ཡུ་ཧན་ན། 3
3
ཡི་ཤུ་དང་ ནི་ཀོ་དེ་མཱས།
1ཆོས་ལུགས་ ཕ་རི་སི་པ་ག་དྲེ་ཀེ་ ཡ་ཧུ་དི་པ་བ་ཀ་ འགོ་དཔོན་ ནི་ཀོ་དེ་མཱས་དག་ཁཱན་ཐུར་ ཅ་གི་ཝ༌ལ། 2ཤེབ་ཐུར་ རོག་བི་ནང་ག་ ཡི་ཤུ་ག་ སྐུན་མདུན་ག་བཅག་ཐཱན་ ཞུ་ཝ་ལ་ སློབ་དཔོན་ ནཱན་ཤོ་ དཀོན་མཆོག་གེ་བྱོན་ཁཱན་ སློབ་དཔོན་གི་ལ་དག་ཉི་ ཨ་ཤི་སེན༌ཅ། ཧང་ཡ་དག་ནེ་ལ་ དཀོན་མཆོག་ སོ་ངོ་ཀབ་ཉི་མ་བཞུགས་ནེ་ལ་ ཐུར་གི་བུ་ ནཱན་གི་མཛད་ཁཱན་ རྫུ་འཕྲུལ་ག་རྟགས་མཚན་བ་ གེན་མེ་རེ་བུ་མཱན་ཅ་དག༌ཉི།
3ཡི་ཤུ་གི་ རོ་ཀ་ལན་གནང་ཉི་ གསུངས་མ་ལ་ ཇི་གི་ ན་ག་དེན་པ་ཡེག་ཅ་ ལོག་ཉི་མ་ཀེ་ཝ་སག་པུ་ ཨི་བི་གི་རང་ དཀོན་མཆོག་ག་རྒྱལ་སྲིད་ནང་ཀ་ ནུ་ཕེ་མར་བ་དག༌ཉི།
4ནི་ཀོ་དེ་མཱས་གི་ཞུ་ཝ་ལ་ སོ་ངོ་གཱན་ཏེན་གེ་ ཧང་ཏེན་ལོག་ཉི་ ཀེ་ལེ་རེ་བེ་ཡ། རོག་ལོག་ཉི་ཀེ་ལེ་དེན་གེ་ ཨ་མ་ག་ངེ་ཀ་ ཨོམ་ཆང་རང་ ཤེབ་ཐུར་ནུ་ཕེ་མར་བ་དག༌ཉི།
5ཡི་ཤུ་གི་ལན་གནང་ཉི་ གསུངས་མ་ལ་ ཇི་གི་ ན་ག་དེན་པ་ཡེག་ཅ་ སོ་ངོ་ཁེ་པ་ རི་དང་ཐུགས་ཉིད་གེ་ཨ་ཉི་ མ་ཀེ་ཝ་སག་པུ་ དཀོན་མཆོག་ག་རྒྱལ་སྲིད་ནང་ཀ་ ནུ་ཕེ་མར༌བ། 6ཕུང་པུ་གི་ ཕུང་པུ་ཀེན༌ཅ། དག་པ་ཀབ་ཉི་ ཐུགས་ཉིད་གི་ ཐུགས་ཉིད་ཀེན་ཅ་གི་ལ་དག༌ཉི། 7ཇི་གི་ན་ག་ ནཱན་ལོག་ཉི་ཀེ་ལེ་ཁེ་ལེ་དག་ཉི་ ཡེག་པ་ཨ་དེན་གེ་ ཡིད་མ་ཆི། 8རི་དི་ཨོ་ག་ཏཱན་ ཨོ་ཕེ་ལ་མ་ཐུར་ཨུན༌ཅ། ཉི་རི་དི་ག་ཀཱན་ ན་ཤི་ན་ཐཱན༌ཅ། དག་པ་ཀབ་ཉི་ ཨོ་ཉ་རི་དི་ཁེ་པ་ ཨོ་གེ་ཨུན་ཅ་གི་ལ་སྨོ་ ཉི་ཨོ་ག་ཏཱན་དིན་ཅ་གི་ལ་སྨོ་ ན་ཤི་སེ་ལུ་མཱན༌ཅ། ཉི་ཐུགས་ཉིད་ག་ཀེ་ཁཱན་བ་བུ་ ཨུ་ཉུ་ད་བུ་རང་གི་ལ་དག༌ཉི།
