San Juan 19

Pilato kjuajon kjuachaxin kixin itsꞌen Jesús

(Mt. 27:15-31; Mr. 15:6-20; Lc. 23:13-25)

1A̱ndá chꞌin Pilato mé kꞌue̱to̱an kixin tsjate sin ti chꞌin Jesús. 2Ndá ti sin soldado mé kjuíchꞌénaxín sin ntachꞌi̱ ijnko corona la kjua̱kꞌe̱nka̱ya sin ikja chꞌin Jesús la ko kjuínchekꞌinkáya sin chꞌan ijnko ika kjátsetié. 3Ndá kóchjina sin ti itjen chꞌan, la ndáchro sin:

―Nkochríxín tsjakꞌe tsétue̱hén ti sin judío ―ichro sin, kjuanoá sin chꞌan la chjéhe sin nkayakon chꞌan.

4A̱ndá chꞌin Pilato kꞌuaxrje ínaá la nixje̱he̱ ti sin tsíkónkotsé ntiha, ndáchro:

―Tsjehéra, ntihi kjuiki̱a̱n ti nkexro i kixin tso̱nohara kixin kꞌuitjáhya ninkehó ijie̱ chónta chꞌan.

5Ndá kꞌuaxrje chꞌin Jesús la tjenkáya ikja chꞌan ti corona tsíkꞌónaxín ntachꞌi̱ la ko tjechrꞌinkáya chꞌan ti ika kjátsetié. Ndá chꞌin Pilato ndáchro:

―Tsjehéra, ntihi itjen chꞌan.

6A̱ndá ti ó kꞌuíkon ti sin ncha̱tꞌá tꞌe̱to̱an la ko ti sin policía kuènté ti ni̱nko la kjuankíxin sin kꞌóyako sin, ndáchro sin:

―¡Tjakénka̱nira chꞌan ntacruz! ¡Tjakénka̱nira chꞌan ntacruz! ―ichro sin.

Ndá chꞌin Pilato ndáchro:

―Ti xi̱kaha la jahara sátsjikoára chꞌan la tjakénka̱nira chꞌan ti ntacruz kixin janhan la ninkehó ijie̱ kꞌuitjáhya chónta chꞌan.

7Ndá ti sin judío kjuáte̱he, ndáchro:

―Jeheni chojni judío la chóntani ijnko ley tꞌe̱to̱an kixin chrókꞌuen chꞌan kixin chꞌéna chꞌan a̱sén chꞌan Xje̱en Díos.

8A̱ndá ti ó kuíhin chꞌin Pilato xi̱kaha, la a̱ntsí chrákon chꞌan, 9la kꞌuíxehen chꞌan ti nchia tꞌe̱to̱axín chꞌan, la kjuanchankíhi chꞌan ti chꞌin Jesús, ndáchro chꞌan:

―¿Xá nketí kꞌuinkaxian?

Kjánchó chꞌin Jesús la ninkehó kjuáte̱hya.

10Ndá chꞌin Pilato ndáchro:

―¿Á tsjate̱éhya ti nkehe tjánchánkíha ní? ¿Á noahña kixin chonta kjuachaxin tséto̱an kixin tsjakꞌenka̱nia ntacruz la ko kja̱xin chonta kjuachaxin tsondáxrja̱n kixin sátsjia, la kohya nkehe tso̱han ní?

11Ndá kjuáte̱he chꞌin Jesús, ndáchro:

―Ninkehó kjuachaxin chróchontahya kixin chrókuéto̱an chrókꞌuen janhan o̱ sáchrókjuia, ti jehya Díos chrókjuajon kjuachaxin. A̱ndá ti chojni kjui̱ka̱ona ntihi la a̱ntsí chónta ijie̱ ke jaha.

12Ndá ti kuíhin chꞌin Pilato tíha, la kjuankíxin kjuénka̱yáxin chꞌan nkexrín chrókꞌuatjánta chꞌan ti chꞌin Jesús, kjánchó ti sin judío la kꞌóyako sin, ndáchro sin:

―Ti tsi̱to̱hé chꞌan sátsji chꞌan, la jaha la jehya ijnko nkexro tꞌiton jína ti chꞌin tꞌe̱tue̱hen ti nación kuènténi. Ti nkexro tjinkaon tsꞌóna ijnko rey mé nínkakohen ti nkexro tꞌe̱tue̱hen ti jeheni.

13A̱ndá ti ó kuíhin chꞌin Pilato tíha, la kuakitsje chꞌan ti chꞌin Jesús ndója ndá kjuákꞌetja̱xi̱n chꞌan ti silla nchekito̱exín chꞌan ijie̱, mé ngiva hebreo la itꞌin Gabata, mé tꞌaxrjexín kixin tja̱tꞌo̱ noi jehó ixro̱ tsíkꞌónaxín. 14La ó kuichjina ti ña̱o tsjasin sin ti kia Pascua la ó chjina chonkíxin, ndá ti chꞌin Pilato mé ndáche ti sin judío:

―Ntihi itjen ti rey kuèntára.

