Luka 10
10
Yesu natuma abe:igisibzna 70
1Emisango ejo jejire jawa, Ratabugenyi na:uramo abandi makumi gata:nu na gabiri, nabatuma babiri-biri imbere yae okugenda mu misi jo:ne, na:nu wo:ne ariga nenda okuja omwene. 2Nababwira ati, Orugeso ni rwafu, nawe abagesi nibo bakeere. Mbe nimusabwe Omwene rugeso, atume abagesi mu rugeso rwae. 3Mugende, rora, nabatuma emwe rwa jina:ma aagati ye misege. 4Mutagegaga nsagwa amwi rukoba, amwi bikwirya, amwi mutake:syaga mu:nu mu njira. 5Na inyumba yo:ne inu murengiragamo, mutangate okwaika ati, Omurembe gube mu nyumba inu. 6Akaba arimo Omwana wo murembe, omurembe gwemwe guramubagako. Araba tari kutyo gurabasubagako emwe rindi. 7Mwabaga mu nyumba eyo, nimurya nimunywa binu ababayana, okuba omukosi we mirimu e:ire omuyero gwae. Mutaso:kaga mu nyumba eimwi nimwingira mu indi. 8Na musi gwone gunu murakingagamo, bakabakuma, mwaryaga cinu barataga imbere yemwe. 9Muosyega abarwae banu barimo, mubabwire ati, Obukama bwa Nyamuanga bwafugee kwimwe. 10Nawe musi gwone gunu murakingagamo, bakarema okubakuma, mwaurukamo mu njira yagwo, nimwaika ati, 11No ruteri rwo musi gwemwe, runu ruri ku bigere byeswe, cabaruku:kumurira emwe, nawe nimumenye ati, Obukama bwa Nyamuanga bwafugee. 12Enibabwira ati, Sodoma iriba no kwigumirisya ku rusiku niriya kukira omusi ugwo.
Jiribabona banu abarema okuta
(Mt. 11:20-27)
13Jirikubona Korajini! Jirikubona Betesaida! Okuba ebya managa binu byakoreywe mwimwe, kumba byakoreywe mu Turo na mu Sidoni, bakatee kara benyanjire mwifu bafwae amagunira. 14Nawe Turo na Sidoni jiriba no kwigumirisya ku rusiku rwa intambara kukira emwe. 15Na:we Kaperinaumu, ?urigungurusibwa kukinga mu rwire? Uri:sibwa ebwire! 16Unu kabongwa emwe kanyungwa anye. Na unu kabarema emwe kandema anye, na unu kandema anye kamurema na unu antumire.
Abe:igisibwa 70 nibasuba
17Mbe abo amakumi agata:nu na gabiri nibasuba nibakonderwa, niba:ika ati, Ratabugenyi, ne misambwa ejico:robera eswe mwisi:na ryao. 18Nababwira ati, Nabwene Syetani nagwa okuso:ka mu rwire rwo rurafi. 19Rora, nabayae obuinga okutaja jinjoka na jinge na ku managa go:ne ago muremo, amwi ci:nu co:ne citaribo:nona na katyari. 20Nawe mutakonderwa okuba emisambwa ejibo:robera, nawe nimukonderwe okuba amasi:na gemwe gandikirwe mu rwire.
21Mbe mu saa eyo eyo nakonderwa mu Mwoyo Mweru, na:ika ati, Enikusi:ma Rata, Omukuru wo rwire na i:si, okuba wababisire abenge na bengeso emisango jinu, nujiswerurira aba:na bato:to. Nikwo kutyo, Rata, okuba nikwo kutyo jakukondee awe. 22Rata ananire byone. Atario mu:nu unu kamenya Omwana, tari Rata. Nakabee atario unu kamenya Rata, tari Omwana, no:yo Omwana kenda okumuswerurira. 23Naindukira abe:igisibwa bae, nababwira bwitebe ati, Gana ribando ame:so ganu agarora jinu omurora. 24Okuba enibabwira ati, Baragi ba:fu na bakama ba:fu bendaga okurora jinu omurora emwe, nawe batajirorere. Bendaga no kungwa jinu omungwa nawe batajunguywe.
Omusamaria we cigongo
25Mbe rora, omwiigisya we biragiro nemereguru namusaka, na:ika ati, Mwiigisya, ?nikore kutiki korereki nirye omwandu gwo buanga bwa kajanende? 26Namubu:sya ati, ?Byandikirwe kutiki mu biragiro? ?Ousoma kutiki? 27Naindura na:ika ati, Yendaga Ratabugenyi Nyamuanga wao no mutima gwao gwone, no mwoyo gwao gwone, na managa gao go:ne, no bwenge bwao bwone, no mwikasyanya wao umwende rwa kutyo wiyendere. 28Namubwira ati, Wabarira. Ukakora kutyo uriba no buanga.
29Nawe omwene ariga nenda okwiyana oburengeresi, nabu:sya Yesu ati, ?Omwikasyanya wani niga? 30Yesu naindura ati, Ariga:rio mu:nu unu aso:kaga Yerusalemi, natebera Yeriko. Nagwa mu basa:kusi, nibamufu:ra nibamubuma, nibe:gendera, nibamusiga nayenja okufwa. 31Mbe omugabisi ariga natebera mu njira eyo. Mbe wejire amurora nakerera. 32No Murawi one naja. Wejire akingao namurora, nakerera. 33Nawe Omusamaria umwi ariga naribata naja anu ariga:ri. Wejire amurora namufwira ecigongo. 34Namufugerako, naboya amauta gae, namwitiriramo amafuta na manji ge mijabibu, namuta ku sikiri yae, namure:ta mu buma:mo bwa bagenyi, namurwasya. 35Wejire bwaca katondo nagega siringi ibiri najiyana omwene nyumba, na:ika ati, Numurwasye. Na cinu co:ne urigwata okusagirira, ndikuriya ariba nasuba. 36Mbe owiganirisya atiki, ?Ni uya kwabo abasatu unu ariga mwikasyanya wa unu agu:ye mu basa:kusi? 37Na:ika ati, Ni unu amufwiriye ecigongo. Yesu namubwira ati, Genda ukorega kutyo.
Marita na Maryamu
38Mbe anu bariga nibagenda, nengira mu musi-Ariga:rio mugasi risi:na ryae Marita namukunia mu nyumba yae. 39Oyo ariga no muyara we:ja:bo natogwa Maryamu, unu enyanjaga mu maguru ga Yesu, nategeresya emisango jae. 40Nawe Marita ariga ne mifurubendo myafu ejo kute:ka, namu:jako namubu:sya ati, Ratabugenyi, ?Utakukararwa omuyara we:ja:su ansindikira okufurubenda nenyere? Mbe numubwire ansakire. 41Nawe Ratabugenyi naindura namubwira ati, Marita, Marita, awe ouwa omwoyo niwinya:sya-nya:sya misango myafu. 42Nawe cinu cikenerwe ni cimwi, na Maryamu e:toramo omugabo gwo bwana gunu atarite:sibwa.
Zur Zeit ausgewählt:
Luka 10: KIJ1960
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kijita New Testament © The British and Foreign Bible Society and The Bible Society of Tanzania, 1960.