Yunus 3
3
Ɓi Niniw ɓoƴsiɗohiɗ tumohaaɗ, Kooh ɗaasiɗ ɓa
1Wa a pul ŋ cuurnda, Nikiɗi kanakɗukka woo Yunus ne : 2« Kaɗa win-win Niniw, kur ka yakka. Kataa ɓa ini ŋ woo ɗa. » 3Yunus gooñukka, kaɗta Niniw findi Nikiɗi woyoha. Niniw nikee kur yakoh na yakoh, a neeh kaahay onan ɓo' a tiinda ɓak po ɓak. 4Wa a kaɗ po a aassa Niniw, a hooɓukka wil nga. A huflukka ɓi Niniw na hoosoocii : « Tasiɗ neeh ndaŋkiyaah-nikiis (40), Niniw ɗumbu ! »
5Wa ɓi Niniw kerah woo keem, ɓa kossa Kooh ; ɓa katohha or, ɓa ɓekukka ɓi daah, ambohha ŋ ya uup yak po ŋ ya uup ƴin. 6Wa woo ka ree ŋ nofaŋ buuraŋ Niniw, a kurukka ngaŋ ɓoofohaanaŋ ɗe, a wolukka lipkohaaɗaŋ ɗe, a ɓekukka daah, a baffa ŋ wet, 7a woosohha ŋ ɗooƴ kur ka jen ne : « Buur na yakak ci sangohiɗ ɓooɓi na ɗoopaat ci, yakak na ƴin, ne ɓa kanaat ñam, ɓa kanaat an masuɓ, yaa nu nga ɗah, ɓekkaat daah. 8Ɓi hooso roofiɗ koolɗu, po ngaŋ Kooh, te yaa nu nik suungɗuk tiindohaaɗiŋ ɗe sepƴiɗi, na tumohaaɗ ci otiɗ ciŋ yaah ciŋ ɗe. 9Yaa inah andi Kooh ɓoƴsanɗi liiɓohaaɗ, andi inwaaso ambanɗi ɗe, andi a heyɗi dokne paa finho dohɗiŋ aay-keeñiŋ ɗe, po ɓoo sooƴuu ? »
10Ndeem, Kooh inhisohha in ca ɓa haɓɗe ne ɓa pul ngaŋ tiindohaaɗ ca moɗaaɗiicaŋ ɓa. Taambohha nga inwaaso ammba Kooh ŋ in ca a kooɗkiɗee ɓa, te a mirndohɗi ca raakiɗ.
Zur Zeit ausgewählt:
Yunus 3: FHSS
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© (Active), Wycliffe Bible Translators, Inc. All rights reserved.