15Kjánchó jehe sin kꞌóyako sin, ndáchro sin:

―¡Itsꞌen chꞌan! ¡Itsꞌen chꞌan! ¡Tja̱kꞌenka̱nira chꞌan ntacruz!

Ndá chꞌin Pilato kjuanchankí ndáchro:

―¿Á tjinkáonra kixin janhan tsjakꞌenka̱nia ntacruz ti rey kuèntára ní?

Ndá ti sin ncha̱tꞌá tꞌe̱to̱an mé kjuáte̱he, ndáchro:

―Chóntahyani íjnko rey, jehó ti chꞌin César.

16Ndá chꞌin Pilato kjuajon kjuachaxin sákjuíko sin ti chꞌin Jesús tsjakꞌenkáni chꞌan ntacruz.

Kjuákꞌenkáni chꞌin Jesús ntacruz

(Mt. 27:32-44; Mr. 15:21-32; Lc. 23:26-43)

17Ndá sákjuíko sin ti chꞌin Jesús yámá ti ntacruz tsjakꞌenkáni. Ndá kjuíjiko sin chꞌan ijnko itjo̱ ti̱ki̱texín sin Hueso ikja chojni, mé ngiva hebreo la nchekꞌin sin Gólgota. 18Ndá ntiha kjua̱kꞌe̱nka̱ni sin chꞌan ti ntacruz la ko kja̱xin yaá sin nánánko kꞌuejó, ndá nko̱siñe kjuákꞌe chꞌin Jesús. 19Ndá chꞌin Pilato kꞌue̱to̱an kixin tsꞌóna letra ijnko inta tsjakꞌenkáni ikja ti ntacruz tsondáchro:

“Jesús tsikji̱xi̱n Nazaret, Rey kuènté ti sin judío.”

20La itsjé ti sin judío kjuínchekuáxin ti letra tsíkꞌóna kixin chjina ti chjasin Jerusalén ti kjuákꞌenkáni chꞌin Jesús ntacruz, la ko ti inta tsíkꞌóna letra mé iní ngiva chonta, ti ngiva hebreo, griego la ko latín. 21Ndá xi̱kaha ti sin ncha̱tꞌá tꞌe̱to̱an kuènté ti sin judío mé ndáche sin ti chꞌin Pilato:

―Chrokjinhña kixin jehe chꞌan mé “Ti Rey kuènté ti sin judío.” Náhí. Chrókjian kixin “Jehe chꞌan mé ndáchro chꞌan kixin jehe chꞌan ti Rey kuènté ti sin judío.”

22Kjánchó chꞌin Pilato kjuáte̱he ndáchro:

―Ti kuéto̱an kꞌóna la ó kꞌóna, la xi̱kahó tsjakꞌe.

23A̱ndá ti sin soldado ti ó kjuixin kjua̱kꞌe̱nka̱ni sin ntacruz ti chꞌin Jesús, la kuákja sin ti iké chꞌan la kꞌóxika̱ye̱he sin kuákja nkojnko, kanoé sin. La ko kja̱xin kuákja sin ti ika kjíjin tꞌinkáyate chꞌan. Ti ika a mé chóntahya ti tsíxro̱nñaxín, méxra̱ nkoko̱a ika tíha. 24#Sal. 22:18.*Ndá ti sin soldado mé ikjo kícho sin ndáchro sin:

―Tsótséchjehyani ti ika i. Ícha jína sichꞌexíni suerte ndá tso̱noheni nkexro tsákja.

Mé xi̱kaha kjuíchꞌe sin la xiteyá éxi ndáchro ti xroon tsíkjin sin ósé, ndáchro: “Kjuíchꞌexín sin suerte ti kaná ndá kꞌóxika̱ye̱he sin kuákja sin.”

25A̱ndá chjina ti ntacruz kjuákꞌenkáni chꞌin Jesús, mé ntiha kjuákꞌe ti ìñé chꞌan la ko ti kícho tjan, ti tjan María ichjién chꞌin Cleofas, la ko ti tjan María Magdalena. 26A̱ndá ti ó kꞌuíkon chꞌan kixin ntiha itjen ti ìñé chꞌan la ko ti chꞌin imá tjue̱hé chꞌan kuékꞌajiko chꞌan, la ndáche chꞌan ti ìñé chꞌan:

―Ìñéni, tsjehé méhe̱ itjen ti xja̱an.

27Ndá kjuixin la nixje̱he̱ chꞌan ti nkexro tjue̱he chꞌan, ndáchro chꞌan:

―Tsjehé, méhe̱ itjen ìná.

A̱ndá ti nkexro a mé sákjuíko chꞌan ndo̱e chꞌan ti tjan María la kꞌuayakohen chꞌan éxi ìñé chꞌan xi̱kaha.

Ikꞌuén chꞌin Jesús

(Mt. 27:45-56; Mr. 15:33-41; Lc. 23:44-49)

28 # Sal. 69:21; 22:15. *Ndá ti ó kjuixin tíha la chꞌin Jesús ó nohe kixin kaín ixra̱ la ó kjuixin xiteyá, ndá tjinkaon chꞌan kixin tsoxiteyá kaín ti nkehe ndáchro ti xroon tsíkjin sin ósé, ndá xi̱kaha ndáchro chꞌan:

―Ikꞌuén ìnta̱.

