ཡུ་ཧན་ན། 1
1
ཁིརིས་ཤོ་ མ་འགྱུར་བརྟན་པ་ག་ གསུང་གི༌ལ།
1གོ་དང་པ་རང་ གསུང་ཆོ༌ཝ། ཉི་གསུང་ཤོ་ དཀོན་མཆོག་ཀབ་ཉི་ བཞུགས་པ་ཆོ༌ཝ། ཉི་ཨོ་ཉ་གསུང་ཤོ་ དཀོན་མཆོག་གི་ཝ་ཆོ༌ཝ། 2ཉི་རོག་ཤོ་ གོ་ཙུག་པེ་གང་ཀེ་རང་ དཀོན་མཆོག་ཀབ་ཉི་ བཞུགས་པ་ཆོ༌ཝ།
3ཉི་ཐམས་ཅན་རང་ རོ་ཀ་ཐུང་ཀེ་ཨ་ཉི་ བཀོད་པ་གི༌ལ། ཉི་བཀོད་ཁཱན་བ་ཀ་པོང་ཀེ་ ཐུར་བུ་ རོ་ཀི་མ་བཀོད་ཁཱན་མཱན༌ཅ། 4ཉི་རོ་ཀ་ནང་ཀ་ཚེ་ཆོ༌ཝ། ཉི་ཨོ་ཉ་ཚེ་ཤོ་ སོ་ངོ་བ་ཀ་དེན་གེ་ འོད་ཟེར་གི་ཝ་ཆོ༌ཝ། 5ཨོ་ཉ་འོད་ཟེར་ མེར་བུ་ནང་ཀ་ཆར༌ཅ། དག་པ་ཀབ་ཉི་ མེར་བུ་གི་ འོད་ཟེར་ཧ་གོ་ལེ་མར་ཤི། 6དཀོན་མཆོག་གི་ ཡུ་ཧན་ན་དག་ཁཱན་ སོ་ངོ་ཐུར་ ཀུན་ཏི་ཝ་ཆོ༌ཝ། 7རོ་ཀ་གསུང་ཉཱན་ཁཱན་ སོ་ངོ་ཐམས་ཅན་གི་ དད་པ་ཨན་ཆེན་དག་པ་གི་ ཡུ་ཧན་ན་ཤོ་ འོད་ཟེར་ག་ཀོར་གེ་ འཛོམས་དཔང་ ཨ་ལེ་དེན་གེ་ བྱོན་མ་ཆོ༌ཝ། 8ཡུ་ཧན་ན་ རོག་ཏེན་ཤོ་ འོད་ཟེར་མང་གི་ཝ་ཆོ༌ཝ། དག་པ་ཀབ་ཉི་ འོད་ཟེར་ག་ཀོར་གེ་ འཛོམས་དཔང་ ཨ་ལེ་དེན་གེ་ རོག་བྱོན་མ་ཆོ་ཝ༌ལ། 9སོ་ངོ་ཐམས་ཅན་ག་ འོད་ཟེར་གནང་ཁཱན་ འོད་ཟེར་ངོ་མ་ཁེ་པ་ འཛམ་གླིང་ནང་ཀ་ བྱོན་ཅ་གི་ཝ༌ལ། 10གསུང་འཛམ་གླིང་ནང་ཀ་ བཞུགས་པ་ཆོ༌ཝ། དག་པ་ཀབ་ཉི་ འཛམ་གླིང་ཁེ་པ་ རོ་ཀ་ཐུང་ཀེ་ཨ་ཉི་ བཀོད་ཐཱན་རང་གི་ནེ་བུ་ འཛམ་གླིང་གི་ རོག་གུམ་ཡེ་ལེ་མར་ཤི། 11རོག་ཤོ་ རོག་ཏེན་ག་བཱརང་ཀ་ བྱོན་མ་ཆོ༌ཝ། དག་པ་ཀབ་ཉི་ རོ་ཀ་སོ་ངོ་བ་ཀི་ རོག་མ་ཞུན་ཤི། 12དག་པ་ཀབ་ཉི་ རོག་ཞུ་ཉི་ རོ་ཀ་མཚན་ག་ དད་པ་ཨ་ཁཱན་ སོ་ངོ་ཐམས་ཅན་ག་ དཀོན་མཆོག་ག་ སྲས་སྲས་མོ་རི་ལེ་ག་དབང་ཚད་ རོ་ཀི་ རོག་ཏེ་བ་ཀ་གནང་མ༌ཅ། 13ཉི་རོག་ཏེ་བ་ རང་བཞིན་གེ་ཨ་ཉི་ དཀོན་མཆོག་ག་ སྲས་སྲས་མོ་རིན་ཅ་མང་གི། ཉི་སོ་ངོ་གི་ ཐག་གཅཱད་ཉི་ རིན་ཅ་བུ་མང་གི། ཡང་ན་ལ་ ཕེ་ཝག་ཙ་ག་ སེམས་དང་ཏུ་ཉི་ རིན་ཅ་བུ་མང་གི། དག་པ་ཀབ་ཉི་ དཀོན་མཆོག་ རོག་ཏེན་གི་ རོག་ཏེ་བ་ རོ་ཀ་སྲས་སྲས་མོ་ ཅོད་ཉི་གནང་མ་གི༌ལ། 14གསུང་སོ་ངོ་རི་ཉི་ འཛམ་གླིང་ནང་ཀ་བྱོན་ཐཱན་ ཨ་ཧ་བ་ཀབ་ཉི་ བཞུགས་པ་ཆོ༌ཝ། ཉི་རོག་ཤོ་ དེན་པ་དང་ ཐུགས་རྗེ་གི་ཕུང་མ་ཆོ༌ཝ། རོ་ཀ་གཟི་བརྗིད་ཁེ་པ་ ཨ་ཤི་མཇལ༌བ། ཉི་ཨོ་ཉ་གཟི་བརྗིད་ཁེ་པ་ རོག་ཐུར་ཤ་ཡབ་ག་ སྲས་གི་ཝ་ཨ་དེན་གེ་ ཡབ་གི་ རོ་ཀ་གནང་ཁཱན་ གཟི་བརྗིད་གི༌ལ། 15ཡུ་ཧན་ན་གི་ རོ་ཀ་ཀོར་གེ་ འཛོམས་དཔང་ཨ་ཉི་ གསུང་སྐད་ཤུག་ཨ་ཉི་ གསུངས་མ་ལ་ ཇང་གེ་ཚིང་ཚིང་བྱོན་ཁཱན་ཁེ་པ་ ཇང་གེ་ཆི་ལུ་གི༌ལ། ཧང་ཡ་དག་ནེ་ལ་ རོག་ཤོ་ ཇང་གེ་གོ་མ་གེ་རང་ བཞུགས་པ་ཆོ་ཝ་དག་ཉི་ ཇི་གི་ཡེག་ཁཱན་ཁེ་པ་ རོག་གི་ལ་དག༌ཉི། 16ཉི་རོ་ཀ་ཐུགས་རྗེ་ གནམ་མེད་ས་མེད་ ཆི་ལུ་ཆོ་ཝ་ཨ་དེན་གེ་ རོ་ཀི་ ཨའི་ཐམས་ཅན་ག་བྱིན་རླབས་ ཐུར་ག་ཐུང་ཀ་ ཐུར་པོན་ཉི་གནང་མ༌ཅ། 17དཀོན་མཆོག་གི་ མོ་ས་ག་ཐུང་ཀེ་ཨ་ཉི་ བཀའ་ཁྲིམས་གནང་མ༌ལ། དག་པ་ཀབ་ཉི་ ཐུགས་རྗེ་དང་ དེན་པ་ཁེ་པ་ ཡི་ཤུ་ཁིརིས་ག་ཐུང་ཀེ་ཨ་ཉི་ གནང་མ༌ཅ། 18ཨི་བི་གི་རང་ དཀོན་མཆོག་མཇལ་བ་མཱན༌ཅ། དག་པ་ཀབ་ཉི་ རོག་ཏེན་བུ་ དཀོན་མཆོག་དངོས་སུ་གི་ཁཱན་ རོ་ཀ་སྲས་ཐུར་ཤ་ ཡབ་ག་ ར་ག་བཞུགས་པ༌ཅ། ཉི་རོ་ཀི་ཨ་ཉི་ དཀོན་མཆོག་གུམ་ཡེ་ལེ་རེ་བ་ ཅོད་ཉི་གནང་མ་ཅ། ཨི་བི་གི་རང་ དཀོན་མཆོག་མཇལ་བ་མཱན༌ཅ། དག་པ་ཀབ་ཉི་ རོག་ཏེན་བུ་ དཀོན་མཆོག་དངོས་སུ་གི་ཁཱན་ རོ་ཀ་སྲས་ཐུར་ཤ་ ཡབ་ག་ར་ག་བཞུགས་པ༌ཅ། ཉི་རོ་ཀི་ཨ་ཉི་ དཀོན་མཆོག་གུམ་ཡེ་ལེ་རེ་བ་ ཅོད་ཉི་གནང་མ༌ཅ༎
ཁྲུས་གསོར་པ་ཡུ་ཧན་ན་གི་ ཡི་ཤུ་ག་ཀོར་གེ་གསུངས་མ༌ལ།
19ཡུ་ཧན་ན་ག་ ནཱན་ཨི་བི་གི་ལ་ཡ་དག་ཉི་ ཇི་མེ་དེན་གེ་ ཡ་རུ་ཤ་ལེམ་ག་ ཡ་ཧུ་དི་པ་ འགོ་དཔོན་བ་ཀི་ བླ་མ་བ་དང་ མི་རིགས་ལེ་ཝི་ག་སོ་ངོ་བ་ ཀུན་ཏི་ཝ༌ལ། 20རོ་ཀི་ རོག་ཏེ་བ་ཀི་ཞུ་ཁཱན་ག་ སྙན་མ་གསེང་པ་ མ་ཨ་ལཱན་ གསུངས་མ་ལ་ ཇང་ཤོ་ ཁིརིས་མང་གི་དག༌ཉི།
21ཉི་ལ་ ནཱན་ཤོ་ ཨི་བི་གི་ལ་ཡ། ཧང་ ནཱན་ཨེ་ལི་ཡ་གི་ལ་སྨོ་དག་ཉི་ རོག་ཏེ་བ་ཀི་ ཞུ་ལ་ཀབ་ཉི་ ཇང་ཨེ་ལི་ཡ་མང་གི་དག་ཉི་ གསུངས་མ༌ལ།
ཉི་ལ་ ནཱན་ལུང་བསྟན་པ་གི་ལ་སྨོ་དག་ཉི་ རོག་ཏེ་བ་ཀི་ ཞུ་ལ་ཀབ་ཉི་ ལུང་བསྟན་པ་བུ་མང་གི་དག་ཉི་ གསུངས་མ༌ལ།
22ཇུ་ཀ་དག་པ་ཀབ་ཉི་ རོག་ཏེ་བ་ཀི་ཞུ་ཝ་ལ་ ཉི་ལ་ ནཱན་གི་ལུ་ཤོ་ ཨི་བི་གི་ལ་སྨོ་ ཨ་ཧ་ཏཱན་གསུངས་གནང༌ཤོ། ཧང་ཡ་དག་ནེ་ལ་ ཨ་ཤི་ ཨའི་ཀུན་ཏི་ཁཱན་བ་ཀ་ཏཱན་ ལན་མཇལ་བེ་ཁེ༌ལེ། ཨོ་ཉི་ཨ་དེན་གེ་ ནཱན་ཏེན་ག་ཀོར་གེ་ ཧང་གསུངས་མེ་ཅ་ཡ་དག༌ཉི།
23ལུང་བསྟན་པ་ ཡ་ཤའི་ཡ་ག་གསུང་གེ་ ཡུ་ཧན་ན་གི་ལན་གནང་ཉི་ ས་ཏོང་པ་ནང་ཀ་ ཤ་དར་ཕི་ཉི་ གཙོ་བོ་ག་དེན་གེ་ ལམ་ཐྲང་པུ་ཅོད་ཅོ་དག་ཁཱན་ཤོ་ ཇང་གི་ལ་དག་ཉི་ གསུངས་མ༌ལ།
