Matthew 16
16
Iinuuch kaa nituweyihtahkwaau chechii waapahtiyaakanuutwaau maamishkaach chekwaayuu
Mark 8.11-13; Luke 12.54-56
1Pasch maak Phariseech ekw maak Sadduceech chii pechi nituwaapameuch aniyuu Jesus e wii kakwechihaatwaau. Chii iteuch maak chechii waapahtiikutwaau maamishkaach waapahtiiwewiniyuu kihchikiishikuhch e uhchiimakaniyich. 2Mikw maak Jesus chii iteu, “Iskutak wiyaapahtamekw e ati utaakushich chititwenaawaau, ‘Chika miyu chiishikaau, wesh mihkwaataakushuu.’ 3Ekw wiipach e chechishepaayaach chititwenaawaau, ‘Chika chimuun, wesh mihkwaapan kaye pechi wiipaau chiishikw.’ Chichischeyihtenaawaau e kanawaapahtamekw chiishikw taan che ispayihch. Mikw maak namui chichii nisituunenaawaau taan e ispayihch anuhchiish. 4Anuhchiish iinuuch naashch taapwe machaatisiyuuch kaye naashch pisikwaatisiyuuch. Mikw e wii waapahtahkwaau maamishkaach waapahtiiwewinh, namui maak chika chii waapahtiyaakanuuch. Mikw aniyuu maamishkaach chekwaayuu kaa ispayit Jonah eukw mikw aniyuu che waapahtiyaakanuutwaau.” Ekw Jesus kaa nakataat kaa ati chistuhtet.
Phariseech ekw maak Sadduceech e iteyihtaakusitwaau
Mark 8.14-21
5Iskutak maak anichii chischinuhamuwaakanich mesikaatwaau nete kwestehchekaam aniyuu saakahiikaniyuu, chii wanchischisuuch chechii ayaawaatwaau aaihkunaau. 6Ekw Jesus kaa itaat, “Yaakwaah, ayaakwaamiistamuwaahkw uhpisikanawaau anichii Phariseech ekw maak anichii Sadduceech.”
7Chii ayimituutamuch aniyuu kaa itikutwaau Jesus e itwetwaau, “Ekaa uhchi peshiimuhkw aaihkunaau eukw wehchi itwet uyuu.”
8Mikw maak Jesus chii chischeyimeu taan e itweyich, ekw kaa itaat, “Taapwe apishaashuu chitaapwehtamuwinawaau. Chekwaan wehchi ayimitutamekw an ekaa ayaawekw aaihkunaau. 9Namui aa chinisituhtenaawaau eshkw. Namui aa chichischisinaawaau niyaayinwaau chishemitaahtumitanuu naapeuch kaa ashamakwaau niyaayin aaihkunaauh uhchi. Taan tahtu maak utapiiwat kaa saakaschinitaayekw taan kaa ishpish iskupayihch an miichim. 10Ekw kaye an newaau chishemitaahtumitanuu naapeuch kaa ashamakwaau niishwaashch aaihkunaauh uhchi. Taan tahtu maak utapiiwat kaa saakaschinitaayekw e iskupayihch miichim. 11Taanite wehch ekaa chii nisituhtamekw ekaa aaihkunaau uhchi aayimuumak iskutak kaa ititakuch ayaakwaamiistuwaahkuch anichii Phariseech kaye anichii Sadduceech.”
12Ekw kaa uhchi nisituhtahkwaau anichii chischinuhamuwaakanich ekaa uhpisikaniyuu ayimitutamiyich, aniyuu yaakw taan e ishi chiskutamaacheyich aniyuu Phariseeh ekw maak Sadduceeh eukw aniyuu kaa yaakwaamimaakanuutwaau.
Peter kaa nisituunawaat Jesus e ayaawiyich Christ
Mark 8.27-30; Luke 9.18-21
13Jesus chii ituhteu anite waaskaa aniyuu aschiiyuu Caesarea Philippi kaa ishinihkaateyich ekw kaa kakwechimaat uchischinuhamuwaakan e itaat, “Aweyuu e ishi ayaaweyimaatwaau iinuuch Iinuu Ukusisah.”
14Ekw kaa itikut, “Pasch awenichii aniyaa John siikahaahtaacheu iteyimeuch, ekw kutakach aniyaa Elijah iteyimeuch, ekw kutakach aniyaa Jeremiah ekun e iteyimaatwaau, kutakach miin iteyimeuch kutak uchischiwehiichesuuh e aawiyich.”
15Ekw Jesus miin kaa kakwechimaat, “Chiyawaau maak wii, awen niya e iteyimiyekw.”
