Smnlean 26
26
Meniq Gerar ka Yijxaq
1Niqan krayan ka dxeral hiya. Uxe so sntreengan krayan Abraham ciida. Yijxaq de mosa Abimeleq, qbsuran paru Peliset, dxeral Gerar hiya. 2Ptuura Yijxaq ka Utux Tmninun, rmengo: “Iya osa Micrayim ka isu, eniq dxeral tniyu mu sunan. 3Mptnooda su dxeral hini. Yaku we mptheyaq ku isu ma mpsbleyaq ku isu. Ado bege mu isu ma laqi mslutuc su nexal kana ka dxeral nii. Mplekoh ku pnsdhegan mu Abraham tama su. 4Biqun misu hbaro bale laqi mslutuc su, mntena so pngerah karac baro. Bege mu laqi mtlutuc su ka kana dxeral nii. Kiya uri we ririh laqi mtlutuc su maha mangal qnbleyaq ka kana qnlhangan bobo dxeral. 5Ado mbahang kari mu ka Abraham, muyu dnurun mu, kari pndakar, gaya ma tnugesa mu ka heya.”
6Kiya de, meniq Gerar ka Yijxaq. 7Smiling mqedil na ka dseediq hiya, rmengo ka heya: “Mtswai mu ka heya.” Ado miicu rmengo mesa: “Mqedil mu ka heya”. Lmngelung ka heya: “Nhuwa ririh Ribqah de mphuqil kenan ka dseediq hini. Ado mbtunux qtaan ka heya.” 8Bsiyaq hari nniqan daha hiya ka dheya. Niqan 1 ali, Abimeleq qbsuran paru Peliset we peeyah bais mita nganguc. Taan na Yijxaq we gisu rmubux heyi Ribqah mqedil na. 9Mlawa Yijxaq ka Abimeleq, rmengo: “Tai, heya we bale ba mqedil su ka heya. Ma su rmengo: ‘Heya we mtswai mu’ ho?” Rmengo ka Yijxaq: “Ado lmngelung ku, miicu ku ririh heya mphuqil ku ka yaku da.” 10Rmengo ka Abimeleq: “Maanu ka wada su sqeepah yami ho? Ckceka nami seediq hini we niqan ka 1 heyi kmpsuupu mtaqi mqedil su ka heya. So kiya de gisu su pqriun ckceka qnquwan noda ka heya da.” 11Kiya de Abimeleq we asi posa kari kana seediq ka heya: “Ani ima ka tmnelung seediq nii ma mqedil na we phqilun mu ka heya.”
12Qmeepah dxeral hiya ka Yijxaq. Knkawas ciida we betaq msn1'00 kneegu ka nangal daha. Utux Tmninun we smbleyaq heya. 13Kiya de mrana bale ka heya, mrana klaali de betaq mseediq mbleyaq ba. 14Heya we niqan qpuruh miric ma dapa. Kiya uri we niqan egu tnqliyan uri. So kiya de snhuur heya ka dseediq Peliset. 15Meniq bobo dxeral ka Abraham tama na ciida han we, kana bbulan knari tnqliyan tama na we, wada tbnean dxeral seediq Peliset kana ka bubul na. 16Rmengo Yijxaq ka Abimeleq: “Osa mlatac peeyah yami ka yamu da ho? Ado yamu we mgkala beyax nami ka yamu da.”
17Kiya de mlatac hiya ka Yijxaq mosa pkobu ayu Gerar meniq hiya. 18Kmnari kbbulan Abraham muudus ciida we, wada spuyan seediq Peliset bobo mhuqil Abraham. Yijxaq de brahun daha kmari ka bbulan. Kiya we tnanun na ngayan ida dnoi tama na. 19Kmari kbbulan ckceka ayu hiya ka tnqliyan Yijxaq de slayan daha ka 1 pusu muudus qsiya bbulan. 20Mtgdiyal kari ka mtabu miric nGerar ma mtabu miric nuYijxaq, rmengo: “Qsiya nii we nnami kiya.” Kiya de Yijxaq we kesun na tmngayan Isik ka kbbulan kiya. 21Kmnari 1 kbbulan dungal ka tnqliyan Yijxaq. Mtgdiyal kari 1 kbbulan nii dungal ka dheya. Yijxaq we kesun na tmngayan Sitnah ka kbbulan nii. 22Mlatac peeyah hiya ka Yijxaq. Kiya de kmnari 1 kbbulan dungal. Kiya de ini daha ngali mkeekan kari ka kbbulan nii da. Heya de Rexobot kesun na tmngayan ka kbbulan nii. Rmengo ka heya: “Utux Tmninun we gisu mege dxeral knuglahang riyung. Dxeral nii uri we maha mrana bale uri.”
23Yijxaq de peeyah hiya mosa Beerseba. 24Keeman ciida, meyah mtqita heya ka Utux Tmninun. Rmengo: “Yaku we Utux ku baro nuAbraham tama su. Iya kiicu, ado mptheyaq ku sunan ka yaku. Mpbleyaq ku isu, ririh Abraham tnqliyan mu maha mrana egu riyung ka laqi mslutuc su.” 25Yijxaq de, smalu 1 spuhan hiya ma thmuku ngayan Utux Tmninun ma, pkobu hiya uri. Tnqliyan na we kmnari 1 kbbulan qsiya hiya.
Psdehu ka Yijxaq ma Abimeleq
26Abimeleq we madis Axusat sslingan na ma Pikol qbsuran supi na peeyah Gerar mosa Yijxaq hiya. 27Rmengo dheya ka Yijxaq: “Tmraqil namu yami de, lwaqi nami peeyah yamu. Hmuwa namu meyah yami hini dungal ho?” 28Rmengo ka dheya: “Taan nami bale gaga mtheyaq isu ka Utux Tmninun. So kiya de rmengo ka dheya. Ppsdehu ta ka ita, yami we ppheyu ta gaya yamu. 29So su uxe meyah phuqil yami. Mntena so ini miyan phuqil yamu uri. Smbleyaq miyan yamu ka yami. Kiya uri we mege nami smbleyaq lhebun mkkesa yamu. Yamu we gisu namu mangal snbleqan Utux Tmninun ka yamu!” 30Yijxaq de psramal paru qrasun uqan. Msuupu mekan ma miimah ka dheya. 31Mtutuy mgrebu ka dheya, ppsdehu ka dheya. Kiya de mosa smraki dheya ka Yijxaq. Kiya de wada mbleyaq ba mlatac ka dheya da. 32Ali ciida, meyah ka tnqliyan Yijxaq. Meyah rmengo kari quri kbbulan. Rmengo: “Smdiyal miyan pusu qsiya da.” 33Heya we kesun na Sibah tmngayan ka bubul kiya. So kiya de alang kiya we Beerseba kesun daha tmngayan betaq saya.
Mqedil Esaw Klegan Seediq Icil
3440 knkawas na ka Esaw ciida, mangal mqedil Yehudit, weewa Beeri seediq Xet ma mqedil Basmat weewa Eylon seediq Xet. 35Dheya nii we wada pslhebun bale kndesan Yijxaq ma Ribqah.
Zur Zeit ausgewählt:
Smnlean 26: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020