ᤋᤥᤗᤡᤱᤛᤥᤔᤢ 29
29
ᤕᤠᤁᤢᤒᤧᤴ ᤗᤠᤒᤠᤏᤧᤸᤗᤧ ᤁᤢᤜᤡᤶᤔᤥ ᤁᤧᤳ
1ᤂᤧᤒᤩᤠᤱ ᤕᤠᤁᤢᤒᤧᤴ ᤐᤥᤃᤧᤀᤠᤱ ᤗᤠᤶ ᤌᤠᤛᤡᤱ. ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤈᤣ᤹ᤀᤥ ᤁᤧᤖᤧ॥ 2ᤂᤧᤴ ᤋᤧᤴᤏᤥᤒᤠ ᤐᤩᤠᤱᤛᤡᤀᤥ ᤂᤢᤏᤧ᤹ ᤀᤥᤔᤧᤳᤋᤢᤸᤗᤧ ᤗᤳᤇᤠ ᤘᤒᤠᤰᤌᤡᤰ ᤏᤡᤛᤢ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤒᤣᤛᤠᤱ ᤛᤢᤶᤛᤡ ᤔᤧᤸᤗᤢᤰ ᤗᤢᤵᤜᤠ᤹ ᤔᤧᤕᤧᤒᤧ. ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤀᤠᤶᤓᤠ ᤂᤧᤴ ᤘᤒᤠᤰᤁᤥᤗᤠᤶ ᤔᤧᤸᤗᤢᤰ ᤗᤢᤵᤜᤠ᤹ ᤆᤫᤠ᤺ᤳ ᤔᤧᤎᤢᤱᤄᤢᤛᤡ॥ ᤂᤧᤴ ᤘᤒᤠᤰᤁᤡᤸᤗᤧ ᤁᤢᤶᤒᤪᤠ ᤋᤧᤵᤔᤠ ᤕᤶᤒᤠ ᤗᤢᤱᤎᤡᤰ ᤐᤳᤇᤧ॥ 3ᤁᤧᤖᤧᤰ ᤔᤧᤸᤗᤢᤰ ᤗᤢᤵᤜᤠ᤹ ᤂᤧ᤹ᤕᤥ ᤔᤧᤈᤢᤶ ᤔᤧᤈᤢ᤺ᤳᤋᤠᤱ ᤔᤧᤸᤗᤢᤰ ᤀᤥᤃᤧᤔᤵᤐᤠᤜᤠ᤹ᤖᤧ ᤘᤒᤠᤰᤁᤡᤸᤗᤧ ᤁᤢᤛᤢ᤺ᤵᤔᤠ ᤗᤢᤱᤅᤡᤴ ᤔᤧᤀᤡᤛᤢᤀᤠᤱ ᤔᤧᤸᤗᤢᤰᤜᤠ᤹ ᤆᤫᤠ᤺ᤳ ᤔᤧᤎᤢᤱᤄᤢᤛᤡ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤗᤢᤱᤅᤡᤴ ᤕᤠᤶᤔᤥ ᤘᤒᤠᤰᤁᤡᤸᤗᤧ ᤁᤢᤶᤒᤪᤠᤀᤥ ᤔᤧᤓᤳᤇᤢ॥
4ᤕᤠᤁᤢᤒᤧᤸᤗᤧ ᤂᤧᤴ ᤔᤧᤸᤗᤢᤰ ᤀᤥᤃᤧᤔᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤀᤠᤍᤠᤱᤒᤠᤛᤣ. ᤂᤡᤏᤡ᤹ ᤀᤠᤳᤋᤡ ᤁᤧᤕᤢᤱᤒᤠᤏᤡᤱᤒᤣ᥅”
ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤏᤡᤃᤣ ᤜᤠᤖᤠᤏ ᤁᤧᤕᤢᤱᤒᤠᤛᤡᤃᤧᤖᤥ॥”
