ཡུ་ཧན་ན། 7
7
ཡི་ཤུ་དང་ རོ་ཀ་བོ་ཉིང༌བ།
1ཨོ་ཉ་ཚི་ངེ་ ཡི་ཤུ་ ག་ལིལ་ག་དུང་དུང་ཁོན་ བྱོན་མ༌ལ། རོག་ཡ་ཧུ་དི་ཡ་གེ་ ཇང་ཀིན་ཨ་ཉི་ བཞུགས་པེ་ག་ ཐུགས་བསམ་གནང་མ༌ལ། ཧང་ཡ་དག་ནེ་ལ་ ཉ་ག་ཆོ་ཁཱན་ཡ་ཧུ་དི་པ་བ་ཀི་ རོག་བཀྲོངས་མེ་ག་ འཆར་གཞི་ཙམ་ཅ་གི་ཝ༌ལ། 2ཉི་དོ་ཟོ་རང་ གུར་ག་དུས་ཆེན་#7:2 གུར་ག་དུས་ཆེན་ཤོ་ ལོ་ཐོག་དུང་མ་ག་ དུས་ཆེན་ཨ་ཉི་བུ་ཆིན༌ཅ། ཨིས་རེལ་ག་སོ་ངོ་བ་ ཨི་ཇིབ་ག་ཟ་པ་གེ་ཤོ་ཉི་ དཀོན་མཆོག་གི་ དབུ་མནའ་བཞེན་གནང་ཁཱན་ ས་ཆ་ག་ཏཱན་དིན་ཅ་ཨ་ཉི་ ས་ཏོང་པ་ནང་ཀ་ ཉིང་ 40 གོར་བ༌ལ། ཨུ་ཉུ་གང་ཀ་ དཀོན་མཆོག་གི་ རོག་ཏེ་བ་ཀ་ ཕ་མ་བ་ཀ་ དམ་ཚིག་ཙུང་ཉི་གནང་ཁཱན་དང་ ཧང་ཁག་ཆི་ཝ་ཐུར་གནང་ཁཱན་ ཉི་སྐྱབས་གཟིགས་གནང་ཁཱན་ཁེ་པ་ ཡིད་ཀ་ཨ་ཉི་ ཨོ་ཐ་གུར་ག་དུས་ཆེན་ ཙིན་ཅ་གི་ཝ༌ལ། གུར་ག་དུས་ཆེན་གང་ཀ་ ཡ་ཧུ་དི་པ་བ་ཀི་ གུར་པུབ་ཐཱན་ ངམ་བི་ནང་ཟུམ་སག་པུ་ ཉ་ག་རང་ཆོ་ཉི་ ཟཱན་ཇམ་ཉི་ བརྩི་སྲུང་ཨན་ཅ་གི་ཝ༌ལ།རེན་ཅ་གི་ཝ༌ལ། 3ཨོ་ཉི་ཨ་དེན་གེ་ ཡི་ཤུ་ག་བོ་ཉིང་བ་ཀི་ རོ་ཀ་ཞུ་ཝ་ལ་ ནཱན་ཐ་གེ་ ཡ་ཧུ་དི་ཡ་ག་ཏཱན་བྱོན༌ཤོ། ཧང་ཡ་དག་ནེ་ལ་ ནཱན་གི་ མཛད་ཁཱན་རྫུ་འཕྲུལ་བ་ ན་ག་སློ་མ་བ་ཀི་ ཐོང་མེ་རེ་ཆེན། 4ནཱན་གི་ ཨོ་ཐེན་རང་ གུམ་ཉི་བཞུགས་ནེ་ལ་ སོ་ངོ་བ་ཀ་གུབ་ཀ་ མིང་གཏམ་ཤོ་ལེ་མར༌བ། ཉི་ནཱན་གི་ ཨུ་ཐུ་ད་བུ་ མཛད་པེ་རེ་བ་ཨ་དེན་གེ་ འཛམ་གླིང་ག་སོ་ངོ་བ་ཀི་ ན་ག་ཀོར་གེ་ སེ་ལེ་ཁེ་ལེ་དག༌ཉི། 5རོ་ཀ་བོ་ཉིང་བ་ཀི་ཆང་ རོ་ཀ་དད་པ་མ་ཨ་ཝ༌ལ།
