San Juan 17

Jesús chrónoéhe̱ Díos kixin tsꞌayakohen ti sin kꞌuájiko chꞌan

1A̱ndá ti ó kjuixin chrónka chꞌin Jesús kaín tíha, ndá konta chꞌan nka̱jní la ndáchro chꞌan:

―Itꞌéni, ó kjuixraká ti hora. A̱ndá ijie tjáko̱xián ti kjuachaxin ijié kuènté ti Xja̱an kixin kja̱xin ti Xja̱an chrókjua̱ko̱xi̱n ti kjuachaxin ijié kuèntá. 2Jaha kjuánjua ti kjuachaxin kixin tsꞌe̱tue̱hen chꞌan kaín chojni, ndá jehe chꞌan tsochjéhe chꞌan kjuachón nkochríxín kaín ti nkexro tsíchje̱hé chꞌan. 3Ti kjuachón nkochríxín mé tꞌaxrjexín kixin tsochóxin sin ti jaha, ti nkoko̱a Díos tjechón, la ko Jesucristo, ti nkexro ichrꞌán ikui chjasintajni.

4’Ó kjuixin kjuákohá ti chojni chjasintajni ti kjuachaxin kuèntá la ko ó kjuixina ti ixra̱ kuéto̱an. 5A̱ndá ijie Itꞌéni, tsjánjua ti kjuachaxin ijié kꞌuéchonta janhan ti na̱xa̱ kuékꞌejóni nkoko̱a ti na̱xa̱ kꞌónahña chjasintajni.

6’Kaín ti chojni chjasintajni kjuánjua la ó kjuixin kjuákohá sin nkexro ti jaha. Jaha kꞌuekuèntá ti jehe sin, ndá kjuánjua la kjuákohá sin ti itan, la kuitekaon sin. 7A̱ndá ijie ó nohe sin kixin kaín ti kjuachaxin chonta janhan, la jaha kjuánjua. 8Kixin ó kjuixin kjuákohá sin ti itan kjuánjua, la jehe sin kuitekaon sin, la ó nohe sin chaxín kixin janhan la kꞌuinkaxian ti itjen jaha, la ko kuitekaon sin kixin jaha ichrꞌán ti janhan kꞌuinka.

9’Xrja̱noáha kixin chrókꞌuayakohén ti jehe sin. Jehya xrja̱nóaha kixin chrókꞌuayakohén kaín ti chojni siín chjasintajni. Náhí. Jehó chrókꞌuayakohén ti sin kjuánjua kixin kuèntá ti jehe sin. 10Kaín ti nkehe chonta janhan la kuèntá, la ko kaín ti nkehe kuèntá mé kuénta̱na kja̱xin. A̱ndá ti kjuachaxin ijié kuénta̱na mé tja̱ko̱xi̱n nkexrín ti janhan.

11’A̱ndá ijie í séhya tsjakꞌé ntihi chjasintajni, kjánchó jehe sin na̱xa̱ tsꞌejó sin ntihi. La janhan ó tsjasán ti itjén. Jaha Itꞌéni, jaha imá jína, tꞌayakuénxian sin kjuachaxíen ti ihni̱á ndá xi̱kaha nkoko̱a chrókꞌuejó sin éxi jaha la ko janhan nkoko̱a tjejóni. 12#Sal. 41:9; Jn. 13:18.*Ti na̱xa̱ kjuakꞌéki̱an sin ntihi chjasintajni la kꞌuayakoha̱n ti kjuánjua, kjuachaxíen ti ihni̱á, la ninkehó ti jehe sin kꞌuitjáñahña. Jehó ti nkexro tsíkokjéexién kixin tsꞌitjáña, mé kꞌuitjáña kixin xi̱kaha tsoxiteyá éxi nixja ti xroon tsíkjin sin ósé.

