Luka 5
5
Yesu nabirikira abategi
(Mt. 4:18-25; Mk. 1:16-20)
1Ebise wejire byamuiganya korereki bongwe omusango gwa Nyamuanga, omwene ariga e:mereguyu ku njekekera ya inyanja ya Genesareti. 2Narora ama:to gabiri gari ku mwaro, nawe abategi bariga bagaso:ke-remo, nibo:sya emijarifu jebwe. 3Nasyabara mu bwato obumwi, nibwo bwa Simoni, namubwira okufugesyayo kuto:to kuso:ka ku njekekera. Nenyanja mu bwato ne:igisya ebise. 4Wejire amara okwaika, nabwira Simoni ati, Fugesya ebusiba, mwese emijarifu jemwe mutege. 5Simoni naindura na:ika ati, Ratabugenyi, canya:ka bwire co, cite:ta ci:nu, nawe kurwo musango gwao enije:sa emijarifu. 6Mbe wejire bakora kutyo, nibe:ta jiswi nyafu muno, emijarifu jebwe nijamba okutemuka. 7Nibaungisya abe:ja:bo mu bwato obundi, ba:je babasakire. Niba:ja nibe:jusya ama:to go:ne gabiri, nigendo:tubira. 8Nawe Simoni Petero wejire arora ebyo, nafukama ku maguru ga Yesu, na:ika ati, So:ka kwanye, Ratabugenyi, okuba anye ndi mu:nu we bibi:bi. 9Okuba ataŋaŋae na banu bo:ne ariga:ri nabo kurwo bwafu bwa jiswi jinu be:tire. 10Na Yakobo na Yoana one kutyo, aba:na ba Jebedayo, banu bariga basangiye na Simoni. Yesu nabwira Simoni ati, Utaja ku:baya. Kuso:ka rero urategaga ba:nu. 11Wejire bagobya ama:to gebwe ku mwaro, nibasiga byone, nibamuru:ba.
Yesu naosya omugenge
(Mt. 8:1-4; Mk. 1:40-45)
12Mbe anu ariga:ri mu musi gumwi, rora, ariga:rio mu:nu aswirire ebigenge. Ejire arora Yesu, nagwa bwifumbike, namuremberesya ati, Ratabugenyi, ukenda, outura oku:mosya. 13Nagogora okuboko kwae, namukuniako, na:ika ati, Enenda nuore. Aonao ebigenge byae nibimuwa:ko. 14Omwene namukomeresya ati, utabwirako mu:nu wo:ne, nawe genda, wiyeresye ku mugabisi, ugwate ebyo kwerera kwao, rwa kutyo Musa aragiriye, rube rusingiro ku bene. 15Nawe orukuma rwae nirwiyongesya:ra okuswira, ebise byafu nibi:kofyanya okumungwa no kuosibwa jindwara jebwe. 16Nawe omwene ne:yaura nagenda mwibara, nasabwa.
Yesu naosya omukomborike
(Mt. 9:2-8; Mk. 2:2-12)
17Mbe ku rusiku rumwi ariga ne:igisya, na Bafarisayo na be:igisya be biragiro bariga benyanjiremo, banu bariga baso:kere mu misi jo:ne eja Galilaya ne ja Buyaudi na Yerusalemi. Na managa ga Ratabugenyi gariga ganage ago kuosya. 18Rora, aba:nu nibamure:tera omu:nu ku buriri unu ariga akombo:rikire, nibayenja obwenge bwo kumwingisya, no kumutu:ra imbere yae. 19Wejire baburwa awo kumwingisisya kurwe cise, nibarinya inguru ku nyumba, nibamuisiŋanya mu matafwari, nibamwisisya ku buriri bwae aagati imbere ya Yesu. 20Wejire arora okwikirisya kwebwe, na:ika ati, Omu:nu awe we:swaririrwa ebibi:bi byao. 21Abandiki na Bafarisayo nibamba okubambasyanya, niba:ika ati, ?Niga unu ka:ika jinu ejo kufuma Nyamuanga? ?Niga unu katura okwiswaririra ebibi:bi, tari Nyamuanga omwene:ra? 22Nawe Yesu namenya okwiganirisya kwebwe, naindura nababu:sya ati, ?Omwiganirisya ki mu myoyo jemwe? 23?Ecangu ni ciya, okwaika ati, We:swaririrwa ebibi:bi byao, tere amwi ati, Imuka uribate? 24Nawe mumenye ati, Omwana wo mu:nu arina managa okwiswaririra ebibi:bi ku ca:ro. Nabwira omukombo:rike oyo ati, Enikubwira ati, Imuka, witwike oburiri bwao ugende ike:wao. 25Aonao nemereguru imbere yebwe, ne:twika cinu ariga nama:mira, naja ike:wae, nakusya Nyamuanga. 26Ecitaŋaŋaro nicibagwata bo:ne, nibakusya Nyamuanga. Nibo:baya muno, niba:ika ati, Carora ebyo kurugu:ra rero.
Yesu nabirikira Lawi
(Mt. 9:9-13; Mk. 2:13-17)
27Ejo jejire jawa, naso:kayo, nabona omutobesya wa rigoti, risi:na ryae Lawi, enyanjire anu batobesyaga rigoti, namubwira ati, Ndu:ba. 28Nasiga byone ne:muka namuru:ba. 29Omwene Lawi namute:kera ebiryo byafu mu nyumba yae. Cariga cirio cise cinene eca batobesya ne ca bandi banu bariga benyanjire nabo ku biryo. 30Abafarisayo na bandiki bebwe nibe:toŋa-nira ku be:igisibwa bae, niba:ika ati, ?Niki cinu omukora nimurya no kunywa aamwi na batobesya na be bibi:bi? 31Yesu naindura nababwira ati, Abaanga batakenere mufumu, tari banu barwae. 32Anye nite:jire kubirikira abarenge:resi, nawe abe bibi:bi bate.
Okusara:rira
(Mt. 9:14-17; Mk. 2:18-20)
33Abene nibamubwira ati, Abe:igisibwa ba Yoana abasara:rira kwiya ka:fu, no kusabwa, na ba Bafarisayo one, nawe abao abarya nibanywa. 34Yesu nababu:sya ati, ?Omutura okusara:risya aba:na bo bwenga, omutwasi wo mwenga acari nabo? 35Nawe jisiku jiri:ja, omutwasi wo mwenga orwo ariba aso:sibwako. Mbe niwo nibasara:rira mu siku ijo. 36Nababwira ecijekekanyo ati, Atario mu:nu unu katemura ku mwenda omuya:ya ecisa:to, nacibari:rira ku mwenda omukokoro, akefura natako katemura eco eciya:ya ne cisa:to co mwenda omuya:ya citakwiyanya no mwenda omukokoro. 37Amwi atario mu:nu unu katu:ra amanji ge mijabibu amaya:ya mu nsagwa ja jinjai jiŋokoro, okuba amanji ge mijabibu amaya:ya agatemura jinsagwa ja jinjai, nige:tika, jinsagwa nijifafanikana. 38Nawe kwiire amanji ge mijabibu gatu:rwe mu nsagwa ja jinjai jinya:ya. 39Amwi atario mu:nu unu kanywa amanji ge mijabibu aga kara, nasuba okurigira amaya:ya, okuba ka:ika ati, aga kara ni ga kisi.
Zur Zeit ausgewählt:
Luka 5: KIJ1960
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kijita New Testament © The British and Foreign Bible Society and The Bible Society of Tanzania, 1960.