ཡུ་ཧན་ན། 5
5
ཡི་ཤུ་གི་ དང་མེ་མར་ཁཱན་སོ༌ངོ་ དྲག་ཉི་གནང་མ༌ལ།
1ཨོ་ཉ་ཚི་ངེ་ ཡ་ཧུ་དི་པ་དུས་ཆེན་ ཙི་ལེ་དེན་གེ་ ཡི་ཤུ་ ཡ་རུ་ཤ་ལེམ་ག་ཏཱན་ བྱོན་མ༌ལ། 2ཉི་ཨོམ་ ཡ་རུ་ཤ་ལེམ་ག་ ཤི་ཤ་མ་ཀོ་ག་ར་ག་ གཡབ་རིང་ལྔ་ཆོ་ཁཱན་ རི་ཙང་ཐུར་ཅ་གི་ཝ༌ལ། ཉི་ཧི་བུརུ་གེ་ ཨོ་ཉ་མིང་ བེད་སེ་ད་དག་པེ་གི་ཝ༌ལ། 3མར་ཁཱན་སོ་ངོ་མང་པུ་ཐུར་ མིང་ཀ་ན་བ་དང་ ཞ་ཝ་བ་ ཉི་ཟ་ན་ཚ་ཁེ་ཁཱན་བ་ ཨོ་ཉ་ནུ་ཕེ་བཱརང་ཀ་ ཐང་ཉི་ཆོ་ཝ་ཅ་གི་ཝ༌ལ།#5:3 ཆམ་ཆམ་རང་ གཙོ་བོ་ག་ ཞིང་ཁམས་ག་འཐེན་པ་བྱོན་ཐཱན་ ཨོ་ཉ་རི་ཙང་ཏྲོག་ཉི་གནང་ཅ་གི་ཝ༌ལ། ཉི་ཨོ་ཉ་རི་ཏྲོག་ཏེན་གེ་ ཨི་བི་གི་ གོ་དང་པ་ ཨོ་ཉ་རི་ཙང་ནང་ཀ་ནུ་ཕ་ཐུར་ རོ་ཀ་ན་ཚ་ ཧང་ད་བུ་ཆོན་ཐཱན་རང་གི་ནེ་བུ་ དྲག་ཅ་གི་ཝ༌ལ། 4-5ཉི་མར་ཉི་ ཉིང་ 38 དི་ཁཱན་ སོ་ངོ་ཐུར་ ཉ་ག་ཅ་གི་ཝ༌ལ། 6ཨོ་ཉ་སོ་ངོ་ ཉ་ག་ཐང་ཉི་ཆོ་ཝ་ག་ ཡི་ཤུ་གི་གཟིགས་པ༌ལ། ཉི་རོག་ ཨུ་ཉུ་ད་བུ་ཨན་ཆོ་ཉི་ ཉིང་མང་པུ་ཐུར་དི་ཝ་ག་ ཡི་ཤུ་གི་མཁྱེན་ཉི་ གསུངས་མ་ལ་ ནཱན་དྲག་པེ་ག་ སེམས་ཅ་སྨོ་དག༌ཉི།
7སློབ་དཔོན་ རི་ཏྲོག་པེ་གང་ཀ་ ཇང་རི་ནང་ཀ་ཙུག་ཉི་ག་ཁཱན་ ཨི་བི་རང་མ་ཝ་ཨ་དེན་གེ་ ཇང་ཏེན་གི་ནང་ཀ་ནུ་ཕེ་དེན་གེ་ ཙ་དྲེག་པ་ཀབ་ཉི་ ཇང་གེ་གོ་མ་ བཱརའ་ཐུར་ནུབ་ལ་དག་ཉི་ ཨོ་ཉ་ནཱད་པ་གི་ཞུ་ཝ༌ལ།
8ག་ཐིང༌ཤོ། ཉི་ན་ག་ཏཱན་ག་དུང་ཐཱན་ དང་ཤོ་དག་ཉི་ ཡི་ཤུ་གི་ རོ་ཀ་གསུངས་མ༌ལ། 9ཤེབ་ཐུར་ག་རང་ རོག་དྲག་པ༌ལ། ཉི་རོ་ཀི་ རོ་ཀ་ཏཱན་ ག་དུང་ཐཱན་ དང་མེ་གོ་ཙུག་པ༌ལ།
