San Juan 16

1’Kaín tíhi tjo̱nka̱ra kixin chrókui̱tékaonra ti nkehe kjuákohára. 2Ti sin judío la tsakítsjexín sin ni̱nko ti jahara la itsi jnko ña̱o la ti tsꞌóñá sin ti jahara la tsondáchro sin kixin xi̱kaha tjejóchꞌehe sin ixra̱ Díos. 3Mé xi̱kaha sichꞌe sin kixin chónhña sin ti Tꞌaná la ko chónhña sin ti janhan. 4A̱ndá tjo̱nka̱ra kaín tíhi kixin ti ó tsjixraká ti ña̱o xi̱kaha tso̱hen, la tsoxraxinkáonra kixin ó xráxín kꞌuéxrja̱nka kaín tíhi.

Ti ixra̱ ichꞌe ti Ncha̱kuén Díos

’Ndáxrja̱nhña tíhi ndesi xránkíxixín kixin nkoko̱a kꞌuéjoni. 5A̱ndá ijie sátsjiá ti itjen ti nkexro ichrꞌán ti janhan kꞌuinka, kjánchó nijnkora tjánchánkíhyara nketí sátsjiá. 6Ndá ijie ti ó tjo̱nka̱ra tíha, ndá imá tꞌavára kixin kuihínra xi̱kaha xrja̱nká. 7A̱ndá chaxín ndáxrja̱n kixin ticháxi̱n sátsjiá kixin jína tsꞌejora. A̱ndá ti sátsjihya la tsihya ti nkexro tsjinki̱tsa ti jahara. Méxra̱ ticháxi̱n sátsjiá ndá tséto̱an itsi ti nkexro tsꞌejoko̱ara. 8A̱ndá ti ó itsi mé sinchenohe chꞌan kaín ti chojni siín chjasintajni kixin tjasin sin ijie̱, la ko tsochronka nkexro ti chaxín jína itjen la ko tsochronka kixin Díos sinchekito̱exín ti ijie̱, 9kixin chónta sin ijie̱ kixin titekakonhña sin ti janhan. 10La ko tsochronka nkexro ndoá itjen. Kixin janhan sátsjiá ti itjen Tꞌaná la jahara i tsꞌikonhñarani. 11La tsochronka nkexro tsito̱exín iji̱é. Tíha la ti nkexro tꞌe̱tue̱hen ti chjasintajni ntihi la ó kuito̱exín kixin tsjasóte.

12’Na̱xa̱ chonta itsjé nkehe chrótjo̱nkara, kjánchó tsjáchahyara tsiénxinra ijie. 13A̱ndá ti ó itsi ti Ncha̱kuén Díos chaxín, ndá tíha mé tsja̱ko̱hara kaín ti nkehe jína. Méxra̱ jehya ti nkehe kuènté chꞌan ó tsochronka chꞌan. Náhí. Kaín ti nkehe tsíkihin chꞌan chrónka Tꞌaná mé tsochronka chꞌan la tsja̱ko̱hara chꞌan ti nkehe tso̱hen chrꞌéxi̱n. 14Jehe chꞌan mé tsja̱ko̱xi̱n chꞌan ti kjuachaxin ijié kuénta̱na kixin tsꞌáyéhe̱ chꞌan kaín ti nkehe kuénta̱na, ndá tsja̱ko̱he̱ chꞌan ti jahara kaín tíha. 15Kaín ti nkehe chónta Tꞌaná mé kja̱xin kuénta̱na. Mé xi̱kaha ndáxrja̱n kixin ti Ncha̱kuén Díos chaxín mé tsꞌáyéhe̱ ti nkehe kuénta̱na, ndá kaín tíha tsja̱ko̱he̱ ti jahara.

Ti kjuatꞌává la tsꞌóna kjuachéhe̱

16’Ndá í séhya la í tsꞌikonhñara ti janhan. La ko kja̱xin í séhya ndá xíkꞌikonra ti janhan ínaá kixin sátsjiá ti itjen Tꞌaná.

17Ndá iso ti sin kꞌuájiko chꞌan mé kjuanchankíhi sin kícho sin:

―¿Nkehe tꞌaxrjexín ti nkehe ndáchro chꞌan kixin í séhya ndá tsꞌikonhñani chꞌan la ko kja̱xin í séhya ndá xíkꞌikoni chꞌan ínaá kixin sátsji̱ chꞌan ti itjen Itꞌé chꞌan? 18¿Nkehe tꞌaxrjexín ti ndáchro chꞌan, kixin “í séhya”? Tienxínhñani ti nkehe ndáchro chꞌan ―ichro sin.

