Hechos 14
14
Chꞌin Pablo la ko Bernabé sákjuí sin chjasin Iconio
1A̱ndá chꞌin Pablo la ko Bernabé kjuíji sin ti chjasin Iconio. La kꞌuíxehen sin ni̱nkué ti sin judío la jína kjuako sin la itsjé ti sin judío la ko ti sin jehya judío la kuitekaon sin. 2Kjánchó iso ti sin judío kuítekakonhña sin la kjuankíxin kjuínchekónínkaon sin ti chojni jehya judío kixin tso̱nínkakohen sin ti sin tjako. 3Kjánchó Pablo la ko Bernabé la kuíto̱he sin ntiha itsjé ña̱o, la a̱ntsí kuinkáchónki sin Díos la chrákonhña sin nixja sin nkexrín tjue̱he Díos kaín chojni. La Ìnchéni kjuajon kjuachaxin kixin tsjasin sin itsjé kjuaxroan, mé xi̱kaha kjua̱ko̱xi̱n chꞌan kixin chaxín ndoá ti itan nixja sin. 4A̱ndá ti sin ntiha la nkokónhña kjuénka̱yáxin sin. Iso sin la kuitekakohen sin ti sin judío a̱ndá íso sin la kuitekakohen sin ti sin tsíkjeyá Ìnchéni. 5A̱ndá ti sin judío la ko ti sin jehya judío la kjuénka̱yáxiko sin ti sin tꞌe̱to̱an kixin tso̱nínkakohen sin ti sin tsíkjeyá Ìnchéni la ko tsjatexin sin ixro̱. 6Kjánchó chꞌin Pablo la ko Bernabé kuíhin sin nkehe kjuénka̱yáxin ti sin a, la sákjuí sin nó chjasin Listra la ko Derbe nonte Licaonia la ko ti íso chjasin tjejó chjinaxón ntiha 7la kjuako sin ti itan jína kuènté Ìnchéni.
Kjuatexín sin ixro̱ chꞌin Pablo chjasin Listra
8Ti chjasin Listra mé kjuákꞌe ijnko nkexro tsíkokjíexín xrokjuahya itji, la tjetja̱xi̱nko̱a chꞌan, 9tihin chꞌan ti nkehe tjako chꞌin Pablo. Ndá chꞌin Pablo komá chꞌan ti nkexro a la kónohe chꞌan kixin ti nkexro a, la chaxín kuitekaon chꞌan kixin tsito̱he jína. 10Ndá chꞌin Pablo itsen ndáche chꞌan ti nkexro a:
―Tꞌínkatjen, tjakꞌexián to̱tá.
Ndá tuénxín kꞌuínkatjen ti nkexro a, kjuákꞌexín chꞌan to̱té chꞌan la chrika chꞌan la ikjuí chꞌan. 11Ndá kaín ti chojni tjejó ti chjasin ntiha la kꞌuíkon sin nkehe kjuíchꞌe chꞌin Pablo, ndá kaín sin kjoxin sin ngive̱e sin Licaonia la ndáchro sin:
―Tíhi la díos tsíkꞌóna chojni, tsíki̱xi̱n nka̱jní tjejókoni ―ichro sin.
12La jehe sin kjuínchekꞌin sin Bernabé ti díos Júpiter, a̱ndá Pablo mé ti díos Mercurio kixin imá nixja chꞌan. 13A̱ndá ti ncha̱tꞌá kuènté ti ni̱nko tinkáchónki sin díos Júpiter itjen ikon chjasin, mé kjui̱ka̱o chꞌan koxinta teyá itsjo, kixin jehe chꞌan la ko kaín ti chojni chréhe̱ tíha la tjinkaon sin tsjikosáyehe sin ti sin tjako la ko chrókꞌóñá sin ti koxinta chrókꞌuáyéhe̱ ti sin a. 14A̱ndá ti ó kónohe chꞌin Pablo la ko Bernabé kixin xi̱kaha tjenka̱yáxin sin la kótséchje sin iké sin la sákjuikiakjan sin ti chojni siín ntiha la kꞌóyako sin ndáchro sin:
15 #
Ex. 20:11; Sal. 146:6. *―¿Nkekuènté kixin xi̱kaha tjejochꞌera? Jeheni la chojni éxi ti jahara. Ti ixra̱ kui̱xi̱ni la kixin tsochronkani ti itén Díos, kixin tsi̱to̱héra kaín ti nkehe sínkíhya la tsokjanra tsinkachónkira ti Díos tjechón, ti nkexro kjuíchꞌéna nka̱jní la ko chjasintajni, nda̱ñao la ko kaín ti nkehe siín. 16Ósé la Díos kuíto̱he kixin kaín chojni la tsꞌaji sin ti nti̱a tóxríhi̱n sin. 17Kjánchó kuíto̱ehya chꞌan ti jehe sin la kjua̱ko̱xi̱n chꞌan kixin imá tꞌe̱to̱an chꞌan la tjinki̱tsa chꞌan kaín chojni, tjajon chꞌan kjuachaxin kixin tꞌaniá ichrin ndá tꞌe̱nka̱ni la jína tꞌóneheni, la ko tjajon chꞌan kjuachaxin kixin nkochríxín tsꞌixin nkehe sinieni, la xi̱kaha nchechéhe̱ chꞌan ti jeheni ―ichro chꞌin Pablo.
