मत्ति 1
1
इसु ख्रिस्टको खालगेलाइ
(लुका ३:२३-३८)
1इसु ख्रिस्ट आब्राहाम रो दाउद खालको हिघाखे। इता इसु ख्रिस्टको आजुखालको मिङ इसिका हि: 2आब्राहामको चान इसहाक हिघाखे। इसहाकको चान याकुब, याकुबको चानगेलाइ यहुदाको वाको दादाओनेगेलाइ हिघाखे। 3यहुदाको तामारपाहाको चानगेलाइ फारेस रो जाहेर हिघाखे। फारेसको चान हेस्रोन, हेस्रोनको चान आराम, 4आरामको चान अम्मिनादाब, अम्मिनादाबको चान नहसोन, नहसोनको चान सल्मोन, 5सल्मोनको राहाबपाहाको चान बोअज हिघाखे। बोअजको रुथपाहाको चान ओबेद, ओबेदको चान यिसै 6रो यिसैको चान राजा दाउद हिघाखे। दाउदको चान सोलोमन हिघाखे। सोलोमनको आमाइ उरियाहको बेअ् हिघाखे।#२ राजा २४:१४-१५; २ इतिहास ३६:१०; यर्मिया २७:२०
7सोलोमनको चान रहबाम, रहबामको चान अबिया, अबियाको चान आसा, 8आसाको चान यहोसापात, यहोसापातको चान यहोराम, यहोरामको चान उज्जियाह, 9उज्जियाहको चान योताम, योतामको चान आहाज, आहाजको चान हिजकिया, 10हिजकियाको चान मनस्से, मनस्सेको चान आमोन रो आमोनको चान योसियाह हिघाखे। 11योसियाहको चान यकोनियास रो इङकोको ओनेगेलाइ बुङ हिघाखे। एम्बालाइ बेबिलोनता यहुदिगेलाइहेङ रिमतेङ चुमपुका पहरलाम्फा जोलोमजेङका हिघाखे।
12बेबिलोनता रिम्तेङ चुमपुन्हाकान्हुअ्सो: यकोनियासको चान सालतिएल जोलोम जेङहि, सालतिएलको चान यरुबाबेल, 13यरुबाबेलको चान अबिउद, अबिउदको चान एल्याकिम, एल्याकिमको चान आजोर, 14आजोरको चान सादोक, सादोकको चान आखिम, आखिमको चान एलिउद, 15एलिउदको चान एलाजार, एलाजारको चान मत्तान, मत्तानको चान याकुब, 16याकुबको चान योसेफ जेङहि। योसेफचाहिँ इसु ख्रिस्टको आमाइ मरियमको केअ् हिघाखे। इदोङ मरियम ख्रिस्ट दोअ्का इसुहेङ जोलोमपिहि।
17एसापा आब्राहामसो दाउदथिकापा तेद्या खाल जेङखे रो दाउदसो इस्राएलिगेलाइ बेबिलोनता चुमपुका पहरथिकापा तेद्या खाल दोङ जेङखे। कालाउ इङको पहरसो ख्रिस्ट जोलोमजेङका पहरथिकापा आरोङ तेद्या खाल दोङ जेङलि लोखे।
इसु ख्रिस्टको जोलोम
(लुका २:१-७)
18इसु ख्रिस्टको जोलोम एसापा जेङहिः वाको आमाइ मरियमको योसेफदोफा बिहु जेङका काथा पालिदोका हिघाहि। ओबालाइको बिहु जेङकाखान्तेङ लाम्फा मरियम पुनित हाङसासो न्हेजिउको जेङका हिघाहि।#लुका १:२७ 19योसेफ धरमाति द्याङ हिघाखे। एन्सा जेङलाउ वा द्याङको आगाता मरियमहेङ मारेम्का माज्याको दोअ्तेङ सिपापा लाअ्लि निधो पाहि। 20इसिका निधो पातेङहिलाउ परमप्रभुको सादेलचर वाको सोपोन्दाता देखाल पितेङ एसा दोअ्हि, “दाउदको खाल योसेफ, ना मरियमहेङ चुमालि माथि, हाइदोनु जाइ वाको हेमुङता हि, वा पुनित हाङसासो हि। 21इङको एलोङ चान जोन्मायावा रो ना इङकोको मिङ इसु ताअ्ताना, हाइदोनु वा ताइको द्याङगेलाइहेङ एम्बालाइको कुकरमसो सिन्हुपावा।”#लुका १:३१
22परमेस्वरसो आगाधुइकासो परमप्रभुको धुइका कथन पोङघालि दोङ इदोइ गोताङ जेङका एइ: 23“खाङ, बिहुमाजेङका बेजान न्हेजिउ जेनावा, वा एलोङ चान जोलोमजेनावा, वाको मिङ इम्मानुएल ताअ्तावा” जाइको माने “परमेस्वर केलाइदोफा” जेङखे।#यसैया ७:१४
24कालाउ योसेफ निन्धासो नाङघाहि रो सादेलचर वासेहेङ दोअ्काभाइपा वा मरियमहेङ ताइको बेअ् दोअ्तेङ र्हुहि। 25कालाउ बुङ मरियम चान जोलोम माजेम्पाधाउ योसेफ वाकोदोफा माजिम्हि। मरियम चान जोलोमजेङकान्हुअ्सो योसेफ इङको जामालको मिङ इसु ताअ्हि।#लुका २:२१
Zur Zeit ausgewählt:
मत्ति 1: DHIM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2024 (Active), Wycliffe Bible Translators, Inc. All rights reserved.