Smnlean 32
32
Psramal Smterung Esaw ka Yakobu
1Mkleelu moda elu ka Yakobu we smterung heya ka snkgulan Utux Baro. 2Qmita dheya ka Yakobu de rmengo: “Dsupi Utux Baro ka nii.” Kiya de Maxanayim kesun na tmngayan ka dxeral hiya.
3Yakobu we pgeela smkagul dsnkgulan na betaq dxeral Seir, kiya ka dxeral Edom ga niqan Esaw qbsuran na. 4Dmurun dheya ka heya: “Yamu we kesa rmengo ka Esaw pusu qbsuran mu: ‘Tnqliyan su Yakobu we so nii dmurun, tnooda ku meniq Rapan hiya ma, tggila betaq saya. 5Niqan ku dapa, dapa roba, rahul miric, tnqliyan ma tnqliyan mqedil. Saya we smnkagul seediq meyah rmengo pusu qbsuran mu. Tai so maha mangal huwe meniq berah su.’”
6Mbrinah dehuk Yakobu hiya ka dsnkgulan, rmengo: “Mnosa nami Esaw qbsuran su hiya da. Heya we ga smterung isu ma, niqan 4'00 seediq uri ga msuupu heya.” 7Kiya de miicu ka Yakobu ma, krinah slhebun. Heya de tgdahai na ptqpuruh ka dseediq tnheyaq heya, qpuruh miric, dapa, dapa bukung uri tgdahaun na. 8Rmengo: “Netun meyah phuqil tgkingal qpuruh ka Esaw de, mtduwa qduriq ka 1 qpuruh na.” 9Rmengo ka Yakobu: “Utux Tmninun, Utux Baro nuAbraham baki mu, Utux Baro nuYijxaq tama mu, rmnengo su kenan: ‘Osa mbrinah tnpusu rudan su, mpsbleyaq ku isu.’ 10Bnege su kana gnhuwe ma knbale su quri tnqliyan we, uxe ku mpdehuk mangal. Cuuxal ka yaku we wano 1 ba hukuc ka sdoi mu mntaril yayung Yarden. Saya de nii ku betaq tgdahaun qpuruh seediq da. 11Braho misu, doi ku hiya baga pqduriq peeyah baga qbsuran mu, qdriqi ku peeyah baga Esaw. Ado miicu ku meyah phuqil yaku ka heya. Ani bubu ma lqlaqi uri we uxe na laxun kana. 12Rmnengo su: ‘Maha ku smbleyaq isu, mptena bnaquy ssiyo rcilung ka laqi mslutuc su. Kneegu na we ini tduwa spegan.’”
13Mkrabi hiya ka Yakobu ciida, kiya de mosa mangal bbege na Esaw qbsuran na peeyah dnoi na ka Yakobu. 14Kiya ka 2'00 bubu miric, 20 baus miric, 2'00 bubu miric rudu, 20 baus miric rudu, 1530 bubu dapa bukung ida kiya gaga thiqan wawa, 40 bubu dapa, 10 ka balas dapa, 20 ka bubu dapa roba ma 10 ka dapa balas roba. 16Skngalun na knkingal qpuruh ptgaanak ka tnbugan na ma sbege na baga tnqliyan. Rmengo tnqliyan: “Osa mgeela berah mu ka yamu, pniqi knuglahang hari cenga ka knkingal qpuruh.” 17Kiya de rngagan na ka tnqliyan gaga tgeela ba: “Smterung sunan ka Esaw qbsuran mu ciida, netun smiling sunan: ‘Ima su ka isu? Mmaha su quri inu? Nima ka gisu berah su nii?’ 18Kiya de rengo so nii ka isu: ‘Nii we ntnqliyan su Yakobu, ngalun na qnaras bbege na Esaw pusu qbsuran mu. Tai, heya nanak uri we ga meniq bukuy nami uri.’” 19Kesun na rmengo dungal ka tg2 tg3 qpuruh ma kana seediq gaga dmudul tnbugan: “Sterung namu Esaw ciida, keso nii cmiyuk heya kana namu. 20Kiya uri we rengo dungal: ‘Tai, Yakobu tnqliyan su we gaga bukuy nami.’” Ado rmnengo ka Yakobu: “Spooda mu bnege mu gisu tgberah nii ge, maha smparu dqeras na, kiya de mtqita ku dqeras na. Nhuwa smruwa kenan ka heya.” 21Kiya de pglaun na posa moda berah na ka bbege. Keeman ciida, mkrabi kobu na hiya ka Yakobu.
Mntalang Meniq Penuel ka Yakobu
22Mtutuy keeman ciida ka heya, madis 2 mqedil na, 2 tnqliyan mqedil ma 11 lqlaqi na mntaril Yayung Yaboq. 23Madis dheya ma hmaduc dheya mtaril yayung. Wada pntrilun kana ka dnoi na uri. 24Wano Yakobu nanak ka mtrangi bukuy. Niqan 1 seediq meyah psseung mntalang heya, asi betaq pgrapo caman. 25Seediq kiya we taan na uka ba beyax na mpkbeyax heya de, asi na tlengi ka surul bteriq na. Sqrahuq ka bteriq Yakobu tgdiyal seediq kiya. 26Rmengo ka seediq kiya: “Uxe beyo lmedax da, posa ku da!” Rmengo ka Yakobu: “Ini su sbleyaq kenan we uxe misu psaun.” 27Rmengo ka seediq kiya: “Ima ngayan su?” Rmengo ka heya: “Yakobu.” 28Rmengo ka seediq kiya: “Ngayan su we iya kesi Yakobu da, Israel kesi. Ado smeung su beyax Utux Baro ma seediq we wada su ini baka kana da.” 29Rmengo heya ka Yakobu: “Braho su rngagi ku hiya ka ngayan su ho?” Rmengo ka seediq kiya: “Hwaun su nanak smiling ka ngayan mu ho?” Kiya de smbleyaq Yakobu meniq hiya ka heya. 30Yakobu de Penuel kesun na tmngayan ka dxeral hiya. Rmengo: “Wada ku asi ptdqeras qmita Utux Baro da, knuudus mu we ida ga meniq na.” 31Gisu hani mcriyu ka hido ciida, moda Penuel ka Yakobu we sppika ka papak na da. 32So kiya de, seediq Israel we ini ekan heyi bteriq betaq saya. Ado wada tmelung surul bteriq Yakobu ka seediq kiya.
Zur Zeit ausgewählt:
Smnlean 32: Stgdaya
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan, 2020
© 台灣聖經公會版權所有，2020