka neniihchu thangbaenna ong kapa ing tuvaata. 20Ki karuming nache meenii ynthum pangkho purtanuwve, nengkaarna kikho ynvaeva kata.”
Ikuhpeehnii amanghuwmah Meenae taklina Ynghuwnii
21 #
Luk 17.3,4 Pitar ing Jesu ningna thengka ariir, “Aafhuw, kauw kanae yngkheh ing kataklina isii tunave vajaehchak ipha ing kuhpeehva kachiiva? Vasarii pangva chiiva?”
22Jesu ing abasang, “Ki ing naning-na kariirnah, vasarii pang mahva changvakonchu vasomsarii arii sarii ipha ing vachiiva.” 23Chutahnache thangbaen iruwng lipahchu laaruw paamna iruwng yngkheh ing ameenae thoh seer empha isi vakhae isajaeh ing manvuwh chirka asiihthoh aanghakva. 24Iruwng inche seer empha isi aang-kheng amanvuwhrae, aseer talen lising suum atuur mee yngkheh aningna ahenruwpae. 25Amachu ipha ing alertuurchu singcheh mahsa. Chutahnache iruwng inche ariirpa, arumee, asiti amanche apeehchae aangkheng juwrchir nuwna alertuur i singnii rasiing taka chonghak apeehpa. 26Seer atuur mee inche rumka athamsahpa, “Ki ing katuur seer chaap singsa vakachii apha topoh ihahsara. 27Iruwng inche aning manchuwhka alertuur chaapchu kuhpeeh chirka amangkaepa. 28‘Changvakonchu ama ing aangkaerae dinari chaama atuur meenae aarang yngkheh yntuwhsae; chutahnache aarangchu suwrka ariingna irahka seer yntuur chiika ising behra taka asiingpa. 29Chutahnache aarang inche rumsaka, kaarang apha topoh pangti ihahsara taka athamsahpa. 30Chang-vakonchu ama ing rumahka atuurchu asingmahritaang atakchu kaeshum sungnache asiihpa. 31Amana isuwh vakhaechu aarang areh aenche emutah nache nungaemahdeh aeka iruwng ningnache ahungtongpae.’ 32Aanuwnache iruwng ing amachu eenka ariir, Ichummah meenae nang ing nalertuur khaena ynthamsahtah nachii ki ing nalertuur vakhae kakuhpeeh chirmah vachiikhang. 33Ki ing nangchu kaning kamanchuwhchii vaangkhe, nangkho naarang havi naning manchuwhmah taniikhang? 34Aafhuw inche amachu abarung mansikka, alertuur vakhaechu asing-chir mahtaang atakchu ponti pinii khaena kaeshum aapaanii tingche apeehpa.” 35“Chukhaenache nenguw nenae aechu nenbarungriir sungna nening manchuwhmah tanuwve, thang-baenna ong kapa inche aanghakjaeh ing nentaklina chenkho tuvaata.”
Zur Zeit ausgewählt:
METHIU 18: MOYO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.