5ᤂᤢᤏᤧ᤹ ᤔᤧᤳᤋᤢᤛᤡ. “ᤏᤠᤜᤥᤖᤖᤧ ᤁᤢᤶᤔᤧᤴᤇᤠ᤹ ᤗᤠᤒᤠᤴᤏᤧᤴ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅”
ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤀᤠᤏᤡᤃᤣ ᤂᤧᤴ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ॥”
6ᤕᤠᤁᤢᤒᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤢᤏᤧ᤹ ᤏᤢ᤹ᤍᤠᤀᤠᤱ ᤘᤠ᤹ᤒᤡ᥅”
ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤂᤢᤏᤧ᤹ ᤏᤢ᤹ᤍᤠᤀᤠᤱ ᤘᤠ᤹ᤖᤥ॥ ᤀᤥᤔᤧᤳᤋᤧ᤹. ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠ ᤖᤠᤜᤣᤗᤖᤧ ᤁᤢᤔᤧᤸᤗᤢᤰᤜᤠ᤹ ᤑᤧᤳᤋᤢᤛᤡᤀᤠᤱ ᤑᤧᤸᤗ ᤐᤳ॥”
7ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤥᤔᤧᤳᤋᤧᤶᤔᤧ᤹. ᤏᤠᤶ ᤔᤧᤴᤎᤠᤀᤣ ᤘᤠ᤹॥ ᤔᤧ᤺ᤴᤍᤠ ᤔᤧᤸᤗᤢᤰᤜᤠ᤹ ᤛᤢᤶᤔᤠᤛᤡ ᤕᤧᤶ ᤔᤧᤱᤃᤧᤳᤋᤣ ᤘᤠ᤹॥ ᤔᤧᤸᤗᤢᤰᤜᤠ᤹ ᤆᤫᤠ᤺ᤳ ᤌᤢᤱᤛᤧᤶᤛᤡᤶᤔᤧ᤹ᤀᤠᤱ ᤕᤠᤶᤔᤥ ᤆᤠᤗᤠᤶᤛᤧ ᤋᤣ᤹ᤖᤠᤶᤛᤡᤶᤔᤧ᤹॥”
8ᤂᤧᤱᤜᤠ᤹ᤖᤧ ᤔᤧᤔᤧᤳᤋᤢ. “ᤁᤧᤖᤧᤰ ᤔᤧᤸᤗᤢᤰ ᤗᤢᤵᤜᤠ᤹ ᤔᤧᤴᤈᤢᤶᤔᤣ ᤌᤠᤖᤡᤰ ᤜᤧᤰᤁᤩᤠᤱ ᤘᤒᤠᤰᤁᤡᤸᤗᤧ ᤁᤢᤛᤢ᤺ᤵᤔᤠ ᤗᤢᤱᤅᤡᤴ ᤔᤧᤴᤀᤡᤀᤣᤃ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤢᤰᤋᤢᤶᤒᤧᤴ॥ ᤜᤧᤰᤁᤩᤠᤱᤗᤰ ᤀᤠᤏᤡᤃᤣ ᤔᤧᤸᤗᤢᤰᤜᤠ᤹ ᤆᤫᤠ᤺ᤳ ᤌᤢᤱᤛᤢᤶᤛᤡᤶᤒᤧ॥”
