ལུ་ཀ། 22
22
གོག་ཉི་དི་ཝ་ག་དུས་ཆེན།
1ཉི་ཨོམ་ གོག་ཉི་དི་ཝ་དག་ཉི་ ཆིན་ཁཱན་ བི་ཏོ་མ་ཁཱན་ ཀེབ་ཏང་ག་དུས་ཆེན་#22:1 བི་ཏོ་མ་ཁཱན་ ཀེབ་ཏང་ག་ དུས་ཆེན་ཤོ་ གོག་ཉི་དི་ཝ་ག་དུས་ཆེན་གེ་ཏུ་ཉི་རང་ ངམ་ཟུམ་སག་པུ་ ཙིན་ཅ་གི༌ལ། གོག་ཉི་དི་ཝ་ག་དུས་ཆེན་གི་ དད་པ་ཨ་ཁཱན་བ་ སྡིག་པ་གེ་ཐར་ཉི་ ཐར་པ་ཉོང་པ་ཀོར་གེ་གེན༌ཅ། ཉི་བི་ཏོ་མ་ཁཱན་ ཀེབ་ཏང་ག་དུས་ཆེན་གི་ ཨ་ཧ་ཚེ་ཁེ་པ་ སྡིག་པ་དང་ ངན་པ་ཀབ་ཉི་ མ་ཡ་ལཱན་ ཡི་ཤུ་ཁིརིས་ག་ནང་ཀ་ སིང་མ་རི་ཝ་ཀོར་གེ་ གེན་ཅ་གི༌ལ།ཁེ་པ་ ར་ག་ཏེམ་པ་ཅ་གི་ཝ༌ལ། 2ཉི་བླ་མ་ཆི་ལུ་དང་ བཀའ་ཁྲིམས་ག་ སློབ་དཔོན་བ་ཀི་ ཡི་ཤུ་བཀྲོངས་མེ་ག་འཆར་གཞི་ ཙམ་ཅ་གི་ཝ༌ལ། དག་པ་ཀབ་ཉི་ རོག་ཏེ་བ་ སོ་ངོ་བ་ཀེ་ ཡོང་ཁེན་ཅ་གི་ཝ༌ལ༎
ཡ་ཧུ་ད་གི་ ཡི་ཤུ་ག་ མགུ་སྐོར་ཕི་ལེ་དག་ཉི་ ཁ་དོག་པ༌ལ།
3སྐུ་ཚབ་སོང་ཉིག་ཙིང་ག་པོང་ཀེ་ ཨིས་ཀ་རི་ཡོད་དག་ཁཱན་ ཡ་ཧུ་ད་ག་ནང་ཀ་ སེ་ཏཱན་ནུ་ཕ༌ལ། 4ཉི་རོག་ དིན་ཐཱན་ རོ་ཀི་ ཡི་ཤུ་ རོག་ཏེ་བ་ཀ་ཏཱན་ ཧང་ཏེན་སྤྲོད་པེ་གི་ལ་སྨོ་ ཨོ་ཉ་ཀོར་གེ་ བླ་མ་ཆི་ལུ་དང་ མཆོད་ཁང་ཁུང་ཁཱན་ སློབ་དཔོན་བ་ཀ་ ཡེག་པ༌ལ། 5ཉི་རོག་ཏེ་བ་ ཤོ་ནང་ཕེ་ཉི་ ཏི་རུ་བི་ལེ་ཨ་ཉི་ ཁ་ཙི་ཐ་ཝ༌ལ། 6ཉི་རོ་ཀི་ ཁ་དོག་ཉི་ སོ་ངོ་བ་མ་ལཱན་ ཆོ་ལ་ཀབ་ཉི་ རོ་ཀི་ ཡི་ཤུ་ རོག་ཏེ་བ་ཀ་ ག་དང་ག་ རྩིས་སྤྲོད་པེ་དེན་གེ་ གོ་སྐབས་ལེག་པུ་ཐུར་ ཉོང་ལ་སྨོ་ གོད་ཉི་ཆོ་ཝ༌ལ༎
གསོལཝ་མཇུག་དུས།
7ཉི་བི་ཏོ་མ་ཁཱན་ཀེབ་ཏང་ག་ ནོང་ཤེག་ཉི་ ཨོ་ཉ་ནོང་ཀ་ གོག་ཉི་དི་ཝ་ག་དུས་ཆེན་ བརྩི་སྲུང་ཨ་ལེ་དེན་གེ་ ཤི་ཤ་ཀ་ཏོང་ཤེ་ཉི་ མཆོད་པ་ཕུལ་བེ་ ཁེན་ཅ་གི་ཝ༌ལ། 8ཉི་ཡི་ཤུ་གི་ པ་ཏྲུས་དང་ ཡུ་ཧན་ན་ག་ དིན་ཐཱན་ གོག་ཉི་དི་ཁཱན་ག་ ཚོགས་ཅམ་ཅོ་དག་ཉི་ གསུངས་མ༌ལ།
