Jẹnẹsis 3
3
Eshe rẹ Ohwo
1Asakiephana ọrọdekọ kọye Me vwo aghwanre nọ eranvwe ri chekọ vwẹ aghwa rẹ Ọrovwohwo Ọghẹnẹ mare na. Ọ da ta kẹ aye na, Ọ dianẹ Ọghẹnẹ tare nẹ, Wọ re emamọ rẹ irhe rẹ udju na vuọvo-o? 2Aye na da ta kẹ ọrọdekọ na, Avwanre sa re emamọ rẹ irhe rẹ udju na, 3ẹkẹvuọvo Ọghẹnẹ tare nẹ, Wa ria emamọ rẹ urhe rọ uherevie rẹ udju na-a, eyẹ wa vwẹ obọ te-e, we de rhe ghwu. 4Ẹkẹvuọvo ọrọdekọ na da ta kẹ aye na, We che ghwu-u. 5Kidie Ọghẹnẹ riẹnre nẹ ọke wa da riọ ẹro rẹ ovwan ko rhie, ku wa họhọ Ọghẹnẹ, rọ riẹn erhuvwu vẹ umiovwo. 6Rẹ aye na vwọ mrẹ nẹ urhe na fẹriọ, o ki rhe fẹro, nẹ urhe na ki rhe ru ohwo ghwanre, ọ da reyọ omamọ rọye ọ da riọ; ọ da je vwẹ ẹvo kẹ ọshare rọye ọ da je re. 7Kọye ẹro rayen ivẹ de rhie, ayen da riẹn nẹ ayen ban phihọ, ayen de ko ẹbe ri fig kugbe vwo ru amwa vwo rhuo oma rayen.
8Ayen de nyo urhuru rẹ Ọrovwohwo Ọghẹnẹ rọ yan vwẹ udju na vwẹ ọke rẹ ovwọnvwọn, te ọshare na te aye na de si oma nu kẹ Ọrovwohwo Ọghẹnẹ vwẹ uvwre rẹ irhe rẹ udju na. 9Ẹkẹvuọvo Ọrovwohwo Ọghẹnẹ de se ọshare na, ọ da ta kẹ nẹ, Tivọ wọ epha vwo? 10Ọ da tanẹ, Mi nyo urhuru wẹn vwẹ evun rẹ udju na, oshọ ko mu vwe, fikiridie Me ban phihọ; ki mi si oma mẹ nu. 11O da ta, Ono ta kẹ wẹ nẹ wọ ban phihọ? Takpe wọ re omamọ rẹ urhe ri mi ji urhi kẹ wẹ nu wọ ria-a na? 12Ọshare na da ta, Aye ru wọ vwọ kẹ vwẹ nẹ o nene uvwe dia, ọye vwẹ emamọ rẹ urhe na kẹ vwẹ, Me da re. 13Etiyin Ọrovwohwo Ọghẹnẹ da ta kẹ aye na, Ọna ki didi emu wo ruru na? Aye na da ta, Ọrọdekọ re phiẹn vwẹ, Me da re. 14Ọrovwohwo Ọghẹnẹ da ta kẹ ọrọdekọ na, Fiki robo wo vwo ru emu nana, eka kẹ wẹ vwẹ ohri rẹ uchuru ejobi, kugbe ohri rẹ eranvwe ejobi; evun wẹn kọye wo vwo kpono yan, ekpẹn kọye wọ cha re vwẹ ẹdẹ rẹ akpọ wẹn ejobi. 15Ki mi phi eghrẹ phihọ uvwre wẹn vẹ ọ rẹ aye na, Te uvwre rẹ emọ wẹn vẹ erẹ aye na, kọ ghwiẹ wẹ uyovwi, ku wọ rhovwọ uchukowọ. 16Vwọ kẹ aye na ọ da ta, Me kẹ wẹ odjadja buebu vwẹ ọke rẹ evwiẹ wẹn, vwẹ odjadja wo de vwiẹ emọ, ẹguọnọ wẹn kẹ obọ rẹ ọshare wẹn onurhe, ko sun we. 17Vwọ kẹ Adam ọ da tanẹ, Fikiridie wọ vwọ kerhọ rẹ aye wẹn, wo da re emamọ rẹ urhe na re Me djẹ wẹ nu wọ ria-a na, eka kọ dia kẹ otọ na fiki wẹn, vwẹ evun rẹ owian wọ ke sa re emu vwẹ ẹdẹ rẹ akpọ wẹn ejobi; 18idjigbẹ vẹ ekpia ke djẹ nẹ otọ na rhe kẹ wẹ, ku wọ cha re ekankọn rẹ aghwa na. 19Ọdja kọ dia opharo wẹn wọ ke cha re emu, bẹsiẹ wo che vwo rhivwi kpo otọ ri wo nurhe, ekpẹn wo ji che hirhe ra.
20Ọshare na de se odẹ rẹ aye rọye Ivi, fikiridie ọye oni rẹ ihwo rẹ akpọ na ejobi. 21Ọrovwohwo Ọghẹnẹ de ko ewun rẹ ophiẹn kẹ Adam vẹ aye rọye, o de rhuo ayen.
22Ọrovwohwo Ọghẹnẹ da ta, Nighe, ohwo rhoma rhe họhọ ọvo rẹ avwanre re, rọ riẹn erhuvwu vẹ umiovwo re, Asakiephana, a da fọ ke, ọ cha riẹn obọ rọye rhe ọ da je rhe reyọ omamọ rẹ urhe rẹ arhọ na, ọ da riọ, ọ da rhe dia bẹdẹ. 23Fiki rẹ ọtiọye na Ọrovwohwo Ọghẹnẹ da djẹ nẹ evun rẹ udju rẹ Idẹn na, nẹ o gbe re voro otọ ra reyerọ nurhe na. 24Ọ da djẹ ohwo na ruẹ afe, vwẹ obọrhe rẹ udju rẹ Idẹn na, o de phi chẹrobim, ọ vẹ ọnọkọ rẹ erhanre rọ rhẹriẹ kpenẹ kpenẹ, rọ rhẹrẹ urhe rẹ arhọ na.
Zur Zeit ausgewählt:
Jẹnẹsis 3: UBV77
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Bible in Urhobo © United Bible Societies, 1977.