9ᤕᤠᤁᤢᤒᤧᤴ ᤂᤧᤱᤜᤠ᤹ᤏᤢ ᤋᤠ᤹ᤈᤧᤰᤂᤧᤖ ᤕᤧᤒᤧᤸᤗᤧ. ᤖᤠᤜᤣᤸᤗᤧᤴ ᤁᤢᤶᤒᤠᤖᤧ ᤁᤢᤔᤧᤸᤗᤢᤰ ᤗᤢᤵᤜᤠ᤹ ᤋᤠᤖᤢᤛᤡᤀᤠᤱ ᤂᤧ᤹ᤕᤥ ᤁᤧᤖᤧ. ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤜᤠ᤹ ᤂᤢᤏᤧ᤹ᤀᤣ ᤆᤠᤖᤠᤶᤛᤢᤛᤡᤖ ᤘᤕᤧ॥ 10ᤕᤠᤁᤢᤒᤧᤸᤗᤧ ᤀᤠᤒᤠᤅᤣ ᤁᤢᤱᤃᤫᤠᤖᤧ ᤁᤢᤛ᤻ᤛᤠ ᤁᤢᤸᤗᤢᤱᤘᤠᤔᤠ ᤖᤠᤜᤣᤸᤗᤧᤴ ᤏᤢ ᤁᤢᤱᤃᤫᤠᤖᤧ ᤁᤢᤔᤧᤸᤗᤢᤰᤜᤠ᤹ ᤏᤡᤛᤢᤛᤡ. ᤜᤧᤰᤁᤣ᤺ᤸᤗᤧ ᤘᤒᤠᤰᤁᤡᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤘᤒᤠᤰᤁᤡᤸᤗᤧ ᤁᤢᤶᤒᤪᤠᤀᤥᤒᤠ ᤗᤢᤱᤅᤡᤴ ᤂᤢᤏᤧ᤹ ᤀᤠᤒᤠᤅᤣ ᤆᤡᤏᤠᤏᤠᤰ ᤀᤡᤛᤢ. ᤜᤧᤰᤁᤩᤠᤱ ᤁᤢᤱᤃᤫᤠᤖᤧ ᤁᤢᤔᤧᤸᤗᤢᤰᤜᤠ᤹ ᤆᤫᤠ᤺ᤳ ᤌᤢᤱᤄᤢᤛᤡ॥ 11ᤂᤧᤒᤩᤠᤱ ᤕᤠᤁᤢᤒᤧᤸᤗᤧ ᤖᤠᤜᤣᤸᤗᤧᤴ ᤆᤢᤵ ᤔᤧᤳᤋᤢ ᤜᤧᤰᤁᤩᤠᤱ ᤜᤠ᤺ᤵᤔᤠ ᤜᤣ᤺ᤰᤋᤧ॥ 12ᤕᤠᤁᤢᤒᤧᤸᤗᤧ ᤖᤠᤜᤣᤸᤗᤧᤴ “ᤀᤠᤱᤃᤠ᤹ ᤁᤧᤶᤒᤠᤖᤧ ᤁᤢᤃᤠ᤹ᤀᤡ ᤖᤣᤒᤡᤁᤠ᤺ᤸᤗᤧ ᤁᤢᤛ᤻ᤛᤠᤀᤠ” ᤔᤧᤳᤋᤢ॥ ᤂᤧᤒᤩᤠᤱ ᤖᤠᤜᤣᤸᤗᤧᤴ ᤗᤥ᤺ᤰᤋᤧᤖ ᤐᤣᤀᤠᤱ ᤁᤴ ᤐᤠ᤺ᤴᤏᤡᤴ ᤁᤢᤶᤒᤠ ᤆᤧᤰᤋᤢ॥
13ᤁᤢᤸᤗᤠᤶᤛᤠ ᤕᤠᤁᤢᤒᤧᤴ ᤋᤩᤧᤒᤠ ᤀᤡᤱᤄᤱ ᤂᤧᤵᤛᤢᤏᤢᤔᤧ᤺ᤴᤏᤣ ᤗᤠᤒᤠᤏᤧᤴ ᤂᤢᤏᤧ᤹ ᤁᤢᤍᤢᤶᤛᤧ ᤗᤥ᤺ᤰᤋᤧ ᤑᤧᤖᤧᤀᤠᤱ ᤜᤧᤵᤐᤪᤧᤰ ᤜᤧᤵᤋᤢᤖ ᤆᤢᤵ ᤔᤧᤳᤋᤢ. ᤜᤧᤰᤁᤩᤠᤱ ᤂᤧᤴ ᤁᤢᤜᤡᤶᤔᤥ ᤋᤣ᤹ᤖᤢ॥ ᤕᤠᤁᤢᤒᤧᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤠᤒᤠᤏᤧᤴ ᤆᤧᤰᤋᤢ॥ 14ᤜᤧᤰᤁᤩᤠᤱ ᤗᤠᤒᤠᤏᤧᤸᤗᤧ ᤔᤧᤳᤋᤢ. “ᤛᤧᤰᤂᤠ᤺ᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤔᤏᤠᤏᤧᤖᤥ॥” ᤕᤠᤁᤢᤒᤧᤴ ᤗᤠᤎᤡᤰ ᤌᤠᤖᤡᤰ ᤂᤢᤏᤧ᤹ᤏᤢ ᤘᤕᤧ॥