9ཨ་ཤི་ ཨོ་ག་ཅམ་པེ་ཁེ་ལེ་ཡ་དག་ཉི་ རོག་ཉིག་ཙིང་གི་ ཞུ་ལ་ཀབ་ཉི་ 10ནའི་ཁྲོམ་ག་ནུ་ཕ་ཀབ་ཉི་ སོ་ངོ་ཐུར་གི་ ཏེ་ཀེ་ལིང་ག་ རི་བང་མེན་མ་ཨ་ཝ་ཁྲ༌པེ། རོག་ནུབ་ས་ག་ ཕའི་ནང་ཀ་ནུབ་ཐཱན་ 11ཕའི་ཡོན་ད་ག་ཡེག་ཅོ་ ཇང་ ཇ་ག་སློ་མ་བ་ཀབ་ཉི་ གོག་ཉི་དི་ཁཱན་ག་ཚོགས་ ཟ་ལེ་དེན་གེ་ མགྱོན་ཁྱིམ་ ཨོ་ག་ཅ་ཡ་ཨ་ཉི་ སློབ་དཔོན་གི་ ན་ག་གསུངས་ཆོ་ཝ་དག༌ཉི། 12ཉི་རོ་ཀི་ ཐོ་ལ་ཐོ་ཀ་ ཕའི་ནང་ཆི་ལུ་ཐུར་ ཧང་རང་ཕྲིག་ཀིན་ཨ་ཉི་ ཐ་ཝ་ཨ་ཝ་ཐུར་གེན༌མེ། ཉི་ཨོ་ཉ་ག་ ཅམ་ཅོ་ན་དག་ཉི་ གསུངས་མ༌ལ། 13ཉི་རོག་ཉིག་ཙིང་དི་ཉི་ ཧང་རང་ རོ་ཀི་ གསུངས་མ་ད་བུ་རང་ཁྲབ་ཉི་ གོག་ཉི་དི་ཝ་ག་དུས་ཆེན་ག་དེན་གེ་ ཅམ་པ༌ལ༎
གཙོ་བོ་ག་ཚོགས།
14ཉི་བཞེས་ལེ་ག་ དུས་ཙུན་རེན་པ་ཀབ་ཉི་ རོག་ རོ་ཀ་སྐུ་ཚབ་བ་ཀབ་ཉི་ དོང་ཏཱན་ག་ར་ག་ བཞུགས་པ༌ལ། 15ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཇང་དཀའ་ཝ་ མ་ཅཱད་པེ་གོ་མ་ ཨོ་ཐ་གོག་ཉི་དི་ཝ་ག་དུས་ཆེན་ ན་ཧ་བ་ཀབ་ཉི་ ཟ་ལེ་ག་ ཇ་ག་སེམས་ གནམ་མེད་ས་མེད༌ཅ། 16ཧང་ཡ་དག་ནེ་ལ་ ཇི་གི་ ན་ཧ་ཡེག་པེ་ དཀོན་མཆོག་ག་རྒྱལ་སྲིད་ག་ དེན་ཐ་མ་འགྲུབ་ཕ་སག་པུ་ ཇང་ལོག་ཉི་ མ་ཟ་ལ་དག༌ཉི།
17ཉི་བཞེས་ཆ་བུ་བསྣམས་ཉི་ བཀའ་དྲིན་བསམ་ཐཱན་ ཨུ་ཐུ་བུན་ཐཱན་ ན་ཧ་བ་ནང་དོ་བོང༌ཤོ། 18ཧང་ཡ་དག་ནེ་ལ་ ཨོ་ཐ་གེ་ག་ཏཱན་ དཀོན་མཆོག་ག་རྒྱལ་སྲིད་ མ་བྱོན་མ་སག་པུ་ ཇང་ཨོ་ཐ་སེ་ག་རི་ མ་ཇ་མ་ན་དག་ཉི་ གསུངས་མ༌ལ།