24ཕ་རི་སི་པ་བ་ཀི་ ཀུན་ཏི་ཁཱན་བ་ཀི་ 25ཡུ་ཧན་ན་ག་ཞུ་ཝ་ལ་ ནཱན་ཁིརིས་ལ་མང་གི་ཝ་ལ་ ཨེ་ལི་ཡ་ལ་མང་གི་ཝ་ལ་ ཉི་ལུང་བསྟན་པ་བུ་མང་གི་ཝ༌ལ། ཉི་ལ་ ནཱན་གི་ ཧང་ཨ་ཉི་ སོ་ངོ་བ་ཀ་ ཁྲུས་གསོར་གནང་ཅ་ཡ་དག༌ཉི།
26ཡུ་ཧན་ན་གི་གསུངས་མ་ལ་ ཇི་གི་ ན་ཧ་བ་རི་གི་ཨ་ཉི་ ཁྲུས་གསོར་ཕིན༌ཅ། དག་པ་ཀབ་ཉི་ ཨོ་ཐ་སོ་ངོ་བ་ཀ་པོང་ཀ་ ན་ཤི་གུམ་མ་ཡེ་ཁཱན་ ཐུར་བཞུགས་པ༌ཅ། 27ཉི་ཇང་གེ་ཚིང་ཚིང་བྱོན་ཁཱན་ཤོ་ རོག་གི༌ལ། ཉི་ཇང་ཏ་ རོ་ཀ་ཞབས་ལྷམ་ཐུར་བུ་ ཕེག་པེ་མ་རུང་ཁཱན་ སོ་ངོ་གི་ལ་དག༌ཉི།
28ཉི་ཨོ་ཐ་བ་ ཐམས་ཅན་རང་ ཡུ་ཧན་ན་གི་ ཁྲུས་གསོར་གནང་ཁཱན་ ཡར་དཱན་རི་དྲང་ག་ ཤར་ཕྱོགས་ལོ་ཀ་ཆོ་ཁཱན་ བེ་ཐ་ནི་ཡ་དག་ས་ག་ ཇུང་མ༌ལ༎
དཀོན་མཆོག་ག་ཤི་ཤ་ཀ་ཏོང་།
29ནམ་ནིང་ད་བུ་ ཡུ་ཧན་ན་གི་ ཡི་ཤུ་ རོག་བཞུགས་ས་ག་ཏཱན་ བྱོན་མ་གཟིགས་ཉི་ གསུངས་མ་ལ་ གོད་ཅོ་ རོག་ཤོ་ འཛམ་གླིང་ག་ སྡིག་པ་བང་ཉི་བསྣམས་ཁཱན་ དཀོན་མཆོག་ག་ ཤི་ཤ་ཀ་ཏོང་གི་ལ་ཨ༌ཉི། 30རོག་ཤོ་ ཇང་གེ་ཚིང་ཚིང་བྱོན་ཁཱན་ཁེ་པ་ ཇང་གེ་ཆི་ལུ་གི༌ལ། ཧང་ཡ་དག་ནེ་ལ་ རོག་ཤོ་ ཇང་གེ་གོ་མ་གེ་རང་ བཞུགས་པ་ཆོ་ཝ་དག་ཉི་ ཇི་གི་ ན་ཧ་ཏཱན་ཡེག་ཁཱན་ཁེ་པ་གི༌ལ། 31ཇི་གི་རོག་ཤོ་ རོག་གི་ལ་ཨ་ཉི་ གུམ་མ་ཡེ་ཝ་ཆོ༌ཝ། ཨོ་ཉེ་རང་གི་ནེ་བུ་ ཨིས་རེལ་ག་སོ་ངོ་བ་ཀི་ རོག་གུམ་ཡེན་ཆེན་དག་པ་གི་ ཇི་གི་ ན་ཧ་བ་རི་གི་ཨ་ཉི་ ཁྲུས་གསོར་ཕིན་ཅ་གི་ལ་དག༌ཉི།