6ཨོ་ཉི་ཨ་དེན་གེ་ ཡི་ཤུ་གི་ རོག་ཏེ་བ་ཀ་གསུངས་མ་ལ་ ཇ་ག་དེན་གེ་ དུས་ཙུན་ཕྲིག་ཀིན་ མ་རེན་པ༌ཅ། ན་ཧ་དེན་གེ་ཏ་ ཧ་ལ་ཨ་ནེ་བུ་ དུས་ཙུན་ཕྲིག་ཀིན་ རེན་པ་ཨུ་ན། 7འཛམ་གླིང་ག་སོ་ངོ་བ་ཀི་ ན་ཧ་མ་ཟེས་པ་ཨ་ལེ་མར༌བ། དག་པ་ཀབ་ཉི་ རོག་ཏེ་བ་ཀི་ ཨ་ཁཱན་ལའི་ངན་པ་ག་ཀོར་གེ་ ཇི་གི་ཡེག་པ་ཨ་དེན་གེ་ རོག་ཏེ་བ་ཀི་ ཇང་ཟེས་པུ་མཱན༌ཅ། 8ན་ཧ་བ་ དུས་ཆེན་ག་དེན་གེ་དི། དག་པ་ཀབ་ཉི་ ཇ་ག་དེན་གེ་ དུས་ཙུན་མ་རེན་པ་ཨ་དེན་གེ་ ཇང་དུས་ཆེན་ཙི་ལེ་ག་ མ་དི་ལ་དག་ཉི་ གསུངས་མ༌ལ། 9རོ་ཀི་ཨོ་ཐེན་གསུངས་ཐཱན་ རོག་ག་ལིལ་ག་རང་ བཞུགས་པ༌ལ༎
ཡི་ཤུ་གི་མཆོད་ཁང་ག་ ཡེ་ཉི་གནང་མ༌ལ།
10རོ་ཀ་བོ་ཉིང་བ་ དུས་ཆེན་ཙི་ལེ་དེན་གེ་ དི་ཉི་ཆུམ་དེན་གེ་ རོག་བུ་ བཱརའ་ཨི་བི་གི་རང་མ་སེ་ཝ་ ཙང་ཀེན་ཨ་ཉི་བྱོན་མ༌ལ། 11ཉི་ཨོམ་ དུས་ཆེན་ཙི་ས་ག་ ཡ་ཧུ་དི་པ་ འགོ་དཔོན་བ་ཀི་ རོག་ལམ་ཉི་ཡེག་པ་ལ་ རོག་ཨོ་ག་ལ་ཡ་དག༌ཉི།
12སོ་ངོ་མང་པུ་ཨ་ཉི་ ཛོམ་ཁཱན་བ་ཀ་པོང་ཀ་ རོ་ཀ་ཀོར་གེ་ ས་བ་སུ་བུ་ཨ་ཉི་ ཐམས་ཅན་གི་ ཆཱས་ཕིན་ཅ་གི་ཝ༌ལ། ཚེ་བང་གི་ཡེག་པ་ལ་ རོག་སོ་ངོ་ལེག་པུ་ཐུར་ཅ་དག༌ཉི། དག་པ་ཀབ་ཉི་ ཚེ་བང་གི་ཨ་ནེ་ལ་ རོག་ལེག་པུ་མཱན༌ཅ། རོ་ཀི་སོ་ངོ་བ་ཀ་ མགུ་སྐོར་ཕིན་ཅ་དག་ཉི་ ཡེག་པ༌ལ། 13དག་པ་ཀབ་ཉི་ ཡ་ཧུ་དི་པ་འགོ་དཔོན་བ་ཀེ་ ཡོང་ཁེ་ཝ་ཨ་དེན་གེ་ ཐུར་གི་བུ་ སོ་ངོ་བ་ཀ་གུབ་ཀ་ རོ་ཀ་ཀོར་གེ་ ཧང་རང་ཡེག་པེ་མར་བ༌ལ། 14དུས་ཆེན་ཙི་ཉི་ བར་ཁོ་ལེ་ཅམ་པ་ཀབ་ཉི་ ཡི་ཤུ་མཆོད་ཁང་ག་ཏཱན་བྱོན་ཐཱན་ སོ་ངོ་བ་ཀ་ ཡེ་ལེ་གོ་ཙུག་པ༌ལ། 15ཡ་ཧུ་དི་པ་ག་འགོ་དཔོན་བ་ གནམ་མེད་ས་མེད་ ཡིད་ཆི་ཉི་ཡེག་པ༌ལ། ཨོ་ཐ་སོ་ངོ་གི་ དཔེ་ཆ་ཧང་རང་མ་ལབ་ནེ་བུ་ ཨུ་ཐུ་ད་བུ་ཡོན་ཏན་ ཨོ་གེ་ཉོང་པ་གི་ས་དག༌ཉི།
16ཡི་ཤུ་གི་ ལན་གནང་ཉི་གསུངས་མ་ལ་ ཇི་གི་ཡེ་ཁཱན་ཁེ་པ་ ཇང་ཏེན་གེ་ཨ་ཉི་མང་གི་ཝ་ ཇང་ཀུན་ཏི་ཁཱན་གེ་ ཨུན་ཅ་གི༌ལ། 17ཉི་ཨི་བི་གི་ དཀོན་མཆོག་ག་ ཐུགས་བཞེད་དང་ཏུ་ཉི་ ཨ་ལེ་གོད་པ་ཐུར་ ཨོ་ཉ་སོ་ངོ་གི་ ཇི་གི་ཡེ་ཁཱན་ཁེ་པ་ ཇང་གེ་གི་ལ་སྨོ་ དཀོན་མཆོག་གེ་གི་ཝ་ལ་སྨོ་ ཙ་ཆོད་པེ་རེ༌བེ། 18རང་ཏེན་ག་གནས་སྐབས་དང་ཏུ་ཉི་ ཆཱས་ཨ་ཁཱན་སོ་ངོ་གི་ རོག་ཏེན་ག་ མིང་གཏམ་ཤོ་ལེ་གོད༌ཅ། དག་པ་ཀབ་ཉི་ རོག་ཀུན་ཏི་ཁཱན་ག་ མིང་གཏམ་ཤོ་ལེ་གོད་ཁཱན་ སོ་ངོ་ཤོ་ དེན་པ་ཨ་ཁཱན་ སོ་ངོ་གི༌ལ། ཉི་རོ་ཀ་ནང་ཀ་རྫུས་མ་ ཧང་རང་མཱན༌ཅ། 19མོ་ས་གི་ ན་ཧ་བཀའ་ཁྲིམས་མ་གནང་ཤི་སྨོ། དག་པ་ཀབ་ཉི་ ནའི་ཨི་བི་གི་རང་ བཀའ་ཁྲིམས་ག་ ཆ་གནས་ཐ་ལུ་མ༌ལ། ཉི་ན་ཤི་ ཧང་ཨ་ཉི་ ཇང་ཤེ་ལེ་མིག་པ་ཕིན་ཅ་ཡ་དག༌ཉི།
20ཉི་སོ་ངོ་བ་ཀི་ཡེག་པ་ལ་ ན་ག་ནང་ཀ་དོན་ནུ་ཕ༌ལ། ནཱན་ཤེ་ལེ་མིག་པ་ཕི་ཁཱན་ ཨི་བི་གི་ལ་ཡ་དག༌ཉི།
21ཡི་ཤུ་གི་ རོག་ཏེ་བ་ཀ་ གསུངས་མ་ལ་ ཇི་གི་རྫུ་འཕྲུལ་ཐུར་ཤ་གེན༌མ། ཉི་ན་ཧ་བ་ གནམ་མེད་ས་མེད་ ཡིད་ཆི་ན། 22དག་པ་ཀབ་ཉི་ མོ་ས་གི་ ན་ཧ་ཏཱན་ཤ་ཅཱད་པེ་ག་ བཀའ་གནང་མ༌ཅ། (མ་པ་ཨུ་ཉུ་ཤོ་ མོ་ས་གི་མང་གི་ཝ་ ན་ཧ་དང་པོ་ག་ཕ་མ་བ་ཀི་ གོ་ཙུག་པ་ཆོ༌ཝ།) ཉི་ན་ཤི་ དུས་བཟང་ག་ནོང་ཀ་ ཤ་ཅཱད༌ཅ། 23ཉི་ཨོམ་ མོ་ས་ག་ བཀའ་ཁྲིམས་དང་ཏུ་ཉི་ ཨ་ལེ་དེན་གེ་ ན་ཤི་དུས་བཟང་ག་ནོང་ཀ་ ཤ་ཅཱད་ནེ་ལ་ ཇི་གི་དུས་བཟང་ག་ནོང་ཀ་ སོ་ངོ་ག་ལུས་པུ་ ཐམས་ཅན་རང་ དྲག་པ་ཨ་དེན་གེ་ ན་ཧ་བ་ ཧང་ཨ་ཉི་ རོ་ཙིག་ཅ་ཡ། 24ཨོ་ཉི་ཨ་དེན་གེ་ ཕིས་ཀེ་གོད་ཉི་ ཁྲིམས་ཅཱད་པེ་ག་ ཐུབ་ཐཱན་ཐཱན་ དེན་པ་ཨ་ཉི་ ཁྲིམས་ཅཱད་པེ་གོད་ཅོ་དག༌ཉི༎
ཡི་ཤུ་ ཁིརིས་གི་ལ་སྨོ།
25ཉི་ཡ་རུ་ཤ་ལེམ་ག་ཆོ་ཁཱན་ སོ་ངོ་ཚེ་བང་གི་ རོག་ཏེ་བ་ནང་དོ་ཆཱས་ཨ་ཉི་ རོག་ཏེ་བ་ཀི་ ཤེ་ལེ་ཅམ་ཁཱན་སོ་ངོ་ རོག་མང་གི་སྨོ། 26རོ་ཀི་ཐ་ག་སོ་ངོ་མང་ཀབ་ཉི་ ཆཱས་ཨ་ན་ དག་པ་ཀབ་ཉི་ རོག་ཏེ་བ་ཀི་ རོ་ཀ་ཏཱན་ ཧང་རང་ཡེག་པེ་རེ་བུ་མ༌ལ། ཧང་དབང་ཚད་ཙུང་ཁཱན་བ་ཀི་ རོག་ཤོ་ ཏེན་ཏེན་རང་ ཁིརིས་གི་ལ་དག་ཙིན་ཅ་གི་ས། 27དག་པ་ཀབ་ཉི་ ཨོ་ཐ་སོ་ངོ་ ཨོ་གེ་གི་ལ་སྨོ་ ཨ་ཤི་སེན༌ཅ། ཉི་ཁིརིས་བྱོན་མ་ཀབ་ཉི་ རོག་ཨོ་གེ་གི་ལ་སྨོ་ ཨི་བི་གི་རང་མ་སེ་ལ་དག་ཉི་ ཡེག་པ༌ལ།
28ཡི་ཤུ་གི་མཆོད་ཁང་ནང་ཀ་ ཡེན་ཅ་ཨ་ཉི་ གསུང་སྐད་ཆི་ལུ་ཨ་ཉི་ གསུངས་མ་ལ་ ཇང་ཨི་བི་གི་ལ་སྨོ་ ཉི་ཨོ་གེ་གི་ལ་སྨོ་ ན་ཤི་ཏེན་ཏེན་ཨ་ཉི་རང་ སེན་ཅ་སྨོ། ཇང་ཇང་ཏེན་ག་ སེམས་དང་ཏུ་ཉི་ ཨོ་ཕ་མང་གི་ དག་པ་ཀབ་ཉི་ ཇང་ཀུན་ཏི་ཁཱན་ཤོ་ དེན་པ་གི༌ལ། ཉི་ན་ཤི་ རོག་གུམ་ཡེ་ལུ་མཱན༌ཅ། 29དག་པ་ཀབ་ཉི་ ཇི་གི་ རོག་གུམ་ཡེན༌ཅ། ཧང་ཡ་དག་ནེ་ལ་ ཇང་ཤོ་ རོ་ཀེ་གི༌ལ། ཉི་ཇང་ རོ་ཀི་ཀུན་ཏི་ཝ་གི་ལ་དག༌ཉི།