19ཉི་རོ་ཀི་ ཀེབ་ཏང་བསྣམས་ཉི་ སྨོན་ལམ་ཞུན་ཐཱན་ བིརིང་ཐཱན་ བོང་ཉི་ རོག་ཏེ་བ་ཀ་གནང་མ༌ལ། ཉི་རོ་ཀི་གསུངས་མ་ལ་ ཨུ་ཐུ་ཤོ་ ན་ཧ་དེན་གེ་བི་ཁཱན་ ཇ་ག་ལུས་པུ་གི༌ལ། ཇང་ཡིད་ཀ་ཨ་ལེ་དེན་གེ་ ཨུ་ཐུ་ད་བུ་ཨའི་ན་དག༌ཉི།
20བཞེས་ཉི་ཆུམ་དེན་གེ་ ཨུ་ཉུ་པུརུས་ཀིན་ཨ་ཉི་ བཞེས་ཆ་བསྣམས་ཉི་ ཨོ་ཐ་གུར་བུ་ཤོ་ ན་ཧ་དེན་གེ་ལུག་ཁཱན་ ཇ་ག་ཞི་ག་འགན་རྒྱ་སིང་མ་གི་ལ་ན་ དག་ཉི་གསུངས་མ༌ལ།
21དག་པ་ཀབ་ཉི་ གོད་ཅོ་ ཇང་ཤེ་ལེ་ག་སྤྲོད་ཁཱན་ག་དང་ ཇང་ཀབ་ཉི་ ཨོ་ཐ་དོང་ཏཱན་ཐུང་ཀ༌ཅ། 22སོ་ངོ་ག་ཟ་རང་ཏ་ རོ་ཀ་ཀོར་གེ་ གསུང་རབ་ནང་ཀ་ འབྲི་བ་པུརུས་ཀིན་ཨ་ཉི་ དིན༌ཅ། དག་པ་ཀབ་ཉི་ རོ་ཀ་མགུ་སྐོར་ཕི་ཁཱན་ སོ་ངོ་ཁེ་པ་ ཧབ་ཏུར་ ཀ་ལུ་ཨོ་ཕེ་ཡ་དག་ཉི་ གསུངས་མ༌ལ། 23ཉི་རོག་ཏེ་བ་ཀ་པོང་ཀེ་ ཨུ་ཉུ་ད་བུ་ཨ་ཁཱན་ ཨི་བི་གི་ས་ཨ་ཉི་ རོག་ཏེ་བ་ ཐུར་གི་ཐུར་ག་ ཇི་མེ་གོ་ཙུག་པ༌ལ༎
ཨི་བི་ཆི་ལུ་གི་ལ་ཡ་དག་ཉི་ ཤག་རུ་མ༌ལ།
24ཉི་རོག་ཏེ་བ་ཀེ་ཆི་ལུ་རང་ ཨི་བི་ཨོ་ཕེ་གི་ས་ཨ་ཉི་བུ་ རོག་ཏེ་བ་ནང་དོ་ ཤག་རུ་མ༌ལ། 25ཉི་རོ་ཀི་ རོག་ཏེ་བ་ཀ་ གསུངས་མ་ལ་ དད་པ་མ་ཨ་ཁཱན་བ་ཀ་ དཔོན་བ་ཀི་ཤོ་ སོ་ངོ་བ་ཀ་ཐུང་ཀེ་ དབང་ཚད་ཙུང་ཉི་ ཆོ་ལེ་གོད༌ཅ། ཉི་རོག་ཏེ་བ་ཀ་ ཐུང་ཀེ་ཆོ་ཁཱན་ འགོ་དཔོན་བ་ཀི་ཤ་ རོག་ཏེ་བ་ཤོ་ སོ་ངོ་བ་ཀ་ ལེག་པུ་ཨ་ཁཱན་ཨ་ཉི་ཆིན༌ཅ། 26དག་པ་ཀབ་ཉི་ ན་ཧ་བ་ཤོ་ ཨུ་ཉུ་ད་བུ་མང་གི་ཝ་ ལག་ཏང་ ན་ཧ་པོང་ཀེ་ ཆི་ལུ་ཤོ་ཁཱན་ཁེ་པ་ ཐམས་ཅན་གེ་ ཟེ་མུ་ད་བུ་ཐུར་ ཨོ་ཕེ་ཁེ༌ལེ། ཉི་འགོ་དཔོན་ཤོ་ གཡོག་པ་ད་བུ་ཐུར་ ཨོ་ཕེ་ཁེ༌ལེ། 27ཧང་ཡ་དག་ནེ་ལ་ ཨི་བི་ཆི་ལུ་གི་ལ་ཡ། རྐང་ཁྲི་ཐུང་ཀ་ལང་ཁཱན་ ཆི་ལུ་སྨོ། དྲང་ཁཱན་ཆི་ལུ་ཡ། རྐང་ཁྲི་ཐུང་ཀ་ལང་ཁཱན་རང་ ཆི་ལུ་མང་གི་སྨོ། དག་པ་ཀབ་ཉི་ ཇང་ན་ཧ་པོང་ཀ་ དྲང་ཁཱན་ཨ་ཉི༌ཅ།
