मत्ती 5
5
येशूये डाँडाङ याछ उपदेश
(लुका ६:२०-२३)
1भर्मीकुङ बाड्को भीड डाङार येशू डाँडाङ नुङा, र होसको ङुवा, र चेलाको र होसको लेठाङ नुङा। 2होटै होसकै होखुरीककी शिक्षा याखी ठाला:
3“लाहाकी आत्माङ गरीब मन्डीचको कुडीक आसीस डुप्चको ले!
हीजैडेनाङ स्वर्गुङ राज्य होखुरीकुङ न हो।
4शोक जाट्चको कुडीक आसीस डुप्चको ले!
हीजैडेनाङ होखुरीकै सान्त्वना डुप्ले।
5नम्र छान्चको कुडीक आसीस डुप्चको ले!
हीजैडेनाङ होखुरीकै पृथ्वीयुङ अधिकार जाट्की डुप्ले।
6कुडीक आसीस डुप्चको ले धार्मिकतौ लागी रन्छीचको र सोन्छको!
हीजैडेनाङ होखुरीक र्हास्ले।
7दया जाट्चको कुडीक आसीस डुप्चको ले!
हीजैडेनाङ होखुरीकै दया डुप्ले।
8शुद्ध मीमन लेचको कुडीक आसीस डुप्चको ले!
हीजैडेनाङ होखुरीकै परमेश्वरकी डाङ्ले।
9मेलमीलाप जाटाक्चको कुडीक आसीस डुप्चको ले!
हीजैडेनाङ होखुरीककी परमेश्वरौ मीजाको डेले।
10धार्मिकतौ लागी डुख भोक्डीचको कुडीक आसीस डुप्चको ले!
हीजैडेनाङ स्वर्गुङ राज्य होखुरीकुङ न हो।
11“नाखुरीक आसीस डुप्चको हो, जब ङाकी विश्वास जाट्च कारनै नाखुरीककी भर्मीकै निन्दा जाट्ले र सटडीले, र झुटो ङाकार नाखुरीकुङ विरुद्धाङ पट्ट खालुङ मासेछ कुराको डेले। 12होडीक बेला नाखुरीक साप्फी मार्हाङ्नी, हीजैडेनाङ स्वर्गाङ नाखुरीकुङ इनाम बाड्को ले। होटजाट्न न खायाकुङ अगमवक्ताकोलाक र होखुरीकै सटडीमन्या।
छा र ज्योटीयो उदाहरण
(मर्कूस ९:५०; लुका १४:३४-३५; ११:३३)
13“नाखुरीक च पृथ्वीयुङ छा हो। टर छओ स्वाद नुङा डेनाङ होसकी फेरी हीये सेस्च खास्की य्होक्ले र? होसे हीयाङ र काम मालक्डीस्ले र होसकी बाहीर लोम्हकाले र भर्मीकुङ मीखुटेइ फेट्ले।
14“नाखुरीक चहीँ संसारुङ ज्योति हो। डाँडाङ खास्च सहर आर्च्युखी माय्होक्ले। 15र भर्मीकै बट्टी ढाकार पाठीये माहुप्ले, टर सामदानाङ डाले होटबाटै इमाङ लेच पट्ट न भर्मीकुङ लागी होचे ट्याङछ याल्हे। 16होटजाट्न न नाखुरीकुङ ज्योति भर्मीकुङ मीहासाङ चम्कडीस्ख्यो, र होखुरीकै नाखुरीकुङ सेछ कामको डाङ्ख्यो, अनी स्वर्गाङ लेच नाखुरीकुङ बोयो महीमा जाट्ख्यो।
व्यवस्था मन्डीच बारेयाङ शिक्षा
(लुका १६:१७)
17“मोशै याछ व्यवस्था र अगमवक्ताकै डेच वचन रद्द जाट्की डेम ङा राछ हो डेम माआर्मीट्नी टर ङा रद्द जाट्की होइन पुरा जाट्की डेम राछ हो। 18हीजैडेनाङ ङा साँच्ची न नाखुरीककी डेले, जबसम्म स्वर्ग र पृथ्वी म्हाटार मानुङ्ले टब सम्म व्यवस्थाङ लेच पट्ट न कुराको पुरा माछान्ठर कुसे कीसीमै र व्यवस्थालकीङ मार्जा-मार्जा कुराको र म्हाटार मानुङ्ले। 19होटबाटै सुये व्यवस्थौ मार्जा डेनाङ मार्जा कुराकी मामन्डीच र मामन्डीकी डेम पाहाक्च भर्मी स्वर्गौ राज्याङ पट्ट डेनाङ मार्जा ठहरीस्ले। टर सुये होसे आज्ञाको मन्डीले र अरुकी र मन्डीकी लैडीले होसे चहीँ स्वर्गौ राज्याङ बाड्को ठहरीस्ले। 20होटबाटै ङा नाखुरीककी डेले, व्यवस्थौ आज्ञाकोलाक धर्मगुरु र फरीसीकै डेनाङ सेम्ह मामन्डीया डेनाङ नाखुरीक स्वर्गौ राज्याङ पर्की माडीन्ल्हे।
