MAKI 5
5
Chisɔsi‑a mɔ kaima baun, nyina yama n ni min fɛ
(Matiu 8:28-34; Duku 8:26-39)
1Chɛ gbakɔ, mbɛ Chisɔsi che‑a Kadidi yii wa tindi dɔndɔɛ ma, an bɛ a fɛ denɛ n na. Chɛnyɛ chɛ nɛnɛ, a tɔ ni Kɛyasa. 2An che‑a kɛn nɔ, mbɛ Chisɔsi bɔ‑a dɛndɛ ɔ. Ɛ bɔ‑a dechee a ɔ, mɔ kaima dɔndɔ na‑a a tan, min na‑a ka bɛnkuɛ ɔ. Nyina yama, an ni an kamin chɛ fɛ. 3A sin, a ni chi bɛnkuɛ ɔ wan. Mɔ ɔ mɔ nii kun, a ni a sa yɔɔɛ a. 4Tima sɛsɛ ko a, an na‑a a sa wan yɔɔɛ a. Chɛɛ a ni yɔɔɛ chɛ ɔ tɛ wan, a chenɛ ma, a basan a boo a. A ɔ ni gbɛɛ gbeden, mɔ ɔ mɔ nii kun a ma. 5Su ɔ tee a, kamin chɛ ni ma wan sɔ ɔ, a chenɛ a, ben‑da bɛnkuɛ ɔ, a basan kɔnkɔɛ n dɔ a. Ɛ yee tɛ‑a, ɛ a wandi ma tɛ tɛ senɛ n na.
6A ni pɔɔ, a‑a Chisɔsi yen, mbɛ a‑a bui sa a a. A na‑a, mbɛ a‑a a kumbai gbangban, Chisɔsi chen kɔɔ. 7Mbɛ a‑a yee wa tɛ, a ɔ, “Chisɔsi, Yataa Wa 'a denɛ! I toen mu i ni fen ma n na? I dimu, I ma n tɔɔya. A chɛ Yataa ko a.” 8A‑a chɛ fɔ, koe min na mu, Chisɔsi na‑a a kuu sɔ wan gbɛ a fɔ‑a nyina yama chɛ ma, a ɔ, a ni ka mɔ kaima chɛ fɛ.
9Mbɛ Chisɔsi ɔ, “I tɔɛ?”
Mbɛ a ɔ, “N tɔ mu Fanka Wa. Koe min na mu, nn kɔkoo kaka.” 10Mbɛ a‑a Chisɔsi disa pien, a ɔ, a ma nyina yama chɛ n gbain an tanda chɛ ɔ.
11A tima chɛ a, kɔɛnya man sɛsɛ ni wan an baima, an mbe daun chɛ‑a kɔnkɔɛ kaa fɛ. 12Mbɛ nyina yama chɛ n‑na Chisɔsi disa, an dɔ, “Nn na ta kɔɛnya chɛ n tena, nn ni bea an fɛ.” 13A dɔn‑da wan an ta koe ma. Mbɛ nyina yama chɛ n bɔ‑a kamin chɛ fɛ, an ta‑a, an bea‑a kɔɛnya chɛ n fɛ. Kɔɛnya chɛ n gbɛɛ, wu fea da faenɛ ɛ gban, an yii‑a bui chɛ‑a kɔnkɔɛ kaa fɛ, an dɛ‑a yii wa chɛ ɔ, an to‑a a ɔ.
14Mbɛ mɔɛ chɛ nu, miin ni ka kɔɛnya chɛ n kun ma fɛn tena, an ben‑da bui‑a. An ta‑a duu ɔ, mbɛ an‑na a gbɛɛ ɔ yian, min chɛ‑a a ɔ. Mbɛ an‑na a ɔ yian ben‑da an tanda chɛ ɔ. Mɔ sɛsɛ n na‑a wan, min mbe a ma, an ni a ɔ yen min ma‑a. 15A sin, an che‑a kɛn, nyina yama chɛ n ni ka kaminɛ min fɛ, an‑na a tan fan, ɛ si ɔ nɔ. A ma chiienɛ ɛ, a sin, a yiima tɛenɛ ɛ. Chɛ‑a a ma wan, an gbɛɛ chian‑da. 16Mɔɛ miin ni ka nɔ ko ɔ ko ma‑a, an fan‑na a gbɛɛ ɔ yian gbɛ an bɔ n na. An‑na a ɔ yian, Chisɔsi na‑a nyina yama chɛ n gbain buɛ min dɔ kamin chɛ fɛ, a basan kɔɛnya chɛ n bakoe a.