28ན་ཧ་བ་ཤོ་ ཇང་ནང་དོག་པེ་གང་ཀ་ ཇང་ཀབ་ཉི་རང་ ཆོ་ཁཱན་བ་གི༌ལ། 29ཨོ་ཉི་ཨ་དེན་གེ་ ཇ་ག་ཨ་པ་གི་ རྒྱལ་སྲིད་དབང་པེ་ག་ ཇ་ག་གནང་མ་པུརུས་ཀིན་ཨ་ཉི་ ཇི་གི་བུ་ ན་ཧ་དབང་པེ་ག་ དབང་ཚད་བི༌ལེ། 30ན་ཧ་བ་ ཇ་ག་རྒྱལ་སྲིད་ག་ ཇ་ག་དོང་ཏཱན་ ཀོ་ལོ་ལོ་ལང་ཉི་ ཇང་ཀབ་ཉི་ ཟཱན་ཇ་མེ་དེན་གེ་དང་ གསེར་ཁྲི་ག་ལང་ཉི་ ཨིས་རེལ་ག་ མི་རིགས་སོང་ཉིག་ཙིང་ དབང་པེ་དེན་གེ་གི༌ལ༎
པ་ཏྲུས་གི་ ཁ་མ་དོག་པ་དག་ཉི་ ཡི་ཤུ་གི་གསུངས་མ༌ལ།
31སི་མོན་ སི་མོན་ བོང་ཧོམ་གེ་ སོ་སུ་སོ་སུ་ཨ་ཉི་ པེ་བ་པུརུས་ཀིན་ཨ་ཉི་ པེ་བེ་དེན་གེ་ སེ་ཏཱན་གི་ ནཱན་ཚཱས་པེ་དང་། 32དག་པ་ཀབ་ཉི་ ན་ག་དད་པ་ མ་འགྱུར་བེ་དེན་གེ་ ཇི་གི་ ན་ག་དེན་གེ་ སྨོན་ལམ་ཏ་པ༌ཅ། ཧང་ཡ་དག་ནེ་ལ་ ནཱན་ལོག་ཏེན་གེ་ ན་ག་ཡུང་ཟི་བ་ དོ་རི་རི་ཅོད་པེ་ཁེ་ལེ་དག༌ཉི།
33ཉི་པ་ཏྲུས་གི་ ཡི་ཤུ་ག་ཞུ་ཝ་ལ་ གཙོ་བོ་ ཇང་ནཱན་ཀབ་ཉི་ བཙོན་ག་དི་ལེ་ག་ གྲ་སྒྲིག་ཅ་ ཉི་ཤི་ལེ་བུ་རེ་བེ་དག༌ཉི།
34རོ་ཀི་གསུངས་མ་ལ་ ཇི་གི་ ན་ག་ཡེག་པེ་ པ་ཏྲུས་ ནཱན་གི་ ཇང་གུམ་མ་ཡེ་ལ་ཨ་ཉི་ ཤེབ་སམ་མ་ཡེག་པེ་གོ་མ་ ཐི་ནོང་ གོ་ག་མ་ཇིག་པ་དག༌ཉི༎
པ་ཀོ་ དོ་ཕ་ཙ་དང་ཁ་ཅི།
35ཉི་རོ་ཀི་ རོག་ཏེ་བ་ཀ་ ཇི་གི་ ན་ཧ་བ་ ཏི་རུ་དང་དོ་ཕ་ཙ་ ཉི་བི་དར་ཨོ་ཉ་བ་ མ་བི་ལཱན་ ཀུན་ཏི་ལ་ཀབ་ཉི་ ན་ཧ་བ་ ཧང་གེ་ཀོན་མ་ཡ་དག་ཉི་ གསུངས་མ་ཀབ་ཉི་ མ་ལ་ ཧང་གེ་རང་ མ་ཀོན་ཤི་དག་ཉི་ ཞུ་ཝ༌ལ།