30ཉི་གེ་ རོག་ཏེ་བ་ཀི་ རོག་ཙུང་མེ་ཅམ་པ༌ལ། དག་པ་ཀབ་ཉི་ རོ་ཀ་དུས་ཙུན་ མ་རེན་པ་ཆོ་ཝ་ཨ་དེན་གེ་ རོག་ཏེ་བ་ཀི་ རོ་ཀ་ཐུང་ཀ་ ག་དང་ཀེ་བེ་མར་བ༌ལ། 31ཨོ་ཉེ་རང་གི་ནེ་བུ་ སོ་ངོ་མང་ཀ་པོང་ཀེ་ མང་པུ་ཐུར་གི་ རོ་ཀ་དད་པ་ཨ་ཝ༌ལ། རོག་ཏེ་བ་ཀི་ ཡེག་པ་ལ་ ཧང་ཁིརིས་བྱོན་མ་ཀབ་ཉི་ ཨོ་ཐ་སོ་ངོ་གེ་ལག་ཉི་ རྫུ་འཕྲུལ་ག་རྟགས་མཚན་བ་ གེན་མེ་སྨོ་དག༌ཉི།
32ས་བ་སུ་བུ་ཨ་ཉི་ ཨུ་ཉུ་ད་བུ་ཆཱས་ཨ་ཝ་ག་ ཕ་རི་སི་པ་བ་ཀི་ ན་ཐ་ཝ༌ལ། ཉི་བླ་མ་ཆི་ལུ་བ་དང་ ཕ་རི་སི་པ་བ་ཀི་ རོག་ཙུང་མེ་དེན་གེ་ མཆོད་ཁང་ཁུང་ཁཱན་བ་ ཀུན་ཏི་ཝ༌ལ།
33ཉི་ཡི་ཤུ་གི་གསུངས་མ་ལ་ ཇང་ན་ཧ་བ་ཀབ་ཉི་ རེབ་ཀིན་ཐུར་ག་དེན་གེ་ཤ༌ཅ། ཉི་གེ་ ཇང་ཀུན་ཏི་ཁཱན་ག་བཱརང་ཀ་ཏཱན་ དི་ལེ་གི༌ལ། 34ན་ཤི་ཇང་ལ༌མེ། དག་པ་ཀབ་ཉི་ ན་ཤི་ཇང་མ་ཐོང༌མ། ཉི་ཇང་ཆོ་ས་ག་ ན་ཧ་བ་ཤེག་པེ་མར་བ་དག༌ཉི།
35ཡ་ཧུ་དི་པ་འགོ་དཔོན་བ་ཀི་ རོག་ཏེ་བ་ནང་དོ་ཡེག་པ་ལ་ ཨ་ཤི་མ་ཐོང་ས་ག་ ཨོ་ཐ་སོ་ངོ་ ཨོ་ག་ཏཱན་དི་ལེ་ མིག་པ་ཕིན་ཅ་གི་ས། ཨ་ཧ་སོ་ངོ་བ་ཏོར་ཉི་ གིརིག་བ་ཀ་པོང་ཀ་ཆོ་ཝ༌ཅ། ཧང་རོག་དིན་ཐཱན་ གིརིག་བ་ཀ་ ཡེ་ལེ་གི་ས། 36ན་ཤི་ཇང་ལ༌མེ། དག་པ་ཀབ་ཉི་ ན་ཤི་ཇང་མ་ཐོང༌མ། ཉི་ཇང་ཆོ་ས་ག་ ན་ཧ་བ་ཤེག་པེ་མར་བ་དག་ཉི་ ཡེག་ཁཱན་ཤོ་ ཧང་དག་པ་ཙ་རྩིས་གི་ས་དག༌ཉི༎
ཚེ་ག་རི།
