Luka 12
12
Ecifwimbya ca Bafarisayo
(Mt. 16:5-12; Mk. 8:14-21)
1Mu mwanya ogwo, aba:nu be cise wejire be:kofyana ebisira ne bisira, nibatajana no kutajana, namba okubwira abe:igisibwa bae ati, Mwikenge ecifwimbya ca Bafarisayo, nirwo rurimi. 2Nawe gutario gunu guswikiye gunu gutariswerurwa, amwi gunu gwabisirwe gunu gutarimenywa. 3Mbe jo:ne jinu mura:ikiye mu cisu:te jiryungwirwa abweru. Na gunu mwariga mwaikiye mu kutwi mu masago, guryaikirwa inguru ku nyumba. 4Nanye enibabwira emwe basa:ni bani ati, Muto:bayaga abo abe:ta omubiri, kumara batakutura kukora musango gundi. 5Nawe enibabwira unu muro:bayaga. Mu:bayega oyo akamara okwita ari no buinga okwesa mu nyanja yo muriro. Mbe enibabwira ati, Oyo niwe muro:bayaga.
6?Barukuyure bata:nu batakubaka:namo senti ibiri? Nawe Nyamuanga atakurabirwa eimwi kwijo. 7Nawe na jifwiri ja ku mitwe jemwe jibarirwe jo:ne. Muto:ba-yaga, emwe mukirire barukuyure aba:fu. 8Mbe enibabwira ati, Unu wo:ne arintogora imbere ya ba:nu, oyo Omwana wo mu:nu one arimutogorera imbere ya bamaraika ba Nyamuanga. 9Na unu arinyiga:nira imbere ya ba:nu, oyo ari:ga:nirwa imbere ya bamaraika ba Nyamuanga. 10No mu:nu wo:ne unu ka:ika omusango ku Mwana wo mu:nu, ari:swaririrwa, nawe oyo kafuma Mwoyo Mweru atari:swaririrwa. 11Mbe barabare:taga emwe mu mekofyanyisyo, na ku basi:ba, na ku banyaŋoma, mutaweraga mwoyo jinu muriindura, amwi jinu muryaika. 12Okuba Mwoyo Mweru arabe:igisyaga mu mwanya ogwo jinu jibe:ire okwaika.
Okurigira kwe bi:nu
13Omu:nu wa mu cise namubwira ati, Omwiigisya, bwira Omwana wa:su cigabane omwandu. 14Nawe omwene namubu:sya ati, ?Mu:nu awe, niga unu anteeo anye okuba muramusi amwi mugabanya wemwe? 15Nababwira ati, Murore, mwikenge okurigira kwone, okuba obuanga bwo mu:nu butakuso:ka mu bwafu bwe bi:nu binu kaba ari nabyo.
16Nababwira ecijekekanyo ati, Ariga:rio muni:bi, oyo risambu ryae ndiundya. 17Neganirisya munda yae ati, ?Nje nikore kutiki okuba nitana wa kutu:ra omuuro gwani? 18Na:ika ati, Kanje nikore kutya. Nje nifumye amabi:kiro gani, numbake amanene kukira ago, nitu:remo omuuro gwani gwone, ne bi:nu byani byone. 19Kumara ndibwira Omwoyo gwani ati, Mwoyo gwani, uri ne bi:nu byafu binu wibi:kiye bya myaka myafu. Isya omwoyo, urye, unywe, usandabe. 20Nawe Nyamuanga namubwira ati, Mutamutamu awe, mu ngeta inu oujo:so:sibwamo omwoyo gwao. ?Kambe ebi:nu binu ubi:kire jebibe byaga? 21Nikwo kutyo kaba unu ke:bi:kira obuni:bi, nawe atari muni:bi imbere ya Nyamuanga. 22Nabwira abe:igisibwa bae ati, Kwenikora nimbabwira ati, Mutaweraga omwoyo obuanga bwemwe cinu murarya, amwi mibiri jemwe binu murafwara. 23Okuba obuanga obukira ebiryo, no mubiri ogukira ebifwaro. 24Murore banyamukoro kutyo batakubiba amwi batakugesa. Batari na cibi:kiro amwi citara, nawe Nyamuanga kabari:sya. ?Mbe emwe omukira jinyonyi kwiya karinga? 25?Niga kwimwe unu katura okwiganirisya nongesya ku mutungara gwae kuboko kumwi? 26Mbe araba mutakutura ecito:to muno, ?niki cinu omukora nimuwera omwoyo ebindi?
27Murore obwaso kutyo obumera. Butakukora murimu, nakabee kuruka mwenda, nawe enibabwira ati, na Sulemani mwikusyo ryae ryone ariga atafwae rwo bwaso bumwi. 28Nawe Nyamuanga akaba nafwafya kutyo obunya:si bwa mu ndiri bunu rero burio na mutondo nibabwesa mu co:to, ?mbe ataribafwafya muno emwe? Emwe muri no kwikirisya kuto:to. 29Emwe mutayenjaga cinu murarya amwi cinu muranywa, amwi mutawaga omwoyo. 30Okuba amaanga ga mu:si nigo agayenja ebyo byone. Nawe Esomwana amenyere ati, mubikenere. 31Nawe nimuyenje obukama bwa Nyamuanga, ne bi:nu ebyo muryongesibwako.
