San Juan 20

Ti xechón chꞌin Jesús

(Mt. 28:1-10; Mr. 16:1-8; Lc. 24:1-12)

1A̱ndá ti ña̱o xránkíxixín semana imá nchítjen mé ti tjan María Magdalena la sákjui̱ tjan ti tsíxravá chꞌin Jesús, ndá kꞌuíkon tjan kixin tsíkjìin ti ixro̱ tekjèxin ti tòye̱. 2Ndá kuinká tjan sákjuí tjan ti itjen ti chꞌin Simón Pedro la ko ti nkexro imá kꞌuétjue̱he chꞌin Jesús, la ndáchro tjan:

―Ó tsíkakítsjexín sin tòye̱ ti cuerpo kuènté Ìnchéni, ndá noehñani nketí sátsíkjiko sin ―ichro tjan.

3Ndá chꞌin Pedro la ko ti íjnko chꞌin kuíhin sin xi̱kaha, la sákjui̱tsjehe sin ti tòye̱. 4Ndá yóí sin nkokón kuinká sin sákjuí sin, kjánchó ti chꞌin íjnko la a̱ntsí tji̱a̱n kuinká ndá chꞌin Pedro la kanhñó, ndá sa̱o ti íjnko chꞌin kjuíji ti itjen ti tòye̱. 5Ndá kꞌuisén chꞌan tsjehe chꞌan nkaxehen ti tòye̱ la kꞌuíkon chꞌan kixin ti ika tsíkꞌisimá chꞌin Jesús la na̱xa̱ tjejó, kjánchó kꞌuixenhña chꞌan ti tòye̱. 6Ndá chrꞌéxi̱n ikjui chꞌin Simón Pedro la kꞌuíxehen chꞌan ti tòye̱. La kja̱xin chꞌan kꞌuíkon chꞌan kixin tjejó ti ika tsíkꞌisimá chꞌin Jesús, 7la ko kꞌuíkon chꞌan kixin ti ika tsíkꞌisimá ikja chꞌin Jesús mé yóxin tsíxratꞌo la ókjé itjen. 8Ndá ti íjnko nkexro kꞌuájiko chꞌin Jesús, ti chꞌin sa̱o tsíkjiji, la kja̱xin chꞌan kꞌuíxehen chꞌan ti tòye̱, ndá kꞌuíkon chꞌan ti nkehe tsíkóhen la kuitekaon chꞌan, 9kixin na̱xa̱ kꞌuékienxínhña sin ti nkehe chronka ti xroon itén Díos kixin ticháxi̱n tsoxechón ti chꞌin Jesús. 10Ndá xi̱kaha ti sin kjuitsjehe la ikjan sin ndo̱e sin.

Tjan María Magdalena kꞌuíkon chꞌin Jesús

(Mr. 16:9-11)

11Ndá ti tjan María mé ndója ti tòye̱ ó kuíto̱he tjan tsjánka tjan. Ndá na̱xa̱ tsjánka tjan la kꞌuisén tjan tsjehe tjan nkaxehen ti tòye̱, 12la kꞌuíkon tjan yaá sin ángel tjejóchrꞌinkáya sin ika tjóá, tjejótja̱xi̱n sin ti tsíkjakꞌe ti cuerpo kuènté chꞌin Jesús. Ijnko ti ángel mé itjen ti tsíkjakꞌe ikja chꞌin Jesús la ko ti íjnko mé itjen ti tsíkꞌejó to̱té chꞌan. 13Ndá ti sin ángel mé kjuanchankí, ndáchro:

―¿Nkekuènté tsja̱nka?

Ndá kjuáte̱he tjan ndáchro tjan:

―Sátsíkjiko sin ti Ìnchéni, ndá noehñani nketí tsíkjakꞌe sin chꞌan.

14Kjuixin ndáchro tjan tíha, ndá kuinkátjíá tjan, la kꞌuíkon tjan ti chꞌin Jesús, kjánchó kjuátso̱anhña tjan kixin jehe chꞌan tíha. 15Ndá chꞌin Jesús kjuanchankí, ndáchro:

―¿Nkekuènté tsja̱nka? ¿Xá nkexro ti xritjéyá?

Ndá jehe tjan kjuénka̱yáxin tjan kixin jehe chꞌan mé ti nkexro tꞌayakohen ti huerto, ndá ndáchro tjan:

―Ti jaha sákjuikoá ti cuerpo kuènté Ìnchéni Jesús, la chro̱nka nketí sákjuikoá ndá jeheni sátsjichréhe̱ni.

16Ndá chꞌin Jesús ndáchro:

―¡María!

Ndá jehe tjan kuinkátjíá tjan la nixja̱xi̱n tjan ngiva arameo, ndáchro tjan:

―¡Raboni! ―tíha mé tꞌaxrjexín Maestro.

17Ndá ndáchro chꞌin Jesús:

―Tséhya ti janhan kixin na̱xa̱ sátjihya ti itjen Tꞌaná. Sátjia ti tjejó ti sin kíchina la chenka sin kixin sátsjiá ti itjen Tꞌaná, mé kja̱xin Itꞌára, ti Díos kuénta̱na la ko Díos kuèntára kja̱xin.