37དུས་ཆེན་ག་ནོང་མཇུག་དུས་ཤོ་ ཐམས་ཅན་གེ་ ཁག་ཆི་ལུ་གི་ཝ༌ལ། ཉི་ཨོ་ཉ་ནོང་ཀ་ ཡི་ཤུ་ག་བཞེངས་ཐཱན་ གསུང་སྐད་ཆི་ལུ་ཨ་ཉི་ གསུངས་མ་ལ་ ཨི་བི་རི་ནང་སོ་ཕ་ཐུར་ ཇང་ཆོ་ས་ག་ ཨོ་ཕེ་ཁེ༌ལེ། 38ཉི་ཨི་བི་གི་ ཇ་ག་ཏཱན་ དད་པ་ཨ་ཝ་ཐུར་ ཨོ་ཉ་རི་ཇ་མེ་ཁེ༌ལེ། ཧང་ཡ་དག་ནེ་ལ་ གསུང་རབ་གེ་ཤོན་ཅ་ རོ་ཀ་ནང་ཀེ་ ཚེ་ག་རི་ཤོ་ལེ་དག༌ཉི། 39ཨུ་ཐུ་ཤོ་ རོ་ཀ་མཚན་ག་ དད་པ་ཨ་ཁཱན་བ་ཀི་ ཉོང་པེ་གི་ཁཱན་ དམ་པའི་ཐུགས་ཉིད་ག་ཀོར་གེ་ གསུངས་མ་ཆོ་ཝ༌ལ། ཨུ་ཉུ་གང་ཀ་ ཡི་ཤུ་གཟི་བརྗིད་ག་ཏཱན་ མ་བསྣམས་པ་ཨ་དེན་གེ་ ཐུགས་ཉིད་མ་གནང་མ་ཆོ་ཝ༌ལ།
40རོ་ཀ་གསུང་ཉཱན་ཁཱན་ སོ་ངོ་ཚེ་བང་གི་ ཡེག་པ་ལ་ རོག་གི་ནེ་ལ་ ཏེན་ཏེན་རང་ ལུང་བསྟན་པ་གི་ཝ་ལ་དག༌ཉི།
41ཉི་བཱརའ་སོ་ངོ་བ་ཀི་ ཡེག་པ་ལ་ རོག་ཤོ་ ཁིརིས་གི་ལ་དག༌ཉི། དག་པ་ཀབ་ཉི་ བཱརའ་ཚེ་བང་གི་ཡེག་པ་ལ་ ཁིརིས་ཤོ་ ཧང་ཏེན་ ག་ལིལ་གེ་བྱོན་མེ་ཡ་དག༌ཉི། 42ཁིརིས་ཤོ་ དཔོན་ད་ཝུད་ག་ མི་རྒྱུད་ཨོ་ཕེ། ཉི་རོག་ཤོ་ ད་ཝུད་ག་ཁྲོམ་ བེད་ལེ་ཧེམ་གེ་ འཁྲུངས་མེ་གི་ལ་དག་ཉི་ གསུང་རབ་ནང་ཀེ་ཤོན་ཅ་དག༌ཉི། 43ཨོ་ཐེན་ཨ་ཉི་ ཡི་ཤུ་ག་ཡོར་ཀེ་ སོ་ངོ་བ་ ཁ་མ་ཆ་མ་རི་ཝ༌ལ། 44ཚེ་བང་གི་ རོག་ཙུང་མེ་ག་ སེམས་ཨ་ཝ༌ལ། དག་པ་ཀབ་ཉི་ ཐུར་གི་རང་ རོ་ཀ་ཐུང་ཀ་ ག་དང་ཀེ་བེ་མར་བ༌ལ༎
ཡ་ཧུ་དི་པ་འགོ༌དཔོན༌བ༌ཀི་ དད་པ་མ་ཨ་ཝ༌ལ།
45ཇུ་ཀ་དག་པ་ཀབ་ཉི་ མཆོད་ཁང་ཁུང་ཁཱན་དམག་མི་བ་ བླ་མ་ཆི་ལུ་བ་དང་ ཕ་རི་སི་པ་བ་ཆོ་ས་ག་ཏཱན་ ལོག་ཉི་དི་ཝ༌ལ། ན་ཤི་ རོག་ནང་ཀ་ཏཱན་ ཧང་ཨ་ཉི་མ་ཕཱན་ཤི་ཡ་དག་ཉི་ བླ་མ་ཆི་ལུ་བ་དང་ ཕ་རི་སི་པ་བ་ཀི་ རོག་ཏེ་བ་ཀ་ ཇི་མ༌ལ།
