LUKAT 19
19
Yetut Takeyut imbirak eereegwaarak wone
1At Yetut o Yeriko unggwi nage nagagirik, nok-nok nage me, 2aap ambi endage Takeyut pemerintah inake kuwak eeka inowe eenggi abu warak lombok wonagagerak. 3At nogo nen, ”Yetut ti, nonggop kwe?” yinuk, pekkaakit nduk, eereegerak mendek anggup kuwagaluk, ndi, aakumi ambik kuwak eerak wonogwe me, pekkoorak meek agagerak. 4Meek age mbareegi, Yetut tu yi paga wage kagi, yinuk, kaakit nduk, at aa'nduk mbe agan nage nagagirik, eyo paga laganeegerak. 5Laganeegerak wonage me, at Yetut wok yi nage nagagirik, ena nikkage logonet, ”Takeyut wae. Yogondak kat kame nimbirak nogo yi noorak me, mbet wambi mok o.”
6Yoge mbareegi, Takeyut nogo nen mbet-mbet eyo paga nen wambi wage nagagirik, keyage wappunuk, ale'nggen mbakak imbirak aret at ame nogogwaarak. 7Yetut imbirak nage it aakumi nen kogo nogogwaarik, ineebi-ineeba yogo logonet, ”Aap maluk eeke menggerak imbirak ame nogo yuurak nduk, nogwe yi kiraap!”
8Yogo mbareegwa, at Takeyut nen it apit inenggaanom paga Yetut yoge logonet, ”Nogoba o. An namindik-namendek mogonogo aap ineenggi lek kenok, wogorage, ndi aap wi-wi aganake nagarak kero, obaane'me onggo 4 aret wogorage, eerikit o.”
9Yoge mbareegi, at Yetut nen, ”Kat kunduk Abarakam ombooluk aret me, kat kapuri kinom yogondak aret kinagap ndakkologop o. 10An aap aret nda'nagagirak yi, it aakumi kobak ogogwaarak nogo kwaarogo inagap ndarikit nduk, wambi wagagirak o,” yinuk, yoreegerak.
Wu mbuti emas paga eegu laarogo yoragagerak wone
(Mat 25:14-30)
11It aakumi nogo nen inaruk konenit nogwe iigak, at Yetut nen wone yoranet inom o Yerutalem wok yi wambi nogo nogogwaarik, it aakumi nen Ala abu'me piige minggim mbet-mbet tena'me ariyak mbakwi yelok iige nagagirik, wone ambi eegu laarogo yorage logonet, 12”Aap nagawan aput ambi nen o nda time nage neenok, aap nggwok nendagembogut mippanugwi iinok, woraakit o, yinuk, 13naakit nduk, eeke logonet, at ayeloman ineebe 10 wiirage nagagirik, wogo mbareegwa, awu 10 aret inalitak wogorage logonet, An waga'lek neegak, nawu yi nogo paga yi mendek ndi mendek kunit nogo logonet, ambinom nabenggo'net nogo logonip o. 14Yorage nagagirik, nagagerak. Nage kagak, at owe-awot nen at ineebi lombok ombako logonet, Kat yi ninowe kendagembogut ninarum logorak nineebi o, yori nawak nduk, inawuri nappiyareegwaarak.
15Nappiyareegwaarak yori nogogwaarak kwe, kagak, aap nogo endagembogut mippogo mbareegwa, ame wage nagagirik, Nawu nogo paga it mande nabenggolaarak kaamun? yinuk, ayeloman awu wogoragagerak nogo wiiragagerak. 16Wiirage mbareegi, ayeloman aa'nduk wagagerak nogo nen, Nogoba o. Kawu nogo paga 10 ambinom nabenggolagarak o. 17Yoge mbareegi, ogoba nen, Naput wa! Nayeloman obeelom kat aret me, abu op lombok eekendak o. Mbuuluk eeriyak mendek kwe, kagak, liirogon eerit nege nagandak me, yogondak o tini 10 unde logonok nduk, mippagi o. 18Yoge mbareegi, ambi ambokan wage nagagirik, Nogoba o. Kawu nogo paga 5 ambinom nabenggolagarak o. 19Yoge mbareegi, ogoba nen, Ndi, kat o tini 5 aret unde logonu o. 20-21Yoge mbareegi, ambi ambokan wage nagagirik, Nogoba o. Kat kogogumbuk aret menggendak me, ndi, kogogumbuk logonet, kat nen puulik kwe, wagangge, ndi, awi yumbunulik kwe, anggen yugu mbanggolage, eeke menggendak me, nagabiti nen kawu nayuma nggerenak porogo wonagarak nogo yi o, yinuk, yoreegerak. 22Yoge mbareegi, ogoba nogo nen ayeloman nogo yoge logonet, An eeriyak yokkege kwe, kobak menggendak kat nayeloman yi, koone yagandak nogo paga kenggali wappagi o. Nogogumbuk logonet, puulik kwe, wagangge, ndi, awi yumbunulik kwe, anggen yugu mbanggolage, eeke minggirak kat keenu menggendak kwe, 23an wage neenok, nawu inom, porogo logomenggaarak onggo inom, an wa woraakit lak, it aakumi inawu nggwok aruwak nduk, eeko menggaarak nogo nonggop nduk, wogoraga'lek wonagagindak? 24Yoge nagagirik, aakumi at inom wonogwe nogo yorage logonet, Nawu ambi at porogo wonage nogo ndinogo aap wu 10 nabenggolegerak nogo wogo'nip o. 25Yorage mbareegi, it nen, Nogoba o. At ti, muk wu 10 wonage ti. 26Yogo mbareegwa, at nen, It aakumi inamendek wonage kenok, ambinom luunogo wogorage, ndi, inamendek lek kenok, mbuuluk porogo wonage nogo aret ndingge, eeke kaamunggup o. 27Ndi, it ninom ogoorak logonet, an inowe endagembogut inarum logorak, Nineebi o, yagaarak nogo perak, wogoret wogo logomonggotik, nenegen neegak, inoo'nip, yoragagerak o,” yinuk, Yetut nen aakumi nogo yoragagerak.