ཉི་ཨུ་ཉུ་ཤོ་ དུས་བཟང་ག་ནོང་ཀ་ ཇུང་མ་གི་ཝ༌ལ། 10ཨོ་ཉི་ཨ་དེན་གེ་ ཡ་ཧུ་དི་པ་འགོ་དཔོན་བ་ཀི་ མར་བ་གེ་དྲག་ཁཱན་ སོ་ངོ་ག་ཡེག་པ་ལ་ ཐི་ནོང་ཤོ་ དུས་བཟང་གི་ཝ་ཨ་དེན་གེ་ ནཱན་གི་ ན་ག་ཏཱན་ བང་མེ་མ་ཆོག་པ་དག༌ཉི།
11དག་པ་ཀབ་ཉི་ རོ་ཀི་ལན་མཇལ་ཉི་ ཡེག་པ་ལ་ ཇང་དྲག་ཉི་གནང་ཁཱན་ སོ་ངོ་གི་ ན་ག་ཏཱན་ ག་དུང་ཐཱན་དང་ཤོ་ཨ་ཉི་ གསུངས་ཆོ་ཝ་དག༌ཉི།
12ཉི་རོག་ཏེ་བ་ཀི་ རོ་ཀ་ཇི་མ་ལ་ ན་ག་ཏཱན་ ཨུ་ཐུ་ད་བུ་ཨའི་དག་ཉི་ཡེག་ཁཱན་ སོ་ངོ་ཁེ་པ་ ཨི་བི་གི་ལ་ཡ་དག༌ཉི།
13དག་པ་ཀབ་ཉི་ རོག་དྲག་ཉི་གནང་ཁཱན་ སོ་ངོ་ཁེ་པ་ ཨི་བི་གི་ལ་སྨོ་ རོ་ཀི་མ་སེ་ཝ༌ལ། ཧང་ཡ་དག་ནེ་ལ་ ཨོ་ཉ་ག་ སོ་ངོ་མང་པུ་ ཛོ་མ་ཆོ་ཝ༌ལ། ཉི་ཡི་ཤུ་ ཨོ་ཉ་སོ་ངོ་བ་ཀ་པོང་ཀ་ཏཱན་ ནུ་ཕ་ཅ་གི་ཝ༌ལ།
14ཨོ་ཉ་ཚི་ངེ་ ཡི་ཤུ་གི་ རོག་མཆོད་ཁང་ག་རུམ་ཉི་ གསུངས་མ་ལ་ གོད་ཅོ་ ཨོམ་ནཱན་དྲག་པ༌ཅ། ཨོ་ཉི་ཨ་དེན་གེ་ ཨོ་ཐ་གེ་ག་ཏཱན་ སྡིག་པ་མ་ཨའི། ཨུ་ཉུ་མ་ནེ་ལ་ ཨོ་ཉ་གེ་ལག་ཉི་ མ་ལེག་པ་ཏེ་ ཇུང་དུ་ན་དག༌ཉི། 15ཉི་རོག་དིན་ཐཱན་ ཡ་ཧུ་དི་པ་འགོ་དཔོན་བ་ཀ་ ཡེག་པ་ལ་ རོག་དྲག་ཉི་གནང་ཁཱན་ཤོ་ ཡི་ཤུ་གི་ཝ་ལ་དག་ཉི༎
ཚེ་ཤོ་ སྲས་གེ་ཨ་ཉི་ཉོང༌པེ།