29Ndá ntiha itjen ijnko nchísén síkaón xranvino isán, ndá kjuínchekjata sin ijnko kachjo̱n, la kjua̱kꞌe̱chónta sin ijnko inta kjíjin, ndá kjuínchechrìin sin ti itjen irꞌua chꞌan. 30Ndá chꞌin Jesús ikꞌui ti xranvino isán la ndáchro:

―Ó kjuixin xiteyá kaín nkehe.

Ndá kꞌuisén ikja chꞌan la ikꞌuén chꞌan.

Ijnko soldado chrꞌáte chika iyo ti chjia chꞌin Jesús

31A̱ndá ti na̱xa̱ tihya ti ña̱o tjasin sin ti kia Pascua, ndá ti sin judío mé tjinkakonhña kixin ti cuerpo kuènté ti sin tsíkꞌen la na̱xa̱ tsꞌejóyáni ti ntacruz ti ña̱o to̱kꞌéhe sin, kixin ti ña̱o Pascua mé ijnko ña̱o imá tjetoan. Mé kjuanchehe sin ti chꞌin Pilato kixin tsꞌóchjejin sin to̱té ti sin tjejóyáni ntacruz la ko tsꞌinkajin ti cuerpo. 32Ndá xi̱kaha ti sin soldado la sákjuí sin kꞌóchjejin sin to̱té ti chꞌin itjen sa̱o la ko kja̱xin kꞌóchjejin sin to̱té ti íjnko chꞌin, tjejóyániko chꞌin Jesús ti ntacruz. 33Ndá ti ó kóchjina sin ti itjen chꞌin Jesús, la kꞌuíkon sin kixin ó tsikji̱xi̱n tsíkꞌen chꞌan, ndá í kꞌóchjejinhña sin to̱té chꞌan.

34Ndá ijnko soldado mé chrꞌáte ijnko chika iyo ti chjia chꞌin Jesús ndá tuénxín kꞌuaxrje ijni̱ la ko ìnta̱. 35A̱ndá ti nkexro kꞌuíkon kaín ti nkehe kóhen la ndoá chronka, la ko nohe kixin chaxín ti nkehe chrónka kixin kaín ti nkexro tsihin la tsitekaon. 36#Ex. 12:46; Nm. 9:12; Sal. 34:20.*Mé xi̱kaha kóhen kixin xiteyá ti nkehe ndáchro xroon itén Díos tsíkjin sin ósé ndáchro: “Kꞌóchjejinhña sin ninkehó huéso̱e chꞌan.” 37#Zac. 12:10; Ap. 1:7.*Kja̱xin íjnko nketí nixja ti xroon itén Díos tsíkjin sin ósé ndáchro: “Tsokomá sin ti nkexro tsíkjiate chika ti chjia.”

Xravá chꞌin Jesús

(Mt. 27:57-61; Mr. 15:42-47; Lc. 23:50-56)

38Ndá ti ó kjuixin kóhen kaín tíha, ndá chꞌin José, ijnko nkexro tsikji̱xi̱n chjasin Arimatea, mé chrónoéhe̱ ti chꞌin Pilato kixin chrókjuajon kjuachaxin kixin tsꞌinkaji̱xi̱n ntacruz ti cuerpo kuènté chꞌin Jesús, ndá sátsjiko chꞌan tsoxravá. Jehe chꞌan mé ómó kuinkáchónki chꞌan ti chꞌin Jesús kixin chráko̱nhe̱n chꞌan ti sin judío. Ndá chꞌin Pilato mé kjuajon kjuachaxin, ndá chꞌin José la kuakjijin la ko sákjuíko chꞌan ti cuerpo kuènté chꞌin Jesús. 39#Jn. 3:1, 2.*Kja̱xin chꞌin Nicodemo, ti nkexro kjuinixje̱he̱ chꞌin Jesús ijnko tie, mé ikjui kjui̱ka̱o treinta kilo xro̱a̱n xraxé náxrjón tsíkjiko mirra la ko kachroxro̱a̱n. 40Ndá xi̱kaha yóí sin kuákja sin ti cuerpo kuènté chꞌin Jesús, la kjuínchekꞌísímá sin ijnko ika kjíjin síkjajin ti xro̱a̱n xraxé náxrjón kixin xi̱kaha kuéhen ti sin judío kꞌuékja̱vá ti sin tsíkꞌen. 41Chjinaxón ti kjuákꞌenkáni chꞌin Jesús ntacruz mé itjen ijnko huerto la ntiha itjen ijnko tòye̱ ni̱xin na̱xa̱ ninkexró tsíxraváhya. 42Mé ntiha kjua̱vá sin ti chꞌin Jesús kixin kjínhña la ko kixin ó kuichjina ti ña̱o to̱kꞌéhe ti sin judío.

Zur Zeit ausgewählt:

San Juan 19: poeNTplus

Markierung

Kopieren