”Ninowe endagembogut yi aret o,” agan nogwe iigak, o Yerutalem unggwi nagagerak wone
(Mat 21:1-11, Mrk 11:1-11, Ya 12:12-19)
28Yetut nen wone ti yorage nagagirik, at aa'nduk o Yerutalem nage me, oone waganggwi inom nogo logonet, 29puut endage Tayitun eegwa'me o tini Mbetapage inom, Mbetaniya inom, imbirak panggo yi nogo nogogwaarik, at oone waganggwi mbere nappiige logonet, 30O tini iruguna time nanip o. Awo mbo unggwi nogo logonet, keledai wam awo iluk aakumi amborowak paga kwi'naga'lek mberenak aret kinigen kogo logomonggotik, nogo aret piinogo wonok wa'nu o. 31It aakumi time nen, Kit nonggop nduk keledai wam piinggo ogotik o, yokkirogwe iinok, kit nen yorogo logonet, Nit ninogoba keledai wam lek me, wa nanip o, yo'nirage mbaki, wa wogo, yoraanu o,” yinuk, nappiyareegerak.
32It nappiyareegerak nogo, nogo nogogwaarik, yoragagerak nogo ndak-ndak aret kogogwaarak. 33Kogo nogogwaarik, keledai wam nogo piinggwi me, it aap inaanggo unde nogo nen, ”Keledai wam ti, nonggop nduk, piinggo ogotik o?”
34Yorogo mbareegwa, it nen, ”Nit ninogoba keledai wam lek me, wa nanip o, yo'nirage mbaki, wa wogo o,” yorogo nogogwaarik, 35wonok Yetut owagam pi wogogwaarak. Pi wogo nogogwaarik, inambogoyum endekem mendek nggoorogo wam amborowak paga lenggembogo nogogwaarik, Yetut amborowak paga kwippereegwaarak. 36Kwippogo nogogwaarik, Yetut nage kagak, inambogoyum tu nggwok paga mbiganogo ndoombit nogogwaarak.
37O Yerutalem panggo yi nogwe iigak, tu puut Tayitun wambi nogo menggam nogome aakumi at oone waganggwi mendek abok nen eerubok mendek ambik eerit nage nogo inigen kogo nogogwaarak me, inale'nggen nen keekok agan nogo logonet, Ala endage alut eerit nogogwaarak. 38Keekok agan nogo logonet, ”Ala nen ninowe endagembogut nappi wagaarak yi, endage wogoppuwok o. It mbogut paga menggaarak nogo iniki tayenak logonet, ale'nggen mbakwi, ndi, it mbogut irimbaga lombok menggerak nogo Ala tiyappugwi, eeko logowak o,” yinuk, agan nogogwaarak.
39Agan nogwe me, it Pariti mendek ando nen aakumi apit kuwak eeri wogogwaarak nogo inenggela'me logonet, Yetut yogwi, ”Ngguru wae. Koone waganggwi yi, mbereret o.”
40Yogo mbareegwa, Yetut nen, ”It aap yi inoone puk logonetak en, yugum yi, inoone yogo logonetak o, yinuk, yokkiragi,” yoragagerak.
Yetut o Yerutalem kage nagagirik, le yereegerak wone
41Yorage nagagirik, o tini Yerutalem panggo yi nage nagagirik, enegen kage logonet, le yereegerak. 42Le ari logonet, ”Kit aakumi Yerutalem mendek yi, yogondak yi eyom paga kit nonggop agago kiniki ugun obeelom logomunggup nduk, eeppinagarak nogo, Ineenu agabok agarak me, ao, kinombake kwe, yogondak kinigen kogwe kiyo, noberak wonage o. 43Ala yi eyom aret niya wagaarak o, yinuk, yelok koolik me, kiname nen wundi nogwe kiyo, it kinom wim mbanak nen yagat wurogo pinagagwi, wanggekkinakwi, agi-ogu nen, iru-ogwe nen, yigikkinaburak nduk, panggo yi wogwe, 44kinawi yugum paga wurik yi, yugum ambi obaga lu'luk agago logogin lek o. Langgonogo pogo logonet, kinapuri kinom abok aret mondok pup eerogo pinagagwi, eeriyak eyom panggoni woraagin o,” yinuk, yoragagerak.
Yetut nen Ala awi wurik me ndegeneegerak wone
(Mat 21:12-17, Mrk 11:15-19, Ya 2:13-22)
45Ti yoranuk, Ala awi wurik me unggwi nage nagagirik, it aakumi yi mendek ndi mendek onggo kunggologwe nogo mugogo wumbiige logonet, 46”An nawi wurik yi, Tamban eeko menggam logorak o, yinuk, liiru mbaneegerak kwe, kit perak, aap yogoot wappunuk, kiraa'nari nogo menggam negen eekotak o,” yoragagerak.
47Yetut ko'lu-kii'me Ala awi wurik me wone mamunirage nagagerak. Mamunirage nagagerak kwe, it Ala unde inoweewi inom, it Ala wone liiru mbanak unde inom, it aap paambanak inom, at Yetut nogo wariyak nduk, 48eereegwaarak kwe, aakumi nen inikilom paga inigen at mban pik-pak ungwi me, ”Nonggop waruwi kwe?” yinuk, puk ogogwaarak.
Zur Zeit ausgewählt:
LUKAT 19: WNO
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.