ᤖᤠᤜᤣᤗ ᤏᤢ ᤗᤡᤀᤠᤖᤧ ᤂᤢᤴᤇᤡ᤹ ᤗᤠᤃᤡ ᤕᤠᤁᤢᤒᤖᤧ ᤕᤠ᤺ᤶᤒᤰ ᤆᤥᤃᤢ᤹
15ᤗᤠᤒᤠᤏᤧᤸᤗᤧ ᤕᤠᤁᤢᤒᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤠᤃᤠ᤹ᤀᤡ ᤁᤧᤒᤥ᤺ᤰᤂᤧᤒᤠᤸᤗᤧ ᤜᤏᤧ ᤀᤠᤕᤠ᤺ᤶᤒᤰ ᤁᤧᤈᤥᤃᤢᤒᤠᤒᤡ᥅ ᤏᤠᤶᤕᤠᤰ ᤀᤠᤰᤂᤩᤠᤖᤡᤰ ᤁᤧᤒᤠ᤺ᤳᤋᤢ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹॥”
16ᤀᤠᤸᤗ ᤗᤠᤒᤠᤏᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤏᤧᤳᤇᤡ ᤘᤕᤧᤳᤇᤡ॥ ᤋᤢᤶᤔᤧᤸᤗᤧ ᤁᤢᤔᤡᤱ ᤗᤡᤀᤠ ᤜᤧᤰᤁᤩᤠᤱ ᤑᤥ᤺ᤰᤘᤠᤔᤧᤸᤗᤧ ᤁᤢᤔᤡᤱ ᤖᤠᤜᤣᤗ ᤘᤕᤧ॥ 17ᤗᤡᤀᤠᤖᤧ ᤁᤢᤔᤡᤰᤜᤠ᤹ ᤌ᤺ᤶᤎ᤺ᤶᤒᤠ ᤆᤥᤃᤧ. ᤁᤖ ᤖᤠᤜᤣᤸᤗᤧᤴ ᤏᤠᤖᤠ ᤏᤢ ᤌᤰᤗᤠ ᤗᤡᤱᤃᤧᤴᤏᤥ ᤏᤢᤔᤠ ᤆᤥᤃᤧ॥
18ᤕᤠᤁᤢᤒᤧᤸᤗᤧ ᤖᤠᤜᤣᤸᤗᤧᤴ ᤏᤠᤏᤢ᤹ᤖᤢ ᤜᤧᤰᤁᤣ᤺ᤸᤗᤧ ᤗᤠᤒᤠᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤛ᤻ᤛᤠ ᤑᤥ᤺ᤰᤘᤠᤔᤠ ᤖᤠᤜᤣᤗᤖᤧ ᤗᤠᤃᤡ ᤀᤠᤱᤃᤠ᤹ ᤋᤱᤒᤣ ᤏᤢᤛᤡ ᤌᤠᤖᤡᤰ ᤁᤧᤛᤧᤘᤠᤖᤥᤒᤠ ᤐᤥᤱᤀᤠ॥”
19ᤗᤠᤒᤠᤏᤧᤸᤗᤧ ᤔᤧᤳᤋᤢ. “ᤂᤧᤴ ᤘᤣ᤹ ᤔᤏᤠᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤡᤔᤠᤏᤢ᤺ᤸᤗᤧᤃ ᤂᤧᤏᤧ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤐᤡᤔᤠᤀᤣ ᤏᤢᤒᤠ ᤐᤥᤱ॥ ᤏᤢ᤹. ᤀᤠᤱᤃᤠ᤹ᤏᤢᤀᤣ ᤘᤕᤧ᤹ᤀᤠᤱ ᤕᤠ᤺ᤶᤒᤰ ᤆᤥᤃᤧ᤹॥” 20ᤂᤧᤸᤗᤧᤆᤥᤃᤢᤸᤗᤧ ᤕᤠᤁᤢᤒᤧᤸᤗᤧ ᤖᤠᤜᤣᤗᤖᤧ ᤁᤢᤗᤠᤃᤡ ᤋᤱᤒᤣ ᤏᤢᤛᤡ ᤌᤠᤖᤡᤰ ᤕᤠ᤺ᤶᤒᤰ ᤆᤥᤃᤢ॥ ᤂᤢᤏᤧ᤹ ᤂᤧᤴ ᤛᤠ᤹ᤖᤡᤰ ᤏᤠᤏᤢ᤹ᤖᤢᤒᤠᤸᤗᤧ ᤆᤥᤃᤢᤸᤗᤧ ᤏᤢᤛᤡ ᤋᤱᤒᤣᤴ ᤂᤢᤏᤧ᤹ ᤁᤢᤗᤠᤃᤡ ᤌᤡᤰᤕᤠᤴ ᤏᤡᤕᤠᤴ ᤁᤢᤛᤡᤱᤗᤰ ᤐᤥ᤺ᤰᤂᤧ॥
21ᤂᤧᤒᤩᤠᤱ ᤕᤠᤁᤢᤒᤖᤧ ᤗᤠᤒᤠᤏᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤁᤧᤛᤧᤘᤠᤖᤥᤒᤠ ᤐᤥᤱᤔᤠᤀᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤧᤶᤔᤡᤴ ᤁᤧᤖᤧ॥ ᤀᤠᤸᤗ ᤖᤠᤜᤣᤸᤗᤧᤴ ᤀᤠᤔᤣᤳ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤐᤡᤖᤠᤱᤅᤧ᤹॥ ᤀᤠᤱᤃᤠ᤹ ᤂᤧᤴᤏᤢ ᤀᤡᤶᤔᤠ ᤀᤠᤛᤡᤖᤠ᤹ ᤌᤠᤅᤧᤀᤠᤱ ᤘᤠ᤹॥”
22ᤜᤧᤰᤁᤣ᤺ᤸᤗᤧ ᤗᤠᤒᤠᤏᤖᤧ ᤂᤧᤴ ᤋᤧᤴᤏᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤢᤵᤛᤢᤛᤡᤀᤠᤱ ᤛᤠ ᤏᤢ ᤋ᤺ᤰ ᤌᤥ᤺ᤰᤋᤢᤀᤠᤱ ᤐᤡᤖᤢᤛᤡ॥ 23ᤁᤖ ᤕᤢ᤺ᤴᤇᤡᤰ ᤗᤠᤒᤠᤏᤧᤸᤗᤧ ᤁᤢᤛ᤻ᤛᤠ ᤗᤡᤀᤠᤴ ᤕᤠᤁᤢᤒᤧᤴ ᤜᤢ᤹ᤖᤢ. ᤜᤧᤰᤁᤩᤠᤱ ᤕᤠᤁᤢᤒᤧᤴ ᤂᤧᤴᤏᤢ ᤀᤡᤵᤛᤧ॥ 24ᤗᤠᤒᤠᤏᤧᤸᤗᤧ ᤁᤢᤛᤧᤘᤠᤖᤥᤔᤠ ᤈᤡᤸᤐᤠᤴ ᤁᤢᤛ᤻ᤛᤠ ᤗᤡᤀᤠᤖᤧ ᤁᤢᤛᤧᤘᤠᤖᤥᤔᤠ ᤐᤥᤱᤛᤧ ᤐᤡᤖᤢ॥
25ᤕᤠᤁᤢᤒᤖᤧ ᤂᤠᤀᤥ᤺ᤳᤋᤧᤀᤠᤱ ᤋᤠᤏᤠᤶ ᤀᤥᤔᤧᤳᤋᤢᤸᤗᤧᤃ ᤗᤡᤀᤠ᤺ᤴᤏᤡᤖᤇ᥄ ᤂᤧᤒᤩᤠᤱ ᤗᤠᤒᤠᤏᤧᤴ ᤔᤧᤳᤋᤢ. “ᤂᤧᤏᤧ᤹ ᤌᤣᤀᤠᤱ ᤀᤠᤱᤃᤠ᤹ᤏᤢ ᤀᤰᤂᤣ ᤁᤧᤈᤥᤃᤢᤒᤠ᥅ ᤀᤠᤱᤃᤠ᤹ᤃ ᤖᤠᤜᤣᤗᤖᤧ ᤗᤠᤃᤡᤏᤧ ᤕᤠ᤺ᤶᤒᤰ ᤆᤥᤃᤢᤱᤒᤠ ᤔᤣ᤺ᤶᤒᤡ᥅ ᤌᤣᤀᤠᤱ ᤂᤧᤏᤧ᤹ ᤀᤠᤱᤃᤠ᤹ᤏᤢ ᤀᤰᤋᤱᤒᤠ ᤀᤡᤱᤗᤧᤰ ᤁᤧᤈᤥᤃᤢᤒᤠ᥅”
