Smnlean 31
31
Qduriq Peeyah Rapan ka Yakobu
1Mnbahang kari lqlaqi Rapan ka Yakobu, rmengo mesa: “Wada glekun Yakobu kana ka dnoi tama ta da! Heya we pnooda dnoi tama ta wada mangal kneegu qnbleyaq dnoi ka heya.” 2Yakobu we, taan na ka dqeras Rapan. Tai, ini so cuuxal ka sntreengan na da. 3Rmengo Yakobu ka Utux Tmninun: “Osa mbrinah dxeral ddrudan su cbeyo, osa dpusu rudan namu nanak hiya. Yaku we mptheyaq ku isu.” 4Smkagul seediq mosa mlawa Rajie ma Leah ka Yakobu. Psaun na mquri rahul miric na ga meniq qnpahan hiya. 5Rmengo dheya: “Taan mu ka dqeras sntreengan na yaku ka tama su we ini bale pntena cuuxal da. Ani so kiya we ida msuupu klaali yaku ka Utux Baro tama mu. 6Mkela namu uri. Wada kana ka beyax mu qmeepah tama namu we, ida namu klaun uri. 7Maanu so kiya we mberiq yaku ka tama namu. Mn10 priyux bbege na sntkean mu. Ani so kiya we ini srwai pphuqil yaku ka Utux Baro. 8Netun rmengo ka heya: ‘Niqan trbangan na we kiya ka sntkean su’ mesa de, tmwawa trbangan kana ka rahul miric. Netun rmengo: ‘Niqan rako na we kiya ka sntkean su’ mesa de, tmwawa rako kana ka rahul miric. 9So kiya de, Utux Baro we sbege na kenan ka tnbugan tama namu di.
10Mssayuk ciida ka rahul miric we, meniq ku ckceka sepi, qmnita ku. Tai, mtaril kmpsiyuk giyas miric ka baus miric we to niqan rako, trbangan ma, rako kana. 11Mlawa yaku ka snkgulan Utux Baro ckceka sepi: ‘Yakobu.’ Cmiyuk ku: ‘Gisu ku hini.’ 12Rmengo ka heya: ‘Posa doriq su qita, mtaril kmpsayuk bubu miric ka baus miric we to niqan rako, trbangan ma, rako kana. Kana qneepah na sunan ka Rapan we, wada mu qtaan kana da. 13Yaku we Utux Baro ku Beytel. Isu we cmnuwaq su abura pnheyu su btunux hiya ma, mquri su yaku smdehu. Saya de tutui da, latac hini, brinah mosa dxeral tnpusu rudan su da!’” 14Cmiyuk Yakobu ka Rajie ma Leah: “Meniq nami sapah tama nami we maha niqan ka dnoi ngngalun miyan peeyah nsugan nana ho? 15Ita we uxe gisu tana ngalan so seediq icil ka ita peni? Ado wada maruy ita ka heya da. Kiya uri we wada rmequn mangal pila nami. 16Nangal Utux Baro pneyah tama ta ka ani maanu dnoi we, ida nnami ma nlaqi miyan kiya. Saya, kana dnurun na sunan ka Utux Baro we, keso kiya moda ka isu da!”
17-18Kiya de Yakobu ge, psramal oosa na mpbrinah tama na Yijxaq ga Kenaan hiya. Spaapa na bukuy dapa bukung ka kana lqlaqi na ma mmqedil na. Ddudul na ka kana tnbugan na ma desun na kana ka qyqeya nangal na peeyah Padan Aram. 19Wada matak ubal miric na ciida ka Rapan we spkelu na ini eeniq sapah hiya ciida, mosa gmeeguy mangal tikung utux tama na ka Rajie. 20Yakobu ge, wada gmuruus qduriq mberiq Rapan seediq Aram. 21Desun na kana ka dnoi na ma mtbbeyax mosa, mntaril yayung Paru ma mqquri dgiyaq Gilad.
Mhero Yakobu ka Rapan
22Mk3 de niqan ka seediq rmengo Rapan mesa: “Wada qduriq ka Yakobu.” 23Heya de madis ddheya nanak smdurak Yakobu. Mk7 bnhragan daha Yakobu de sklaan daha Dgiyaq Gilad heya ka Yakobu. 24Keeman ciida, msepi ka Rapan seediq Aram we mtqita heya ka Utux Baro ma rmengo: “Qlahang, iya rinah smiicu Yakobu.”
25Yakobu ciida we pkobu bobo dgiyaq ma Rapan uri we msuupu ddheya nanak pkobu Dgiyaq Gilad hiya. 26Rmengo Yakobu ka Rapan: “Ma su mberiq kenan, spntena su so seediq qnerac tnugdiyal madis ka lqlaqi mu mqedil ho? 27Hmuwa su gmruus qduriq kenan, ani 1 kari ini su hiti ma asi su lux wada ho? Netun su so pgkela kenan ani su 1 kari de ida ku naka tqqaras tmatuk tatuk hmuril ma tmubu tbegan muyas smraki sunan. 28Sgcuqi su ba mngataq ka noda su so nii. Ani ka so ttunguh dqeras lqlaqi laqi mu ma lqlaqi mu mqedil mswaye dheya we ini su kesi heya uri. 29Bale ba we naka misu dhekan pluqah, kiya ka kiya skeeman ciga rmnengo kenan ka Utux Baro tama su: ‘Qlahang bale ka isu, iya khmeti rmengo ka Yakobu.’ 30Klaun mu ka lnglungan su mkmosa sapah. Kiya de ma su wada gmeeguy tikung utux mu ho?” 31Cmiyuk Rapan ka Yakobu: “Lmngelung ku we ida ba yaa maadis beyax gmeeluk mangal peeyah kenan ka lqlaqi su mqedil mesa ku ma miicu ku bale. 32Kiya de ima slayan su peeyah heya ka utux mpqlahang su we asi phqili ka heya berah kana ddyami hini. Nasi su klaun kika qyqeya su we asi desi.” Bale ba we ini kela ka Yakobu Rajie wada gmeeguy tikung utux tama na.
