YAYA 2
2
O Kaana aap kwe kolage me Yetut eereegerak wone
1Nogo mbere yinuk, o Nggalileya tini ambi endage Kaana aap ambi kwe kolage me, Yetut agalo time inom wonagagerak. 2Ndi, Yetut at oone waganggwi mendek inom woraawak nduk, inayonggo pereegwaarak. 3Inayonggo pereegwaarak nogo wogo mbareegwa, anggur amburu nogo lek age mbareegi, at Yetut agalo nen Yetut yoge logonet, ”Anggur amburu nogo abu lek agaarak o.”
4Yoge mbareegi, at Yetut nen, ”An eeriyak eyom awo panggoni waga'lek me, nagalo kat an togop yo'nirugun o.”
5Yoge mbareegi, at agalo nen aap laago unde ayeloman nogo yorage logonet, ”At yokkirage kenok aret ee'nu o,” yinuk, yoragagerak.
6It aap Yakuri mendek wone lengganak eeko logonet, yi mendek ndi mendek kookak yuurak nduk, togolowak yugum mendek 6 kuli aret nogome kwi'ndak wonagagerak. Togolowak iyo'nggok tak me, yi niyowak ndi niyowak apit aret toologo nogome kombet wako nogogwaarak. 7At Yetut nen aap laago unde ayeloman nogo yorage logonet, ”Togolowak ti, niyo ene korok togon too'nip o,” yorage mbareegi, it nogo nen ene korok togon tooleegwaarak. 8Tooko mbareegwa, Yetut nen, ”Yogondak! Niyo ando toologo aap laago unde ti wogori nanip o.” Yorage mbareegi, toologo wogori nogogwaarak. 9Toologo wogori nogo mbareegwa, aap laago unde nogo nen niyo toolak nogo ombat wakkage logonet, anggur amburu agagerak kage nagagirik, ayeloman nogo nda'nogo nen tooleegwaarak ineenu iigak kwe, at perak kobak me, aap kwe kolage nogo wiige nagagirik, wage mbareegi, yoge logonet, 10”Wulaga! Anggur amburu ombat abe mendek aa'nduk tumburirogo nagaatik, ndonggorogon nunggwi iinok, ti'nuk, peebi amburu ombat maluk negen tumburirogo menggaarak kwe, kat perak, anggur amburu ombat abe mendek peebi wo'niroorak nduk, porogo wonagandak keegi o,” yinuk, yoreegerak.
11At Yetut nen ineenu ariyak inagabiti warak mendek aa'nduk lombok eeregerak nogo ti, o Nggalileya tini Kaana nogome logonet, eereegerak ti aret. Time logonet, at tiyanak menggerak nogo abok paganeegerak me, at oone waganggwi nogo iniki at oba panggombunuk, abet mbareegwaarak.
12Ti'nuk, at Yetut nogo at agalo inom, awuri inom, at oone waganggwi mendek inom, o Kaperenaum lagi wogo nogogwaarik, time logonet, nogo mbere negen yereegwaarak.
Yetut nen Ala awi wurik me ndegeneegerak wone
(Mat 21:12-13, Mrk 11:15-17, Luk 19:45-46)
13Nogome wonogwe me, it aap Yakuri ndomba warogo Patika lariyak eyom nogo panggoni wage mbareegi, at Yetut o Yerutalem wambi nagagerak. 14Wambi nage nagagirik, Ala awi wurik me unggunuk, it aap sapi inom, ndomba inom, towe inom, onggo mbanggwi, ndi, it wu onggo-onggo eeko menggaarak nogo eeko menggam ta'nogo wu onggo-onggo eekwi, eekwi enegen iyareegerak. 15Eekwi enegen iige nagagirik, ligi laanak waganogo muun yawi negen ogobakkigippunuk, ndomba sapi abok aret Ala awi wurik me nen teerogo wumbiige, ndi, it aap wu onggo-onggo eekwi nogo inagayo ndoonak ogobakkigirik abut laganogo nggimbege, inawu nogo a'nggan yumbunik-telenak eerogo nappege, eereegerak. 16Eeke nagagirik, it towe onggo mbanggwi nogo yorage logonet, ”Towe yi apit aret wogoret nanip o. Kit an nogoba awi wurik me yime, yi mendek ndi mendek kunggo menggam negen eeriyak mage o,” yinuk, yoragagerak. 17Yorage mbareegi, it aap Yetut oone waganggwi nogo nen, ”Kat nogoba Ala wae! Kat kawi wurik op logorak nduk, an niniki aganggen kerek togon eerit nage paga niniki abu lek ee'nabigin o,” yinuk, yereegerak wone liiru mbanak wonage nogo abereegwaarak.
18Abeko mbareegwa, it aap Yakuri nen, ”Kat yi eeken nogo, ta oone paga eekendak nineenu aruwok nduk, ambi nano eeke keyaawi o?”
19Yogo mbareegwa, at Yetut nen, ”Lek o. Ala awi wurik yi minogo pinip o. Minogo pugwi kiinok, wuke neegak, nogo mbere aret yumunggup o.”
20Yorage mbareegi, it aap Yakuri nen, ”A puk! Ala awi yi, wukwi niigak 46 tahun aret eereegerak kwe, kat wuke keegak, nogo mbere mban yuurak yagan ya? Wi!” yinuk, yoreegwaarak.
21Ala awi wurik yoragagerak nogo ti, at eebe nduk aret yoragagerak. 22Ndi, peebi Ala nen Yetut kambunuk, nogo menggam nen eenik agago mippege mbareegi, at oone waganggwi nen wone yoragagerak yi nogo abereegwaarak. Abeko nogogwaarik, Ala wone liiru mbanak inom, wone Yetut nen yoragagerak nogo inom, abet mbareegwaarak.
Aakumi iniki mbakwi Yetut nen abok eenu menggerak wone
23At Yetut o Yerutalem ndomba warogo Patika lakome nogome logonet, ineenu ariyak inagabiti warak mendek eerit nege aakumi inigen kogo nogogwaarik, aakumi apit iniki at oba panggombunuk, abet mbareegwaarak. 24It aap apit iniki at oba panggombunuk, abet mbareegwaarak kwe, at Yetut perak, yi aap ndi aap abok inobaabut eenu me, ”It aakumi yi, abet aret iniki noba panggombegaarak kagi,” inombarulik o. 25It aakumi iniki mbakwi nogo ti, Yetut eenu menggerak me, aap ambit nen at ambi eeke paganogo at yoriyak mondok lek aret o.
Zur Zeit ausgewählt:
YAYA 2: WNO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
