Hechos 12
12
Kꞌóñá sin Jacobo la ko kjuákꞌechjina chꞌin Pedro
1Ndá ti ña̱o a la ti rey Herodes kjuankíxin kónínkakohen ti sin tinkáchónki chꞌin Jesús 2la kꞌue̱to̱an chꞌan kixin tsꞌenxín chika espada ti chꞌin Jacobo, kícho chꞌin Juan. 3A̱ndá ti kꞌuíkon ti rey Herodes kixin imá kóchéhe̱ ti sin judío kixin ikꞌuén chꞌin Jacobo, la kja̱xin itsé chꞌan ti chꞌin Pedro, ti ña̱o kia Pascua ti ó inie sin ti nio̱tja̱ chóntahya nkehe tꞌánkíxin. 4#Ex. 12:1-27.*Ndá ti ó itsé chꞌan ti chꞌin Pedro la chrꞌáxehen chꞌan ndo̱echjiso, tjejónta noó grupo soldado la mé noó soldado nkojnko grupo. La chꞌin Herodes kjuénka̱yáxin kixin tsꞌatsínkajia ti kia Pascua, ndá sátsjiko chꞌan ti chꞌin Pedro kixin tsꞌikon kuenté chjasin nkexrín tsꞌóñá sin chꞌan. 5A̱ndá chꞌin Pedro na̱xa̱ tjechjina chꞌan la sínta itsjé sin ti jehe chꞌan, la kaín ti sin tinkáchónki Ìnchéni la tjejóchrónoéhe̱ sin Díos kaín a̱sén kixin tsjinki̱tsa Díos ti jehe chꞌan.
Díos kjuínki̱tsa chꞌin Pedro kꞌuaxrjexín ndo̱echjiso
6A̱ndá ti tie a, la ti rey Herodes kjuénka̱yáxin kixin ti ó tso̱ña̱o ndá tsakitsje chꞌan ti chꞌin Pedro ti siín kaín ti chojni chjasin. Ndá chꞌin Pedro la tjejua chꞌan la nkojnko ti nánko chꞌan la tjejó yaá soldado la chróntetoxín itja chꞌan cadena. La íso ti sin soldado la tjejónta sin ndója ti ndo̱echjiso. 7Ndá xrína̱hña ikui ijnko ángel kuènté Ìnchéni, ndá ti nkaxehen ndo̱echjiso la imá kꞌuínkaséña. A̱ndá ti ángel la kjuakꞌetja tja ti chjia chꞌin Pedro la kjuínchekjaye̱he̱ la kꞌue̱to̱an ndáchro:
―Tjoka tꞌàyá.
Landá ti cadena tjejóchróntetoxín itja chꞌin Pedro la tuénxín kꞌuánótjen. 8A̱ndá ti ángel xíkꞌe̱to̱an ndáchro:
―Tꞌinka̱ya ti iká la tjanka to̱ka̱tá.
Ndá chꞌin Pedro la kjuínchexiteyá, ndá ti ángel la ínaá ndáchro:
―Tꞌitsa̱te ti iká ndá chréhé sátsjini.
9Ndá chꞌin Pedro la chréhe̱ ton ti ángel la noehña chꞌan á chaxín xi̱kaha kóhen o̱ áchꞌe ncha̱kuén Díos tjetꞌikonxín chꞌan tíha. 10Ndá xi̱kaha kꞌuatsínka sin ti sa̱oxín ndója tjejó ti sin soldado la xíkꞌatsínka sin ti yaáxin ndója tjejó ti sin soldado. Landá kjuíji sin ti itjen ti puerta chika ijié chjinaxón nti̱a la ti puerta chika la jehó xitje̱he̱. Ndá kꞌuaxrjexín sin ntiha la tjejótji sin, la nko̱siñe nti̱a la kꞌuitjáñakoa ti ángel. 11A̱ndá chꞌin Pedro la kónohe chꞌan kixin chaxín kóhen tíha. La ndáchro chꞌan:
―Ijie la chaxín nona kixin Ìnchéni ichrꞌán ti ángel kjuínchekaána kixin tsꞌóñáhña chꞌin Herodes ti janhan la tso̱nahña kaín ti nkehe tjinkaon ti sin judío.