18La kjónté xi̱kaha ichro ti sin tjako, la na̱xa̱ tjinkaon ti chojni Iconio chrókjuikosáyehe sin Pablo la ko Bernabé, chrókꞌóñá sin koxinta chrókjo̱ke̱he̱ sin ti jehe sin.
19Ndá ikui iso sin judío kjui̱xi̱n sin Antioquía la ko Iconio la kjuínchekónínkaon sin ti sin chjasin, ndá kaín ti chojni tjejó ntiha la kónínkaon sin la kjuatexín sin ixro̱ chꞌin Pablo. La kjuénka̱yáxin sin kixin ó tsíkꞌen chꞌan, la kuinkánkákjen sin sákjuíko sin ikon chjasin la ikꞌue sin chꞌan. 20Kjánchó ti sin tinkáchónki Ìnchéni la kua̱ntátjen sin ti itjen chꞌin Pablo ndá kꞌuàya chꞌan la xíkjan chꞌan ti chjasin ínaá. Ndá ti ña̱o chrꞌéxi̱n la sákjuíko chꞌan chꞌin Bernabé nó chjasin Derbe.
21Ndá ti ó kjuixin kjuako sin ti itan jína la ko kjuacha sin itsjé chojni kuinkáchónki Ìnchéni ti chjasin Derbe, ndá ikjan sin ti chjasin Listra, Iconio la ko Antioquía. 22Nkuíxín ti chjasin kꞌuatsínka sin la nixje̱he̱ sin ti sin tinkáchónki Ìnchéni kixin kaín a̱sén sin chrókuitekaon sin Díos, la ko kja̱xin ndáchro sin: “Ti tjinkaoni tsꞌixeheni ti itjen Díos la ticháxi̱n tsjasóteni”, ichro sin. 23La kja̱xin kjueyá sin chojni nkojnko ni̱nko kixin tsꞌe̱tue̱hen sin ti sin tinkáchónki Jesús kixin jína tsꞌejó sin. Ndá nixje̱he̱ sin Díos ti na̱xa̱ kjoniehña sin, la kjuanchehe sin Ìnchéni kixin tsꞌayakohen chꞌan ti sin tinkáchónki Ìnchéni.
Pablo la ko Bernabé ikjan sin Antioquía
24Ndá kꞌuatsínka sin chjasin Pisidia la kjuíji sin nonte Panfilia. 25Ndá ti ó kjuixin kjuako sin ti itan kuènté Ìnchéni ti chjasin Perge, ndá sákjuí sin chjasin Atalía. 26A̱ndá ntiha kꞌui̱tꞌótjen sin ijnko ntabarco ndá sákjuí sin Antioquía, ti tjejó ti sin kjuanchia kixin Díos tsjinki̱tsa ti jehe sin kixin jína sichꞌe sin ti ixra̱ la tso̱kohya nkehe chrókꞌuinkakohe̱n. La ó kjuixin xiteyá tíha. 27Ndá ti ó kjuíji sin ntiha la kónkotséko sin kaín ti sin tinkáchónki chꞌin Jesús la chrónka chꞌin Pablo nkexrín kjuínki̱tsa Díos ti jehe sin la ko nkexrín kjuajon Díos kjuachaxin kixin tsja̱ko̱he̱ sin ti chojni jehya judío kixin kja̱xin sin tsitekaon sin Ìnchéni. 28Ndá xi̱kaha chꞌin Pablo la ko Bernabé ntahó kꞌuéjóko sin ti sin tinkáchónki Ìnchéni itsjé ña̱o.
Zur Zeit ausgewählt:
Hechos 14: poeNTplus
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2016, Wycliffe Bible Translators, Inc. All rights reserved.