16Ekw Simon Peter kaa ishi nishkweushihaat, “Eukw chiya Christ, an Chishemanituu kaa pimaatisiit Ukusisa.”
17Ekw Jesus kaa itaat aniyuu Peter, “Chishaweyihtaakusin Simon, John ukusisa, wesh uu kaa ishi chischeyimiin, namui iinuu kuuhchi wiihtamaakw, Nuuhtaawii kihchikiishikuhch kaa ihtaat ekute kaa uhchi miikuyin uu chechii ishi chischeyimiin. 18Chiwiihtamaatin Peter, eukw chiya e paahpaachipiskaach. Ekut maak utah e paahpaachipiskaach che wiikaapuuhtaayaan nitayimiheukamikw, namui maak waawaach nipuwin chika uhchi shaakuuchihtaachemakan utah nitayimiheukamikuhch. 19Chika miitin maak kihchikiishikw uchimaawinihch aapahiikanh. Chekwaan maak che maahkupatamuwane utah aschiihch chika maahkupitaakanuu anite kihchikiishikuhch, kaye chekwaan che aapihkunamuwane utah aschiihch chika aapihkunakanuu anite kihchikiishikuhch.” Ekun kaa itaat Jesus aniyuu Peter.
20Ekw kaa itashumaat uchischinuhamuwaakan ekaa chechii wiihtamuwaayich kutak aweyuu e aawit wiya Christ.
Jesus kaa aayimuutahk che wiisacheyihtahk neshta che nipahaakanuut
Mark 8.31–9.1; Luke 9.22-27
21Iskutak maak uyuu kaa ishi ayimihaat aniyuu uchischinuhamuwaakanh Jesus ekw kaa chihchi wiihtamuwaat e piyekastaakusit e itaat, “Nika ituhten anite Jerusalemihch, ekute maak anite che mistawaawiisacheyihtamihiitwaau anichii kaa niikaanishkuwaatwaau aniyuuh iinuuh, kaye anichii niikaanayimiheuchimaauch, kaye maak anichii kaa chiskutamaachetwaau wiishuwewiniyuu. Ekw maak che nipahiikuyaan, nishtu chiishikaau maak miin nika pimaatisiin.”
22Ekw Peter pahkaan kaa ituhtahaat aniyuu Jesus, kaa chistahamuwaat aniyuu kaa itweyich e itaat, “Utipeyihchikeu, namui kata uhchi pachishtinam Chishemanituu uyuu chechii ispayiyich. Namui nihtaa chika chii ihtuutaakuun uu.”
23Ekw Jesus kaa kweschikaapuushtawaat aniyuu Peter, kaa nishkweushihaat e itaat, “Machimanituu, maachiih iiches nete. An taan e iteyihtamihiikuyin chekwaayuuh taapaa Chishemanituu e ihtaat uhchipayuu naapeu e ihtaat uhchipayuu. Maachiih iiches nete machimanituu.”
24Ekw Jesus kaa itaat aniyuu uchischinuhamuwaakan, “Awen waa nuushuushkuukwe ekush chipaa pachishtinam aniyuu wiya taan waa ishi naniheyihtamihiisut, chipaa utineu utaashiteyaahtikum ekw maak nipaa pechi nuushuushkaakw. 25Awen kaa wii kanuweyihtamaasut upimaatisiiwin kata wanihtaau. An maak awen kaa wii pachishtinahk misiwe chekwaayuu taan kaa wii ihtuutahk mechim kaye upimaatisiiwin e wii pechi nuushuushkuut eukw an che miyaakanuut pimaatisiiwiniyuu. 26Ekw maak an awen kaa wii kanuweyihtamaasut upimaatisiiwin, puunipimaatisiite maak taanite chechii uhchi wiichihiikut aat chii wiihkuchihtamaasute misiwe chekwaayuu utah aschiihch, wiya taan kaa ishi nitaweyihtahk chechii ishi ayaat. Namui kata uhchi miyaakanuu pimaatisiiwiniyuu wiya. Namui mitun ihtakuniyuu chekwaayuu chechii pachishtinahkw kaau chechii miyaakanuut upimaatisiiwin. 27Wesh Iinuu Ukusisah chika takushiniyuuh Uhtaawiimaau uchisteyihtaakusuwiniihch kaye enchilh e pechi wiicheukut, ekw maak che tipahamuwaat misiwe aweyuu taan kaa ishi ihtuutaamiyich. 28Chiwiihtamaatinaawaau, taapwe e ihtaatwaau utah awenichii eshkw che pimaatisiitwaau iskutak utihchipayihche che takushiniyich Iinuu Ukusisa che pechi chisheuchimaawiyich.”
Zur Zeit ausgewählt:
Matthew 16: crjrNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.