YOHANES 8
8
1Arawe I Yesus natarai nusumaka sarang Wukiri u Zaitung. 2Ndai nal᷊ou mborong mal᷊uka-l᷊ukari I Sie sau nakoa sarang Wal᷊e ngu Mawu, dang napene taumata nusumongo sarang koa-E. I Yesus nukumangiang, bou e'e nanita nanintiro si sire. 3Tintal᷊a e'e, manga meteri agama dingang u manga tau Farisi numbawa sarang koa-E singkatau kowawine nikatangka nawuang. Tau kowawine e'e nioro ngi sire pararisi su tal᷊oara i sire, 4bou e'e nangul᷊i si Yesus, “Tuang Guru tau kowawine i'i nikatangka i kami nawuang. 5#Im. 20:10; Sau. 22:22-24Su l᷊al᷊ung u Atorang i Musa pia atorange himoneu kowawine ko kiri'i mambeng pakipal᷊o dingang u watu sarang pakapate. I'i kirapa su sipirang I Tuang?” 6I sire nukina kere'e guna ngu mangakal᷊i si Sie tadeau i sire botonge mupunsal᷊a ngi Sie. Kateho I Yesus kitang nukumakurung dang namohe dingang u tal᷊imboronge su tana. 7Suapang i sire mang ta mangiro manunsuri, I Sie nuhengke pahesie dang nangul᷊i si sire, “Taumata ko takoae dosa su tal᷊oara i kumu, nae'e i sie horo pamal᷊o u watu su tau kowawine e'e.” 8Bou e'e I Yesus sau nukumakurung dang sau namohe su tana. 9Suapang nakaringihi si Yesus nangul᷊i kere'e, i sire nul᷊umal᷊eng singkatau-singkatau nanita bou ko kaghurangenge nanintang u tampa e'e. Panginsuenge I Yesus natintang sisanenge su se'e dingang u tau kowawine ko mborong kararisi su tampa e'e. 10Bou e'e I Yesus nuhengke u pahesie dang nangul᷊i su tau kowawine e'e, “Su apa i sire kaul᷊ie? Takoae ko nuhukung si kau?”
11“Takoae, Tuang,” nisimbahie.
“Mapiate,” Niul᷊i I Yesus, “Ia l᷊ai ta muhukung i kau. Su orasi i'i tamaite, kumbahang sau mukoa dosa.”]#8:11: Su l᷊al᷊ung u wohe maul᷊i dang salenang horo, takoae bahageang ii (7:53–8:11); pia ko namilo samuri ngu Yoh. 21:24; pia l᷊ai ko samuri ngu Luk. 21:38; dang pia wohe simbau ko namilo samuri ngu Yoh. 7:36
I Yesus kasasua ngu dunia
12 #
Mat. 5:14; Yoh. 9:5 I Yesus sau nudidato su taumata maul᷊i, “Angkung-E, ko Ia kasasua ngu dunia. Taumata ko tumuhu si Sia ta sarung l᷊umal᷊eng su kararundung kateho managhuang kasasua ngu puwawiahi.”
13 #
Yoh. 5:31
Angkung tau Farisi e'e nangul᷊i si Sie, “I kau orasi i'i musaksi ngu watangeng-U sisane, kasaksiangu takoae kabanarange.”
14I Yesus nusumimbahi, “Maningwe Ia musaksi ngu watangeng-Ku sisane, kasaksiang-Ku e'e ko tingari, watu'u Ia matitong bou apa Ia nusumongo dang sarang apa Daku l᷊al᷊engang. I kumu wugha ngu bou apa Ia nusumongo dang sarang apa Daku l᷊al᷊engang. 15I kumu mupunsal᷊a taumata tumuhu titong u taumata, Ia ta mupunsal᷊a taumata sarang singkatau. 16Kateho andenge Ia mupunsal᷊a ngu taumata, putusang-Ku e'e ko adili, watu'u Ia wal᷊ingewe sisane-Ku, I Yamang ko nundoi si Sia mahundingang u Ia. 17Su l᷊al᷊ung u Atorang i Musa pia mawawohe kiri'i: Kasaksiang ko tingari e'e ko kasaksiang u dua ngkatau. 18Ko nunggile kasaksiang hal᷊i u watangeng-Ku pia darua – Ia l᷊au I Yamang ko nundoi u Ia.”
19Angkung i sire, “I Yamang-U e'e ko su apa?”
I Yesus nusumimbahi, “I kumu wugha ngu Ia arako l᷊ai I Yamang-Ku. Kiko i kumu matitong u Ia, nal᷊ahe i kumu l᷊ai matitong I Yamang-Ku.”
20Kaul᷊i u e'e niul᷊i I Yesus su tempo ngi Sie kapanintironge su Wal᷊e ngu Mawu su sindihang u manga kasi u derma. Kateho takoae ko sarang manga singkatau naname si Sie, watu'u mborong ta nurating temponge.