17Mbɛ mɔɛ chɛ n‑na Chisɔsi disa, an dɔ, a ni bɔ an 'na chɛnyɛ ɔ.
18Chisɔsi ɛ kɛn dɛ‑a dɛndɛ chɛ ɔ, mbɛ a na‑a nyina yama gbain ka kaminɛ min fɛ, a‑a disa chɛ wan, a ɔ, Chisɔsi ni a ma an bɛ ni ta.
19Chɛɛ Chisɔsi ma dɔn ni. Chɛɛ a‑a min fɔ, a ɔ, “Ta i waa a. I ni a ɔ yian i 'a mɔɛ n na, Mansa Chisɔsi‑a koe min chɛ i ye, a chinchin‑da buɛ min dɔ i ma.”
20Mbɛ kamin chɛ wɛɛ ta‑a wan, a ben‑da Duu Tan dɔ gbɛɛ, ɛ a ɔ yian‑da mɔɛ n na, Chisɔsi na‑a min chɛ a ye. A sin, an mɔɛ n gbɛɛ da ɔ gbaa‑a wan, an koe chɛ a min koe a.
Chisɔsi 'a baun chɛ, a basan a 'a fɔɛ be a
(Matiu 9:18-26; Duku 8:40-56)
21Mbɛ Chisɔsi yɛ‑a yii wa chɛ kaka dɔndɔɛ, a ka‑a kaina, an bɛ a fɛ denɛ n na. Mɔ fanka wa an na sɔn‑da nɔ a ma, yii chɛ da a. 22Mɔ dɔndɔ ni wan nɔ, min tɔ ni Chayɔsi. A ni mɔ chenama dɔndɔ an na, Chu n 'na samun chɛ chenɛ a. Mbɛ a na‑a Chisɔsi tan. A‑a Chisɔsi tan kɛn, mbɛ a bea‑a a chen na. 23A‑a a disa, a sɔɛ gbɛɛ a, a ɔ, “N 'na den musuenɛ e na fa‑a. I dimu, na i ni i boo bun a ma, a ni baun, a fɔɛ ni yɛ to a ma.”
24Mbɛ Chisɔsi bea‑a Chayɔsi fɛ, an bun‑da ta‑a. Mɔ sɛsɛ ta‑a wan an na saan‑da, an findi findienɛ ɛ a ma, a ka kaka kan kɔ kan ma.
25Musu dɔndɔ ni wan fanka chɛ tɛ ɔ, musu n 'na kau ma gbandi ni min ma, san tan kun ma fea ko a. 26A na‑a tɔɔ wan bui ti sɛsɛ ye. A‑a a boo fenɛ gbɛɛ ma tachɛ wɛɛ, chɛɛ chɛ gbɛɛ ɔ, a ma gboo ɔ bɔɛ ma sɔn ni, gbandi gbu ta‑a wan ya ɔ ma. 27-28A na‑a Chisɔsi ma tɔɛ a min fan, a kɔma a. Chɛ ko a, a na‑a wan a gbaa chia a, fanka chɛ ɔ. A ni wan a fɔ‑a, a yiima ɔ, a ɔ “Ni n tu‑a a ma doma a dechee, n mbe baun‑da wan gbandi chɛ ɔ.” Mbɛ a tu‑a Chisɔsi 'a doma a. 29A ya kɔɔɛ a, a 'a kau ma gbandi chɛ sɛmbɛ‑a. Mbɛ a‑a a gboo gbu a tinsɔn, mbɛ a baun‑da gbɛ.