36རོ་ཀི་ རོག་ཏེ་བ་ཀ་ གསུངས་མ་ལ་ དག་པ་ཀབ་ཉི་ ཨོམ་གི་ནེ་ལ་ ཏི་རུ་ ཨི་བི་ག་ཆོ་ཝ་ཐུར་ བུ་ལེ་ཁེ༌ལེ། ཉི་ཨུ་ཉུ་པུརུས་ཀིན་ཨ་ཉི་ དོ་ཕ་ཙ་བུ་ བུ་ལེ་ཁེ༌ལེ། ཉི་ཆོ་ཝང་མ་ཁཱན་གི་ ཁ་མུང་ཙོང་ཐཱན་ ཐུར་ངོ་ལེ་ཁེ༌ལེ། 37ཧང་ཡ་དག་ནེ་ལ་ གསུང་རབ་གེ་ རོག་ཁྲིམས་པ་ཙི་ཉི་ ཤེ་ལེ་#22:37 ཡ་ཤའི་ཡ་ག་དཔེ་ཆ་ 53:12 དག་ཉི་ ཤོ་ཁཱན་ཁེ་པ་ དེན་ཐ་འགྲུབ་ཕེ་ ཅམ་པ་ཅ་དག༌ཉི།
38ཉི་རོག་ཏེ་བ་ཀི་ གཟིགས་ཅོ་ གཙོ་བོ་ ཨོ་ཐ་ག་ གི་རིང་ཉིག་ཙིང་ལ་ཨ་ཉི་ ཞུ་ལ་ཀབ་ཉི་ རོ་ཀི་ རོག་ཏེ་བ་ཀ་ གསུངས་མ་ལ་ ཨོ་ཐ་ཆཱས་ཨོབ་ཏུར་གི་དྲིག་པ་ཨ་ཉི་ཐའི་དག༌ཉི༎
ཨོ་ལིབ་ཤིང་ཕུ་ག་ ཡི་ཤུ་གི་ སྨོན་ལམ་ཏ་པ༌ལ།
39ཉི་རོག་ཕིས་ཀ་ཤོན་ཐཱན་ རོ་ཀ་ལུགས་སྲོལ་དང་ཏུ་ཉི་ ཨོ་ལིབ་ཤིང་ཕུ་ག་ཏཱན་ བྱོན་མ༌ལ། ཉི་རོ་ཀ་སློ་མ་བ་ རོ་ཀ་ཕྱག་ཞུ་ཉི་ དི་ཝ༌ལ། 40ཉི་རོག་ རོག་ཏེ་བ་ཆོ་ས་ག་ ཕེབས་ཏེན་གེ་ ན་ཧ་ཐུང་ཀ་ བར་ཆད་མ་ཇུང་མེ་དེན་གེ་ སྨོན་ལམ་ཏབ་ཅོ་དག་ཉི་ གསུངས་མ༌ལ།
41ཉི་རོག་ རོག་ཏེ་བ་ཀེ་ ལུ་ཤི་ཕི་ལ་ཀབ་ཉི་ ཤེག་ས་དོབ་ཏང་ག་ བྱོན་ཐཱན་ ཏོང་ཟིང་ས་ག་ཏེས་ཉི་ ཨོ་ཐེན་ སྨོན་ལམ་ཏ་པ༌ལ། 42ཨ་པ་ ན་ག་ཐུགས་ཆོ་ནེ་ལ་ ཨོ་ཐ་དཀའ་ཝ་ཅཱད་པེ་ཁེ་ཁཱན་ གུར་བུ་ ཇང་གེ་བསྣམས༌ཅོ། དག་པ་ཀབ་ཉི་ ཏ་ཀ་མཱན་ཅ་ ཇི་གི་མི་ཁཱན་མང་གི་ཝ་ ན་ག་ཐུགས་དང་ཏུ་ཉི་ ཇུང་ཆེན་དག་ཉི་ ཞུ་ཝ༌ལ། 43རོ་ཀ་ཐུགས་དོ་རི་རི་ ཅོད་པེ་དེན་གེ་ ཞིང་ཁམས་གེ་དོང་ ཞིང་ཁམས་ག་འཐེན་པ་ ཕེབས་པ༌ལ། 44ཉི་ཐུགས་དོགས་པ་ཨ་དེན་གེ་ རོ་ཀི་སྨོན་ལམ་ལག་ཏང་ སེམས་ཤོ་ཉི་ ཞུ་ཝ༌ལ། ཉི་རོ་ཀ་ ཤུབ་ཏང་ཁེ་པ་ ཞི་ཁག་ཏང་ཁག་ཏང་ཨ་ཉི་ ཤོ་ཝ་པུརུས་ཀིན་ཨ་ཉི་ ཤོ་ཝ༌ལ།