32ཉི་ཡུ་ཧན་ན་གི་ འཛོམས་དཔང་ཨ་ཉི་ གསུངས་མ་ལ་ ཇི་གི་དམ་པའི་ཐུགས་ཉིད་ ཞིང་ཁམས་གེ་དོང་བྱོན་ཐཱན་ ཏི་ཏ་ར་པུརུས་ཀིན་ཨ་ཉི་ རོ་ཀ་ཐུང་ཀ་ཆག་པ་ག་ མཇལ༌བ། 33རོག་ཨི་བི་གི་ལ་སྨོ་ གུམ་མ་ཡེ་ཝ་ཆོ༌ཝ། དག་པ་ཀབ་ཉི་ དཀོན་མཆོག་གི་ ཇ་ག་གསུངས་མ་ཆོ་ཝ་ ནཱན་གི་ ཁྲུས་གསོར་ཕི་ལ་ཀབ་ཉི་ ཨི་བི་ག་ཐུང་ཀ་ དམ་པའི་ཐུགས་ཉིད་ ཆག་ཅ་གི་ལ་སྨོ་ ཨོ་ཉ་སོ་ངོ་གི་ཤོ་ དམ་པའི་ཐུགས་ཉིད་གི་ཨ་ཉི་ ཁྲུས་གསོར་གནང་མེ་ན་དག༌ཉི། 34ཇི་གི་ ཨུ་ཐུ་ཇུང་མ་ག་མཇལ༌བ། ཨོ་ཉི་ཨ་དེན་གེ་ རོག་ཤོ་ དཀོན་མཆོག་ག་ སྲས་གི་ལ་དག་ཉི་ ཇི་གི་ན་ཧ་ཡེག༌ཅ༎
ཡི་ཤུ་གི་ གོ་དང་པ་སི་ཁཱན་སློ་མ༌བ།
35ཉི་ནམ་ནིང་དག་པ་ཀབ་ཉི་ ཨོམ་ཆང་རང་ ཡུ་ཧན་ན་ རོ་ཀ་སློ་མ་ཉིག་ཙིང་ཀབ་ཉི་ ཉ་ག་ཅ་གི་ཝ༌ལ། 36ཉི་ཡི་ཤུ་ ཨོ་ཉ་གེ་ཨ་ཉི་ བྱོན་མ་ཀབ་ཉི་ ཡུ་ཧན་ན་གི་ རོ་ཀ་སློ་མ་ཉིག་ཙིང་ག་ གསུངས་མ་ལ་ གོད་ཅོ་ལེ་ རོག་ཤོ་ དཀོན་མཆོག་ག་ ཤི་ཤ་ཀ་ཏོང་གི་ལ་ན་དག༌ཉི།
37ཉི་ཡུ་ཧན་ན་ག་ སློ་མ་ཉིག་ཙིང་གི་ ན་ཐ་ཉི་ ཡི་ཤུ་ག་ཕྱག་ཞུ་ཉི་ དིན་ཅ་ཨ་ཉི་ 38ཡི་ཤུ་གི་ གིར་ཉི་གཟིགས་པ་ཀབ་ཉི་ རོག་ཉིག་ཙིང་གི་ རོ་ཀ་ཚིང་ཁོན་མ་ཐོང་ཉི་ གསུངས་མ་ལ་ ན་ཆིང་ཧང་ཚཱས་པེ་ཡ་དག༌ཉི།
ཉི་རོག་ཉིག་ཙིང་གི་ ཞུ་ཝ་ལ་ རབ་བི་ ནཱན་ཨོ་ག་བཞུགས་ཅ་ཡ་དག༌ཉི། རབ་བི་ག་དེན་ཐ་ཤོ་ སློབ་དཔོན་དག་པ་ག་ རྩིས་གི་ཝ༌ལ། 39ཡི་ཤུ་གི་ལན་གནང་ཉི་ གསུངས་མ་ལ་ ཨུན་ཐཱན་གོད་ཅོ་དག༌ཉི། ཉི་རོག་ཉིག་ཙིང་དིན་ཐཱན་ ཡི་ཤུ་ ཨོ་ག་བཞུགས་ཅ་གི་ལ་སྨོ་ གོད་ཐཱན་ ཨོ་ཉ་ནོང་ཀ་ རོག་ཉིག་ཙིང་ རོག་ཀབ་ཉི་ ཉ་ག་རང་ཆོ་ཝ༌ལ། ཉི་ངེ་རི་ག་ཆུ་ཚོད་ ཕིཤི་དི་ཝ་ཆོ་ཝ༌ལ།