33Mosa migin kobu Yakobu ka Rapan ma mremux kobu Leah ma 2 tnqliyan na we ida ini sdiyal. Kiya de mremux kobu Rajie ka heya. 34Rajie ge, lingi na toma qraqil spilan paapa dapa bukung ka tikung utux ma tleung bobo na hiya ka heya. Mtqiri migin mxmuxi kobu ka Rapan we ini sdiyal. 35Rmengo tama na ka Rajie: “Tnpusu sapah mu, iya kseang, nii ku pkelu yahan ma ini ku tduwa mheyu berah su.” Moda migin ani inu ka Rapan we ini na slai ka tikung utux.
36Kiya de sqama seang smiling Rapan ka Yakobu: “So ba maanu ka qnqihan mu ma qnquwan mu betaq su meyah smdurak kenan ho? 37Mnoda su migin kana qyqeya mu ma wada su slayan ka nisu ho? Adis ma peeniq berah dheya ma dyami, kiya de psgeego ta. 3820 knkawas ka nniqun mu sapah su we uka wada tnhuhuc ka miric rudu ma miric, uxe uri we ini ku ekan ani 1 baus miric rudu peeyah qpuruh su. 39Snliqan mekan camac ka miric we ini mu hadi berah su ma wada mu prihan kana. Wada gguyun ani keeman ani diyan ka miric we ‘Prihi ku hiya’ knesa saku. 40Klaali ka yaku we uqun ku kntlexan ka diyan, uqun ku knskean ka keeman ma uxe malu tnqiyan mu. 41Yaku ge, 20 knkawas ka nniqan mu su ma ririh 2 laqi su mqedil we 14 knkawas ma ririh rahul miric su we qmeepah ku sunan 6 knkawas, Ani so nii, mn10 su wada marah ka bbege su kenan. 42Nasi uxe Utux Baro nuAbraham ma nuYijxaq rudan mu ka theyaq kenan we naka saku wada pbrasun platac. Kiya de Utux Baro we ado qmita qnrqilan mu ma bqerus mu ka heya wada mseang sunan keeman soni.”
Msdehu ka Yakobu ma Rapan
43Cmiyuk Yakobu ka Rapan: “Lqlaqi mqedil nii we nnaku ma lqlaqi laqi uri we nnaku, rahul mrmiric we nnaku uri. Nii su taan kana nii we nnaku. Kiya de uxe ku tduwa hmuric lqlaqi mu mqedil ma lqlaqi laqi mu, 44nuuqu malu asi ta pssdehu, ptetu ta btunux ma ngale ta pnskraya uxe cchungi pnsdhegan.” 45Kiya de mangal btunux ka Yakobu ma ngalan na eruc spteetu na. 46Rmengo mtswai na ka Yakobu: “Psseli ta btunux.” Kiya de gtuun daha psseli ka btunux ma, mekan ssiyo pnhuradan hiya ka kana daha. 47Rapan ge: “Igal Shaduc” kesun na tmngayan ka pnharac nii ma Yakobu we “Garic” kesun na. 48Rmengo Yakobu ka Rapan: “Ngale ta pnskraya pnsdhegan ta ka pnharac nii” mesa. Peeyah so nii Garic kesun daha ka dxeral nii. 49Uxe uri we Micpah kesun daha ka dxeral nii. Ado Rmengo uri ka Rapan: “Bobo wada ta mswaye we tai so mpqlahang qmita ita ka Utux Tmninun. 50Netun su tmraqil lqlaqi mu mqedil uxe uri we mangal su mqedil duma dheya ge, ani yaa ini kela ka seediq we iya chngii nii qmita ita ka Utux Baro mpgkeela.”
51Rmengo dungal Yakobu ka Rapan: “Tai, nii hini ka harac, dungal we nii hini ka btunux pnteetu uxe ta cchungi. 52Pnharac nii we pnskraya na, btunux pnteetu nii ka mpgkeela na. Uxe ku ba phrinas pnharac mosa mekan sunan ma isu uri we uxe su ba phrinas pnharac ma btunux pnteetu uxe cchungi nii meyah mekan kenan. 53Utux Baro nuAbraham ma Utux Baro nNahor ka tai so mpnduwa psgao ita.” Bobo na nii ka Yakobu de spooda na ngayan Utux Baro smdehu gaga thmkuwan Yijxaq tama na. Kiya de qqlahang dmoi kari pnsdhegan nii. 54Dungal Yakobu we mgkala dgiyaq mosa smapuh ma, splawa na kana ka mtswai na. Bobo mnekan de mkrabi dgiyaq heya ka dheya. 55Mgrebu ba so kusun ka Rapan we htiyan na smwaye tmunguh ka lqlaqi laqi ma lqlaqi na mqedil de wada sapah na da.
Zur Zeit ausgewählt:
Smnlean 31: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020