45ཉི་རོག་ སྨོན་ལམ་གེ་བཞེངས་ཐཱན་ རོ་ཀ་སློ་མ་བ་ཆོ་ས་ག་ ཕེབས་ཉི་ གཟིགས་པ་ཀབ་ཉི་ རོག་ཏེ་བ་ སྡུག་བསྔལ་ཁེ་ཉི་ ཆཱད་པ་ཨ་དེན་གེ་ ཡི་ཕ་ཁྲ་པ༌ལ། 46ཉི་རོ་ཀི་ རོག་ཏེ་བ་ཀ་ གསུངས་མ་ལ་ ན་ཧ་བ་ ཧང་ཨ་ཉི་ ཡིབ་ཅ་ཡ། ཝུན་ཐཱན་ ན་ཧ་ཐུང་ཀ་ བར་ཆད་མ་ཇུང་མེ་དེན་གེ་ སྨོན་ལམ་ཏབ་ཅོ་དག༌ཉི༎
ཡི་ཤུ་ཙུང་མ༌ལ།
47རོ་ཀི་གསུངས་ཉི་ མ་ཆུ་མེ་གོ་མ་ སྐུ་ཚབ་སོང་ཉིག་ཙིང་ག་པོང་ཀེ་ ཡ་ཧུ་ད་དག་ཁཱན་གི་ སོ་ངོ་མང་པུ་ཐུར་ རིག་ཉི་ཤེག་པ༌ལ། ཉི་རོ་ཀི་ ཡི་ཤུ་ག་ ཅུབ་ཨ་ལེ་དེན་གེ་ རོ་ཀ་སྐུན་མདུན་ག་ ཤེག་པ༌ལ། 48དག་པ་ཀབ་ཉི་ ཡི་ཤུ་གི་ རོ་ཀ་གསུངས་མ་ལ་ ཡ་ཧུ་ད་ ནཱན་གི་ཅུབ་ཨ་ཉི་ སོ་ངོ་ག་ཟ་ག་ མགུ་སྐོར་ཕིན་ཅ་སྨོ་དག༌ཉི།
49ཉི་རོག་ཀབ་ཉི་ཆོ་ཁཱན་བ་ཀི་ ཧང་ཇུང་མེ་གི་ལ་སྨོ་སེ་ཉི་ ཞུ་ཝ་ལ་ གཙོ་བོ་ ཨ་ཤི་གི་རིང་ཤོ་ཉི་ ལག་རུམ་ཤོ་སྨོ་དག༌ཉི། 50ཉི་རོག་ཏེ་བ་ཀ་པོང་ཀེ་ ཐུར་གི་ བླ་མ་གོང་མ་ག་ གཡོག་པ་ཐུར་ག་ ལ་ཉོང་ལོ་ཀ་ ན་ཅཱད་ཉི་གེ་མ༌ལ།
51དག་པ་ཀབ་ཉི་ ཡི་ཤུ་གི་ ཨོ་ཐ་གེ་ལག་ཉི་ མ་ཨའི་ཨ་ཉི་ གསུངས་ཐཱན་ རོ་ཀ་ཕྱག་ཀི་ཨ་ཉི་ ན་ག་ཐོབ་ཉི་ དྲག་གནང་མ༌ལ།
52ཉི་ཡི་ཤུ་གི་ རོག་ཙུང་མེ་ཨུ་ཁཱན་ བླ་མ་ཆི་ལུ་བ་དང་ མཆོད་ཁང་ཁུང་ཁཱན་ འགོ་དཔོན་བ་ ཉི་ཡ་ཧུ་དི་པ་ སོ་ངོ་ཆི་ལུ་བ་ཀ་ གསུངས་མ་ལ་ ཇང་ཁྲིམས་པ་ གི་ཝ་པུརུས་ཀིན་ཨ་ཉི་ ན་ཧ་བ་ མཚོན་ཆ་དང་ ཏོ་ཀང་ཨོ་ཉ་བ་ཕ་ཉི་རང་ ཨོ་ཕེ་ཁེ་ཝ་སྨོ། 53ཇང་ནོང་དྲང་རང་ ན་ཧ་བ་ཀབ་ཉི་ མཆོད་ཁང་ནང་ཀ་ ཆོ་ལ་ཀབ་ཉི་ ན་ཤི་ ན་ཧ་ག་དང་ ཇ་ག་ཐུང་ཀ་མ་ཀེན་ཤི། མ་པ་ ཨུ་ཐུ་ཤོ་ མེར་བུ་ག་དབང་ཚད་དང་ ན་ཧ་དུས་གི་ལ་དག༌ཉི༎
