मति 14
14
बप्तिस्मा देलाहर युहन्नाक मृत्यु
(मरकुस ६:१४-२९; लुका ९:७-९)
1उअ समयमा गालिल परदेसक सासक हेरोद येसुजिक बारेमा सुनलिय। 2उअ यापन दरबरवाक मन्सावानिके कहलिय, “इअ त बप्तिस्मा देलाहर युहन्नाहिँ हखिय। जुने मरलिसे जियल बडिय। उहेसे त इअ यसनुक सक्तिसालि कामसभ करइ बडिय।”
3केहकेकि हेरोद रजवा, यापन भयवा फिलिपक जनियावाक, कारनसे युहन्नाके पकडके बान्हके झ्यालखनवामा थुनदेले रहलिय।#लुका ३:१९-२० 4केहकेकि युहन्ना हेरोदके यसके कहते याइल रहलिय कि, “यपनहुँ यापन भयवाक जनियावाके बियाह करेके ठिक हइने हखइ।”#लेवि १८:१६; २०:२१ 5उहेसे हेरोद युहन्नाके मारे खोजइ रहलिय। बाकि हेरोद मन्सावानिसे डेरइय, केहकेकि हुनुका युहन्नाके अगमवक्ता हखिय कहके मनइ।
6जब हेरोद रजवाक जनम दिन यलइ, हेरोदियसक बेटिया जम्मे जनक यागा नाचके हेरोदके खाँ खुसि बनोलिय। 7उहेसे उअ किरिया खइते कहलिय, “तुइ जथि मङले फेनि मुइ तोरके देबहि।” 8तब उअ छउडिया यापन दाओक सिखोलि नहिँया यसके कहलिय, “बप्तिस्मा देलाहर युहन्नाक मुडिया यखनहिँ छिपवामा दे।” 9इअ बतवा सुनके हेरोद खाँ दुःखित भेलिय, बाकि हेरोद बहुत जन पहुनाक यागा किरिया खइलेसे वकर माङ पुरा कर देह कहके आग्या देलिय। 10उहेसे उअ झ्यालखनवामा युहन्नाक मुडिया काटेके आग्या देलिय। 11युहन्नाक मुडिया छिपवामा राखके यनलइ हसे उअ छउडियाके दियलइ। तब उअ लिगाके यापन दाओके देलिय। 12वकरपाछा युहन्नाक चेलवाह याके वकर देहिया लिगाके गाडदेलइ हसे हुनुका जाके येसुजिके खबर देलइ।
येसुजि पाँच हजार मन्सेसभके खियोलसि
(मरकुस ६:३०-४४; लुका ९:१०-१७; युहन्ना ६:१-१४)
13जब येसुजि इअ बतवा सुनलसि, हुने डोङवामा चढके सुनसान ठउरिमा गेलसि। हुने जाइबडसि कहके थाह पउलेपर मन्सावाह सहरवासभसे निकडके पइदले हुनेक पाछा लगलइ। 14येसुजि डोङवासे नभइकि मन्सेक जबड भिड देखलसि। उअ भिडवाके देखके येसुजिक सोग लगलइ हसे वहवाँ भेलि मनियइलि मन्सावानिके डउल बनोलसि।
15साँझ भेलेपर चेलवाह हुनेक लघिना याके यसके कहलइ, “इअ त सुनसान ठउरि हखइ हसे साँझ भेसकलइ। याबे इअ मन्सावानिके बिदा देहुँ, ताकि हिनिका गउँवामा जाके किहो खइना चिजु किनके खाइ।” 16बाकि येसुजि हुनुकाके कहलसि, “हिनिकाके कहवहुँ पठावे नाहिँ परतइ, तोहराहिँ हुनुकाके किहो खइना चिजु देह।” 17तब चेलवाह हुनेके कहलइ, “हमारसाङे पाँच गो रोटि हसे दु गो माछर मतरे बडइ।” 18तब येसुजि हुनुकाके कहलसि, “उअ मोर लघिना यनह त।”