40ཡུ་ཧན་ན་ག་གསུང་ཁེ་པ་ ན་ཐ་ཁཱན་ རོག་ཉིག་ཙིང་གེ་ ཐུར་ཤོ་ སི་མོན་པ་ཏྲུས་ག་བོ་ཉིང་ ཨན་དྲི་ཡཱས་གི་ཝ་ཆོ༌ཝ། ཉི་གེ་ རོ་ཀི་ ཡི་ཤུ་ག་ཕྱག་ཞུ་ཝ༌ལ། 41ཨན་དྲི་ཡཱས་གི་ གོ་རང་ རོ་ཀ་ཨ་ཏ་སི་མོན་ལམ་ཐཱན་ ཡེག་པ་ལ་ ཨ་ཤི་མོ་ཤི་མཇལ་བ་དག་ཉི་ (མོ་ཤི་ག་དེན་ཐ་ཤོ་ ཁིརིས་གི་ཝ༌ལ།) 42ཉི་ཨན་དྲི་ཡཱས་གི་ སི་མོན་ ཡི་ཤུ་ག་སྐུན་མདུན་ག་ ཕ་ཝ༌ལ།
ཡི་ཤུ་གི་ སི་མོན་ག་ལེག་པ་རང་ གཟིགས་ཐཱན་གསུངས་མ་ལ་ ནཱན་ཤོ་ ཡུ་ཧན་ན་ག་ ཟ་སི་མོན་གི༌ལ། དག་པ་ཀབ་ཉི་ ཐི་ནོང་གེ་ག་ཏཱན་ ཀེ་ཕཱས་དག་ཉི་ར་ལེ་ (ཀེ་ཕཱས་ཁེ་པ་ གིརིག་ག་ཏཱན་བསྒྱུར་བཅོས་ ཕི་ལ་ཀབ་ཉི་ པ་ཏྲུས་དག་པེ་གི་ཝ༌ལ༎)#1:42 ཧི་བུརུ་ག་ལོ་གེ་ ཀེ་ཕཱས་དག་པེ་དེན་ཐ་ཤོ་ ལུང་གི་ཝ༌ལ། ཉི་པ་ཏྲུས་དག་པེ་དེན་ཐ་བུ་ ལུང་རང་གི༌ལ། ཡི་ཤུ་གི་ རོ་ཀ་སློ་མ་སི་མོན་ག་ མིང་སིང་མ་ཏག་ཉི་ ཀེ་ཕཱས་དང་ པ་ཏྲུས་དག་ཉི་རཱན་གནང་མ༌ཅ། སི་མོན་པ་ཏྲུས་ཤོ་ ཡི་ཤུ་ག་སློ་མ་སོང་ཉིག་ཙིང་ག་པོང་ཀེ་ གོ་སི་ཁཱན་སློ་མ་ཐུར་གི་ཝ་ཆོ༌ཝ།
ཡི་ཤུ་གི་ ཕི་ལིབ་དང་ ན་ཐ་ནེལ་ར་ཝ༌ལ།
43ནམ་ནིང་ད་བུ་ ཡི་ཤུ་གི་ རོག་ ག་ལིལ་ག་ཏཱན་བྱོན་མེ་དག་ཉི་ ཐག་གཅཱད་པ༌ལ། ཕི་ལིབ་ལམ་ཐོང་དེན་གེ་ རོ་ཀི་ཕི་ལིབ་ག་གསུངས་མ་ལ་ ཇ་ག་ཚིང་ཚིང་ཨོ་དོ་དག༌ཉི།
44ཨན་དྲི་ཡཱས་དང་ པ་ཏྲུས་ད་བུ་ ཕི་ལིབ་བུ་ ཁྲོམ་བེད་སེ་ད་གེ་ གི་ཝ་ཆོ་ཝ༌ལ། 45ཕི་ལིབ་གི་ ན་ཐ་ནེལ་ལམ་ཐོང་ཉི་ ཡེག་པ་ལ་ མོ་ས་གི་ བཀའ་ཁྲིམས་ནང་ཀ་འབྲི་ཁཱན་ཁེ་པ་ ཨ་ཤི་མཇལ༌བ། རོ་ཀ་ཀོར་གེ་ཤོ་ ལུང་བསྟན་པ་བ་ཀི་བུ་ འབྲི་བ་ཆོ༌ཝ། ཉི་རོག་ཤོ་ ཡོ་སེཕ་ག་སྲས་ ནཱས་རཱད་ག་ ཡི་ཤུ་གི་ལ་དག༌ཉི།
