Hechos 15
15
Ti kónkotsé sin Jerusalén
1 #
Lv. 12:3. *A̱ndá iso chojni tsíki̱xi̱n Judea la kjuíji sin Antioquía. La kjuankíxin kjua̱ko̱he̱ sin ti sin kíchóni, ndáchro sin kixin xrokjuahya tsaá ti sin chóntahya ti xro̱ye tsíkꞌe̱to̱an Moisés. 2Ndá chꞌin Pablo la ko Bernabé la nkoko̱ahya kjuénka̱yáxiko sin ti sin a, la kónínkakohen kícho sin. Ndá kjuénka̱yáxin sin kixin chꞌin Pablo la ko Bernabé la ko íso chojni sátsji̱ sin Jerusalén kixin tsjanchankíhi sin ti sin apóstol la ko ti sin tꞌe̱to̱an kuènté ni̱nko kixin á ticháxi̱n tsochónta chojni ti xro̱ye o̱ náhí.
3Ti sin tinkáchónki Ìnchéni tjejó Antioquía mé ichrꞌán sin ti sin a sákjuí sin la kꞌuatsínka sin Fenicia la ko Samaria la ntiha chrónka sin kixin ti sin jehya judío la kjuixitoxi̱n ti nkehe tjenka̱yáxin sin la chréhe̱ sin Díos. Ndá kaín ti sin kíchóni la imá kóchéhe̱ sin ti kuíhin sin tíha.
4Ndá ti ó kjuíji sin Jerusalén la ti sin tinkáchónki Ìnchéni la ko ti sin apóstol la ko ti sin tꞌe̱to̱an kuènté ni̱nko la nkojína kjuajon sin kjuachaxin kꞌuejó sin ntiha. La chrónka sin kixin imá kjuínki̱tsa Díos kixin jína kjuíchꞌe sin ti ixra̱ kuènté chꞌan. 5Kjánchó iso ti sin fariseo ó titekaon Ìnchéni mé kꞌuínkatjen sin la ndáchro sin:
―Ticháxi̱n itsa xro̱ye ti sin jehya judío titekaon Ìnchéni la ko tsꞌítuehen sin kixin sinchexiteyá sin kaín ti ley tsíkꞌe̱to̱an Moisés.
6Ndá ti sin apóstol la ko kaín ti sin tꞌe̱to̱an kuènté ni̱nko mé kónkotsé sin kjuénka̱yáxin nkexrín tso̱yóxin tíha. 7#Hch. 10:1-43.*A̱ndá ó isé tjenka̱yáxin sin la chꞌin Pedro kꞌuínkatjen ndáchro:
―Kíchóni, jahara ó nohara kixin Díos kjueyá ti janhan kixin tsjáko̱ha̱ ti sin jehya judío ti itan jína kuènté Cristo kixin kja̱xin sin tsitekaon sin. 8#Hch. 10:44; 2:4.*Díos mé chóxin a̱sén nkojnko chojni la kjua̱ko̱xi̱n chꞌan kixin tjue̱he chꞌan ti sin jehya judío kixin kja̱xin sin kꞌuáyéhe̱ sin ti Ncha̱kuén Díos éxi kꞌuáyéhe̱ni jeheni. 9Díos la nkokón tꞌikon chꞌan kaín chojni la jehe chꞌan kjuínchetjóá chꞌan a̱sén sin ti ó kuitekaon sin Ìnchéni. 10A̱ndá, ¿nkekuènté nchexiteyáhyara ti nkehe tjinkaon Díos, ndá tétue̱hénra ti chojni i kixin sinchexiteyá sin kaín ti nkehe imá ixra̱? Ti nkehe tjachahyani nchexiteyáni la ko ni ti sin kꞌuaxrjeníxini kjuachahya sin kjuínchexiteyá sin. 11Kjánchó noheni kixin Ìnchéni Jesús la imá tjue̱he chꞌan ti jeheni, landá xi̱kaha kuaáxini la ko kja̱xin xi̱kaha kuaáxin ti sin kuitekaon ti jehe chꞌan ―ichro chꞌin Pedro.