9ཨུ་ཉུ་ད་བུ་ ཧང་ཏེན་ཇུང་མེ་ཡ་དག་ཉི་ ནི་ཀོ་དེ་མཱས་གི་ ཞུ་ལ་ཀབ་ཉི་ 10ནཱན་ཨིས་རེལ་ག་ སློབ་དཔོན་གིན་ཐཱན་རང་གི་ནེ་བུ་ ནཱན་གི་ ཨོ་ཐ་བ་ ཧ་གོ་ལུ་མ་ལ་སྨོ་དག་ཉི་ ཡི་ཤུ་གི་ རོ་ཀ་ཏཱན་གསུངས་མ༌ལ། 11ཇི་གི་ ན་ག་དེན་པ་ཡེག་ཅ་ ཨ་ཤི་སེ་ཁཱན་ག་ཀོར་གེ་ ཨ་ཤི་ཆཱས་ཨན༌ཅ། ཉི་ཨ་ཤི་ཐོང་ཁཱན་ཁེ་པ་ ཨ་ཤི་ཡེག༌ཅ། ཨོ་ཉེ་རང་གི་ནེ་བུ་ ན་ཤི་ཨ་ཧ་ལོ་དི་ལུ་མ༌ལ། 12ཇི་གི་འཛམ་གླིང་ག་ཆོ་ཁཱན་ཀོར་གེ་ ཆཱས་ཨ་ལ་ཀབ་ཉི་ ནཱན་གི་ དད་པ་མ་ཨ་ནེ་ལ་ ཞིང་ཁམས་ག་ཆོ་ཁཱན་ཀོར་གེ་ ཆཱས་ཨ་ནེ་ཏ་ ནཱན་གི་ ཧང་ཏེན་ཨ་ཉི་ དད་པ་ཨ་ལེ་ཡ། 13ཞིང་ཁམས་གེ་དོང་ཨུ་ཁཱན་ སོ་ངོ་ག་ཟ་ཐུར་གི་མ་ཏོག་པ་ བཱརའ་ཨི་བི་གི་རང་ ཞིང་ཁམས་ག་ ཤེག་པ་མཱན༌ཅ། 14མོ་ས་གི་ ས་ཏོང་པ་ནང་ཀ་ རུ་གེ་ནང་ ག་དུང་མ་པུརུས་ཀིན་ཨ་ཉི་ སོ་ངོ་ག་ཟ་བུ་ ག་དུང་མེ་ཁེ༌ལེ། 15ཉི་སོ་ངོ་ག་ཟ་ག་ཏཱན་ དད་པ་ཨ་ཁཱན་ཐམས་ཅན་གི་ ཚེ་མ་འགྱུར་བརྟན་པ་ཉོང༌པེ།
16དཀོན་མཆོག་གི་ འཛམ་གླིང་ག་སོ་ངོ་བ་ གནམ་མེད་ས་མེད་ ཕང་པ་ཨ་དེན་གེ་ རོ་ཀ་སྲས་ཐུར་ཨ་ཝ་ཆོ་ཁཱན་བུ་གནང༌མ། ཨི་བི་གི་ རོ་ཀ་ཏཱན་དད་པ་ཨ་ཝ་ཐུར་ དམྱལ་བ་ག་མ་དི༌ལ། དག་པ་ཀབ་ཉི་ ཚེ་མ་འགྱུར་བརྟན་པ་ཉོང་པེ་གི༌ལ། 17འཛམ་གླིང་ག་སོ་ངོ་བ་ཀ་ ཁྲིམས་ཀེ་བེ་དེན་གེ་ དཀོན་མཆོག་གི་ རོ་ཀ་སྲས་ཀུན་ཏི་ཝ་མང་གི་ཝ་ རོ་ཀེ་ཨ་ཉི་ འཛམ་གླིང་ག་སོ་ངོ་བ་ཀི་ ཐར་པ་ཉོང་ཅེན་དག་པ་གི་ ཀུན་ཏི་ཝ་གི༌ལ། 18ཨི་བི་གི་ རོ་ཀ་དད་པ་ཨ་ཝ་ཐུར་ ཨོ་ཉ་སོ་ངོ་གི་ ཁྲིམས་མ་ཉོང༌པ། དག་པ་ཀབ་ཉི་ དད་པ་མ་ཨ་ཁཱན་གི་ གི་ཚེ་གེ་ཤ་ ཁྲིམས་ཉོང་པ༌ཅ། ཧང་ཡ་དག་ནེ་ལ་ རོག་ཏེ་བ་ཀི་ དཀོན་མཆོག་ག་ སྲས་ཐུར་ཨ་ཝ་ཆོ་ཁཱན་ག་མཚན་ག་ དད་པ་མ་ཨན་ཤི། 19ཁྲིམས་ཤོ་ ཨོ་ཐེན་ཅཱད་ཉི་གནང་མེ་གི༌ལ། འོད་ཟེར་འཛམ་གླིང་ནང་ཀ་ བྱོན་ཉི་གནང༌མ། དག་པ་ཀབ་ཉི་ སོ་ངོ་བ་ཀ་ ལའི་ངན་པ་ཆོ་ཝ་ཨ་དེན་གེ་ རོག་ཏེ་བ་ཀི་ འོད་ཟེར་གེ་ལག་ཉི་ མེར་བུ་རང་ཤོ་ནང་ཕེ༌ཝ། 20ངན་པ་ཨ་ཁཱན་བ་ཀི་ འོད་ཟེར་ལེག་པུ་མཱན༌ཅ། ཉི་རོག་ཏེ་བ་ཀི་ ཨ་ཁཱན་ལའི་ངན་པ་བ་ ཐོང་དུ་དག་པ་གི་ རོག་ཏེ་བ་ཀི་ འོད་ཟེར་ནང་ཀ་ ཨོ་ཕེ་ན་ལུ་མཱན༌ཅ། 21དག་པ་ཀབ་ཉི་ དེན་པ་ཨ་ཉི་ཆོ་ཁཱན་བ་ཀི་ འོད་ཟེར་ནང་ཀ་ཨུན༌ཅ། ཧང་ཡ་དག་ནེ་ལ་ རོག་ཏེ་བ་ཀི་ཨ་ཁཱན་བ་ དཀོན་མཆོག་ག་ཐུང་ཀེ་ཨ་ཉི་ ཨ་ཝ་གི་ལ་དག་ཉི་ གེན་མེ་དེན་གེ་གི༌ལ༎
ཡུ་ཧན་ན་གི་ ཡི་ཤུ་ག་བསྟོད་པ་ཕུལ་བ༌ལ།
22ཨོ་ཉ་ཚི་ངེ་ ཡི་ཤུ་དང་ རོ་ཀ་སློ་མ་བ་ ཡ་ཧུ་དི་ཡ་ག་ ཆ་འོག་ག་ཏཱན་བྱོན་མ༌ལ། ཉི་རོག་ཉ་ག་ རོག་ཏེ་བ་ཀབ་ཉི་ ད་སུར་བཞུགས་པ༌ལ། ཉི་སོ་ངོ་བ་ཀ་ ཁྲུས་གསོར་གནང་མ༌ལ། 23ཉི་ཨོམ་ ས་ལིམ་ག་ར་ག་ ཨེ་ནོན་དག་ས་ག་ རི་མང་པུ་ཆོ་ཝ་ཨ་དེན་གེ་ ཡུ་ཧན་ན་གི་ སོ་ངོ་བ་ཀ་ ཁྲུས་གསོར་གནང་ཅ་གི་ཝ༌ལ། ཉི་ཁྲུས་གསོར་ཞུ་ལེ་དེན་གེ་ སོ་ངོ་བ་ ཨུ་ཉི་རང་ཆོན་ཅ་གི་ཝ༌ལ། 24(ཨུ་ཉུ་ཤོ་ ཡུ་ཧན་ན་བཙོན་ག་ མ་ཙུག་པེ་གོ་མ་གི་ཝ༌ལ།) 25ལུགས་སྲོལ་དང་ཏུ་ཉི་ ཟིག་པེ་ཁེ་ཝ་ཀོར་གེ་ ཡུ་ཧན་ན་ག་ སློ་མ་ཚེ་བང་ ཡ་ཧུ་དི་པ་ཐུར་ཀབ་ཉི་ རྩོད་པ་རུ་མེ་གོ་ཙུག་པ༌ལ། 26ཨོ་ཉི་ཨ་དེན་གེ་ རོག་ཏེ་ཚེ་བང་ ཡུ་ཧན་ན་ག་བཱརང་ཀ་དིན་ཐཱན་ ཞུ་ཝ་ལ་ སློབ་དཔོན་ ཡར་དཱན་རི་དྲང་ ལོག་ཐུར་ལོ་ཀ་ ནཱན་ཀབ་ཉི་བཞུགས་ཁཱན་ཁེ་པ་ ནཱན་གི་ རོ་ཀ་ཀོར་གེ་གསུངས་ཁཱན་གི༌ལ། ཉི་ལེ་ལ་ རོ་ཀི་སོ་ངོ་བ་ཀ་ ཁྲུས་གསོར་གནང༌ལ། ཉི་ཨོམ་ སོ་ངོ་བ་ ཐམས་ཅན་རང་ རོག་བཞུགས་ས་ག་དི་ན་དག༌ཉི།