པ་ཏྲུས་གི་ ཡི་ཤུ་གུམ་མ་ཡེ་ལ་དག་ཉི་ ཡེག་པ༌ལ།
54ཉི་རོག་ རོག་ཏེ་བ་ཀི་ཙུང་ཐཱན་ བླ་མ་གོང་མ་ག་ ཕའི་ནང་ཀ་ཏཱན་ བུ་ཝ༌ལ། ཉི་པ་ཏྲུས་གི་ ཇང་ཀིན་གེ་ཨ་ཉི་ ཚིང་ཁོན་མ༌ལ། 55ཉི་རོག་ཏེ་བ་ཀི་ ཕའི་གུབ་ཀ་ཝུང་བར་ཀ་ མི་སིང་ཐཱན་ ཏབ་ཐུར་ལང་མ་ཀབ་ཉི་ པ་ཏྲུས་བུ་ རོག་ཏེ་བ་ཀ་ དྲེ་ཀ་ལང་མ༌ལ། 56ཉི་གཡོག་ཨ་ཁཱན་ གཡོག་མིན་གི་ རོག་མི་གོམ་ཉི་ ཆོ་ཝ་ག་ཐོང་ཉི་ རོ་ཀ་ཏཱན་ལེག་པ་རང་ གོད་ཐཱན་ ཡེག་པ་ལ་ ཨོ་ཐ་སོ་ངོ་བུ་ ཡི་ཤུ་ཀབ་ཉི་ཆོ་ཝ་དག༌ཉི།
57དག་པ་ཀབ་ཉི་ རོ་ཀི་ ཨུ་ས་ ཇི་གི་ རོག་གུམ་རང་ མ་ཡེ་ལ་དག་ཉི་ཡེག་ཉི་ ཁ་མ་དོག་པ༌ལ།
58ཉི་རེབ་ཀིན་ཐུར་ག་ཚི་ངེ་ བཱརའ་ཐུར་གི་ རོག་ཐོང་ཉི་ རོ་ཀ་ཡེག་པ་ལ་ ནཱན་བུ་ རོག་ཏེ་བ་ཀ་པོང་ཀེ་ ཐུར་གི་ལ་དག༌ཉི།
དག་པ་ཀབ་ཉི་ པ་ཏྲུས་གི་ ཀོ་ཏ་ ཇང་མང་གི་དག་ཉི་ ཡེག་པ༌ལ།
59ཉི་གཱན་དྲ་ཐུར་ཕང་ག་ཚི་ངེ་ ཨོམ་ཆང་ བཱརའ་ཐུར་གི་བུ་ ཡེག་པ་ལ་ ཨོ་ཐ་སོ་ངོ་ ཏེན་ཏེན་རང་ ཡི་ཤུ་ཀབ་ཉི་ཆོ༌ཝ། ཧང་ཡ་དག་ནེ་ལ་ དཱན་བུ་ ག་ལིལ་པ་གི་ལ་དག༌ཉི།
60དག་པ་ཀབ་ཉི་ པ་ཏྲུས་གི་ཡེག་པ་ལ་ ཀོ་ཏ་ ནཱན་གི་ ཧང་ཡེག་ཅ་གི་ལ་སྨོ་ ཇི་གི་ལ་ ཧ་གོ་ལུ་མ་ལ་དག༌ཉི། ཨོ་ཉི་ཆོ་ལ་རང་ རོ་ཀི་ཡེག་ཉི་ མ་ཆུ་མེ་གོ་མ་ གོ་ག་ཇིག་པ༌ལ།
61ཉི་གཙོ་བོ་གི་གིར་ཐཱན་ པ་ཏྲུས་ག་ གཟིགས་པ༌ལ། ཉི་པ་ཏྲུས་གི་ གཙོ་བོ་གི་ གསུངས་ཁཱན་ཁེ་པ་ ཡིད་ཀ་ཨ་ཝ༌ལ། རོ་ཀི་གསུངས་མ་ཆོ་ཝ་ལ་ ཐི་ནོང་ གོ་ག་མ་ཇིག་པེ་གོ་མ་ ནཱན་གི་ ཇང་གུམ་མ་ཡེ་ལ་ཨ་ཉི་ ཤེབ་སམ་ཡེག་པེ་དག༌ཉི། 62ཉི་རོག་ ཕིས་ཀ་ཤོན་ཇོང་ཐཱན་ གནམ་མེད་ས་མེད་ སེམས་ཤོག་ཉི་ གེ་ཕ༌ལ༎