16དུས་བཟང་ག་ནོང་ཀ་ ཡི་ཤུ་གི་ ཨོ་ཐ་བ་ མཛད་པ་ཨ་དེན་གེ་ ཡ་ཧུ་དི་པ་བ་ཀི་ ཡི་ཤུ་ ཀ་ལུ་ཅོད་པེ་ གོ་ཙུག་པ༌ལ། 17དག་པ་ཀབ་ཉི་ ཡི་ཤུ་གི་ལན་གནང་ཉི་ གསུངས་མ་ལ་ ཇ་ག་ཨ་པ་གི་ ཧ་ལ་རང་ ལའི་གེ་ཐེམ་པུ་མཱན༌ཅ། ཉི་ཇང་ཤོ་ ཧང་ཨ་ཉི་ ལའི་གེ་ཐེམ་པེ་ཡ་དག༌ཉི། 18ཨོ་ཉི་ཨ་དེན་གེ་ ཡ་ཧུ་དི་པ་འགོ་དཔོན་བ་ཀི་ ལག་ཏང་ ཡི་ཤུ་བཀྲོངས་མེ་ག་ སེམས་ཨ་ཝ༌ལ། རོ་ཀི་དུས་བཟང་ག་ ཆ་གནས་མ་ཐ་ཝ་ཐུར་ཤ་ མང་གི་ཝ་ དཀོན་མཆོག་ཤོ་ རོག་ཏེན་ག་ ཨ་པ་གི་ལ་དག་ཡེག་ཉི་ རོག་ཀི་ རོག་དཀོན་མཆོག་ཀབ་ཉི་ དོ་ལུ་ཅོད་ལ་དག་ཉི་ མི་ཝ༌ལ།
19ཡི་ཤུ་གི་ རོག་ཏེ་བ་ཀ་ལན་གནང་ཉི་ གསུངས་མ་ལ་ ཇི་གི་ ན་ཧ་དེན་པ་ཡེག་ཅ་ ཟ་རོག་ཏེན་གི་ ཧང་རང་ཨ་ལེ་མར༌བ། དག་པ་ཀབ་ཉི་ རོ་ཀ་ཨ་པ་གི་ མཛད་པ་ག་ཐོང་ཁཱན་བ་ཤ་ རོ་ཀི་ཨ་ལེ་རེ༌བེ། ཧང་ཡ་དག་ནེ་ལ་ ཨ་པ་གི་ ཧང་མཛད་པ་ཐུར་ ཟ་གི་བུ་ཨན༌ཅ། 20ཧང་ཡ་དག་ནེ་ལ་ ཨ་པ་གི་ཟ་ཕང༌ཅ། ཉི་རོ་ཀི་ ཧང་མཛད་པ་ཐུར་ རོ་ཀ་ཟ་ག་ཏཱན་ གེན་ཉི་གནང༌ཅ། ཨོ་ཐ་གེ་བུ་ལག་ཉི་ ཆི་ལུ་ཆི་ལུ་ཨ་ཝ་བ་ཨ་ལེ་ག་ རོ་ཀི་གེན་མ་ཀབ་ཉི་ ན་ཧ་བ་ཡིད་ཆི༌ལེ། 21ཨ་པ་གི་ ཤི་ཁཱན་བ་ཝུན་ཐཱན་ རོག་ཏེ་བ་ཀ་ ཚེ་གནང་མ་པུརུས་ཀིན་ཨ་ཉི་ ཟ་གི་བུ་ རོག་ཨི་བི་ཀབ་ཉི་ སེམས་ཨ་ཝ་ཐུར་ ཨོ་ཉ་སོ་ངོ་ག་ཏཱན་ ཚེ་བིན༌ཅ། 22ཨ་པ་གི་ ཨི་བི་ག་རང་ ཁྲིམས་ཅཱད་པུ་མཱན༌ཅ། དག་པ་ཀབ་ཉི་ ཁྲིམས་ཅཱད་པེ་དེན་གེ་ རོ་ཀི་དབང་ཚད་ ཐམས་ཅན་རང་ རོ་ཀ་ཟ་ག་ཏཱན་གནང་མ༌ཅ། 23ཨོ་ཉི་ཨ་དེན་གེ་ ཨ་པ་ག་ གུས་ཞབས་ཨ་ཝ་པུརུས་ཀིན་ཨ་ཉི་ ཐམས་ཅན་གི་ ཟ་ག་བུ་ གུས་ཞབས་ཨ༌ལེ། ཉི་ཨི་བི་གི་ ཟ་ག་གུས་ཞབས་མ་ཨ་ཝ་ཐུར་ རོག་ཀུན་ཏི་ཁཱན་ ཨ་པ་ག་བུ་ གུས་ཞབས་མ་ཨན་ཅ་གི༌ལ།