13’Ndá ijie ó tsjasán ti itjén. Kjánchó ndáxrja̱n tíhi ti na̱xa̱ itjén ntihi chjasintajni kixin tso̱chéhe̱ sin éxi chànaxian janhan. 14Janhan ó kjuákohá sin ti itan, la ijie ti chojni chjasintajni la nínkakohen ti jehe sin kixin jehe sin la í jehya kuènté chjasintajni, éxi janhan la kja̱xin jehya kuènté chjasintajni. 15Tjáncháhya kixin chrókuakítsjexian sin chjasintajni. Náhí. Tjáncháha kixin chrókꞌuayakohén sin kixin ti Jínahña la chrókjuachahya chrókjuichꞌiyehe ti jehe sin. 16Jehe sin la jehya kuènté ti chjasintajni, éxi janhan la kja̱xin jehya kuènté chjasintajni. 17Nchetjuáxian sin ti kjuachaxin kuèntá kixin ti itán mé ti itan chaxín ndoá. 18Éxi jaha kuéto̱an kꞌuinka chjasintajni mé xi̱kaha tétua̱nha̱n sin kixin sáchrokjui sin kuenté chjasintajni, tsochronka sin ti itán. 19Janhan tjánjua a̱sená kixin si̱tꞌa ti ixra̱ kuèntá, ndá kja̱xin sin kaín a̱sén sin chrókjuíchꞌe sin ti ixra̱ kuèntá kixin ó kuíhin sin ti itan chaxín ndoá.

20’Xrja̱noáha kixin jehya jehó sin chrókjuinki̱tsa sin. Náhí. Kja̱xin xrja̱noáhá kixin chrókjuinki̱tsa kaín ti sin tsitekaon chrꞌéxi̱n, ti ó tsihin sin ti nkehe tsochronka ti sin a. 21Xrja̱noáha kixin kaín sin nkoko̱a chrókꞌuejó sin éxi jaha Itꞌéni la ko janhan nkoko̱a tjejóni, mé xi̱kaha xrja̱noáhá kixin kaín sin nkoko̱a chrókꞌuejókoni sin. A̱ndá xi̱kaha ti chojni chjasintajni chrókuitekaon sin kixin jaha ichrꞌán ti janhan kꞌuinka. 22Ti kjuachaxin ijié kjuánjua la tja̱ha̱ sin kixin ndá kaín sin nkoko̱a chrókꞌuejó sin éxi jaha la ko janhan nkoko̱a tjejóni. 23Janhan la ko jehe sin nkoko̱a chrókjuakꞌeki̱a̱n sin éxi jaha la ko janhan nkoko̱a tjejóni. Mé xi̱kaha ti chojni chjasintajni la chrókónohe sin kixin jaha ichrꞌán ti janhan kꞌuinka, la ko kja̱xin chrókónohe sin kixin tjue̱hé ti jehe sin éxi tju̱eéxian ti janhan.

24’Itꞌéni, tjínka̱oan kixin ti sin kjuánjua la chrókꞌuejó sin ti tsjakꞌé janhan kixin chrókꞌuikon sin ti kjuachaxin ijié kjuánjua; kixin xráxín kꞌuétjue̱hé ti janhan ndesi na̱xa̱ kꞌónahña chjasintajni. 25Itꞌéni, jaha imá jína. Kjónté ti chojni chjasintajni chónhña sin ti jaha, la janhan choxián ti jaha la kaín ti sin i la kja̱xin ó nohe sin kixin jaha ichrꞌán ti janhan kꞌuinka. 26Ó kjuákohá sin nkexro ti jaha, la xi̱kaha na̱xa̱ tsjákohá sin, kixin éxi tju̱eéxian ti janhan mé xi̱kaha chrótjue̱hé sin kícho sin, la ko janhan chrókꞌuejoki̱a̱n ti jehe sin ―ichro chꞌin Jesús.

Zur Zeit ausgewählt:

San Juan 17: poeNTplus

Markierung

Kopieren