18Ndá ti tjan María Magdalena mé sákjuí tjan la chenka tjan ti sin kꞌuájiko chꞌin Jesús kixin kꞌuíkon tjan ti jehe chꞌan. La ko kja̱xin chrónka tjan kaín ti nkehe tsíchronka chꞌan.

Ti sin kꞌuájiko chꞌin Jesús kꞌuíkon sin ti jehe chꞌan

(Mt. 28:16-20; Mr. 16:14-18; Lc. 24:36-49)

19A̱ndá ti ó kójín ti ña̱o xránkíxixín semana, ndá ti sin kꞌuájiko chꞌin Jesús mé kónkotsé sin nkaxehen nchia síkjehe̱ jína kixin chráko̱nhe̱n sin ti sin judío. Ndá titàya̱ kꞌuikuén sin kixin nko̱siñe ti tjejó sin itjen chꞌin Jesús, ndá nixje̱he̱ chꞌan ti jehe sin, ndáchro chꞌan:

―Kjuaxróxin tꞌejora.

20Ndá kjuixin ndáchro chꞌan tíha, ndá kjuako chꞌan ti itja chꞌan la ko ti chjia chꞌan. Ndá ti sin kꞌuájiko chꞌan la kóchéhe̱ sin kꞌuíkon sin ti jehe chꞌan. 21Ndá chꞌin Jesús ndáchro ínaá:

―Kjuaxróxin tꞌejora. Éxi Tꞌaná kꞌue̱to̱an kꞌuinka, mé xi̱kaha této̱an sátsjira tsjichro̱nkara ti itan jína.

22Ndá kꞌuánote chꞌan ti jehe sin la ndáchro chꞌan:

―Tꞌayéhéra ti Ncha̱kuén Díos. 23#Mt. 16:19; 18:18.*Ti tsꞌitjáñahanra ti ijie̱ kjuasin nkojín nkexro, la Díos koí tsjakjìin tíha. A̱ndá ti tsꞌitjáñahñara ti ijie̱ kjuasin nkojín nkexro, la kja̱xin Díos tsjakjìinhña ti ijie̱ chontara.

Chꞌin Tomás kꞌuíkon kixin tsíxechón chꞌin Jesús

24A̱ndá chꞌin Tomás, ijnko ti teyóxin sin kꞌuájiko chꞌin Jesús, mé kja̱xin ti̱ki̱texín sin chꞌan Nóhé, mé kohya chꞌan ti ikui chꞌin Jesús. 25Ndá chrꞌéxi̱n ti íso sin kꞌuájiko chꞌin Jesús mé ndáche sin chꞌan:

―Ó kꞌuíkoni ti Ìnchéni.

Kjánchó chꞌin Tomás ndáchro:

―Ti tsꞌíko̱nhña ti itja chꞌan tsíkjiate clavo, la ko tsochrꞌanxianhña ndedo tjaná ntiha, la ko ti tsochrꞌanxianhña tjaná ti chjia chꞌan, la tsíteka̱konhña.

26A̱ndá ijní ña̱o chrꞌéxi̱n, ndá kónkotsé sin ínaá la kja̱xin kjuákꞌe chꞌin Tomás. La ti nchia kꞌuejó sin mé síkjehe̱ jína, ndá titàya̱ kꞌuikuén sin kixin nko̱siñe ti tjejó sin itjen chꞌin Jesús, la ndáchro chꞌan:

―Kjuaxróxin tꞌejora.

27Ndá ndáche chꞌan ti chꞌin Tomás:

―Tjaké ndedo tjá ti kjuiatꞌo clavo la ko tsjehé ti tjaná la xrako̱a ti itjá la chrꞌaxehén ti chjiana. La ndáchrohya kixin chaxínhña. Titekaoan kixin chaxín janhan.

28Ndá kjuáte̱he chꞌin Tomás ndáchro:

―¡Ìnchéni la ko Díos kuènténi!

29Ndá chꞌin Jesús ndáchro:

―Tomás, xi̱kaha ichrua kixin kꞌuikuan ndá kuitekaoan. A̱ntsí ncheñao Díos ti sin kjónté kꞌuíkonhña la titekaon.

Tíhi mé chrónka nkekuènté tsíkjin chꞌin Juan ti xroon

30Chꞌin Jesús kjuasin itsjé íso kjuaxroan náxrjón kꞌuíkon ti sin kꞌuájiko chꞌan, kjónté chrónkahya ti xroon kixin xi̱kaha kóhen. 31Ti nkehe chronka ti xroon i la ikjian janhan kixin chrókuitekáonra jahara kixin Jesús mé ti Cristo, ti Xje̱en Díos, kixin ti tsitekáonra la tsochontara kjuachón nkochríxín.

Zur Zeit ausgewählt:

San Juan 20: poeNTplus

Markierung

Kopieren