Saint Matthieu 14
14
1Ka name o̱kèo̱, Hérode ko̱ ba tétrarque, la baï toula Jésus, 2da sa hi njou‐bakara nèli: On ba Jean‐Baptiste! Kè tome an wora houli, da mono baï on mi ko̱ kème nding njèran pinali.
3Baï ko̱ Hérode mi ba Jean jinguèl ka gna nè ka bou nè jo̱bo̱, baï toula Hérodias, waïn a Philippe, ko̱ ba yine nè, 4baï ko̱ Jean sa hi nè: Ka mboro guingna mo tane ma baï yana nè ka waïn ya. 5Da kè ji baï ina nè, kè waou ro̱kè njoukouli on baï ko̱ klime ko̱ Jean mahana ka ba prophète. 6Da ko̱ loukou name mboungna Hérode mi gui tou, goune waïn a Hérodias mi ndandaï an nona goroli, da on bi wélé toula Hérode ta. 7Da baï on ko̱ kème bi gonjakè ka han fèn, ba fèn ko̱ kème oui nè, yé kè hi nè. 8Da afal ko̱ ma nè mi jo̱lè tou, kè sa: An guèl aïn kassénaï, mè ji mo koung toula Jean‐Baptiste bou bil loukou tassi hi mi. 9Da go̱ra nanjoukaou mi sé nè nyèta. Da baï on ko̱ kème han fèn tou; da baï a goroli on ko̱ kaou baï sona laka jing nè, kè sa bi njaka kli, an klime hi fèn on hi nè. 10Da kè pi njoukou baï koungna sola Jean ko̱ kaou jo̱bo̱. 11Da kè bi toula Jean an bil loukou tassi da hi goune waïn on, da kè sé rou hi ma nè. 12Da njou‐séna bong nèli mi gui ka bi houlè ka goro nè, da kli sé ka sa bongkè hi Jésus.
13Da ko̱ Jésus mi la baï on, kè ourou an ndourou, ka ta sé bil kombone, ka sé woropa ka foli. Da ko̱ ro̱kè njoukouli mi la baï on, kli ourou an bil pou bon baï séna falè ka bo̱ko̱ kli. 14Da kè tèn gui kala ka ko̱ ro̱kè njoukouli, kè ko̱ kli passé ta, da kè haï mona njou‐jangmali an woro kli.
15Da ko̱ bèlaléou mi lé tou, njou‐séna bongli mi guè monè, ka sa: Guèl aïn ba woropa da séssé mi ri nyèta tou; mo sa hi ro̱kè njoukouli on an klime sé, an bil pouli ka zé laka baï an kli fèn kli. 16Da Jésus mi sa hi kli: Kli tane ji oura ya; oui hi laka hi kli an klime son. 17Da kli féré sa hi nè: Na jing tarou dioui da njouïli séré an guèl aïn. 18Da kè sa: Oui fan kli gourou hi mi. 19Da kè sa bi njaka ro̱kè njoukouli, an klime kaou toul pa, da kè ya tarou dioui on da njouïli séré, ka ènrèn sé nonkala, kè same ka haou, ka hi tarou hi njou‐séna bongli, da njou‐séna bongli mi hi ro̱kè njoukouli on. 20Da kli bon mi son ka mba. Da kli fan gara boutoukèli, ko̱ na mba karo botoulè‐séré. 21Da kli on ko̱ son ba wonron njoukouli hèdi ténakè‐bongkè‐dioui, tane waïnli da goundi ya.
22Da koukoulion, Jésus sa hi njou‐séna bongli an klime hé kombone da sé hélé mboro lèkè dambèl hi nè, bo̱l tèn ko̱ kème sa hi ro̱kè njoukouli on an klime sé. 23Da afal ko̱ kème sa hi ro̱kè njoukouli on an klime sé, kè hé sé toul souraguèl ka foli, baï sana jojo Ouone; da ko̱ bèlaléou mi lé tou, kè kaou ho̱kè an ndourou.
24Da kombone mi na an none mbi, da wouna mbi mi wou kombone mingta; baï ko̱ koukouna mi ji dèna mboro akli. 25Hangnachoung ka l’heure tomna ènran fèn an nèngkè, Jésus mi guè mone kli, ka sé yan none loukou mbi. 26Da njou‐séna bongli mi ko̱ nè ko̱ kème yé séna yan none loukou mbi on, mone kli hou mbi ta, kli sa: On ba gajéna! Da kli wan njaka ka none waou. 27Da koukoulion, Jésus mi sa baï jing kli, ka sa: Oui bi hang baï guè tiya, mè mini; oui ngou waou ya! 28Da Pierre mi féré sa hi nè, ka sa: Nanjou tokoré mi yé ba mo, mo sa bi njaka ni an mème guè mono an toul none mbi. 29Da kè sa: Mo gui! Da Pièrre mi tèn kala an bil kombone ka diri guè none mbi, kè sé toulkè baï guèna mona Jésus. 30Da ko̱ kème ko̱ koukouna ko̱ mi kou mingta, waou mi i nè maïya; da kème tissaon baï bina, kè wan njaka, ka sa: Nanjou, mo lé mbèli! 31Da koukoulion Jésus mi ndara ndo̱kè ka ba nè, da sa hi nè: Mo jing tounassaon gounfènakè, baï fèn da mo nding ka ndouri lé? 32Da ko̱ klime hé bil kombone, koukouna mi o chiou. 33Da kli on ko̱ mi kaou bil kombone mi houkou mbèla Jésus, da hiou nè, ka sa: Babaï, mo ba Goune a Ouone.
34Da ko̱ klime hé mbi tou, kli tèn njaka nguéng ko̱ ba koukoula a njou‐Génésareth. 35Da ko̱ njoukouli on an guèl on mi toutou ba Jésus, kli pi njoukouli sé mane bil pouli an ndourou bon, an klime fan njou‐jangmali bon guè monè. 36Da kli sa jo̱jo̱ nè, an klime da ba njaka la nè bo̱l. Da kli bon on ko̱ mi da, mone kli haï tou.
Zur Zeit ausgewählt:
Saint Matthieu 14: KBN1947
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Published by the British and Foreign Bible Society in 1947.