19येसुजि मन्सावानिके घसवा वपरा बइठे कहलसि। वकरपाछा पाँच गो रोटिया हसे दु गो मछरिया लेके स्वरगवरि हेरके परमेस्वरके धन्यवाद देलसि। हुने रोटिया खाडा-खाडा बनाके चेलवानिके देलसि हसे चेलवाह लिगाके मन्सावानिके बाँट देलइ। 20हुनुका जम्मे जन यघाइलइ खेलइ हसे चेलवाह उबरलि खडवा बारह ढकिया उठोलइ। 21वहवाँ जनियानि हसे छोकनिसभके छाडके, खेलहर मधे मरदाना मन्से मतरे पाँच हजार जन रहलइ।
येसुजि पनिया वपरा बुललसि
(मरकुस ६:४५-५६; युहन्ना ६:१५-२१)
22येसुजि भिडवाके बिदा देलेपर यापन चेलवानिके डोङवामा चढाके यापनसे यागा तलवाक वाहिकरवा जाए लगोलसि। 23हुनुकाके बिदा देलेपर हुने यसकरे पहडावामा परथाना करे गेलसि। जब साँझ भेलइ हुने वहवाँ यसकरे रहलसि। 24तखनहिँ डोङवा तिरवासे बहुत तनाउ पुगल रहलिय। बयरवा उल्टावरिसे बहलेसे मचलवा डोङवाके यतेवते डिङोइ रहलिय। 25धुसमुसहि बिहनाक तिन बजेवरि येसुजि तलवामा बुल्ते चेलवानिक लघिना यलसि। 26हुनेके पनिया वपरा बुल्ते यवइकि देखके हुनुका डेराके, “इअ त भुत हखिय!” कहके चिलेलइ। 27बाकि येसुजि वइघरहिँ कहलसि, “साहास करह! मोहिँ हखहि, झिन डेराह।”
28इअ सुनके पतरुस कहलिय, “प्रभुजि, यगर यपनहुँ हखहुँ जउँ, मोरके पनिया वपरा बुल्ते यपनहुँ लघिना यावेके आग्या देहुँ।” 29येसुजि कहलसि, “याउ।” तब पतरुस डोङवासे नभलिय हसे पनिया वपरा बुल्ते येसुजिवरि यलिय। 30बाकि जबडे धुधुइ-बयार चलइकि देखके उअ डेरेलिय हसे डुबे लगलिय। तब उअ चिल्लाके कहलिय, “हे प्रभु, मोरके बचोहुँ!” 31येसुजि वइघरहिँ यापन हथवा बढाके पतरुसके पकडके कहलसि, “अरे इचिके विस्वास भेल मन्से, केहके सक करलहि?” 32जब येसुजि हसे पतरुस डोङवामा चढलइ, धुधुइ-बयरवा रोकेलिय, 33हसे डोङवामा भेलि चेलवाह हुनेक आराधना करते यसके कहलइ, “सदियो यपनहुँ परमेस्वरक पुतर हखहुँ!”
34जब हुनुका तलवाक वाहिकरवा गनेसरेत कहल ठउरियामा पुगलइ। 35तब उअ ठउरियाक मरदनवा मन्सावाह हुनेके चिनलइ। हुनुका उअ जम्मे छेतरवामा समाद पुगादेलइ हसे हुनुका जम्मे मनियइलि मन्सावानिके येसुजिक लघिना यनलइ, 36हसे येसुजिके “इअ मनियइलि मन्सावानिके यपनहुँक लुगवाक कोनहरवा मतरे छुए देहुँ” कहके बिन्ति करलइ। जतेक जन हुनेक लुगवा छुलइ, हुनुका डउल भेलइ।
Zur Zeit ausgewählt:
मति 14: CTHR
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, Wycliffe Bible Translators, Inc. and Nepal Bible Society