24ཇི་གི་ ན་ཧ་དེན་པ་ཡེག་ཅ་ ཇ་ག་གསུང་ཉཱན་ཐཱན་ ཇང་ཀུན་ཏི་ཁཱན་ག་ དད་པ་ཨ་ཁཱན་བ་ཀི་ ཚེ་མ་འགྱུར་བརྟན་པ་ཉོང༌པེ། རོག་ཏེ་བ་ཀ་ཐུང་ཀ་ ཁྲིམས་མ་ཅཱད༌པ། ཧང་ཡ་དག་ནེ་ལ་ རོག་ཏེ་བ་ཀི་ ཤི་སྲོག་གོག་ཉི་ ཚེ་ཉོང་པ༌ཅ། 25ཇི་གི་ ན་ཧ་དེན་པ་ཡེག་ཅ་ ཤི་ཁཱན་བ་ཀི་ དཀོན་མཆོག་ག་ སྲས་ག་ཀཱན་ན་ཐ༌ལེ། ཉི་རོ་ཀ་ཀཱན་ ན་ཐ་ཁཱན་བ་ཀི་ ལོག་ཉི་རང་ ཚེ་ཉོང་པེ་ག་ དུས་ཐུར་ཤར༌བེ། ཉི་ཨོ་ཉ་དུས་ཁེ་པ་ གི་ཚེ་གེ་ཤ་ཤར་བ༌ཅ། 26ཧང་ཡ་དག་ནེ་ལ་ ཨ་པ་རོག་ཏེན་ག་ནང་ཀ་ཚེ༌ཅ། ཉི་རོ་ཀི་ རོ་ཀ་སྲས་ རོག་ཏེན་ག་ནང་ཀ་བུ་ ཚེ་གནང་མ༌ཅ། 27ཉི་རོ་ཀ་སྲས་ཤོ་ སོ་ངོ་ག་ཟ་གི་ཝ་ཨ་དེན་གེ་ ཁྲིམས་ཅཱད་པེ་ག་བུ་ དབང་ཚད་གནང་མ༌ཅ།
28ཨོ་ཐ་ཆཱས་ཉཱན་ཉི་ ཡིད་མ་ཆི། ཧང་ཡ་དག་ནེ་ལ་ ཤི་ཁཱན་ཐམས་ཅན་གི་ རོ་ཀ་ཀཱན་ན་ཐ་ལེ་ག་ དུས་ཐུར་ཤར༌བེ། 29ཨུ་ཉུ་གང་ཀ་ རོག་ཏེ་བ་རང་རང་ས་ དུར་གེ་ཤོ་ཉི་ཨོ་ཕེ། ལེག་པུ་ཨ་ཁཱན་བ་ ཚེ་མ་འགྱུར་བརྟན་པ་ཉོང་པེ་དེན་གེ་ གསོན་པོ་ཨ་ཉི་ཝུ༌ལེ། ཉི་ངན་པ་ཨ་ཁཱན་བ་ ཁྲིམས་ཉོང་པེ་དེན་གེ་ཝུ༌ལེ། 30ཇང་ཇང་ཏེན་ག་ འཆར་གཞི་དང་ཏུ་ཉི་ ཧང་རང་ཨ་ལུ་མཱན༌ཅ། དཀོན་མཆོག་གི་ ཇ་ག་གསུངས་མ་དང་ཏུ་ཉི་ ཇི་གི་ཁྲིམས་ཅཱད༌ཅ། ཨོ་ཉི་ཨ་དེན་གེ་ ཇི་གི་ཁྲིམས་ཐྲང་ཉི་ཅཱད༌ཅ། ཧང་ཡ་དག་ནེ་ལ་ ཇ་ག་སེམས་དང་ཏུ་ཉི་མང་གི་ཝ་ ཇང་ཀུན་ཏི་ཁཱན་ག་ ཐུགས་བཞེད་དང་ཏུ་ཉི་ ཨ་ལེ་ག་མིག་པ་ཕིན༌ཅ༎