19Ndá kónohe chꞌin Jesús ti nkehe chrókjuanchankí sin, la ndáchro chꞌan:

―Xi̱kaha tjo̱nka̱ra kixin í séhya ndá í tsꞌikonhñara ti janhan, la ko kja̱xin í séhya ndá xíkꞌikonra ti janhan ínaá. ¿Á tíha ti tjejotjanchankíhíra kichuara ní? 20Ijnko nkehe chaxín ndáxrja̱n kixin imá tso̱tsja̱nkara la ko tsꞌavára. A̱ndá ti chojni chjasintajni la tso̱chéhe̱ sin. La kjónté jahara imá tsꞌavára, kjánchó chrꞌéxi̱n la imá tso̱cháhara. 21Éxi ijnko chojnichjin sinchekokjíhi ijnko ixjan, la imá tóxakohen kixin ó kjuixraká ti hora tsjotéhe tjan. A̱ndá ti ó tsjixin tsokjíhi ti ixjan, ndá í tsoxraxinkakonhña tjan nkexrín kjoté kixin chéhe̱ tjan kixin kjuínchekokjíhi tjan ijnko ixjan. 22Mé xi̱kaha jahara tꞌavára ijie. Ndá itsi ijnko ña̱o la xíkꞌíkua̱n ti jahara ínaá, ndá imá tso̱chéhe̱ a̱sánra, la ko tso̱kohya ninkexró tsakítsjahara ti kjuachéhe̱ tsochontara.

23’Ti ó itsi ti ña̱o a ndá tsjanchankíhyara ninkehó. Chaxín ti nkehe tjo̱nka̱ra kixin Tꞌaná tsotjáhara kaín ti nkehe tsjanchatoxixínra ni̱ná. 24Jahara na̱xa̱ kjuanchatóxixínhñara ni̱ná ninkehó nkehe. Ndá ijie tjánchíára la tsꞌayéhéra, ndá a̱ntsí tso̱cháhara.

Ìnchéni Jesucristo ti nkexro tꞌe̱to̱an

25’Ti nkehe tjo̱nka̱ra mé ntayóa̱xóan íjnko nkehe. A̱ndá ti ó itsi ti ña̱o la í ninkehó si̱ntayóa̱xinhña, ndoá tso̱xrja̱nka ti nkehe kuènté Tꞌaná. 26A̱ndá ti ña̱o a mé tsjanchatoxixínra nkehe ni̱ná la ndáxrja̱nhña kixin janhan tsonixjayákohanra ti itjen Tꞌaná, 27kixin Tꞌaná mé tjue̱he chꞌan ti jahara kixin jahara tjue̱héra ti janhan la ko kuitekáonra kixin janhan kꞌuinkaxian ti itjen chꞌan. 28Kꞌuaxrjéxi̱a̱n ti itjen Tꞌaná la kꞌuinka chjasintajni. Ndá ijie ó tsi̱to̱ha̱ ti chjasintajni, la sátsjiá ti itjen Tꞌaná ínaá.

29Ndá ndáchro ti sin kꞌuájiko chꞌan:

―Ijie la ndoá tjéchro̱nka la ninkehó ncheyóe̱xinhña. 30Ndá ijie tienxíni kixin jaha mé noha kaín nkehe la ticháxi̱nhña kixin nkojín nkexro chrókjuanchankíha ichrén nkehe. Méxra̱ titekaoni kixin jaha mé kꞌuinkaxian ti itjen Díos.

31Ndá kjuáte̱he chꞌin Jesús ndáchro:

―¿Á ijie ndá kuitekáonra ní? 32Kixin itsi ti ña̱o la ijie tíha, la tsochrakonra la tsoxika̱ya̱hara sátsjira, ndá tsi̱to̱héra janhuán tsjakꞌé, kjánchó jehya janhuán itjén. Tꞌaná mé tjéki̱a̱n. 33Tjo̱nka̱ra kaín tíhi kixin kjuaxróxin tsꞌejó a̱sánra, tinkachónkira ti janhan. Kjónté ntihi chjasintajni kjuaxróxinhña tsꞌejora tsjasótera, kjánchó chrakonhñara kixin janhan kjuácha la í chóntahya kjuachaxin ti chjasintajni.

Zur Zeit ausgewählt:

San Juan 16: poeNTplus

Markierung

Kopieren