Sarang tampa ko Daku l᷊al᷊engang i kumu takoae ko makasongo
21I Yesus sau nangul᷊i si sire, “Ia sarung l᷊umal᷊eng, dang i kumu sarung mundea si Sia, kateho i kumu sarung mate su l᷊al᷊ung u dosangu. Sarang tampa ko Daku tamaing i kumu ta makasongo.”
22Kuteu manga mangangawasa ngu tau Yahudi nangul᷊i, “Pari I Sie mamate badange, watu'u I Sie nangul᷊i, ‘Sarang tampa ko Daku tamaing i kumu takoae ko makasongo.’ ”
23Bou e'e I Yesus nangul᷊i si sire, “Asal᷊i kumu bou wawa, arawe Ia asal᷊i-Ku bou rasi. I kumu bou dunia, Ia wal᷊inge bou dunia. 24E'e sabapie Ia nangul᷊i si kumu, i kumu sarung mate su l᷊al᷊ung apang dosa ngi kumu, dang mang tingari i kumu sarung mate su l᷊al᷊ung apang dosa ngi kumu, boko i kumu ta mangimang himoneu ko Ia I Sie ko nisigho ‘IA ENE’,”#8:24: IA ENE: Pari areng i'i manibo su areng ko nipake u Mawu Ruata ko mul᷊ahe u watangeng-E (Sasu. 3:14)
25I sire nukina, “Tuhu hinonge, I Kau ko i sai?”
I Yesus nusumimbahi, “Apa gunange mborong sau mudidato dingang i kumu!#8:25: Apa gunange borong sau mudidato dingang i kumu!: arako “musul᷊ung ko seng Daku niul᷊i si kumu mangki kahimotongange”. 26Mborong maul᷊i hal᷊i bo i kumu ko hino ngu Daku iul᷊i l᷊au iurusi. Kateho I Sie ko nundoi u Ia botonge pangimaneng. Dang Ia muhabari su dunia apang ko Daku nikaringihi bo I Sie.”
27I sire ta nakahingang himoneu I Sie kapudidatonge si sire bou hal᷊i I Yamang. 28Ual᷊ingu e'e I Yesus nangul᷊i si sire, “Hindo boko i kumu seng mupakarange Ahusi Taumata, i kumu sarung matitong himoneu ko Ia i'i I Sie ko isigho IA ENE, dang i kumu sarung matitong himoneu takoae sarang manga simbau apang ko Daku nikoa e'e ko bou watangeng-Ku sisane. Ia kitang muhabari apang ko nitintiro ngi Yamang si Sia. 29Dang I Sie ko nundoi u Ia e'e ene dingang-Ku. I Sie mborong ta namala ngu Ia sisane-Ku, watu'u Ia mang sintinia mukoa apang ko makasanang naung-E.”
30Suapang I Yesus mbuae nangul᷊i kaul᷊i u e'e, maul᷊i taumata ko nangimang si Sie.
Mawu Ruata ko tingari mul᷊iwiri kumu
31Bou e'e I Yesus nangul᷊i si sire tau Yahudi ko seng nangimang si Sie, “Boko i kumu muwiahi tumuhu tintiro-Ku i kumu tinga-tingari seng makoa tumatuhu-Ku, 32Kuteu i kumu sarung matitong u Mawu Ruata ko tingari, dang ual᷊ingu e'e i kumu sarung ipakal᷊iwiri.”
33 #
Mat. 3:9; Luk. 3:8 Angkung i sire, “I kami i'i hintou ngi Abraham. I kami mborong ta paghisa nakoa l᷊ang i sai-sai! Apa pandung-U didato, ‘I kumu sarung ipakal᷊iwiri’?”
34I Yesus nangul᷊i si sire, mang tingari didato-Ku i'i. “Taumata ko mukoa dosa, e'e ko l᷊ang u dosa. 35Singkatau l᷊ang takoae tampa ko matatapi su tal᷊oara u tataho wal᷊e, arawe ana sarang kal᷊iwuenge i sie matatana su l᷊al᷊ung u wal᷊e. 36Ual᷊ingu e'e boko ana mul᷊iwiri kumu, i kumu tinga-tingari mal᷊iwiri. 37Tingari Ia matitong i kumu i'i ko hintou ngi Abraham. Kateho i kumu mo mamate si Sia, ual᷊ing i kumu mandiri manarima tintiro-Ku. 38Apang ko Daku nikawua si Yamang-Ku, e'e ko Daku iul᷊i. Arawe i kumu mukoa apang ko nitintiro ngi yamang i kumu si kumu.”
39I sire nusumimbahi, “Iyamang i kami i Abraham.”