12Ndá xráxinkaon chꞌan kaín tíha, la sákjuí chꞌan ndo̱e ti tjan itꞌin María, ìñé chꞌin Juan kja̱xin ti̱ki̱texín sin Marcos. Ntiha mé tsíkónkotsé itsjé sin tinkáchónki Ìnchéni tjejóchrónoéhe̱ sin Díos kixin kohya nkehe tso̱hen chꞌin Pedro. 13La kꞌuinka chꞌan ti puerta itjen ndója, chjinaxón nti̱a. La ijnko tjan chꞌexín ixra̱ ntiha, itꞌin Rode, kꞌuaxrje tjan kuitsjehe tjan nkexro tíha. 14A̱ndá ti kjuátso̱an tjan itén chꞌin Pedro la imá kóchéhe̱ tjan la kꞌuitjáñehen tjan kuakitje̱ehya tjan ti puerta la kuinká tjan sákjuichronka tjan kixin ndója itjen chꞌin Pedro. 15Ndá ti sin tjejó ntiha la ndáchro sin:
―¡Kjá locua!
La na̱xa̱ chronka tjan kixin chaxín chꞌin Pedro tíha, ndá jehe sin ndáchro sin:
―Jehya chꞌan. Kjá ti xri̱nto̱e chꞌan ―ichro sin.
16A̱ndá chꞌin Pedro na̱xa̱ tjetꞌínka ti puerta la ti ó kuakitje̱he̱ sin la kꞌuíkon sin kixin chaxín jehe chꞌan, la chrákon sin. 17A̱ndá kjua̱ko̱xi̱n chꞌan itja chꞌan kixin tsotání sin ndá chrónka chꞌan kixin Ìnchéni kuakitsjexín ndo̱echjiso ti jehe chꞌan. La ndáchro chꞌan:
―Chenkara chꞌin Jacobo la ko kaín ti sin kíchóni nkehe kóna ―ichro Pedro ndá sákjuí chꞌan ókjé.
18A̱ndá ti ó kóña̱o la imá kóxakohen ti sin soldado kixin noehña sin nketí sátsíkji chꞌin Pedro. 19Landá kꞌue̱to̱an chꞌin Herodes kixin sátsjikjeyá sin chꞌan, kjánchó kꞌuitjahya sin. Landá xi̱kaha ti sin soldado kuamá sin tíha, la kꞌue̱to̱an Herodes kixin kaín sin itsꞌen sin. Landá chrꞌéxi̱n chꞌin Herodes kꞌuaxrjexín Judea ndá sákjuí chꞌan Cesarea la ntiha kjuákꞌe chꞌan.
Ikꞌuén chꞌin Herodes
20Ti rey Herodes la imá nínkakohen ti sin chjasin Tiro la ko Sidón. Ndá kaín ti chojni chjasin la nkoko̱a kjuénka̱yáxin sin kixin sátsjitsjehe sin chꞌan. Ndá kjuanchia sin kixin tsjinki̱tsa ti chꞌin Blasto, ti nkexro chꞌehe ixra̱ chꞌin Herodes, kixin chrókóninkakuenhña chꞌin Herodes ti jehe sin la na̱xa̱ chróchrꞌán chꞌan ti nkehe sinie sin ti̱xi̱n ti chjasén chꞌan. 21A̱ndá ti Rey Herodes kꞌuéye̱he̱ sin kixin tso̱nkotsé sin ijnko ña̱o. La jehe chꞌan kꞌuítsá chꞌan ika imá náxrjón la ko kjuákꞌetja̱xi̱n chꞌan ti silla kuènté chojni tjetoan. Landá kjuankíxin nixje̱he̱ chꞌan ti sin tsíkónkotsé. 22A̱ndá ti sin tsíkónkotsé la kjuankíxin kꞌóyako sin, ndáchro sin:
―¡Ti nkexro tjenixja la jehya chojni! Náhí, ijnko díos tíha ―ichro sin.
23A̱ndá tuénxín ikui ijnko ángel kuènté Ìnchéni la kjuíncheníhi ti chꞌin Herodes kixin kjuíchꞌéna a̱sén chꞌan Díos. A̱ndá chꞌin Herodes ikꞌuén kixin kjónie kosi̱nto̱ ti nkaya tse̱e chꞌan.
24A̱ndá itsjé chojni kuíhin itén Díos la nkuíxín nkákótsjé ti sin tinkáchónki Ìnchéni.
25Landá chꞌin Bernabé la ko Saulo la kjuixihin sin ti ixra̱ Jerusalén, la ikjan sin Antioquía sákjuíko sin chꞌin Juan mé kja̱xin ti̱ki̱texín sin Marcos.
Zur Zeit ausgewählt:
Hechos 12: poeNTplus
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2016, Wycliffe Bible Translators, Inc. All rights reserved.