26ᤗᤠᤒᤠᤏᤧᤸᤗᤧ ᤔᤧᤳᤋᤢ. “ᤀᤠᤏᤡᤃᤣ ᤗᤠᤈᤣ᤹ᤀᤥ ᤋᤢᤶᤔᤧᤸᤗᤧ ᤁᤢᤔᤣ᤺ᤰᤂᤡᤶ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤑᤥ᤹ᤔᤧᤸᤗᤧ ᤁᤢᤔᤣ᤺ᤰᤂᤡᤶ ᤆᤥ᤺ᤰᤔᤠ ᤌᤡᤶ ᤜᤥᤵ॥ 27ᤔᤣ᤺ᤰᤂᤡᤶᤗᤧ ᤛᤛᤠᤱᤛᤪᤥᤳ ᤆᤥ᤺ᤰᤔᤠᤖᤧ ᤗᤠᤃᤡ ᤏᤢᤛᤡ ᤕᤧᤴ ᤌᤠᤖᤡᤰ ᤗᤡᤀᤠ᤺ᤴᤏᤢ ᤘᤕᤧ᤹. ᤜᤧᤰᤁᤩᤠᤱ ᤘᤣ᤹ ᤋᤱᤒᤣ ᤏᤢᤛᤡ ᤀᤠᤛᤧᤘᤠᤖᤥᤒᤠ ᤐᤥ᤺ᤰᤂᤧ᤹. ᤂᤧᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤀᤠᤛ᤻ᤛᤠ ᤑᤥ᤹ᤔᤧᤴᤏᤠᤱ ᤂᤧᤏᤧ᤹ ᤐᤡᤏᤧᤍᤣᤏᤧ॥”
28ᤜᤧᤰᤁᤩᤠᤱ ᤕᤠᤁᤢᤒᤧᤸᤗᤧ ᤜᤧᤰᤁᤣᤀᤣ ᤆᤥᤃᤢ. ᤂᤢᤏᤧ᤹ ᤗᤡᤀᤠ᤺ᤴᤏᤢ ᤘᤠ᤹ᤔᤠ ᤏᤢᤛᤡ ᤕᤧᤴ ᤁᤧᤳᤋᤢ॥ ᤜᤧᤰᤁᤩᤠᤱ ᤗᤠᤒᤠᤏᤧᤸᤗᤧ ᤁᤢᤛ᤻ᤛᤠ ᤖᤠᤜᤧᤸᤗᤧᤴᤏᤠᤱ ᤁᤢᤔᤣᤳ ᤐᤥᤱᤛᤧ ᤐᤡᤖᤢ॥ 29ᤗᤠᤒᤠᤏᤧᤸᤗᤧ ᤀᤠᤒᤠᤅᤣ ᤁᤢᤛᤧᤘᤠᤖᤥᤔᤠ ᤒᤡᤸᤜᤠᤴ ᤁᤢᤛ᤻ᤛᤠ ᤖᤠᤜᤣᤗᤖᤧ ᤁᤢᤛᤧᤘᤠᤖᤥᤔᤠ ᤐᤥᤱᤛᤧ ᤐᤡᤖᤢ॥ 30ᤕᤠᤁᤢᤒᤧᤴ ᤖᤠᤜᤣᤗᤧᤴᤏᤢᤀᤠᤱ ᤀᤡᤵᤛᤧ. ᤂᤢᤏᤧ᤹ ᤗᤡᤀᤠ᤺ᤴᤏᤢ᤺ᤸᤗᤧ ᤂᤧᤴ ᤆᤠ᤹ᤖᤡᤰ ᤏᤠᤏᤢ᤹ᤖᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤘᤣ᤹ ᤏᤢᤛᤡ ᤋᤱᤒᤣ ᤌᤠᤖᤡᤰ ᤕᤠᤁᤢᤒᤖᤧ ᤗᤠᤒᤠᤏᤧᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤢ ᤐᤡᤖᤢ॥
ᤕᤠᤁᤢᤒᤧᤸᤗᤧ ᤁᤢᤛ᤻ᤛᤠ ᤁᤢᤀᤣᤜᤠ᤹
