YOHANA 2
2
Mulukha kwi Shiselelo shiu Khuhilana mu Litaala lia Kana
1Matukhu kavili nikakhavira, khwali ni shiselelo shiu khuhilana mu litaala lia Kana, lili mu lusomo lwa Galilaya. Mama wa Yesu yaliho. 2Yesu nende veechi veve vali valaanjilwi khandi mushiselelo shiu khuhilana shienesho. 3Lwa idivai yali nivwele, mama wa Yesu yavoolela Yesu, “Idivai yavo ivwele.”
4Yesu yamuvoolela, “Mukhali yivi, nivi unyala khumbolela kakhola? Isaa yanje ishili khutukha.”
5Mama wa Yesu yavoolela varumishi, “Kholi shia shindu shiosi shia amuvoolela mukhole.”
6Khwaliho ni tsinyungu sita tsia matsi himbi hawenaho; shia indala tsikalani makhomi kavili na tsindi makhomi kavaka, khulondokhana khu mulukha kwa Vayahudi vakholanga ku khwinihitsa. 7Yesu yavoolela varumishi venavo, “Tsukhi matsi khutukha lwa kitsula mu tsinyungu yitsi.” Navo vitsulitsa khutukha lwa kitsula mu tsinyungu tsienetso. 8Yesu yavavoolela, “Teehikhu matsi mati nunundi mukahile khu mundu wusinjililanga mulukha kwi shiselelo shiu khuhilana.” Vamuhilila matsi, 9kali ni kakalukhane khukwa idivai natsanzamakhu. Shiyali umanyikhu ha idivai yeneyo yali niruli tawe (navutswa, varumishi vali nivateehi matsi, navo vali nivamanyi). Khulwa yako, yalaanga musatsa uselelanga mwiiha 10namuvoolela, “Shia mundu wosi aranganga khuhaana idivai indahi, vacheni nivakhang'wa nivakhikura, alera idivai ya shia khase khosi; navutswa uvishi idivai indahi khutukha nunundi!”
11Yesu yakhola shiloleshitsu shiukhuraanga shienesho mu litaala lia Kana, lili mu lusomo lwa Galilaya; wa yamanyinya vukhumi vwevwe, ma veechi veve nivasuuvila muye.
12Lwa Yesu yali namali khukhola ndio, yasimukha na mama wewe, vamwavo veve, nende veechi veve nivatsia mu litaala lia Kaperenamu, wa vamenya khumatukhu mati.
Yesu Yatsia mu Litempeli
(Mat 21:12-13; Mk 11:15-17; Luka 19:45-46)
13Lwa Mulukha kwa Pasaka kwa Vayahudi kwali nu kuli himbi khutukha, Yesu yasimukha natsia Yerusalemi. 14Yinjila mu Litempeli nanyola vandu vakuulanyilamu tsing'ombe, makondi, nende vinamusotsi; khandi vakalukhanyinyi vi tsisenti nivikhale ha tsimesa tsiavo. 15Yesu yalomba shivoko khurula khu mikoye nakhunga miruku chiosi khurula mu Litempeli, khali makondi nende tsing'ombe. Yatikaalitsa tsimesa tsia vakalukhanyinyi vi tsisenti, nasalanyinya hasi tsisenti tsiavo; 16navoolela vandu vali nivakuulitsanga vinamusotsi, “Rulitsi vindu yivi munu! Leshi khukhola inzu ya Tata wanje khuva musokoni!” 17Veechi veve vitsushitsa ka Mahandiko Matakatifu kavoolanga, “Nyasaye, vuyaanzi vwanje shichila inzu yoyo vwakhanga mwinzi khuli mulilu.”
18Vimilili va Vayahudi vareeva Yesu, “Ni shiloleshitsu shina shiunyala khukhola khumanyinya ndi uli nu vunyali vu khukhola vindu yivi?”
19Yesu yachipa, “Pomoli Litempeli yili, ninzi mbe niliumbakhanga khumatukhu kavaka.”
20Khulwa yako, Vayahudi vamureeva, “Litempeli yili liavukula mihika makhomi kane na sita khumbakhwa, nivi utsitsanga khuliumbakha khumatukhu kavaka?”
21Navutswa Litempeli lia yalomoloma khulondokhanakhu kwali mmbili kwekwe. 22Lwa Yesu yisimushitswa khurula mu likhutsa, veechi veve vitsushitsa ndi yali wa vavoolela ndio; vasuuvila mu Mahandiko Matakatifu nende makhuva ka Yesu yali navooli.
Yesu Wamanya Kali mu Mioyo chia Vandu Voosi
23Lwa Yesu yali nali mu Yerusalemi khulitukhu liu Mulukha kwa Pasaka vandu vanyishi vasuuvila muye, lwa valola viloleshitsu via yali nakholi. 24Navutswa Yesu shiyali wa vasuuvila tawe, shichila yali wa vamanya voosi. 25Shiyenya mundu wosi khumuvoolelakhu shindu khulondokhana khuvo tawe, shichila yali wamanya kali mu mioyo chiavo.
Zur Zeit ausgewählt:
YOHANA 2: LLLCATHOLIC
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© The Bible Society of Kenya, 2013