ཡི་ཤུ་ག་ཀོར་གེ་འཛོམས་དཔང་།
31ཇི་གི་ཇང་ཏེན་ག་ཀོར་གེ་ འཛོམས་དཔང་ཨ་ནེ་ལ་ ཨུ་ཉུ་ཤོ་ ཁུངས་ཀེ་བ་མ་ཆིན༌མ། 32དག་པ་ཀབ་ཉི་ ཇ་ག་ཀོར་གེ་ འཛོམས་དཔང་ཨ་ཁཱན་ བཱརའ་ཐུར༌ཅ། ཉི་རོ་ཀི་ ཇ་ག་ཀོར་གེ་ འཛོམས་དཔང་ཨ་ཁཱན་གི་ནེ་ལ་ དེན་པ་གི་ལ་དག་ཉི་ ཇི་གི་སེན༌ཅ།
33ན་ཤི་ ན་ཧ་འཐེན་པ་ ཡུ་ཧན་ན་ག་བཱརང་ཀ་ཏཱན་ ཀུན་ཏི་ཝ་ཆོ༌ཝ། ཉི་རོ་ཀི་དེན་པ་ག་ཀོར་གེ་ འཛོམས་དཔང་ཨ་ཝ༌ཅ། 34སོ་ངོ་གི་ཨ་ཉི་ ཇ་ག་ཀོར་གེ་ འཛོམས་དཔང་ཨ་ལེ་ཁེ་ཝ་ཨ་དེན་གེ་ མང་གི་ཝ་ ཇི་གི་ ན་ཧ་ཡེག་ཁཱན་ཤོ་ ན་ཤི་ཐར་པ་ཉོང་ཅེན་ དག་པ་གི་གི༌ལ། 35ཡུ་ཧན་ན་ཤོ་ མི་ཐོག་ཉི་ འོད་ཆར་ཁཱན་ ལ་ཝང་ད་བུ་ཐུར་གི༌ལ། ཉི་རེབ་ཀིན་ཐུར་ག་དེན་གེ་ རོ་ཀ་འོད་ཟེར་ནང་ཀ་ཆོ་ལེ་ག་ ན་ཤི་ཤོ་ནང་ཕེ༌ཝ།
36དག་པ་ཀབ་ཉི་ ཡུ་ཧན་ན་གེ་ལག་ཉི་ ཇ་ག་འཛོམས་དཔང་ཨ་ཁཱན༌ཅ། ཇི་གི་འགྲུབ་ཕེ་དེན་གེ་ ཨ་པ་གི་ ཇ་ག་གནང་ཁཱན་ལའི་ཤོ་ ཇ་ག་འཛོམས་དཔང་གི༌ལ། ཉི་ཇི་གི་ཨ་ཁཱན་ལའི་གི་ ཇང་ཤོ་ དཀོན་མཆོག་གི་ ཀུན་ཏི་ཝ་གི་ལ་དག་ཉི་ ཁུངས་ཀེ༌ཅ། 37ཉི་ཇང་ཀུན་ཏི་ཁཱན་ ཨ་པ་གི་ ཇ་ག་ཀོར་གེ་ འཛོམས་དཔང་ཨ་ཉི་གནང་མ༌ཅ། ན་ཤི་ རོ་ཀ་གསུང་སྐད་ ཧ་ལ་རང་ན་མ་ཐ་ཝ༌ཅ། ཉི་རོག་ ཧང་ད་བུ་ཅ་གི་ལ་སྨོ་ ཧ་ལ་རང་ མཇལ་བ་མཱན༌ཅ། 38ཉི་རོ་ཀི་ཀུན་ཏི་ཁཱན་ག་ ན་ཤི་དད་པ་མ་ཨ་ཝ་ཨ་དེན་གེ་ རོ་ཀ་གསུང་བུ་ ན་ཧ་ནང་ཀ་བཞུགས་པ་མཱན༌ཅ། 39གསུང་རབ་ལམ་པ་ཀབ་ཉི་ ཚེ་མ་འགྱུར་བརྟན་པ་ ཉོང་ཏུ་མེ་དག་རེ་ཆ་ཨ་ཉི་ ན་ཤི་གསུང་རབ་ལམ༌ལ། ཉི་ཨོ་ཐ་གསུང་རབ་བ་ཀི་ ཇ་ག་ཀོར་གེ་ འཛོམས་དཔང་ཨན༌ཅ། 40ཨོ་ཉེ་རང་གི་ནེ་བུ་ ཚེ་ཉོང་པེ་དེན་གེ་ ན་ཤི་ཇ་ག་བཱརང་ཀ་ ཨོ་ཕེ་ན་ལུ་མ༌ལ།
41ཇི་གི་སོ་ངོ་གེ་ བསྟོད་པ་ཉོང་པེ་གོད་པུ་མཱན༌ཅ། 42ཧང་ཡ་དག་ནེ་ལ་ ན་ཧ་ནང་ཀ་ དཀོན་མཆོག་ག་ སྙིང་རྗེ་མཱན་ཅ་དག་ཉི་ ཇི་གི་སེན༌ཅ། 43ཇ་ག་ཨ་པ་ག་མཚན་ག་ ཨོ་ཕ་ཀབ་ཉི་ ན་ཤི་ཇང་ཙི་ལུ་མ༌ལ། དག་པ་ཀབ་ཉི་ བཱརའ་ཐུར་ རོག་ཏེ་བ་ཀ་མིང་ག་ཨུ་ནེ་ལ་ ན་ཤི་རོག་ཤོ་ཙི༌ལེ། 44ན་ཤི་ ནའི་ནང་དོ་གེ་ བསྟོད་པ་ཉོང་པེ་གོད༌ལ། དག་པ་ཀབ་ཉི་ དཀོན་མཆོག་ཐུར་གེ་ཤ་ ཉོང་ཁཱན་བསྟོད་པ་ ཉོང་པེ་གོད་པུ་མ༌ལ། ན་ཤི་དད་པ་ཨ་ལ་ཤོ་ ཧང་ཏེན་ཨ་ཉི་ཨ་ལེ་ཡ།
45དག་པ་ཀབ་ཉི་ ན་ཤི་མ་མི་ ཨ་པ་ག་སྐུན་མདུན་ག་ ཇི་གི་ ན་ཧ་བ་ ཏུག་པེ་རིག་ཏུ་དག༌ཉི། ན་ཤི་མོ་ས་ག་ཐུང་ཀ་ རེ་ཆ་ཨ་ཝ་ཨ་དེན་གེ་ མོ་ས་གི་ ན་ཧ་བ་ ཏུག་པེ་རིག༌པེ། 46ན་ཤི་མོ་ས་ག་ ལོ་དི་ཝ་ཆོ་ནེ་ལ་ ཇ་ག་བུ་ དད་པ་ཨ་ལེ་ཆོ༌ཝ། ཧང་ཡ་དག་ནེ་ལ་ རོ་ཀི་ ཇ་ག་ཀོར་གེ་འབྲི་བ༌ཅ། 47དག་པ་ཀབ་ཉི་ མོ་ས་གི་འབྲི་ཁཱན་ག་ ན་ཤི་ལོ་མ་དི་ནེ་ལ་ ཇི་གི་ཡེག་ཁཱན་ག་ ན་ཤི་ཧང་ཏེན་ཨ་ཉི་ དད་པ་ཨ་ལེ་ཡ༎
Zur Zeit ausgewählt:
ཡུ་ཧན་ན། 5: TNTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tshangla New Testament
© 2023, The Bible Society of India
all rights reserved