31ᤗᤡᤀᤠ᤺ᤴ ᤁᤢᤕᤧᤶᤒᤠ᤺ᤸᤗᤧ ᤏᤠᤔᤧᤏᤢ᤹ᤖᤢᤶᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤏᤡᤛᤢᤀᤠᤱ ᤂᤢᤏᤧ᤹ ᤂᤧᤴ ᤛᤠᤃᤧᤃᤵᤔᤠ ᤆᤥᤃᤢ॥ ᤁᤖ ᤖᤠᤜᤣᤸᤗᤧᤱᤃ ᤛᤠᤔᤧᤱᤃᤵᤔᤏᤠᤔᤠ ᤐᤥ᤺ᤰᤂᤧᤀᤠᤱ ᤘᤕᤧ॥ 32ᤗᤡᤀᤠ᤺ᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤂᤧᤴ ᤀᤅᤧ᤺ᤰᤘᤠ᤺ᤸᤗᤧ ᤁᤢᤔᤡᤱ ᤖᤢᤒᤣᤏ#᥈᥏:᥉᥈ ᤖᤢᤒᤣᤏ—ᤁᤴ ᤔᤡᤱᤅᤧᤴ ᤜᤡᤒᤪᤢᤀᤥ “ᤕᤧᤶᤒᤡᤳᤇᤠ. ᤛᤠᤴ ᤀᤥᤔᤧᤳᤋᤧ᤹” ᤏᤢ “ᤂᤢᤏᤧ᤹ ᤀᤠᤍᤢᤰᤂᤣᤴ ᤏᤡᤛᤢᤀᤠᤱ ᤘᤠ᤹” ᤐᤥᤱ᤹॥ ᤘᤠ᤺ᤳᤋᤢ. “ᤛᤧᤰᤂᤠᤛᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤀᤠᤍᤢᤰᤂᤣᤴ ᤏᤡᤛᤢᤀᤠᤱ ᤘᤠ᤹ ᤌᤣᤀᤠᤱᤓᤧᤸᤗᤧ ᤀᤠᤸᤗᤃ ᤀᤠᤕᤧᤶᤒᤠ᤺ᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠᤖᤥ॥”
33ᤂᤧᤴ ᤕᤠᤶᤔᤥᤀᤠᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤘᤣ᤹ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢ. ᤂᤧᤸᤗᤧ ᤐᤠ᤺ᤳᤋᤢ. “ᤀᤠᤱᤃᤠ᤹ ᤀᤠᤕᤧᤶᤒᤠ᤺ᤸᤗᤧ ᤏᤠᤔᤧᤏᤢ᤹ᤖᤠᤱᤅᤡᤴᤒᤠᤴ ᤕᤜᤘᤣ ᤍᤠᤱᤒᤠᤸᤗᤧ ᤏᤡᤛᤢᤒᤠᤸᤗᤧ ᤂᤢᤏᤧ᤹ ᤁᤴ ᤀᤅᤧ᤺ᤰᤘᤠ᤺ᤴᤏᤠᤱ ᤐᤡᤖᤠᤱᤗᤥ॥” ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤛᤡᤔᤡᤕᤥᤏ#᥈᥏:᥉᥉ ᤛᤡᤔᤡᤕᤥᤏ ᤁᤴ ᤔᤡᤱᤅᤧᤴ ᤜᤡᤒᤪᤢᤀᤥ “ᤂᤧᤶᤔᤠ” ᤜᤧᤰᤋᤱᤒᤠ ᤂᤧᤶᤍᤧᤳ॥ ᤔᤡᤱ ᤘᤠ᤺ᤳᤋᤢ॥ 34ᤕᤠᤶᤔᤥᤀᤠᤱ ᤂᤧᤴ ᤔᤧᤴᤇᤢᤰᤔᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤗᤳᤇᤠ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤀᤠᤱ ᤐᤠ᤺ᤳᤋᤢ. “ᤁᤴᤇᤢᤶᤔᤥᤃ ᤀᤠᤕᤧᤶᤒᤠᤴ ᤀᤠᤱᤃᤠ᤹ᤏᤢ ᤂᤧ᤺ᤶᤛᤡᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤢᤏᤧ᤹ ᤁᤢᤗᤠᤃᤡ ᤛᤢᤶᤛᤡ ᤕᤧᤶᤒᤡᤳᤇᤠᤛᤠᤜᤠ᤹ ᤁᤳᤋᤢᤱ ᤐᤡᤖᤢᤱᤅᤠᤱ ᤘᤠ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤗᤧᤒᤡ ᤔᤡᤱ ᤔᤧᤘᤠ᤺ᤳᤋᤢ॥
35ᤂᤧᤒᤩᤠᤱ ᤂᤧᤴ ᤕᤠᤶᤔᤥᤀᤠᤱ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤕᤧᤶᤒᤡᤇᤠᤛᤠ ᤁᤳᤋᤢ ᤜᤧᤰᤁᤩᤠᤱ ᤐᤠ᤺ᤳᤋᤢ. “ᤁᤴᤇᤢᤶᤔᤥᤃ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤔᤡᤔᤡᤍᤡᤱ ᤐᤡᤖᤢᤱᤗᤥ॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤀᤅᤧ᤺ᤰᤘᤠᤴ ᤕᤜᤢᤍᤠ#᥈᥏:᥉᥋ ᤕᤜᤢᤍᤠ—ᤁᤴ ᤔᤡᤱᤅᤧᤴ ᤜᤡᤒᤪᤢᤀᤥ “ᤁᤢᤏᤠᤖᤠ ᤑᤥᤔᤠ” ᤜᤧᤰᤁᤣ ᤂᤧᤶᤍᤧᤳ॥ ᤔᤡᤱ ᤘᤠ᤺ᤳᤋᤢ॥ ᤂᤧᤒᤩᤠᤱ ᤂᤧᤴ ᤛᤠᤃᤵᤔᤠ ᤏᤠ᤹ᤖᤧ॥
Zur Zeit ausgewählt:
ᤋᤥᤗᤡᤱᤛᤥᤔᤢ 29: LIFOTNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2009, 2023, Wycliffe Bible Translators, Inc. All rights reserved.