I Yesus nangul᷊i, “Boko i kumu tinga-tingari ana i Abraham, nal᷊ahe i kumu mukoa#8:39: Boko i kumu tinga-tingari … i kumu mukoa: pira mbau wohe horo: Boko i kumu …, koate. apang nikoa i Abraham. 40Ia muhabari si kumu kabanarang ko Daku nikaringihi bou Mawu Ruata kateho i kumu mo mamate si Sia. I Abraham ta nukoa kere'e! 41I kumu mukoa apang ko nikoa i yamangu sisane.”
Sasimbahi sire, “I kami wal᷊ingewe manga ana su l᷊ikuri. I Yamang i kami kitang simbau, e'e ko Mawu Ruata sisane.”
42Bou e'e I Yesus nangul᷊i si sire, “Boko Mawu Ruata I Yamang i kumu, i kumu sarung kumindaghi u Ia, watu'u Ia nusumongo bou Mawu Ruata. Ia ta nusumongo dingang u kao-Ku sisane, kateho I Sie ko nundoi si Sia. 43Apa sabapie i kumu ta makahingang apang ko Daku niul᷊i? Watu'u i kumu ta makakuhirang mundaringihi tintiro-Ku. 44I yamangu ko setang, dang i kumu tutuhu kao i yamangu. Mborong bou titae setang e'e tahapate. I sie ta rumarisi su kabanarang, watu'u i sie takoae kabanarang. Boko i sie mul᷊eo, e'e kakakoae, watu'u ko e'e lulunge. I sie mal᷊eo dang punguang u patiku l᷊eo. 45Arawe Ia mangul᷊i kabanarang, dang ual᷊ingu e'e i kumu ta mangimang si Sia. 46I sai su tal᷊oara i kumu makapul᷊ahe himoneu si Sia pia dosa? Boko Ia muhabari kabanarang, apa sabapie i kumu ta mangimang si Sia? 47Taumata ko asal᷊ie bou Mawu Ruata, mundaringihi didato ngu Mawu Ruata. Arawe i kumu wal᷊inge bou Mawu Ruata, e'e sabapie i kumu mandiri mundaringihi.”
I Yesus dingang i Abraham
48Manga tau Yahudi e'e nusumimbahi si Yesus, “Wal᷊ingewe tingari didato ngi kami himoneu I Kau tau Samaria ko nikasukang u setang?”
49I Yesus nusumimbahi, “Ia ta nikasukang u setang, Ia mangadati si Yamang-Ku, arawe i kumu muhinakang si Sia. 50Ia ta mundea tadeau watangeng-Ku sisane adateng. Pia simbau ko mundea tadeau ia adateng, dang ko I Sie sisane muhukung. 51Mang tingari didato-Ku i'i, taumata ko tumuhu didato-Ku, i sie ta sarung mate sarang kal᷊iwuenge.”
52Bou e'e i sire apang tau Yahudi e'e nangul᷊i si Yesus, “Orasi i'i i kami matitong i Kau i'i tinga-tingari nikasukang u setang! I Abraham sisane seng nate kere'e l᷊ai apang nabi. Arawe I Kau nangul᷊i, ‘Taumata ko tumuhu didato-Ku, sarung ta mate sarang kal᷊iwuenge.’ 53Boko i Abraham sisane seng nate, dang l᷊ai apang manga nabi seng kaul᷊ie nasue nate, inau I Kau i'i ko i sai? Tumaniu I Kau lebe l᷊abo bou iyamang i kami i Abraham!”
54I Yesus nusumimbahi, “Kiko Ia mundea makiadati u watangeng-Ku, adati e'e takoae mangal᷊enge. Ko mangadati si Sia e'e ko I Yamang-Ku ko nituhungang i kumu kere Mawu Ruata ngi kumu, 55sumbal᷊i i kumu wugha ngi Sie. Arawe Ia matitong I Sie. Kiko Ia nangul᷊i Ia wugha ngi Sie, kuteu Ia singkatau taumata ko mal᷊eo, musul᷊ung i kumu. Ia matitong I Sie dang nutumuhu didato-Nge. 56Iyamang i kumu i Abraham kere'e mal᷊uasi kahingang himoneu i sie sarung mutuhung l᷊ou-Ku. I sie seng nakawua dang i sie mal᷊uasi.”
57Bou e'e i sire tau Yahudi nangul᷊i si Yesus, “Umuri-U mborong ta nakarea l᷊imampul᷊o su taunge, dang I Kau seng mbuae nakawua si Abraham?”#8:57: I Kau seng mbuae nakawua si Abraham?: pira mbau wohe horo: Apa i Abraham seng mbuae nakawua si kau?
58I Yesus nusumimbahi, “Mang tingari Ia mangul᷊i si kumu: suhoro i Abraham nipahinding, Ia seng ene.”
59Bou e'e manga tau Yahudi e'e nangemong watu pamal᷊o si Sie, kateho I Yesus nukumbuni ngu watangeng-E, bou e'e nul᷊umal᷊eng nanintang u Wal᷊e ngu Mawu.
Zur Zeit ausgewählt:
YOHANES 8: PLT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