12Ndá kaín ti sin kónkotsé la táníkoá sin kuíhin sin ti nkehe chrónka chꞌin Pablo la ko Bernabé kixin Díos kjuínki̱tsa ti jehe sin la kjuasin sin itsjé kjuaxroan kꞌuáyéhe̱ ti sin jehya judío. 13Ndá ti ó kjuixin nixja sin la chꞌin Jacobo, ndáchro:
―Kíchóni, tihínra ti nkehe tso̱xrja̱nka. 14Chꞌin Pedro chrónka nkexrín kjua̱ko̱xi̱n Díos kixin tjue̱he ti chojni jehya judío la nkexrín kjueyá Díos iso ti sin a, kixin tsinkáchónki sin chꞌan. 15La xi̱kaha chrónka ti xroon tsíkjin ti sin kꞌuéchronka itén Díos ósé:
16 #
Am. 9:11, 12. *Janhan tsokjan chrꞌéxi̱n
la si̱tꞌána ni̱xin ti nchia tsíkꞌo̱ya̱ kuènté David
la janhan tsjínki̱tsa tsokjan sin ínaá.
17Ndá xi̱kaha kaín chojni tsjeyá sin Ìnchéni,
la kaín ti íso nación, ti sin kꞌue̱ya̱ha̱ kixin tsitekaon sin ti janhan.
18Mé xi̱kaha ichro Ìnchéni ósé.
19’Méxra̱ ndáxrja̱n kixin ti sin jehya judío la tsicháxi̱nhña sinchexiteyá sin ti nkehe tsíkꞌe̱to̱an Moisés kixin ó kuíto̱he sin ti nkehe kꞌuékinkáchónki sin la kjueyá sin Díos. 20#Ex. 34:15-17; Lv. 18:6-23; Lv. 17:10-16.*La jehó tsochrꞌénheni sin ijnko xroon tsꞌe̱to̱ani kixin siniehña sin ti into tsíchroxi̱hi̱ chojni ti nkehe tsíkjano̱ña, chróchóntahya sin chojnichjin jehya ichjién sin la ko chrókjoniehña sin nto̱e ti iko tsíchríjinhña ikja la ko chrókjoniehña sin ti ijni̱é va. 21Kixin ndesi ósé la nkojnko chjasin chónta sin nkojnko nkexro chrónkaxín ti ley tsíkꞌe̱to̱an Moisés la ko nchekuáxin sin tíhi nkaxehen ni̱nko nkojnko ti ña̱o to̱kꞌéhe chojni ―ichro chꞌin Jacobo.
22Ndá kaín ti sin tsíkjeyá Ìnchéni la ko ti sin tꞌe̱to̱an kuènté ni̱nko la ko kaín ti íso sin tinkáchónki Ìnchéni mé kjuénka̱yáxin sin kixin tsochrꞌán sin iso chojni Antioquía, la kjueyá sin chꞌin Judas, ti̱ki̱texín Barsabás, la ko Silas, ti sin tꞌe̱to̱an ti ni̱nko ntiha, kixin sátsjiko sin chꞌin Pablo la ko Bernabé. 23Ndá ichrꞌán sin ijnko xroon sákjuíko ti sin a, ndáchro:
“Jeheni chojni tsíkjeyá Ìnchéni la ko ti sin tꞌe̱to̱an kuènté ni̱nko ntihi nixjahára, kíchóni jehya judío, tjejora Antioquía, Siria la ko Cilicia. 24Kuíhini kixin iso chojni tsíkji ntihi la kjuínchexakohen ti jahara, ndáchro sin kixin ticháxi̱n itsara ti xro̱ye tsíkꞌe̱to̱an Moisés, kjánchó jehe sin la chóntahya sin kjuachaxin tsꞌe̱to̱an sin tíha. 25La nkoko̱a kjuénka̱yáxini la kjueyáni iso chojni tjejó ntihi kixin tsjijitsjehe sin ti jahara, tsjijiko sin ti sin kíchóni Bernabé la ko Pablo. 26Ti sin i la chrákonhña sin kjónté chrókꞌuenxín sin kixin tinkáchónki sin Ìnchéni Jesucristo. 27Mé xi̱kaha ichrꞌáni chꞌin Judas la ko Silas tsjiji sin kixin jehe sin tsochronkaxín sin kaín tíha. 28Ti Ncha̱kuén Díos mé kjuínki̱tsa kjuénka̱yáxini kixin jehya chrókꞌue̱to̱ani kixin si̱nchexiteyára nkehe imá ixra̱. Náhí. Jehó tíhi: 29Chrókjontehyara ti iko tsíchroxi̱hi̱ sin ti nkehe tsíkjano̱ña, chrókjontehyara ijni̱é iko, la ko nto̱e ti iko tsíchríjinhña ikja la ko chróchontahyara ókjé chojnichjin. Ti si̱nchexiteyára kaín tíhi la jína tsꞌejora. Táhó, nkojína tꞌejora.”