46ཨོ་ཐ་སོ་ངོ་གི་ གསུངས་མ་ད་བུ་ཨ་ཉི་ ཐུར་གི་བུ་གསུངས་མ་ག་ ཨ་ཤི་ཐོང་མ་མཱན་ཅ་དག་ཉི་ དམག་མི་བ་ཀི་ཞུ་ཝ༌ལ།
47རོ་ཀི་ན་ཧ་བ་བུ་ ཡོང་བ་ཅོད་པ་སྨོ་དག་ཉི་ ཕ་རི་སི་པ་བ་ཀི་ རོག་ཏེ་བ་ཀ་ཇི་མ༌ལ། 48འགོ་དཔོན་བ་དང་ ཕ་རི་སི་པ་བ་ཐུར་ཕང་གི་ རོ་ཀ་ཏཱན་དད་པ་ཨ་ན་སྨོ། 49མ་ལ་ དག་པ་ཀབ་ཉི་ ཨོ་ཐ་སོ་ངོ་བ་ཀི་ མོ་ས་ག་བཀའ་ཁྲིམས་ མ་སེ་ཝ་ཨ་དེན་གེ་ རོག་ཏེ་བ་ཀ་ཐུང་ཀ་ དཀོན་མཆོག་ག་ཆདཔ་ཕོག་པ༌ཅ།
50ཕ་རི་སི་པ་བ་ཀ་པོང་ཀེ་ ནི་ཀོ་དེ་མཱས་གི་ གོ་མ་ ཡི་ཤུ་མཇལ་བེ་ག་ དི་ཝ་ཆོ་ཝ༌ལ། རོ་ཀི་བཱརའ་བ་ཀ་ཏཱན་ ཡེག་པ་ལ་ 51ཨ་ཧ་བཀའ་ཁྲིམས་དང་ཏུ་ཉི་ཨ་ནེ་ལ་ གོ་མ་རང་ སོ་ངོ་གེ་ཉཱན་ཐཱན་ རོ་ཀི་ཨ་ཁཱན་བ་ ཧ་མ་གོ་ཝ་སག་པུ་ ཨ་ཤི་ རོ་ཀ་ཁྲིམས་ཅཱད་པེ་མང་ཕ་དག༌ཉི།
52རོག་ཏེ་བ་ཀི་ རོ་ཀ་ཡེག་པ་ལ་ ནཱན་བུ་ ག་ལིལ་གེ་གི་ལ་སྨོ། ནཱན་གི་ གསུང་རབ་ནང་ཀ་ ལམ་ཉི་གོད༌ཅོ། ལུང་བསྟན་པ་ཤོ་ ག་ལིལ་གེ་ ཧ་ལ་རང་ འཁྲུངས་མ་མཱན་ཅ་དག༌ཉི།
53ཉི་གེ་ ཨོམ་ཏུར་ཨ་ཉི་ རོག་ཏེ་བ་ ཐམས་ཅན་རང་ རང་རང་ས་ཕའི་ག་ཏཱན་ དི་ཝ༌ལ༎#7:53 ཡུ་ཧན་ན་ 7༔53–8༔11 གེ་ཤོ་ཁཱན་ཁེ་པ་ ཐམས་ཅན་གེ་ མཱན་མ་ཆོ་ཁཱན་ པར་གཞི་ཡི་གུ་ག་ནང་ཀ་ (manuscript) མཱན་ཅ་གི་ཝ༌ལ།
Zur Zeit ausgewählt:
ཡུ་ཧན་ན། 7: TNTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tshangla New Testament
© 2023, The Bible Society of India
all rights reserved