32Muto:baya emwe riijo rito:to, okuba Esomwana akondeywe okubayana emwe obukama. 33Muka:ne binu muri nabyo, mugabire abakene. Mwibari:rire jinsagwa jinyatakokora, nibwo obuni:bi bunu butakuwao mu rwire, anu omwifi atakufugera, amwi amaenje gatakunyamura. 34Okuba obunibi bwemwe enu buri, niyo emitima jemwe one ejiba.
Okurindirira Yesu mu ku:ja kwae
35Mwiboe ebibunu byemwe na jitara jemwe nija:ka. 36Nemwe abe:ne mube rwa ba:nu banu abarindirira esebugenyi, anu arisubira naso:ka mu buregesi, akaja ne:bu:ra ku rwigi bamwigurireo aonao. 37Bari na ribando abagaya abo, esebugenyi ariba:ja nabasanga batengejere. Ni cimari enibabwira ati, ari:boya omwene nabenyanja ku biryo, na:ja nabafurubendera. 38Mbe ariba:ja mu cifuro ca kabiri, amwi mu ca kasatu, nabasanga bari kutyo, bari na ribando abagaya abo. 39Nawe mumenyere gunu ati, kumba omwenemusi aja:menyere omwanya gunu omwifi are:jiramo, akatengejere, atakasigire nyumba yae kufumurwa. 40Mbe emwe one mube mumaririye, okuba Omwana wo mu:nu ke:jira mu mwanya gunu mutakumenya.
Ecijekekanyo co mubi:ki na bakosi
41Petero na:ika ati, Ratabugenyi, ?wacijekekanyisya eswe ecijekekanyo eco, tere amwi ni bo:ne? 42Yesu na:ika ati, ?Mbe niga omubi:ki uyo omwiikanyibwa no wo bwenge, unu esebugenyi arisigira aba mu nyumba yae okubagabira omugabo gwebwe ogwe biryo mu mwanya gwabyo? 43Ari na ribando omugaya oyo esebugenyi ariba:ja namusanga nakora kutyo. 44Ni cimari enibabwira ati, arimukora mukuru ku bi:nu byae byone binu ari nabyo. 45Nawe omugaya oyo ariba a:ika mu mutima gwae ati, Ratabugenyi ako:ra oku:ja. Namba okubuma abagaya na bagayagasi, no kurya no kunywa no kukorwa. 46Mbe esebugenyi wo mugaya oyo ari:ja ku rusiku runu atakwiganirisyako, na mu saa inu atamenyere, namutematema namuyana omugabo gwae aamwi na banu bate:kirisisye. 47No mugaya oyo unu ariga amenyere esebugenyi jinu kenda narema okwira:ba, norwo kukora jinu kenda, oyo aribumwa simbo nyafu. 48Nawe unu atakumenya, nakora jinu ji:iro:bumwa, oyo aribumwa simbo no:to. Na unu ayabirwe ebyafu, aryendwa byafu, na unu babi:kisisyeko byafu, oyo barimwendako byafu kukirao.
Kristo naraga okwaukana kwa ba:nu
49Anye ne:jire kwesa omuriro ku ca:ro. ?Ogwene gukaba nigwaka woryanu, enenda ki? 50Nawe ndi no kubatija kunu enijo:batijibwa. Anye eniiganyibwa kutiki kukinga runu kuriku:misibwa! 51?Omwiganirisya ati ne:jire kure:ta murembe ku ca:ro? Enibabwira ati, Uri, nawe enire:ta okwaukana. 52Okuba okwambira woryanu baribao ba:nu bata:nu mu nyumba imwi ba:uke:ne, abasatu na babiri, amwi babiri na basatu. 53Baryaukana esemwene no mwana wae, Omwana nesemwene, nyiramwene aryaukana no muyasya wae, no muyasya aryaukana na nyiramwene, na nyabuko aryaukana no mukamwana wae, no mukamwana aryaukana na nyabuko.
54Nabwira ebise one ati, Wora mwarora eri:re niritinga ebugwe:suba, aonao nimwaika ati, Iŋuba eijo:kugwa, na ka nikwo kutyo eiba. 55Wora mwarora amarimbe nigayemba nimwaika ati, Eijo:kuba mbita, niiba kutyo. 56Emwe ba rurimi, mumenyere okurora orususo rwa i:si no rwo rwire. ?Nawe niki cinu cabaingiriye okumenya amagoro ganu?
57Nemwe abe:ne, ?niki cinu cabaingiriye okwimya eci:na? 58Mbe ukaba nugenda aamwi na unu kakubu:ra ku muramusi, ukome:re okungwana nage mu njira, asiga kukukururira ku muramusi, no muramusi nakusira ku muju:ma, no muju:ma nakwesa mu mabubusi. 59Enikubwira ati, Utariso:kamo na katyari kukinga runu urimarira okuriya no ruyera rwa ku bute:ro.
Zur Zeit ausgewählt:
Luka 12: KIJ1960
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kijita New Testament © The British and Foreign Bible Society and The Bible Society of Tanzania, 1960.