30Ndá ti ó nixje̱he̱ kícho sin la sákjuí sin Antioquía. Ndá ti ó kjuíji sin la kónkotsé ti sin ni̱nko ntiha la kjuajon sin ti xroon. 31Ndá ti ó kjuínchekuáxin sin la imá kóchéhe̱ sin. 32Ndá chꞌin Judas la ko Silas la kja̱xin sin chrónkaxín sin ti itén Díos la kjuako sin jína la imá kóchéhe̱ ti sin kíchóni tjejó ntiha. 33Ndá ntiha kꞌuejó sin iso ña̱o, ndá ti ó tsokjan sin ti tjejó ti sin ichrꞌán ti jehe sin, la kaín ti sin tinkáchónki Ìnchéni la nkojína nixje̱he̱ sin, 34kjánchó chꞌin Silas la kjuénka̱yáxin chꞌan kixin ntahó tsito̱he chꞌan. 35Kja̱xin chꞌin Pablo la ko Bernabé la kuíto̱he sin ntiha. Jehe sin la ko íso chojni mé kjuako sin la ko chrónkaxín sin ti itén Díos.
Chꞌin Pablo kjuankíxin ti yaáxin viaje
36A̱ndá iso ña̱o chrꞌéxi̱n la chꞌin Pablo nixje̱he̱ chꞌin Bernabé, ndáchro:
―Sátsjitsjeheni ti sin kíchóni kaín ti chjasin kjuakoni ti itén Ìnchéni ósé kixin tso̱noheni nkexrín tjejó sin.
37Ndá chꞌin Bernabé tjinkaon chꞌan kixin sáchrókjuiko sin ti chꞌin Juan Marcos. 38#Hch. 13:13.*Kjánchó chꞌin Pablo la kóxríe̱nhña tíha, kixin chꞌin Juan Marcos tsíkíto̱he chꞌan sin Panfilia la kjuínki̱tsahya chꞌan ti ixra̱. 39Méxra̱ nkoko̱ahya kjuénka̱yáxin sin, la xika̱ye̱he sin. Chꞌin Bernabé la sákjuíko chꞌin Juan Marcos la kꞌuíxehen sin ijnko ntabarco sákjuí sin nó Chipre. 40Ndá chꞌin Pablo tjinkaon sátsjiko chꞌan chꞌin Silas, la ti sin kíchóni ntiha kjuanchehe sin Díos kixin jína tsꞌayakohen chꞌan ti sin a, landá sákjuí sin. 41Ndá kꞌuatsínka sin Siria la ko Cilicia la kóchéhe̱ a̱sén ti sin tinkáchónki Ìnchéni tjejó ti ni̱nko ntiha.
Zur Zeit ausgewählt:
Hechos 15: poeNTplus
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2016, Wycliffe Bible Translators, Inc. All rights reserved.