मीरीस र हत्या
21“नाखुरीकै सेमने, खायाकुङ भर्मीकोलाक इट डेमन्या, ‘नीये भर्मी मासाट्की, सुये साट्ले होचे दन्ड डुप्ले।’#प्रस्थान २०:१३ 22टर ङा नाखुरीककी डेले, सुर भर्मी अरुखाटा होटन मीरीस ख्योल्हे डेनाङ होचे दन्ड डुप्ले। सुये अरु भर्मीयो अपमान जाट्ले, होचे महासभाङ जवाफ याखी पर्ले। सुये अरु भर्मीकी ‘नाङ मुर्ख’ डेले, होसे नरकौ म्हेयाङ पर्ले।
23“होटबाटै नीये वेदीयाङ भेटी चढडीच बेलाङ अरु भर्मीयो मीमनाङ नुओ विरुद्धाङ हीर ले डेम नीये आर्मीटा डेनाङ, 24नुओ भेटी वेदीयो अगाडी डासार नुङ्ना। अनी पहीला नुङार होसे भर्मीखाटा खाटो र राहार लहो भेटी चढडीयो।
25“नुओ झगडीया खाटा अदालताङ टाखी डेनाङ अगाडी लामाङ न खाट्की क्योटो। नभा च होचे नाङ्की न्यायाधीशौ मीहुटाङ काम याल्हे, र न्यायाधीशै अधिकृतौ मीहुटाङ काम याल्हे, होटै नाङ झ्यालखानाङ पर्ले। 26साँच्ची न, ङा नाखुरीककी डेले, होडीक बेला काट-काट जरीमानौ पैसा चुक्टा माजाट्ठर होटै नाङ ख्योखी माढीन्ले।
व्यभिचारौ बारेयाङ शिक्षा
27“‘नाखुरीकै व्यभिचार जाट्की माछान्ले’#प्रस्थान २०:१४ डेच कुरा च सेमने। 28टर ङा नाखुरीककी डेले, सुयेर कुसे मास्टोकी मासेछ विचारै ङोस्ले, होचे अघीलकीङ न लहो मीमनाङ होसे खाटा व्यभिचार जाट्न भ्याच छान्ले। 29इडीक नुओ डोर मीमीकै नाङ्की पाप जाट्की लैडीले डेनाङ होसकी डोनार लोम्हकौ। नुओ पट्ट न शरीर नरकाङ लोखी डेनाङ च बरु नुओ अङ्गको मध्याङ काट मालेनाङ नाङ्की सेम्ह छान्ले। 30होटजाट्न न इडीक नुओ मीहुटै नाङ्की पाप जाट्की लैडीले डेनाङ होसकी चेयार लोम्हकौ। नुओ पट्ट न शरीर नरकाङ नुङ्की डेनाङ च होसे मीहुट मालेनाङ न नुओ लागी सेम्ह छान्ले।
छोड पत्र बारे शिक्षा
(मत्ती १९:९; मर्कूस १०:११-१२; लुका १६:१८)
31“इट डेमने, ‘सुये लहो मास्टोकी डास्ले, होचे होसकी छोड पत्र रीकार याख्यौ।’#व्यवस्था २४:१ 32टर ङा नाखुरीककी डेले, सुये लहो मास्टोकी व्यभिचारौ दोष बाहेक अरु न कारनै डास्ले, होचे होसकी व्यभिचार जाट्च खास्ले जब होसे मास्टोये फेरी ब्याहा जाट्ले। र सुये डास्च मास्टोखाटा ब्याहा जाट्ले, होचे र व्यभिचार जाट्ले।
शपथ माज्याच बारेयाङ शिक्षा