30A ya kɔɔɛ a, Chisɔsi‑a a ɔ sɔn, mbɛ gbasaya, min ni a ɔ mɔɛ n baun koe a, dɔ bɔ‑a a ɔ. Mbɛ a‑a a ya a mun, fanka chɛ ma, a ɔ, “Nyɔn tu‑a n ma doma a?”
31A fɛ denɛ n dɔ, “I‑a a ɔ yen tena wan, mɔɛ n mbe i 'a tindanɛ, an mbe tindi‑a i ma. I ni tisa chɛ to, mɔɛ tu koe a i a?”
32Chɛɛ Chisɔsi ma sɛmbɛ ni, a ya a ben ben koe a, a ɔ gbɛ koe a, ni mɔɛ min tu‑a a a. 33Chɛɛ musu chɛ ban‑da a ɔ sɔn‑da, a gboo ɔ ɛ gbɛ buɛ min dɔ. Chɛ ko a, a bɔ‑a ya a ma, ɛ samba‑a chiandia a. Mbɛ a‑a a kumbai gbangban Chisɔsi chen kɔɔ, mbɛ a‑a tea gbu gbɛɛ ɔ yian a a. 34Chisɔsi ɔ te a ma, “N 'na den, ta i faa chimaenɛ a don. I 'a danaya‑a i baun. Baun i 'a gbandi chɛ ɔ.”
35Chisɔsi to‑a koɔ tena wan musu chɛ tena, mbɛ sɔ mɔɛ na‑a, a ka Chayɔsi 'a chenɛ a. Mbɛ a ɔ, a 'a den musuenɛ gbu fa‑a, a ma na sɔ to ticha tɔɔya‑a ta koe a nɔ.
36Chɛɛ Chisɔsi ma a too ma sɔ ni an bai chɛ ma. A‑a a fɔ wan Chayɔsi ye, a ɔ, “I ma chian, dan dechee n na.” 37Chisɔsi ma dɔn ni mɔ dɔ gbɛɛ n ni bea a fɛ. A‑a Pita an ya dechee, ni Chimisi, an fea a dɔɛ Chɔn na. 38Mbɛ an che‑a Chayɔsi 'a chenɛ a. An che‑a kɛn, Chisɔsi‑a a ɔ yen, sɔnkɔ sɔnkɔɛ ni buɛ min dɔ nɔ, a basan di chɛ a, ni yee tɛ. 39A don‑da chenɛ bu ɔ, mbɛ a ɔ an ma, “N ma a ɔ sɔn ni fen sɔnkɔ sɔnkɔ e nɛ. Wo sɛmbɛ di chɛ‑a. Den chɛ ma fa ni, ɛ sa ɔ chinɔɛ ɔ wan dechee.”
40An bun‑da a yɛn‑da a da a kuiɛ chɛ ma. Mbɛ a‑a an gbɛɛ a bɔ chen chɛ a. Mbɛ Chisɔsi fɛ den sawa chɛ nu, miin na‑a a fɛ, ni den chɛ fa an fea a de a, a‑a an ya. Mbɛ an don‑da chen chɛ dumu gbu ɔ, den su chɛ ni kaina min sa ɔ. 41Chisɔsi‑a denɛ gbu ya ka wan a boo ma, mbɛ a ɔ, “Den den, n dɔ, i ni i a sɔ.”#5:41 An ta chɛnyɛ koɛ ɔ, a na‑a a fɔ ka wan, a ɔ, “Tadita kum.”
42Den chɛ ni yɛ‑a a ɔ, a‑a a kɔɔ sɔ wan dɔndɔ gbe, mbɛ a bun‑da tachɛ‑a, nɔ a 'a tindanɛ. (Den chɛ sanɛ ni tan kun ma fea). Chɛ ma‑a kɛn, an gbɛɛ da ɔ gbaa‑a wan nɔ. 43Chɛɛ Chisɔsi‑a an na si wan gbau gbau, a ɔ, an ma a fɔ mɔ ɔ mɔ ye. Mbɛ a ɔ, “Wo daun fenɛ be a ma, a ni a daun.”
Zur Zeit ausgewählt:
MAKI 5: KONONT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
New Testament in Kono © The Bible Society of Sierra Leone, 2006.