27ཡུ་ཧན་ན་གི་གསུངས་མ་ལ་ ཞིང་ཁམས་ག་བཞུགས་ཁཱན་ དཀོན་མཆོག་གི་གནང་ཁཱན་ཤ་ སོ་ངོ་གི་ཉོང་ཅ་གི་ལ་དག༌ཉི། 28ཇི་གི་ ན་ཧ་ཏཱན་ ཇང་ཤོ་ ཁིརིས་མང་གི་དག་ཉི་ ཡེག་པ་ག་ ན་ཤི་སེན༌ཅ། ཇང་ཤོ་ རོག་ཀེ་གུམ་གུམ་ ཀུན་ཏི་ཁཱན་ཤ་གི༌ལ། 29གཉེན་ཕི་ལེ་ཅམ་ཁཱན་ཟ་མིན་ཁེ་པ་ རོག་ཀབ་ཉི་ གཉེན་ཕི་ལེ་ཅམ་ཁཱན་ ཟ་ག་གི༌ལ། དག་པ་ཀབ་ཉི་ ཨོ་ཉ་ར་ག་ཐིང་ཉི་ཆོ་ཁཱན་ ཟ་ག་ཇ་རོ་གི་ རོ་ཀ་ཆཱས་ཉཱན༌ཅ། ཉི་རོ་ཀ་ཀཱན་ ན་ཐ་ལ་ཀབ་ཉི་ རོག་ཤོ་ནང་ཕེན༌ཅ། ཉི་ཨུ་ཉུ་ད་བུ་ཨ་ཉི་ ཇང་གནམ་མེད་ས་མེད་ ཤོ་ནང་ཕེ་ཝ༌ཅ། 30རོག་ཤོ་ ཆི་ལུ་རི་ལེ་ཁེ༌ལེ། ཉི་ཇང་ཤོ་ ཟེ་མུ་རི་ལེ་ཁེ༌ལེ།
31ག་གེ་ཨུ་ཁཱན་ཤོ་ ཐམས་ཅན་གེ་ཐུང་ཀ༌ཅ། ཉི་འཛམ་གླིང་གེ་གི་ཁཱན་ཤོ་ འཛམ་གླིང་ག་རང་གི༌ལ། ཉི་འཛམ་གླིང་ག་ གི་ཝ་པུརུས་ཀིན་ཨ་ཉི་ ཆཱས་ཨན༌ཅ། དག་པ་ཀབ་ཉི་ ཞིང་ཁམས་གེ་དོང་ ཨུ་ཁཱན་ཁེ་པ་ ཐམས་ཅན་གེ་ཆི་ལུ་གི༌ལ། 32རོ་ཀི་ཐོང་ཁཱན་དང་ ན་ཐ་ཁཱན་ག་ཀོར་གེ་ སོ་ངོ་བ་ཀ་ཡེག༌ཅ། དག་པ་ཀབ་ཉི་ སོ་ངོ་ཐུར་གི་རང་ རོ་ཀི་ཡེག་ཁཱན་ག་ ཆ་ཐ་ལུ་མ༌ལ། 33དག་པ་ཀབ་ཉི་ རོ་ཀི་ཡེག་ཁཱན་ག་ ཆ་ཐ་ཁཱན་སོ་ངོ་གི་ དཀོན་མཆོག་ཤོ་ དེན་པ་གི་ལ་དག་ཉི་ རྟགས་ས་ཀེན༌ཅ། 34ཧང་ཡ་དག་ནེ་ལ་ དཀོན་མཆོག་གི་ རོ་ཀ་ དམ་པའི་ཐུགས་ཉིད་ ཚེད་མ་ཝ་ཨ་ཉི་གནང་མ་ཨ་དེན་གེ་ དཀོན་མཆོག་གི་ཀུན་ཏི་ཁཱན་གི་ དཀོན་མཆོག་ག་གསུང་ གསུངས་ཉི་གནང༌ཅ། 35ཧང་ཡ་དག་ནེ་ལ་ ཡབ་ཀི་ རོ་ཀ་སྲས་ཕང་ཉི་ གནང་མ་ཨ་དེན་གེ་ ཐམས་ཅན་རང་ རོ་ཀ་དབང་ཚད་ག་ཕརའ་ཁ་ ཙུག་ཉི་གནང་མ༌ལ། 36ཨོ་ཉི་ཨ་དེན་གེ་ ཨི་བི་གི་སྲས་ག་ དད་པ་ཨ་ཝ་ཐུར་ ཚེ་མ་འགྱུར་བརྟན་པ་ཉོང༌པེ། དག་པ་ཀབ་ཉི་ སྲས་ག་ཆ་གནས་མ་ཐ་ཁཱན་གི་ ཚེ་ཉོང་པེ་མར༌བ། དག་པ་ཀབ་ཉི་ ཨོ་ཉ་སོ་ངོ་ག་ཐུང་ཀ་ དཀོན་མཆོག་ག་ཆདཔ་ཕོག༌པེ༎
Zur Zeit ausgewählt:
ཡུ་ཧན་ན། 3: TNTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tshangla New Testament
© 2023, The Bible Society of India
all rights reserved