33“नाखुरीकै सेमने, खायाकुङ भर्मीकोलाक र डेमन्या, ‘नीये झुटो शपथ माज्याकी, टर परमप्रभुओ लागी जाट्च शपथ चहीँ नीये पुरा जाट्की।’#गन्ती ३०:२ 34टर ङा नाखुरीककी डेले, कुसे कुराङ र शपथ माज्याकी। झन् स्वर्गौ म्यार्मीनाङ च शपथ ज्यार माज्याकी, हीजैडेनाङ होसे परमेश्वरौ सिंहासन हो। 35र पृथ्वीयो म्यार्मीनाङ र शपथ माज्याकी, हीजैडेनाङ होसे परमेश्वरौ मीकु बाट्च ठाउँ हो। र यरूशलेमौ म्यार्मीनाङ र शपथ माज्यानी, होसे स्वर्गाङ लेच माहाराजौ सहर हो। 36लहो मीटालु छुवार शपथ माज्यानी, हीजैडेनाङ नीये काट मीछामकी र चीछ वा बोच खास्की माय्होक्ले। 37नाखुरीकै डेच कुरा चहीँ ‘हो’ डेनाङ ‘हो’ ‘होइन’ डेनाङ ‘होइन’ डेनी। इसे डेनाङ ढेरै चहीँ शैतानलकीङ राल्हे।
बदला मालाकी डेच शिक्षा
(लुका ६:२९-३०)
38“नाखुरीकै इट डेच सेमने, ‘मीमीकौ बदला मीमीक, र मीस्याकौ बदला मीस्याक।’#प्रस्थान २१:२४; लेवी २४:२०; व्यवस्था १९:२१ 39टर ङा नाखुरीककी डेले, दुष्ट भर्मीकी विरोध माजाट्नी। इडीक सुये नुओ डोर गालाङ हीर्कडीले, होसकी डेब्र्या गाला र ठोम्ह यान्ही। 40इडीक सुयेर मुद्दा याहार नुओ डौरा आल्खी पाले डेनाङ, होसकी नुओ कोट र योहो। 41र नाङ्की सीपाहीकै#५:४१ सीपाहीकै होसे समयाङ, रोमी सीपाहीको अठबा सरकारी भर्मीकै लहो भारी सुकी बुसाक्की मीमन सेले होसकी बुसाक्न्या। काट कीलोमीटर नुङ्की लैडीले डेनाङ, होसेखाटा नीस कीलोमीटर नुङ्ङ योहो। 42नाङखाटा ङेछकी योहो, र रीन लाकी मीमन जाट्चकी माय्हाले माडेकी।
सट्रुकी र माया जाट्की
(लुका ६:२७-२८,३२-३६)
43“नाखुरीकै इट डेच सेमने, ‘नुओ छीमेकीकी माया जाट्की, अनी नुओ शत्रुकी घृणा जाट्की।’#५:४३ पुरानो कराराङ सट्रुकी घीर्ना जाट्की डेयार आग्या माय्हामने टर होसे समयाङ इसे कुरा चहीँ यहूदी धर्मगुरुकै पाहाक्च शिक्षा मट्टै हो। 44टर ङा नाखुरीककी डेले, लहो शत्रुकोलाक माया जाट्नी, र नाखुरीककी खेडो जाट्चकुङ लागी प्रार्थना जाट्नी। 45इडीक नाखुरीकै याङ्च जाटा डेनाङ नाखुरीक स्वर्गाङ लेच बोयो मीजाको छान्ले। हीजैडेनाङ होसकै दुष्ट र असल नीसकी न नाखानौ खान्छ याल्हे, अनी धर्मी र पापी नीसकी न नामास राहाक्ङ याल्हे। 46इडीक नाखुरीककी माया जाट्चकोलाक मट्टै माया जाटा डेनाङ नाखुरीकै ही इनाम डुप्की य्होक्ले र? ही होट च कर सोट्चकै र होटन माजाट्ले र? 47नाखुरीक लहो भर्मीकोलाक मट्टै स्वागत जाट्ले डेनाङ अरुकै डेनाङ ही बाड्को काम जाट्च छान्ने र? होङ्च च अन्यजातिकै र माजाट्ले र? 48कुटजाट्न नाखुरीकुङ स्वर्गाङ लेच बोइ सिद्ध ले, होटजाट्न न नाखुरीक र पट्ट कुराङ सिद्ध छान्नी।”
Zur Zeit ausgewählt:
मत्ती 5: EMGP
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 (Active), Wycliffe Bible Translators, Inc. All rights reserved.