Genesisi 4
4
Kayini ni Abhele
1Se wamwamna a to ziva Evha, msikati wakwe. Ene a to mana txirumbu e veleka#4:1 Ti wombako kumanana. Kayini; sekoko a to khene:
“Ni mani mwanana wa mfana, ngu kuvhuna ka Mkoma.” 2Se a to veleka mwanawe,#4:2 Ti wombako kukanganyiseka. Kayini. Abhele a to maha m'dyisi wa tinvuta, Kayini eva m'dimi wa mafu.
3Ku di pindile mbimo yokari, Kayini a to maha ka Mkoma mningelo wa mihando ya mafu. 4#Wona ni ka: Vaheb. 11:4. Se Abhele nene a to ningela matiwula a tinvuta ta txibalani kwakwe, to nona. Mkoma a to wona ngu kutsaka Abhele ni mningelo wakwe; 5aniko kha wona ngu kutsaka Kayini ni mningelo wakwe. Kayini a to henya ngutu, ni khohe yakwe yi to thuvika. 6Mkoma Txizimu a wombile ka Kayini, a txi khene:
“Ngu kutxani u txi henya ni khohe yako yi thuvika kani? 7Ina ngako u txi maha ta tinene, khu na mbi#4:7 Mwendo: divalelwa. u amukelwa kani? Se ngako u txi maha to biha, txionho txi na ku baramela ha txikeni, txi txi lava ku ku pfinya, aniko awe wa sikota ku txi xula.”
8 # Wona ni ka: Mat. 23:35; Luk. 11:51; 1 Joh. 3:12. Se Kayini a to langana ni mwanawe Abhele:
“A hi tsimbile thembweni.”
Se ku to maheka taku, va di thembweni, Kayini e wukela mwanawe Abhele, a txi m'daya.
9Txizimu txi to kha txona ka Kayini:
“Ahani Abhele, mwananu kani?”
Kayini a xamute, a txi khene: “Kha ni m'zivi. Kasi ani ngani ni ku mxayisi wa mwanathu kani?”
10Se Txizimu txi to kha txona:
“Njitxani u nga maha kani? Dipswi da mnoha wa mwananu, da pfala ha mafuni, kala tinzeveni kwangu. 11Se konkuwa, u ruketetwe ha mafuni, aale ma nga asama txisofu txa ona, kasi kusela ngu manzani kwako, mnoha wa mnanda wako. 12Hambi u txi dima mafu, kha ma na mbi kuninga txilo txa mihando ya ona. U na pepeseka u tutuma-tutuma ha mafuni.”
13Sekoko Kayini a to khene ka Mkoma:
“Txitsayiso txangu nja hombe ngutu kupinda#4:13 Mwendo: ku sikotako. kudivalelwa. 14Wa ni tutumisa nyamsi ka ditiko diya; ni kurumetwa kusisala kule ni khohe yako, ni na tsimbila ni txi thava-thava ni kupepeseka ha mafuni, ni wu a no khata ku ni mana, a na ni daya.”
15 Mkoma Txizimu a xamute, a txi khene:
Ahim-him, ku txi maheka ti taku m'thu e daya Kayini, a na khawuliswa mtxhanu wa sikhati ni simbidi.#4:15 Mwendo: kuphota. Mkoma a to m'veka txikombiso txokari, ti taku, a si dawi ngu wuhi ni wuhi a mmanako. 16Se Kayini a to khukha ngu masoni ka Mkoma, eya zumba ditikoni ka Nodhe, wutxani ka Edheni.
Liveleko la Kayini
17Se Kayini a to ziva msikati wakwe, a to mana txirumbu e veleka Enoki; a to aka didhoropa e di raya ditina da mwanana wakwe Enoki. 18Se Enoki a to veleka Iradhe; a nga veleka Mewujayeli; Mewujayeli a to veleka Metusayeli; Metusayeli a to veleka Lameki.
19Se Lameki a tekile vasikati vambidi: Mmweyo a ti dhanwa ku i Adha, ni mmwani ditina dakwe i ti ti Zila. 20Se Adha a to veleka Jabhale, awule i nga ti tate wa vale va nga zumba matendani, kambe va ni sifuyo. 21Ditina da mnanda wakwe i ti Jubhali, awule i nga ti tate wa vale va nga ti veta sitende ni misengele. 22Zila a to veleka Tubhali-Kayini, txhari wotshe mthumo wa koporo ni simbi; se ndiya ya Tubhali-Kayini i Nahama.
23Se Lameki a to khene ka vasikati vakwe:
“Adha ni Zila, engisani dipswi dangu;
vasikati va Lameki, engisani
kuwomba kwangu:
Ni date wamwamna, nguko a ni balisile,
ni dijaha nguko di ni ganyatile.
24Nguko Kayini mtxhanu wa sikhati ni simbidi#4:24 Mwendo: kutsayisa. kuphota;
aniko Lameki mtxhanu wa magumi ni mambidi,
a kuwuyetwa mtxhanu ni kumbidi.”
Sete ni Enosi
25Se Adhamu a to engeta e ziva msikati wakwe; awu a nga mana mwanana.
A to mraya ditina#4:25 Di wombako kutsiveta. Mwendo: dikhukhu. daku i Sete. Nguko ene a ti khene:
“Txizimu txi ni ningile mmwani mwanana kasi kutsiveta Abhele, wu a nga dawa ngu Kayini.”
26Nene Sete a mani mwanana, awu a nga mraya ku i Enosi; sekoko ku to khata kukhozelwa Mkoma.
Zur Zeit ausgewählt:
Genesisi 4: BEC2016
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
A Bíblia em Txitxopi © Bible Society in Mozambique, 2016.