དམག་མི་བ་ཀི་ ཡི་ཤུ་ག་མེམ་ཅོར་ཐཱན་ ཀོང་མ༌ལ།
63ཉི་ཨོམ་ ཡི་ཤུ་ཁུང་ཁཱན་ སོ་ངོ་བ་ཀི་ རོ་ཀ་སྐུར་པ་ཞུ་ཉི་ ཉི་གེ་ ཀོང་མ༌ལ། 64ཨུ་ཉུ་མ་ཚཱད་པ་ རོག་ཏེ་བ་ཀི་ རོ་ཀ་སྤྱན་བུག་ཐཱན་ ནཱན་ཨི་བི་གི་ ཀོང་མ་ཡ་ ཡེག་ཅོ་དག་ཉི་ ཞུ་ཝ༌ལ། 65ཉི་རོག་ཏེ་བ་ཀི་ བཱརའ་ཆཱས་བུ་མང་པུ་ཐུར་ མ་ལེག་པ་ཡེག་ཉི་ རོ་ཀ་སྐུར་པ་ཞུ་ཝ༌ལ༎
ཡི་ཤུ་ ཚོགས་པ་ཆི་ལུ་བ་ཀ་གུབ་ཀ།
66ཉི་ནོང་ཤེག་ཏེན་གེ་ ཡ་ཧུ་དི་པ་སོ་ངོ་ཆི་ལུ་བ་དང་ བླ་མ་ཆི་ལུ་བ་ ཉི་བཀའ་ཁྲིམས་ག་ སློབ་དཔོན་བ་ ཏབ་ཐུར་ཛོམ་ཉི་ ཉི་ཡི་ཤུ་ རོག་ཏེ་བ་ཀི་ ཚོགས་པ་ཆི་ལུ་བ་ཀ་གུབ་ཀ་ ཀེན་ཐཱན་ཡེག་པ་ལ་ 67ནཱན་ཁིརིས་གི་ནེ་ལ་ ཨ་ཧ་ཡེག་ཅོ་དག༌ཉི།
དག་པ་ཀབ་ཉི་ རོ་ཀི་ རོག་ཏེ་བ་ཀ་ གསུངས་མ་ལ་ ཇི་གི་ཡེག་ནེ་ལ་ ན་ཤི་ལོ་མ་དི༌ལ། 68ཉི་ཇི་གི་ ན་ཧ་ཇིམ་ནེ་ལ་ ན་ཤི་ལན་མ་ག༌ལ། 69དག་པ་ཀབ་ཉི་ ཨོ་ཐ་གེ་ག་ཏཱན་ སོ་ངོ་ག་ཟ་ དཀོན་མཆོག་ག་དབང་ག་ ལ་ཉོང་ལོ་ཀ་ཁྲི་ག་ ལང་མེ་དག༌ཉི།
70ཉི་རོག་ཏེ་ ཐམས་ཅན་གི་ ཡེག་པ་ལ་ ཉི་ལ་ ནཱན་དཀོན་མཆོག་ག་ སྲས་གི་ལ་སྨོ་དག༌ཉི།
ཉི་རོ་ཀི་ རོག་ཏེ་བ་ཀ་ གསུངས་མ་ལ་ ཇང་གི་ལ་ཨ་ཉི་ ན་ཤི་རང་ཡེག་ལ་དག༌ཉི།
71ཉི་རོག་ཏེ་ ཐམས་ཅན་གི་ ཡེག་པ་ལ་ ཨོམ་བཱརའ་ཚིག་ ཧང་ཤ་ཚཱས་པེ་ཡ། ད་ག་ནོ་ཝང་གེ་ཤོ་ཝ་ག་ ཨའི་ཨའི་ཏེན་ག་ ན་གི་ཐ་ཝ་དག༌ཉི༎
Zur Zeit ausgewählt:
ལུ་ཀ། 22: TNTB
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Tshangla New Testament
© 2023, The Bible Society of India
all rights reserved