Matayo 4
4
Yesu nasakwa na Syetani
(Mk. 1:12-13; Lk. 4:1-13)
1Mbe Yesu nasirwa no Mwoyo mwibara Syetani amusake. 2Wejire amara okusara:rira siku makumi gana mu mwisi na mu ngeta, niwo narumwa omweko. 3Omusaki namu:jako naika ati, Araba uri Mwana wa Nyamuanga, bwira amabui ganu gabe biryo. 4Omwene namuindura na:ika ati, Gwandikirwe ati,
Omu:nu atakuba muanga kurwe biryo era,
Tari kurwo musango gwone gunu oguso:ka mu kanwa ka Nyamuanga.
5Mbe Syetani namusira ku musi omweru, namuta ku cisonge ca iyekaru. 6Namubwira ati, Araba uri Mwana, wa Nyamuanga, ijunga wiyese a:si, okuba gwandikirwe ati, arikuragiririra bamaraika bae, barikuyagata mu maboko gebwe utarija kwiku:jura cigere cao kwibui. 7Yesu namubwira ati, Gwandikirwe rindi ati,
Utasakaga Esobugenyi Nyamuanga.
8Syetani namusira rindi ku ci:ma cire:ra muno, namweresya ebyaro bya bakama bo:ne banu bari mu:si na rikusyo ryendemo. 9Namubwira ati, Binu byone enijo:kuyana, uke:nama okundamya. 10Mbe Yesu namubwira ati, So:kayo Syetani, okuba gwandikirwe ati,
Ramyaga Esobugenyi Nyamuanga, oyo niwe uko-rerega:ra.
11Mbe niwo Syetani namusiga, mbe bamaraika niba:ja mbamufurubendera.
Yesu namba Okusimura
(Mk. 1:14-15; Lk. 4:14-15)
12Ejire Yesu ongwa ati, Yoana bamugwatire, nasuba Galilaya. 13Naso:ka Najareti, naja okwikara Kaperinaumu gunu guri ku mwaro, mu mbibi ja Jaburoni na Nafutali, 14Korereki ciku:mire cinu ca:ikirwe no muragi Isaya na:ika ati,
15I:si ya Jaburoni na i:si ya Nafutali,
Injira ya ku mwaro, ingego ya Yorodani, Galilaya ya maanga,
16Aba:nu banu bariga be:kae mu cisu:te barorere obweru bwafu,
Na banu bariga bekae mu:si yo rufu na mwirengesi ryarwo obweru bwabaswerukira.
17Kuso:ka mu mwanya ogwo Yesu namba okusimura na:ika ati, Mute okuba obukama bwa mu rwire bwafugee.
Yesu nabirikira abe:igisibwa
(Mk. 1:16-20; Lk. 5:1-11)
18Mbe Yesu nabarama ku nyanja ya Galilaya, narora bamura babiri ba nda imwi, Simoni unu katogwa Petero na Andereya wabo, nibe:sa emijarifu mu nyanja okuba bariga bategi. 19Nababwira ati, Mundu:be, enibakora bategi ba ba:nu. 20Aonao nibasiga emijarifu nibamuru:ba. 21Nafugerao imbere narora bamura bandi babiri ba nda imwi, Yakobo mumura wa Jebedayo na Yoana wabo, bariga mu bwato aamwi na Jebedayo esemwene, nibasumikanya emijarifu jebwe, nababirikira. 22Aonao nibasigao obwato nesemwene nibamuru:ba.
23Yesu naswisya Galilaya yone neigisyaga mu mekofyanyisyo gebwe, nasimura ebigambo byo bwana byo bukama, naosya jindwara jo:ne no bugo:bo:ke bwone mu ba:nu. 24Orukuma rwae nduswira Syamu yo:ne. Nibamure:tera bo:ne banu bariga barwae, na banu bagwatirwe jindwara jitasyanyisye, ne binya:syo, na banu baungirwe misambwa na be citwe na banu bafu:ye omubiri, nabaosya. 25Ebise byafu mbimuru:ba mbiso:ka Galilaya na Dekapori na Yerusalemi ne Buyaudi na ku mwambuko gwa Yorodani.
Zur Zeit ausgewählt:
Matayo 4: KIJ1960
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Kijita New Testament © The British and Foreign Bible Society and The Bible Society of Tanzania, 1960.