46ནཱས་རཱད་གེ་ ཧང་ཐུར་ལེག་པུ་ ཤོ་ལུ་ཤོ་ཤོ་དུ་སྨོ་དག་ཉི་ ན་ཐ་ནེལ་གི་ ཇི་མ་ཀབ་ཉི་ ཕི་ལིབ་གི་ཡེག་པ་ལ་ ཨུན་ཐཱན་གོད་ཅོ་དག༌ཉི།
47ན་ཐ་ནེལ་ཨོ་ཕ་ཐོང་ཉི་ ཡི་ཤུ་གི་ རོ་ཀ་ཀོར་གེ་གསུངས་མ་ལ་ ཨོ་ཐ་སོ་ངོ་ཤོ་ ཨིས་རེལ་ག་ སོ་ངོ་ངོ་མ་གི༌ལ། ཉི་རོ་ཀ་ནང་ཀ་ རྫུས་མ་ཧང་རང་མཱན་ཅ་དག༌ཉི།
48ན་ཐ་ནེལ་གི་ ཡི་ཤུ་ག་ ནཱན་གི་ ཇང་ཧང་ཏེན་ཨ་ཉི་ གུམ་ཡེན་ཅ་ཡ་དག་ཉི་ ཞུ་ལ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ཕི་ལིབ་གི་ ནཱན་མ་ར་ལེ་གོ་མ་ ཇི་གི་ ནཱན་ལྕོག་མ་ཤིང་ཕརའ་ཁ་ ཐོང་མ་དག༌ཉི།
49ཉི་ཤ་ ན་ཐ་ནེལ་གི་ཞུ་ཝ་ལ་ སློབ་དཔོན་ ནཱན་ཤོ་ དཀོན་མཆོག་ག་སྲས་ ཨིས་རེལ་ག་དཔོན་ གི་ཝ་ལ་དག༌ཉི།
50ཡི་ཤུ་གི་ རོ་ཀ་གསུངས་མ་ལ་ ཇི་གི་ ནཱན་ལྕོག་མ་ཤིང་ཕརའ་ཁ་ ཐོང་མ་དག་ཉི་ ཡེག་པ་ཨ་དེན་གེ་ ནཱན་གི་ ཇ་ག་ཏཱན་དད་པ་ཨན་ཅ་སྨོ། ཨོ་ཉ་གེ་ལག་ཉི་ ཆི་ལུ་ཆི་ལུ་ཨ་ཝ་བ་ ནཱན་གི་ཐོང༌མེ། 51ཉི་རོ་ཀི་ ཨོ་ཐེན་གསུངས་མ་ལ་ ཇི་གི་ ན་ཧ་ཐྲང་ཉི་ཡེག་ཅ་ ཞིང་ཁམས་ཕེག་ཐཱན་ དཀོན་མཆོག་ག་ ཞིང་ཁམས་ག་འཐེན་པ་བ་ སོ་ངོ་ག་ཟ་ག་ཐུང་ཀ་ ག་ཏ་དོང་ཏ་དི་ཝ་ག་ ན་ཤི་ཐོང་མེ་དག༌ཉི༎
Zur Zeit ausgewählt:
ཡུ་ཧན་ན། 1: TNTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tshangla New Testament
© 2023, The Bible Society of India
all rights reserved
